Marcos 1
1
I. GALILEA MENUXUAN JESUSAN BANA ÑUIXUAN (1-10)
Juan, an uni nashimicë, an anu uni ꞌicëma menuxun bana ñuixuan
(Mt 3.1-12; Lc 3.1-9, 15-17; Jn 1.19-28)
1Ënëx ca upí bana, Nucën Papa Diosan Bëchicë, Jesucristo, a ñui uisai cara axa uti ꞌiacëxa quiax quicë ꞌicën. 2An Nucën Papa Dios quicë bana unicama ñuixuncë uni, Isaías cacë, an ca Jesucristo ënë menu uti sinánquin Nucën Papa Diosan sinánmicëxun ësaquin cuënëocëxa:
A caxu mi cuanun cana uni xutin. Ax pain cuanquin ca anun cuanti bai mëníoquin racanacësaribi oquin, camabi unían min bana cuanun atun nuitua upí ꞌinun sinanamiti ꞌicën. 3Anu uni ꞌicëma menuxun munuma bana ñui ca a unix ësai quia: Nucën ꞌIbu ca aia, camina axa anun uti bai mëníoquin racanacësaribi oi aín bana cuanux sinanati ꞌain.
4Isaíasnëan cuënëosabi oi ca Juan anu uni ꞌicëma menuxun, anu cuancë unicama nashimianan bana ñuixuni ësai quiacëxa:
—Sinanaquin mitsun ꞌuchacama ëni Nucën Papa Diosmi sinani camina nashimicë ꞌiti ꞌain, mitsun ñu ꞌatima ꞌacëcama tërë́ncë ꞌinun.
5Usa ꞌain ca Judea menu ꞌicë unicama ꞌimainun Jerusalénu ꞌicë unicamaxribi Juanën bana ñuixunia cuati cuancëxa. Cuanxuan atun ꞌuchacama chiquinatia ca Juanën Jordán cacë bana anuxun nashimiacëxa.
6Juanëx ca camello rani ꞌacë chupa pañuanan ñuina xacábia ꞌacë anun tsitëcërëquicë ꞌiacëxa. Aín piti ca curuchinti ꞌimainun buna rëpa ꞌiacëxa. 7Usa ꞌixun ca bana ñuixunquin Juanën unicama cacëxa:
—ꞌË caxu ca ꞌësamaira uni aia. Axa upíira ꞌaish cushiira ꞌain cana ꞌëx asaribima ꞌaish ami rabini a ꞌurama ꞌitima ꞌain. Usai ꞌiquin cana a tanáin rantin purúnxun aín taxacabi tubuxuntima ꞌain. 8ꞌËn cana mitsu ꞌumpaxan nashimin, ꞌaínbi ca axira uquin uni aín Bëru Ñunshin Upíñu ꞌinun ꞌimiti ꞌicën.
Juanëan Jesús nashimia
(Mt 3.13-17; Lc 3.21-22)
9Juanëan unicama nashimianan bana ñuixunmainun ca Jesús Galilea menu ꞌicë ëma, Nazaret, anuax Judea menu cuanx anua Juan ꞌicë anu bëbacëxa. Bëbacë ca Juanën Jordán bacanuxun Jesús nashimiacëxa. 10Usoquin Juanën nashimicëx, bacanuax ꞌiruquian Jesusan iscëxbi ca naí panárabëacëxa. Usacëbëtan ca ñumacuru tinax uaxa Nucën Papa Diosan Bëru Ñunshin Upí anu ꞌiruia isacëxa. 11Usaía ꞌicëbëtan ca Jesusan naínuaxa banaia cuacëxa, ësai qui:
—Mix camina ꞌëx amiira sináncë bacë bëchicë ꞌain. Mimi sinani cana chuámarua tani cuëënin.
Ñunshin ꞌatimanën ꞌapun Jesús ñu ꞌaisama ꞌamitisa tan
(Mt 4.1-11; Lc 4.1-13)
12Usaía ꞌicë ca Nucën Papa Diosan Bëru Ñunshin Upitanbi anu uni ꞌicëma menu cuanti Jesús sinánmiacëxa. 13Sinánmicëx cuanx ca cuarenta nëtën anua pianancë ñuina ꞌicë menu ꞌiacëxa. Anua cuarenta nëtë ꞌicë ca ñunshin ꞌatimanën ꞌapu Satanasnën ñu ꞌaisama ꞌamicatsi quixun caraishiacëxa. Usoiabi ca an Nucën Papa Dios ꞌaquincë aín ángelcaman anu uxun Jesús ꞌaquiancëxa.
