Mateo 23
23
An Moisésnën cuënëo bana ꞌunáncë unicamacëñuan fariseo unicamaribi ñui Jesús quiá bana
(Mr 12.38-40; Lc 11.37-54; 20.45-47)
1Usaquin catancëxun ca Jesusan anu ꞌicë unicamaxa ꞌaisamaira ꞌain acamacëñunbi aín ꞌunánmicë unicama ësaquin cacëxa: 2—An quirica cuënëocë unicama ꞌimainun fariseo unibunënribi ca sinania, atux isa, an Moisésnën cuënëo bana ꞌunánun mitsu ñuixunti, a ꞌicë quixun. 3Atun mitsu ñuixuncësabi oquin camina Moisésnën cuënëo bana ꞌati ꞌain. ꞌAnan camina atúan mitsu cacësabi oi ꞌiquinbi atúan a bana quicëma ñu ꞌacësaribi oquin ꞌatima ꞌain, mitsuma paránxun ꞌamia, usa ꞌain. Atux ca unicama bana ñuixunibi an uni ñuixuncë banaxa quicësabi oi ꞌima. 4Moisésnën cuënëo banaishima atúnbi sináncë banaribi ca unicamax isa usai ꞌinun quixun ñuixunia. Usaquin ñuixuncëxbi ca a banacamax ax quicësabi oi ꞌiisama ꞌicën. Atúxribi ca usai ꞌima. Atúan ñuixuncë bana quicësabi oquian ꞌanun ca unicama ꞌaquinima. 5Añu ñu cara ꞌaia a ꞌaquin ca unicaman axira isa upí ꞌicë quixun sinánquinsa unin a rabinun quixun ꞌaia. ꞌAnan ca bëtsi unisama isa ax ꞌicë quixuan camabi unin isnun quixun chupa aín cuëbí chooquin cuëcápuncë pañuia. Pañuanan ca cuënëo bana aín bëmánanu ꞌanan aín pëñan mëmiu tëcërëcaia, a unicamax ca a bana cuacë ꞌicë quixuan unin sinánun quixun. 6Pi timë́xun ca anu aín cushicama tsóti anu tsónuxun caisia, atusaribi ꞌicatsi quixun. ꞌIanan ca anu judíos unicama timë́ti xubunu unicamabë timëti, anua aín cushicamax tsóti anu tsótishi cuëënia, camabi unínsa atu isnun quiax. 7ꞌIanan ca anuxun unin ñu marucë anuxuan a isquin bëtsi unin —ax ca nun cushi ꞌicë —quixun sinánquin atu mëcën ꞌinánquin biti cuëënia. Usai ꞌianan ca unían —an ca nu cuënëo bana ñuixunia —quixun cati cuëënia.
8Atúxa usai ꞌicëbëbi camina mitsux unían usaquin mitsu cati cuëëntima ꞌain. Mitsux camina xucë́onanti ꞌain. Mitsux camina achúshi ꞌibuñushi ꞌain, ax ca Cristo ꞌicën. 9Uinu ꞌicë unibi camina ënë menua Nucën Papa caquin anëtima ꞌain, Nucën Papa Dios naínu ꞌicë, ax cuni ca asérabi mitsun Papa ꞌicë, usa ꞌain. 10ꞌËx Cristo ꞌaish cana ꞌëxëshi mitsun ꞌIbu ꞌain. Usa ꞌain camina, mix camina aín ꞌibu ꞌai quixuan bëtsi uni mitsu canun quitima ꞌain. 11Micama uinu ꞌicë cara upitaxmi bucunun mitsu ñu ꞌaxunia ax ca mi raíribë sënë́nmaira ꞌaish upí ꞌicën. 12Anbia rabíquin —ꞌëx cana cha ꞌai —quixun sináncë uni a ca Nucën Papa Diosan aín uni raíribë sënë́nmara ꞌimiti ꞌicën. Usonan ca cha ꞌiti sinania ax rabícëma uni a cuni Nucën Papa Diosan cha ꞌimiti ꞌicën.
