Mateo 20
20
An uvas bimi bicë unicama ñui quicë bana
1Ësaquinribi ca Jesusan aín ꞌunánmicë unicama cacëxa:
—Nucën Papa Diosan uni ainan ꞌimiti ax ca ësaribi ꞌicën: Achúshi unix ca aín naë anu uvas ꞌapácëñu ꞌiaxa. Usa ꞌaish ca pëcaracëma ꞌaínshi, an a naë mëníoti uni bari cuanxa. 2Bariquin mëraxun ca uiti cara nëtë camabi cupíoti ꞌicë quixun atubëtan mëníotancëxun aín naënuxuan ñu mëënun xuaxa. 3Xutancëx bari manámi ꞌain cuantëcënxun ca raíri uníxa ñu mëëtiñuma ꞌaish anuxun unin ñu marucë anu bucucë isaxa. 4Isquin ca caxa: Mitsúxribi camina ꞌën naënu ñu mëëi cuanti ꞌain. Cuanxunmi ñu mëëia cana mitsun ñu mëëcësabi oquin mitsu cupíoti ꞌain. Cacëx ca ñu mëëi cuanxa. 5Bari xamarucëbë cuantëcënxun ca naë ꞌibun uni raíriribi a mëëti ñu ꞌaíma ꞌain bucucë mëraquin aín naënu ñu mëënun quixun xuaxa. Bari cuanbucëbëtanribi ca usaribi oquin ꞌaxa. 6Bari xupíbucëbëribi cuanquin ca uni raíriribi ñu mëëima bucucë mëraxa. Mëraquin ca caxa: ¿Uisacatsi caramina mitsux ñu mëëima ënuishi bucubaitin? 7Cacëxun ca a unicaman caxa: Uinu ꞌicë unínbia nu ñu mëëxunun cacëma ꞌaish cananuna ënu bucüan. Cacëxun ca naë ꞌibun caxa: Mitsúxribi camina ꞌën naënu ñu mëëi cuanti ꞌain. 8Usa ꞌain ca ñantánbucëbëtan cuënxun naë ꞌibun aín uni caxa: An ꞌë ñu mëëxuncë unicama cuëntancëxun camina camabi cupíoti ꞌain. Axa tsiáncuatsini ucë uni acama pain camina cupíoti ꞌain. Usotancëxun camina raíri unicamaribi cupíotancëxun axa bëráma upuncë unicamaribishi cupíoti ꞌain. 9Cacëxun ca axa bari xupíbucëbë ucë unicama cuëncëx aia achúshi nëtën cupíocësa oquin ꞌinánxa. 10Usaquian cupíoia isquin ca an paían ñu mëënun bicë unicaman —nun cananuna a unicaman bicësamaira oquin curíqui cha biti ꞌai —quixun sinánxa. Sinánxunbi ca bari xupíbucëbë ucëcaman bicësaribi biaxa. 11Usoquin biquin ca ami manánquin 12an atu ñu mëëmicë uni caxa: Ënë unicaman ca bënë́nquinshi ꞌitsamashi ñu mëëaxa. Nun nu bari xamárutamainun ꞌanan bari atsíntamainunribi ñu mëëbaitiabi camina an chucúmashi ñu mëëcë unicamami ꞌacësaribi nu cupíon. 13Cacëxun ca an unicama ñu mëëmicë unin caxa: ꞌËn cana mi paraniman. Mibëtan mëníopuncësabi oquin cana mi cupíon. 14ꞌËn mi ꞌináncë curíqui biax camina cuanti ꞌain. Mi ꞌináncësaribi oquin an ꞌë chucúmashi ñu mëëxuncë unicamaribi ꞌinánti cana cuëënin. 15¿ꞌËn curíquinëxa ꞌënanbi ꞌain carana ꞌëx cuëëncësabi oquin an ꞌë ñu mëëxuncë unicama cupíotima ꞌain? ¿ꞌËn uni itsi curíqui ꞌináncëbëtan caramina nutsiquin masáquin sinanin? 16A unin —ñuumara ca ax ꞌicë —quixun sináncë uni a ca Nucën Papa Diosan aín sinan upí ꞌunánquin a uníxa cha ꞌicë isti ꞌicën. ꞌImainun ca unin iscë́xa cha ꞌicë uni, a Nucën Papa Diosan aín nuitu ꞌunánquin ñuumara isti ꞌicën. ꞌAisamaira unia ainan ꞌinúxa ꞌëmi catamënun sinánmicëxbia ꞌicëbëtanma ca axa ꞌëmi catamëcë ashi Nucën Papa Diosan ainan ꞌinun ꞌimia.
—ꞌËx cana unin ꞌacëx bamati ꞌai —quixun Jesusan aín unicama catëcëan
(Mr 10.32-34; Lc 18.31-34)
17Anuaxa Jerusalénu Jesús cuancëbë ca ꞌitsa uni ꞌimainun xanuribi abë cuancëxa. Usa ꞌain ca cuënbiani atubëshi cuanquin Jesusan aín ꞌunánmicë unicama cacëxa: 18—Mitsúnbi camina isin, bërí cananuna Jerusalénu cuanin. Anuxun ca, uni ꞌinux Nucën Papa Diosnuax uá ꞌicë, ꞌë unin ꞌinánti ꞌicën, judíos sacerdotenën cushicamabëtan an Moisésnën cuënëo bana ꞌunáncë unicaman binun. ꞌInáncëxun ca atun —a uni ca bamati ꞌicë —quixun catancëxun 19judíosma unicaman ꞌanun ꞌë ꞌinánti ꞌicën. ꞌË bëtsi bëtsi onan ꞌëmi cuaianan ꞌë mëëtancëxun ꞌëx bamanun i curúsocënu matásnun ca judíos unicaman ꞌë judíosma unicama ꞌinánti ꞌicën. Usoquian ꞌë ꞌacëx cana bamatancëx rabë́ nëtë ꞌiónxa pëcaracëbë baísquiti ꞌain.