Galilea menuxuan ꞌatabaquin Jesusan unicama bana ñuixuan
(Mt 4.12-17; Lc 4.14-15)
14Juan, an uni nashimicë, a sipuacë ꞌain ca Jesusan Galilea menu cuantëcënquin —aín ꞌucha tërë́ncë ꞌaish ca uni Nucën Papa Diosnan ꞌiti ꞌicë —quixun upí bana ñuibiancëxa. 15Ñuibiani cuani ca ësai quiacëxa:
—Anun Nucën Papa Diosan ainan ꞌiti unicama aín uni ꞌimiti nëtë ca ꞌurama ꞌicën. Mitsux ami sináncë ꞌixunmabi sinanati ca anun aín uni ꞌinux ië́ti bana sinan.
Jesusan rabë́ ꞌimainun rabë́ uni abë cuanun ca
(Mt 4.18-22; Lc 5.1-11)
16Parúmpapa Galilea cuëtani cuanquínbi ca Jesusan Simón ꞌimainun aín xucën, Andrés, an tsatsa bicë uni ꞌixuan tsatsa ricania mëracëxa. 17Mëraquin ca cacëxa:
—ꞌËn mi ꞌunánminun ca ꞌëbë cuani ut. An tsatsa bicë uni ꞌicëbi cana ꞌëmi catamënunmi uni sinánminun mitsu ꞌimiti ꞌain.
18Usaquian Jesusan cacëxunshi aín rica ëbiani ca abë cuancëxa.
19A uni rabë́ bibiani cuanquinbi ca Jesusan Zebedeonën bëchicë Jacobo ꞌimainun aín xucën Juan, nuntinuxuan rica mëníoia mëracëxa. 20Mëraquian cuënquin Jesusan abëa cuanun cacëxëshi ca nuntinubi aín papa Zebedeocëñun aín papan ñu mëëmicë uni ëbiani Jesúsbë cuancëxa.
Uni achúshi ñunshin ꞌatimañu Jesusan pëxcüa
(Lc 4.31-37)
21Cuanx ca abëa nicë unicamabë Jesús Capernaúm ëmanu bëbacëxa. Bëbaxun ca anun ñu mëëtima nëtë ꞌain anua judíos unicama timë́ti xubunu atsínxun, anu ꞌicë unicama bana ꞌunánmiacëxa. 22An xuá ꞌixun ca Jesusan Nucën Papa Diosan cushínbi bana ñuixuancëxa. An Moisésnën cuënëo bana ꞌunáncë unicaman banasamaira ca aín bana ꞌiacëxa. Usaquian Jesusan ñuia cuati ca a xubu anuxun Nucën Papa Dios rabiti, anu ꞌicë unicamax ratuti quiacëxa:
—Usa bana cuacëma cananuna ꞌain.
23Anu ca uni achúshi ñunshin ꞌatimañu axribi ꞌiacëxa. A unin ca munuma cuëncë́nquin Jesús cacëxa: 24—Jesús, Nazaretnu ꞌicë, min caina nu uisa oti ꞌain? ¿Mix caramina nu cëñui uan? ꞌËn cana mi ꞌunan. Mix camina ainan ꞌaish Diosnuax ucë a ꞌain.
25Quia ca Jesusan cacëxa:
—Ca nëtët. Ënë uninuax ca chiquit.
26Usaquian cacëxëshi ca saquiquimiquin bërërumi munuma cuëncëni ñunshin ꞌatima a uninuax chiquíacëxa. 27Usoia isi ca anu ꞌicë unicama ratúacëxa. Ratuti ca atúxbi canani quiacëxa:
—¿Uisa bana cara ënëx ꞌic? Ënëx ca nun cuacëma bana ꞌicën. Ënë uni ca ñunshin ꞌatimanënbi aín bana cuatia. Uninuax —ca chiquit —quixuan cacëx ca chiquitia.
28Usoquian Jesusan ꞌacë ñucama ñuiquin ca Capernaúmnu ꞌicë unicamainshima a ꞌurama ꞌicë Galilea menua ꞌicë ëmacamanuxunribi camaxunbi chaniocëxa.
