ดอ โฆว 11
11
ลอง เฆ ดูอี ลาย กาย็อห
1ดอ อัน ตี เฆ ดูอี อี กอย แดง กาดาย, เฆ บอกาเฆลียด กาลาง โฆรห อู โมยว. 2ดอ เลห ฮาว เฆ ดูอี นา เลห ซีแง, วี ฮาว ปอ โปละ, เฆ วี ยึร ฆลัง อี กอย กาตัด มืง ซีนา ตึอน. เฆ บอ กอย โดง ตี.
3ดูอี เฆ ตี วี ลาย กามวน ต็อห, “แตห เอ โบง มา มาอูด, แตห เอ ฆึม แคง เงา, แตห กอ โปลม.” ปาย ตี เฆ ตา มา มาอูด ตี, ปี อี ตา มาว. เฆ บอ ตา ยาง ปี อี ตา ปูน. 4เฆ วี ต็อห, แตห เอ แด มืง เอ บอ โฮว ตาง, โฮว จา, แตห อึณ กอ ฌัม ฆางหราว. ปาย ตี จืร เอ ดี บอ ลึห ฮาว ดอน บลาก. เอ ดี บอ ปึอน กอย รึม, อาว โลว กาย็อห, ฮาว แบน โปละ แบน โปละ แดง กาดาย.
5ดอ โบง เฆ ปาย ตี เฌาพรา เลห โลง, แตห อัน ยอด บอ มืง. อัน บอ ยึร โฮว ตาง, โฮว จา ปี โบง เฆ. 6เฌาพรา ยี ต็อห, “เฆ มูห ดูอี อู โมยว. เฆ บอ กาลาง โฆรห อู โมยว. เซ เฆ แฮะ จูห ดี โบง ปาย ตี. อู ซีณ ดอ ตี นี ฮาว นา อาต เฆ ดี แป ดี โบง โตต ดอน โมยว ปี คราม เฆ. 7อึร, แตห เอ โลง, แตห เอ กาย็อห โฆรห เฆ, แกวะ แตห ดูอี ลาย โทม, ลาย นับ ปี ต็อห เฆ.”
8ปาย ตี เฌาพรา โบง แตห เฆ ดูอี วี ลาย กาย็อห ฮาว กอย แบน โปละ แบน โปละ แดง กาดาย. เฆ อาว ฮู ปึอน โบง โฮว จา ตึอน. 9โดง กอย เฆ ตี, เฆ แตห อึณ จืร มืง บาแบ.#11:9 ลอง ดาง ‘บาแบ’ แคง โฆรห แฮแบร มูห ‘กาย็อห’ โคว, แคง มืง ตี เฌาพรา แฮะ กาย็อห โฆรห ดูอี แดง กาดาย. อัน บอ แตห เฆ วี กอย แดง กาดาย แบน โปละ แบน โปละ.
ลอง หลูกหลาน อาเซม
10อานี วี มูห จืร เฆ หลูกหลาน อาเซม.
ดอ แฮะ โนะ อาซาก อาเซม อู มาย็อห ซีนัม, อัน มึห ฆอน อี จืร อาพาซาด. ดอ อัน ตี แฮะ โนะ อา ซีนัม วาย อึม ตาง แฮะ ปูน กาดาย. 11วาย อัน ตี อาเซม ตึอน กอย ปอ พัน มาย็อห ซีนัม. อัน บอ มึห ฆอน อีมาย บอ ฆอน อีบึณ.
12ดา อาพาซาด ตึอน, อาซาก อัน บอ โนะ โอย ฆึร ดี พัน ซีนัม, อัน วี มึห ฆอน อี จืร อาเซลา. 13วาย อัน ตี อาพาซาด ตึอน วี กอย ปอ พวน มาย็อห ดี โอย ซีนัม. อัน บอ มึห ฆอน อีมาย บอ ฆอน อีบึณ.
14อาเซลา ตึอน, อาซาก อัน วี โนะ โอย ฆึร ซีนัม, อัน มึห ฆอน อี จืร อาเอบา. 15วาย อัน ตี อาเซลา วี กอย ปอ พวน มาย็อห ดี โอย ซีนัม. อัน บอ มึห ฆอน อีมาย เฆ ฆอน อีบึณ.
