Luc 4
4
Dumangu du Sesu
1Sesu negumanu batisu ne Sambatisete gu mwemambe wu Surede, akubase ne dinyuni diboti. Dinyuni Diboti dine, dimubege gu kumu. 2Mbeni negumane mange Sesu murime mu megumi mane metsufu nyangu ne dibeti, tsufu tsyotsu tsine asayange kepagere givave, tsufu tsine ne guvu, akulu nzale. 3Sige vane, Mbeni negumwambile re «Gere negungenze wu mwane Nyambi yambile dimani didi dikalugi biguye nonge wukuye.» 4Tumbe Sesu negubuse dyufi di Mbeni, negumwagule re «Direndu mu gisangumu gi Nyambi re “Mutu sadili monyu kane biguye.”»
5Vane, Mbeni negubege Sesu gu yulu mukongu. Ne gumurigitse ngalu ngalu melongu motsu me butambe. 6Ne gumwambile re «Nigukuvege didume ne bundumbe bu melongu motsu mame. Nibenze kuvege byotsu bine mbare bi ami, nyabivegi mutu wu mebeni nyarondi. 7Kabe ndyayu, gere wusekutemine, byotsu bibi bigube bi agu.» 8Sesu negumwagule re «Direndu mu gisangumu gi Nyambi re “Wugukutemine ka Fumu Nyambi agu. Wukumu dyanzilange yandi vike.”»
9Mbeni negukunde bege Sesu gu Serisalem. Negu musunze gu yulu ndagu Nyambi. Negumwambile re «Gere negungenze wu mwane Nyambi, kwe kubumi gutsi. 10Mba direndu mugisangumu gi Nyambi re “Nyambi aguvege yanze tsi andi dinyange di gukubandekene.” 11Dikunde rendu re: “Yanze tsi Nyambi tsi gukwake mu mekake me awu, nonge gyeru gi agu gitsatse gurule dimani.”» 12Sesu negumwagule re: «Dikunde rendu re: “Wuyamange Fumu Nyambi agu.”» 13Negumane mange Sesu murime, ne mbili bivagitsi, Mbeni negurageme nandi kwange ne gigumbi gi Nyambi yandi beni tsonzige.
Sesu mapakile gidyanzu gi andi gu Galile
14Sesu negusuge gu ginange gyumuge gi Sudé akugabuge gu Galile. Dinyuni diboti dikumuvegange ngudu. Didume di andi diku panzegene mu mimbu motsu ne yadi tsi Galile. 15Sesu anenzange gu ndagu ndembu nevu vagilange ne mbetsi. Batu botsu bekumudumisange.
Sesu ganenzi musamu boti gu Nazarete
16Sesu negugabuge gu Nasarete yadi yi yandi bungugile. Wisi gukole akwingene gu ndagu ndembu nevu gavagile ne mbetsi. Negurambuge, ayende ve wusu batu botsu gwe tangune gisangumu gi Nyambi. 17Vane mudyanzitsi wugu ndagu ndembu ne gumusambule gisangumu gi mubigitsi Esayi. Negugipusule, akusupugile mbure yi yandi ronde gutangune. Negutangune mbure yirendu re
18«Dinyuni di Fumu di nami,
Nyambi asenzale gugubege musamu boti gu bigayi. Asetinde gusegwambile batu begu nzugu beguvuduge, batu benepafu, misu mawu me gutsibuge begulabe dikengi, batu bakengi begobulu.
19Nyambi setinde gusegwambile batu re Mupume wuwu, mupume wu nugulabile gyesi gi Fumu.»