13An Moisésnën cuënëo bana ꞌunáncë unicama ꞌimainun fariseo unicama, mitsux camina an unicama paráncë a ꞌain. Uisa cara oti ꞌicë usoquin ca Nucën Papa Diosan mitsu ꞌati ꞌicën. Mitsun camina Nucën Papa Diosan bana ꞌunáncë ꞌixunbi a bana quicësabi oquian ꞌanun ꞌaquinquinma unicama a bana bëtsi oquin ñuixunin. Mitsun camina a bana quicësabi oquin ꞌaiman. ꞌAquinma camina uni itsínribia a bana quicësabi oquin ꞌaxunma ꞌanun ꞌunánmin.
14Usai ꞌianan camina casunamëcë xanun ñu bicuanquin cëñuin. Cëñuanan camina mitsux isamina upí ꞌai quixuan unin sinánun quiax, ꞌuran pain Nucën Papa Diosbë banain. Usa ꞌicë ca Nucën Papa Diosan, axa usai ꞌicëma uni ꞌacësamaira oquin mitsu ꞌuchoquin castícanti ꞌicën.
15An Moisésnën cuënëo bana ꞌunáncë unicama ꞌimainun fariseo unicama, mitsux camina an unicama paráncë a ꞌain. ꞌUra cuanquin ui caramina ꞌunánmiti ꞌai quixun bariquin mëraxun camina Nucën Papa Diosmi sinánun ꞌunánmiquinma mitsun sináncësaribi oquin sinánun ꞌunánmin. Usaquinmi mitsun ꞌunánmicëx ca a unicamax mitsúxmi ꞌicësamaira oi ꞌaisama ꞌia. Mitsúxmi anuaxmi tëmërati manë tsi rëquirucë anu ꞌiti ꞌaínbi ca atux mitsúxmi ꞌicësamaira oi anuax tëmërai anu ꞌiti ꞌicën. Mitsúxmi usa ꞌicë ca Nucën Papa Diosan uisa cara mitsu oti ꞌicë usoquin ꞌati ꞌicën.
16Mitsun Nucën Papa Diosan bana unicama ꞌunánmiti ꞌixunbi camina a bana uisai quicë cara quixun ꞌunaniman. Bëxuñu unin ca uni itsi anun cuanti bai ꞌunánmima. Usaribi camina mitsux ꞌain. Mitsux camina ësai quin: Anuxun Nucën Papa Dios rabiti xubu sinánquin cana asérabi ꞌën mi cacësabi oquin ꞌati ꞌai quiax quiquinbi ca unin ꞌaisama tanquin ꞌatima ꞌicën. Usa ꞌaínbi ca unin —curi anuxun Nucën Papa Dios rabiti xubunu ꞌicë a sinánquin cana asérabi ꞌën mi cacësabi oquin ꞌati ꞌai —quiax quiquin asérabi ꞌati ꞌicën. 17Usai qui camina sinánñumasa ꞌain, camina ñu ꞌunáncëma unisa ꞌain. Anuxun a rabiti xubunuxuan unicaman a rabicëx ca Nucën Papa Dios cuëënia. Anu ꞌicë curi ꞌacë ñucama cupíma, aín unicaman anuxun a rabiti xubunuxun rabicë cupíshi ca Nucën Papa Dios cuëënia. 18Usaribiti camina mitsux ësai quin: Anuxun Nucën Papa Dios rabiquin ꞌaracacë ñuina xarotia maxax bucúncë, a sinánquin cana asérabi ꞌën mi cacësabi oquin ꞌati ꞌai quiax quiquinbi ca unin ꞌaisama tanquin ꞌatima ꞌicën. Usa ꞌaínbi ca unin —anuxun Nucën Papa Dios rabiquin ñuina xaroti maxax bucúncë, anu ꞌicë ñuina sinánquin cana asérabi ꞌën mi cacësabi oquin ꞌati ꞌai —quiax quiquin asérabi ꞌati ꞌicën. 19Usai qui camina sinánñumasa ꞌain, camina ñu ꞌunáncëmasa ꞌain. Anuxun ñuina xaroti maxax bucúncë anuxun ca unicaman ñuina rëxun xaroquin Nucën Papa Dios rabia. Usaquian rabicëx ca Nucën Papa Dios cuëënia. Anu ꞌicë ñuina cupíma anuaxa aín unicamax ami sináncë cupíshi ca ax cuëënia. 20Camina ꞌunánti ꞌain, anuxun ñu xarotia bucúncë maxax a sinánquin ca unin anua xaroti nancë ñu aribi sinania. 21Usaribi oquin ca axa aín bana ca asérabi ꞌicë quixun uni itsin ꞌunánun, —anuxun Nucën Papa Dios rabiti xubu sinánquin cana asérabi mitsu cain —quicë uni, an a xubuishi sinánquinma anu ꞌicë Nucën Papa Diosribi sinánquin caia. 22Axa aín bana ca asérabi ꞌicë quixun bëtsi unin ꞌunánun —naí anu Nucën Papa Dios ꞌicë a sinánquin cana asérabi mitsu cain —quicë uni ax ca anu Nucën Papa Dios ꞌicë a ꞌimainun Nucën Papa Diosribi sinani quia.