Pedronën nachia Jesusan pëxcüa
(Mt 8.14-15; Lc 4.38-39)
29Anua judíos unicama timë́ti xubunuax cuanx ca Jesúsbë Santiago ꞌimainun Juan a rabëtaxribi Simón ꞌimainun Andrésnën xubunu bëbai anu atsíancëxa. 30Atsinia ca Simonan nachia ꞌitsisan ꞌi ꞌinsíanx racatan anu ꞌicë unicaman Jesús —Simonan nachi ca ꞌinsíanxa —quixun cacëxa. 31Cacëx anua racácë anu cuanquin ca Jesusan mëínquin biruacëxa. Birucëxëshi ca aín ꞌitsis nëtë́quin atu pimiacëxa.
ꞌItsa uni ñucë Jesusan pëxcüa
(Mt 8.16-17; Lc 4.40-41)
32A nëtë́nbi ca bari cuabúcëbëa bëbáquishbucëbëtan a ëmanu ꞌicë unicaman, uni ꞌinsíncëcamacëñun uni ñunshin ꞌatimañu acama an pëxcunun Jesúsnu bëacëxa. 33Bëcëbë ca a ëmanu ꞌicë unicamax anua Jesús ꞌicë xubun xëcuënu timë́acëxa. 34Usaria ca Jesusan bëtsi bëtsi ꞌinsínñu unicama pëxcüacëxa, pëxcüanan ca ꞌitsa uninua ñunshin ꞌatima chiquíancëxa. Chiquíncëxuan ui cara ax ꞌicë quixun ꞌunáncëxun ca Jesusan uisaíbia a ñui banati cuëënquinma ñunshin ꞌatima banamiama ꞌicën.
Galilea menuxun Jesusan bana ñuixuan
(Lc 4.42-44)
35Usoquin ꞌoonx ca pëcaracëma ꞌaínshi niruquiani anua uni ꞌicëmanu cuanx Jesús Nucën Papa Diosbë banacëxa. 36Axa cuancë caxu ca Simón abëa ꞌicëcamabë Jesús bari cuancëxa. 37Cuanxun mëraquin ca cacëxa:
—Camaxunbi ca mi baria.
38Cacëxunbi ca Jesusan atu cacëxa:
—ꞌUrama ꞌicë ëmacamanuxunribi uni bana ñuixuni cuanun ca cuan. Usoquin ꞌanux cana Capernaúmnuax upunin.
39Usaquin cabiani cuanxun ca Galileanu ꞌicë ëmacamanu ꞌicë anua judíos unicama timë́ti xubucamanuxun bana ñuixuancëxa, ñuixuanan ca ñunshin ꞌatimacama uninua chiquíancëxa.
Jesusan an aín nami chëquimicë ꞌinsínñu uni pëxcüa
(Mt 8.1-4; Lc 5.12-16)
40Usa ꞌain ca an nami chëquimicë ꞌinsínñu unin cuanx a tanáin rantin puruni tsóbuquin Jesús cacëxa:
—Mix cushi ꞌixun camina ꞌaisa tanquin ꞌë pëxcuti ꞌain.
41Cacëxun ca nuibaquin, aín mëcënan ramëquin Jesusan a uni cacëxa:
—Cana mi ꞌati ꞌain. Min nami ca upí ꞌitëcëni motia.
42Usaquian cacëxëshi aín ñucë nëtëti moquin ca ꞌinsíncë uni an chuáma tancëxa. 43Chuáma tania ca Jesusan a uni xuquin ꞌësëquin cacëxa: 44—ꞌËn mi pëxcucë ñuiquin camina uinu ꞌicë unibi catima ꞌain. Caquinmabi camina cuanxun min nami pëxcúcë judíos sacerdote ismiti ꞌain. Ismianan camina Nucën Papa Dios rabiquin Moisés quiásabi oquin a ñu ꞌinánti ꞌain, camina asérabi pëxcúa quixuan camabi unin ꞌunánun.
45Jesusan —ꞌën mi pëxcucë ënë ñuiquin uni caxunma ca ꞌatan —cacëx cuanquinbia aín nami pëxcúcë ñuiquin chaniocëbë ca Jesús, anu uni riquianti rabanan, uinu ꞌicë ëmanubi cuánma ꞌicën. Cuaníma anu uni ꞌicëma menu cuni ꞌicëbëbi ca camabi menuax cuanx uinu cara cuania anubi timë́cancëxa.
Pašlaik izvēlēts:
Marcos 1: cbrPB
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 1978, 1995, 2008, 2022 Wycliffe Bible Translators, Inc. All rights reserved.