Jacobo ꞌimainun Juanën titan Jesús ñucá
(Mr 10.35-45)
20Usa ꞌain ca Zebedeonën bëchicë rabë́, Juan ꞌimainun Jacobo, aín tita Jesús rapasu cuani a bëtánain rantin puruni tsóbuquin abë banatisa tancëxa. 21Abë banatisa tania isquin ca Jesusan cacëxa:
—¿Añu caramina cuëënin?
Cacëxun ca cacëxa:
—Mixmi ꞌapu ꞌaish min nëtë upínu tsotan ꞌën tuacëx bëtsíxa min mëqueu tsómainun bëtsix min mëmiu tsónun camina ꞌimiti ꞌain, mibëa ꞌapu ꞌinun.
22Cacëxun ca Jesusan cacëxa:
—Sinánquinmaishi camina usaquin ꞌë cain.
Caxun ca Jesusan Juan ꞌimainun Jacobo cacëxa:
—¿ꞌË ꞌacësaribi oquian unin mitsu bëtsi bëtsi ocëxun caramina tanshiti ꞌain?
Cacëxun ca —usaribi oquin cananuna tanshiti ꞌai —quixun cacëxa.
23Cacëxun ca Jesusan cacëxa:
—ꞌËn ꞌacësaribi oquin camina bëtsi bëtsi ocë ꞌiti ꞌain. Usa ꞌaínbi cana ꞌën, mix camina ꞌën mëqueu tsónan ꞌën mëmiu tsóti ꞌai quixun ui unibi caiman. ꞌËn Papa Diosan cuni ca cati ꞌicën, uix cara anu tsóti ꞌicë quixun, an mëníosabi oía ꞌinun.
24Usaquian aín titabëtan Zebedeonën bëchicë rabëtan Jesús caia cuati ca Jesusan ꞌunánmicë uni raíri, mëcën rabë́, ax a rabë́mi nishacëxa. 25Usaria isquin ca cuënxun Jesusan cacëxa:
—Mitsun camina ꞌunanin, judíosma ꞌapucaman ca aín unicama ax cuëëncësabi oquin tëmëraquinbi ñu mëënun ꞌamia. Aín cushi unin ca aín unicama ax quicësabi oquian ꞌanun ꞌamia. 26Usa ꞌaínbi camina mitsux usai ꞌitima ꞌain. Uix cara bëtsi unisama ꞌiisa tania, an ca mitsúxmi upitax bucunun ñu mëëquin ꞌaquinti ꞌicën. 27Uinu ꞌicë mitsux caramina aín cushi uni ꞌiisa tani, an ca mitsu ñu ꞌaxúnti ꞌicën, 28ꞌën ꞌacësaribi oquin. Uni itsían ñu mëëxunun cana ꞌëx uni ꞌinux Nucën Papa Diosnuax uáma ꞌain. ꞌËx cana unicamaxa upí ꞌianan upitax bucuti oquin ꞌaquini uacën. ꞌËx ꞌuchañuma ꞌaísh bamatsianxmabi cana camabi uníxa Nucën Papa Diosbë upí ꞌinun atun ꞌucha ꞌënansa ꞌain bamai uacën.
Bëxuñu uni rabë́a Jesusan bëpë́xcüa
(Mr 10.46-52; Lc 18.35-43)
29Ësaquin catancëx ca Jesús abëa cuancë unicamabë Jerusalénu cuani Jericó ëmanu bëbacëxa. Bëbax anuaxribi cuania ca anu ꞌicë unicamanribi a nuibiancëxa. 30Usaquian nuibiania ca bai amo tsóxun, uni rabë́ bëxuñu, an —Jesús ca aia —quixuan ñuicania cuati cuëníshquin cacëxa:
—Davitan rëbúnqui, Nucën ꞌIbu Cristo, nuibaquin ca nu ꞌaquin.
31Usaía quia oquin ca anu ꞌicë unicaman banaxma isa nëtë́nun quixun cacëxa. Cacëxbi ca nëtëtima atúxa ꞌicësamaira oi munuma cuëníshtëcëni quiacëxa:
—Davitan rëbúnqui, Nucën ꞌIbu Cristo, nuibaquin ca nu ꞌaquin.
32Usaía quia cuati niracëquin ca Jesusan a uni rabë́ unun quixun cacëxa. Cacëx aia ca Jesusan cacëxa:
—¿ꞌËn mitsu uisoti caina cuëënin?
33Cacëxun ca cacëxa:
—Isnúnmi nu bëpë́xcuti cananuna cuëënin.
34Usaquian cacëxun nuibaquin ca Jesusan atu bëmëëacëxa. Bëmëëcëxuinshi ca isacëxa. Isi cuëënquiani ca Jesúsbë cuancëxa.
Pašlaik izvēlēts:
Mateo 20: cbrPB
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 1978, 1995, 2008, 2022 Wycliffe Bible Translators, Inc. All rights reserved.