23An Moisésnën cuënëo bana ꞌunáncë unicama ꞌimainun fariseo unicama, mitsux camina an unicama paráncë a ꞌain. Mitsu ca Nucën Papa Diosan uisa cara oti ꞌicë usoquin ꞌati ꞌicën. Mitsun camina an Nucën Papa Dios anuxun rabiti xubunuxun ñu ꞌacë unicama ñu ꞌinanin, Moisés quiásabi oquin. Usa ꞌixunbi camina a bana itsi, axa quicësabi oíira ꞌiti, a quicësa oquin ꞌaiman, Nucën Papa Diosmi upiti catamëanan ax cuëëncësabi oquin upí sinánñu ꞌixun unicama nuibaquin, ꞌaquinsa ꞌicë, ꞌaquinti, acama. Usaquinmi mitsun ꞌacëx ca asábiira ꞌitsíanxa. Usoquin ꞌaquinmi mitsun ñu mësúribi ꞌinánti ca asábi ꞌitsíanxa. 24Mitsun Nucën Papa Diosan bana unicama ꞌunánmiti ꞌixunbi camina a bana uisai quicë cara quixun ꞌunaniman. Bëxuñu unin ca uni itsi anun cuanti bai ꞌunanima. Usaribi camina mitsux ꞌain. Ca ësa ꞌicën. Chupan xanpa bëpucëbë ca anua aín chua, ꞌimainun sia acamax bërúmainun ꞌunpax upíshi xanpa ꞌucë mëu ꞌibutia. Sia ꞌeti rabanan usaquin ꞌaibi camina ñuina cha, camello, a ꞌecësa ꞌain.
25An Moisésnën cuënëo bana ꞌunáncë unicama ꞌimainun fariseo unicama, mitsun camina usabi oquin ꞌacë ꞌixun unicama paranin. Paránquin camina Nucën Papa Diosainsa mitsun nuitu upí isnun quixun xanpa ꞌimainun ñutë acama aín caxu chucain. Usaquin ꞌaquinbi camina mitsun nuitu mëu upíma ñu sinanin. Uni paránquin camina aín ñua mitsu ꞌinánun quixun sinánmianan ñunshínquin mitsun cuëëncë ñu biti acama sinanin. Mitsúxmi usa ꞌicë ca Nucën Papa Diosan uisa cara mitsu oti ꞌicë usoquin ꞌati ꞌicën. 26Fariseo uni, bëxuñu unisa camina mix ꞌain. Xanpa aín namë́ pain chucacëx ca aín caxuribi chuañuma ꞌiti ꞌicën. Usaribi oquin camina min nuitu pain upí ꞌinun mëníoti ꞌain, min ꞌacë ñucamaxribi upí ꞌinun.
27An Moisésnën cuënëo bana ꞌunáncë unicama ꞌimainun fariseo unicama, mitsun camina usabi oquin ꞌacë ꞌixun unicama paranin. Anu uni maíncë me ax ca upí oquin mëníocë ꞌianan ëman upíira upí uxua ꞌinun roncë ꞌaíshbi ꞌucë mëu, uni bamacënën xo ꞌimainun ñu chëquicë ꞌaisama ꞌicën. 28Usaribi camina mitsux ꞌain. Mitsúnmi bëtsi bëtsi ñu ꞌacë cupía unin mitsu upí isti ꞌixunbi camina mitsun nuitu upíma ꞌixun atu paranin.
