Marcos 16
16
Jesús baísquia
(Mt 28.1-10; Lc 24.1-12; Jn 20.1-10)
1Anun ñu mëëtima nëtë ñantabucëbëtan ca María Magdalena ꞌimainun Salomé ꞌimainun María itsi, Jacobonën tita, acaman anúan Jesús imë́ishi ꞌaí cuanti, sanu ro maruacëxa. 2Maruonx ca pëcaracëbëa bari urucëma ꞌaínshi anua Jesús mëníoëxancënu cuantëcëancëxa. 3Cuani ca ësai canancëxa:
—¿Uin cara anun quini xëpucë mapara nu racanaxunti ꞌic?
4Usai cananquiani cuanx niracëquinbi ca anun quini xëpuëxancë mapara axa anua naënxancënuma ꞌicë, racanacë isacëxa. 5Usa ꞌain ca quininu atsínquinbi bëná uni achúshia tari uxua pañuax mëqueu tsócë isi ratúcancëxa. 6Ratutiabi ca cacëxa:
—Ratúaxma ca ꞌit. Mitsun camina i curúsocënua matásëxancë Jesús, Nazaretnu ꞌicë, a barin. Ca ënuma ꞌicën, ca baísquiaxa. Anua unin racáënxancë ca is. 7Isbiani cuanxun camina Pedrocëñun aín ꞌunánmicë unicamaribi ësaquin cati ꞌain: Ax pain ca Galilea menu cuania. Mitsúnribi camina cuantancëxun anua a isti ꞌain, an mitsu cacësabi oquin. Usaquin camina aín ꞌunánmicë unicama cati ꞌain.
8Usaquian ángelnën cacëxun, asérabi ca Jesús anuma ꞌicë quixun istancëx ratuti bërërui quininuax chiquiti ca abáquiani cuancëxa. Cuanquin ca racuë́quin uibi uisaquinbi cáma ꞌicën.
María Magdalenanëan Jesús isa
(Jn 20.11-18)
9Domingo nëtë pëcaracëbë ca Jesús baísquitancëx María Magdalena anua mëcën achúshi ꞌimainun rabë́ ñunshin ꞌatima chiquían, ami pain chiquiracëacëxa. 10Usai ꞌia isbiani ca masá nuitutia bëunan mëscúcë axa Jesúsbë nicë unicama a cai cuancëxa. 11Cuanxuan —Jesús cana asábi isan —quixun cacëxun cuaquinbi ca a unicaman —usama ca —quixun sináncëxa.
Ami sináncë uni rabë́mia Jesús chiquiracëa
(Lc 24.13-35)
12Usai ꞌitancëxa ëmanuax bain cuancëbë ca Jesús a unicama rabë́mi, bëtsi unisa ꞌaish, chiquiracëacëxa. 13Usaía ami chiquiracë́cëxun isbianquian —Jesús cananuna isan —quixun atúnribi cacëxunbi ca raírinën —usama ca —quixun sináncëxa.
Jesusan aín ꞌunánmicë unicama usaquian ñu ꞌanun ca
(Mt 28.16-20; Lc 24.36-49; Jn 20.19-23)
14Usai ꞌitancëx ca Jesús aín ꞌunánmicë unicama mëcën rabë́ ꞌimainun achúshi ami atúxa mesanu bucubuan chiquiracëacëxa. Atumi chiquiracëquin ca Jesusan atu cacëxa:
—An ꞌë baísquicë iscëcaman, asérabi ꞌëx baísquicë isun cacëxunbi camina, asérabi ca baísquiaxa quixun ꞌë sinántisama tan.
15Usaquin caxun ca atu cacëxa:
—Camabi menu cuanquin camina, ꞌëmi catamëti, aín ꞌucha tërë́ncë ꞌaish ca uni Nucën Papa Diosnan ꞌiti ꞌicë quixun camabi unían ꞌunánun, bana ñuixunti ꞌain. 16Ñuixuncëxun cuatia ꞌëmi catamëtia nashimicë ax ca Nucën Papa Diosan ainan ꞌinun ië́micë ꞌiti ꞌicën. Usa ꞌaínbi ca axa ꞌëmi catamëisama tancë uni ax aín ꞌucha cupí xënibua ꞌaínbi Nucën Papa Diosbëma ꞌiti ꞌicën. 17Axa ꞌëmi catamëcë unicaman ca Nucën Papa Diosan cushin uni itsin ꞌacëma ñu ësoquin ꞌati ꞌicën: ꞌënan ꞌixun ca ꞌën cushin uninua ñunshin ꞌatima chiquínti ꞌicën. Chiquíanan ca bëtsi banan banati ꞌicën. 18Usai ꞌianan aín mëcënan bicëxunbi ca runun ꞌatima ꞌicën. ꞌImainun ca muca ñua xëacëxunbi uisabi otima ꞌicën. ꞌImainun ca aín mëcënan ramëcëx uni ñucë pëxcúti ꞌicën.
Jesús naínu cuan
(Lc 24.50-53)
19Usaquin aín ꞌunánmicë unicama catancëx ca Nucën ꞌIbu Jesus, aín mëqueu ꞌaish Nucën Papa Diosbë cushi ꞌi, naínu cuancëxa. 20Usai ꞌian camabi menu cuanquin ca aín ꞌunánmicë unicaman —Nucën ꞌIbu Jesucristomi catamëti aín ꞌucha tërë́ncë ꞌaish ca uni Nucën Papa Diosnan ꞌiti ꞌicë —quixun bana ñuixuancëxa. Usaquin bana ñuixunia ca Nucën ꞌIbu Jesucristonënbi ꞌaquinquin, atúan ñuixuncë banax ca asérabi ꞌicë quixuan unin ꞌunánun, uni itsin ꞌacëma ñu ꞌamiacëxa. Ashi.
Pašlaik izvēlēts:
Marcos 16: cbrPB
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 1978, 1995, 2008, 2022 Wycliffe Bible Translators, Inc. All rights reserved.