16อาเอบา ตึอน, อาซาก อัน บอ โนะ โอย ฆึร ดี พวน ซีนัม, อัน มึห ฆอน อี จืร อาเพเล. 17วาย อัน ตี อาเอบา ตึอน วี กอย ปอ พวน มาย็อห ดี โอย ฆึร ซีนัม. อัน บอ มึห ฆอน อีมาย เฆ ฆอน อีบึณ.
18อาเพเล ตึอน, อาซาก อัน แฮะ โนะ โอย ฆึร ซีนัม, อัน มึห ฆอน อี จืร อาเรฆู. 19วาย อัน ตี อัน วี กอย ปอ อา มาย็อห ดี ดีม ซีนัม. อัน มึห ฆอน อีมาย เฆ ฆอน อีบึณ.
20อาเรฆู ตึอน, อาซาก อัน แฮะ โนะ โอย ฆึร ดี อา ซีนัม, อัน มึห ฆอน อี จืร อาเซรูก. 21วาย อัน ตี อาเรฆู กอย ปอ อา มาย็อห ดี บู ซีนัม. อัน บอ มึห ฆอน อีมาย บอ ฆอน อีบึณ.
22อาเซรูก ตึอน, อาซาก อัน บอ โนะ โอย ฆึร ซีนัม, อัน มึห ฆอน อี จืร อานาโฮว. 23วาย อัน ตี อาเซรูก วี กอย ปอ อา มาย็อห ซีนัม. อัน บอ มึห ฆอน อีมาย เฆ ฆอน อีบึณ.
24อานาโฮว, อาซาก อัน แฮะ โนะ อา ฆึร ดี ดีม ซีนัม, อัน ปึอน ฆอน อี จืร อาเทรา. 25วาย อัน ตี อัน วี กอย ปอ อู มาย็อห ดี ฆึร ดี ดีม ซีนัม บอ มึห ฆอน อีมาย บอ ฆอน อีบึณ.
26อาเทรา ตึอน, อาซาก อัน บอ โนะ บู ฆึร ซีนัม, อัน มึห ฆอน อี จืร อาบราม, อานาโฮว บอ อาฮาราน.
27อา ตี แฮะ มูห หลูกหลาน อาเทรา ตึอน.
อาเทรา มึห ฆอน อี จืร อาบราม,#11:27 อาบราม ฆาย อาบราฮาม มูห อู วี. อานาโฮว บอ อาฮาราน. อาฮาราน มึห ฆอน อี จืร อาโลด. 28อาฮาราน ตึอน ยี ยัม ดอ ซี กอย อัน แคง มืง อูรัะ อี มูห มืง บรีม อัน. บอ ฆูณ อัน อี จืร อาเทรา แฮะ กอย แคง มืง ตี. มืง อูรี ตี, อึณ วี กอย แคง มืง ตาง อี จืร มืง กาลาเด. 29อาบราม เฆ อานาโฮว ตึอน, เฆ วี คัด ดึห อีบึณ. อีบึณ อาบราม ตึอน จืร นาง ซาราย. อีบึณ อานาโฮว ตึอน จืร นาง แมก. อาฮาราน ตึอน มูห ฆูณ นาง แมก บอ ฆูณ นาง ยีก. 30นาง ซาราย ตึอน ยี แฮะ หมัน, อาว มึห ฆอน.
31อาเทรา ตึอน ยี แยต ฆอน อัน อี จืร อาบราม. อัน แดะ บอ หลาน อัน อี จืร อาโลด อี มูห ฆอน อาฮาราน. อัน แดะ บอ เอา อัน อี จืร นาง ซาราย, อี มูห อีบึณ ฆอน อีมาย อัน อี จืร อาบราม. อาเทรา ตึอน แดะ เฆ ตี บอกาเฆลียด, แตห เฆ ฮาว รึม, เลห แคง มืง อูรัะ อี กอย แคง กาดาย มืง กาลาเด ตึอน, แตห เฆ ฮาว ฌัม มืง กานัณ. เฆ ยี ฮา ฌัม ดี มืง ฮาราน บอ กอย แคง มืง ตี.
32อาเทรา ตึอน, อาซาก อัน แฮะ โนะ อา มาย็อห ดี พัน ซีนัม, อัน บอ ยัม แคง มืง ฮาราน ตึอน.
Pašlaik izvēlēts:
ดอ โฆว 11: pce
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2021, Wycliffe Bible Translator, Inc. All rights reserved.