29An Moisésnën cuënëocë bana ꞌunáncë unicama ꞌimainun fariseo unicama, mitsun camina usai oquin ꞌacë ꞌixun unicama paranin. Upíma isquin cara Nucën Papa Diosan mitsu uisoti ꞌicën. Mitsun raracaman an Nucën Papa Dios quicë bana uni ñuixuncë unicama anu maíncan, a me camina upí ꞌinun mëníoin. Mëníonan camina anu uni upíburibi maían me aribi upí ꞌinun mëníoin. 30Usoquin ꞌai camina quicanin, nux nucën raracamabë ꞌixun cananuna atun an Nucën Papa Dios quicë bana unicama ñuixuncë unicama masóquin ꞌaia ꞌaquianma ꞌitsían. 31Usai quiquin camina ꞌunanin, asérabi camina mitsux an Nucën Papa Dios quicë bana uni ñuixuncë unicama an ꞌá, atun rëbúnqui ꞌain. 32Mitsux usa ꞌixun camina mitsun raran ꞌásaribi oquin ꞌaquin sënë́onti ꞌain.
33ꞌAtima ꞌixun uni paráncë ꞌaish camina mitsux runu an uni picë asa ꞌain, mitsun raracama ꞌiásaribiti camina ꞌin. Mitsúxmi usai ꞌicë cupí ca Nucën Papa Diosan asérabi mitsux bamaia anuaxmi tëmërati manë tsinu mitsu ꞌimiti ꞌicën. 34ꞌËn cana unicama ꞌën bana ꞌunánquian a uni ñuixunun ꞌimianan raíriribi ꞌën bana unicama ꞌunánminun ꞌimicëbi camina raíri ꞌanan raíri i curúsocënu matásun bamaminuxun ꞌain. Raíri camina anu timë́ti xubu anuxun rishquinuxun ꞌain. Raírinëan ꞌachushi ëmanuxun bana ñuixuniami mitsun bëtsi bëtsi ocëbëa bëtsi ëmanu cuancëbë anu mitsúxribi cuanxun camina usaribi oquin ꞌatëcënuxun ꞌain. 35Usa ꞌixun camina mitsun raran ꞌásaribi oquin ꞌain. Abel pain ca ꞌuchañuma ꞌicëbi mitsun rara achúshinën ꞌacëxa. Usaribi oquin ca mitsun raran an Nucën Papa Dios quicësabi oquin ꞌacë unicama bari itsi bari itsi inúmiquin ꞌacëxa. ꞌA ꞌaían ca raírinënribi Zacarías, Baraquíasnën bëchicë, a anuxun Nucën Papa Dios rabiti xubu rapasunuxun ꞌacëxa. Usaribi oquin camina mitsun ꞌain. 36Usa ꞌain cana asérabi mitsu cain, mitsun raracama ꞌásaribi oquin ca Nucën Papa Diosan mitsu ꞌuchoti ꞌicën. Mitsúxmi usa ꞌicë ca Nucën Papa Diosan uisa cara oti ꞌicë usoquin ꞌati ꞌicën.
Atun aín bana cuacëma cupía Jerusalénu ꞌicë unicama nuibati Jesús masá nuitua
37Jerusalenu ꞌicë unicama, cana mitsu cain, mitsux camina an Nucën Papa Dios quicë bana uni ñuixuncë unicama ꞌanan a an aín bana ñuixunun xucë unicamaribi maxaxan ꞌá, mitsun raracama axa ꞌiásaribi ꞌain. ¿Uitishi oquin carana mitsu nuibaquin bërúanquin ꞌaquinsa tan? ꞌAtapanëan aín tuácama cuëntancëxun aín pëchin mapuxun bërúancësaribi oquin cana mitsu bërúanquin ꞌaquinsa tan. ꞌAquinsa tancëxbi camina mitsux cuëëncëma ꞌain. 38Usa ꞌain cana ꞌaquinquinma usabimi ꞌinun mitsu ënti ꞌain. 39ꞌËn cana mitsu cain, mitsun camina utëcënia isquin —Nucën ꞌIbu Diosan xucë́xa ucë bërí aia. A ca camabi unin rabiti ꞌicë —quiax quiquin ꞌë rabiti ꞌain. A nëtë utámainun camina ꞌë istëcëntima ꞌain.
Pašlaik izvēlēts:
Mateo 23: cbrPB
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 1978, 1995, 2008, 2022 Wycliffe Bible Translators, Inc. All rights reserved.