20Sesu negupiete gisangumu gi Nyambi. Negugisambule mudyanzitsi wu ndagu ndembu, negutsagene. Batu botsu babe gu gari ndagu ndembu bekumugengisange. 21Vane, Sesu kunde pakile belonze re «Nemuni mambu motsu me nusegulu mu musamu Nyambi wu nyarugili negutangune me gulabene.» 22Batu botsu bekwambesenange yawu ne yawu re «Mambu mesegwambile Sesu memeboti. Tumbe, sa mwane Sosefe?» 23Sesu negubambile re «Mandi nuguperile kugu ya gwambili re “Ndyayu wabugi batu, kwebugi ndya beni.” Nugukunde nyambile re “Dusegulu motsu me wuse vage gu Kaperenawum, me dyanzi gwandi vave gu yadi agu.” 24Yi, negungenze, nyanwambili bureti: Mubigitsi asa singu gu dimbu di yandi burilu. 25Negungenze nyanwambili bureti: Gu gigumbi gi Eli, gube mbili bekwili gu bulongu bu andi bu Iserayel, ve Nyambi vagile re mvule sagunoge gu mipume mireru ne migweli misyamenu. Gukube mundale mu bulongu bwotsu bu Iserayel. 26Nyambi tsetinde Eli nesi gu mukwili mosi wu Iserayel, tumbe amutinde ke gu mukwili mugetu wu tsagenange gu Sarepte gu yadi beli ne Sidu 27Gigumbi gi mubigitsi Elise, gubange gwandi mbili batu babange ne bwatsi gu Iserayel, Nyambi beluse ke Naman mwisi Siri. Tumbe nesi gibedu gimosi gi Iserayel asebeluse.»
28Ve batu botsu babe gu ndagu ndembu bulilu mambu mambilange Sesu, yawu botsu bekumutibile mune kabu. 29Yawu botsu berambuge, bebege Sesu ne ngudu kwange gu yulu mukongu gu rungilu dimbu di awu. Nonge beku mubonduse gu mfudu akufu. 30Sesu kuvyoge vegari awu akwene gwende.
Sesu beluse mutu wube ne dinyuni dibi
31Sesu sunde gu kaperenawum, yadi yi Galile. Anenzange batu wisi gukole. 32Batu babe gu ndagu ndembu bekumamange ginenzitsi gi andi. Mbare anenzange ne ndure.
33Gugari ndagu ndembu gube mutu wube ne dinyuni dibi. Dinyuni dibi negwamuge veveni: 34«Ah! Sesu yi Nasarete, dusisi! Dwayabi re wutseruge gutse duboke! Nyakuyabi veveni, wu rereri yitse vegitse Nyambi!» 35Sesu negumukenine, negumwambile re «Vole, vuduge mu mutu wune!»
Dinyuni dibi diberuse mutune vegari batu, dinyuni dibi negu vuduge dise mutsungule. 36Batu botsu bekudimame. Bekwivusenange yawu ne yawu: «Agi gyambitsi gi mutu wune, are guvagere tsye? Agagwambili ne ndure ne ngudu, la menyuni mabi mekuvuduge!» 37Kavane, didume di Sesu diku panzegene ne muposi wotsu.
Sesu gabelusi mbili bibedu
38Sesu ne gumane vuduse menyuni mabi mu mutu wune, neguvuduge gu ndagu ndembu, akwende gu ndagu yi mutu wa nengure Simu. Gune, aragesenu boyi bu Simu gureme garegemi ne gyotsi. Batu babe gu ndagu be lembige Sesu nonge akumubeluse. 39Sesu negubambeme ne gibedu, abandeme, akenine gyotsi, gyotsi negumusuge abeluge. Vane ne vane arambuge negupakile belambile biguye. 40Tsisige, batu babange ne bibedu mu mbugi tsi awu, kepagere mubelu, bekubebegange gu Sesu. Akubetsabigange mekake, akubebelusange. 41Sesu avudusange gwandi menyuni mabi mu mbili batu. Menyuni mabi mekwamugange re «Ndyayu wu mwane Nyambi.» Sesu negubekenine nonge betsatse kunde gwambile mbare beyabange re Kirisete mukani wutindu ne Nyambi.
Sesu ganenzi gu Sudé
42Wisi negutsamuge, Sesu neguvuduge gu ndagu, negwende gu kumu yisamunage. Mbili batu be Kapernaum bekumukebange, negumusupugile, beronde re atsageni nawu aya gwende. 43Tumbe, Sesu bambile re «Nonge nyendi gwandi gu yadi tsi nzusu gwene lage musamu boti wu bulongu bu Nyambi. Re dibandu Nyambi tindile mu butambe.» 44Vane, akukunde nenzange musamu boti mu ndagu tsi ndembu tsi Galile.
Pašlaik izvēlēts:
Luc 4: SWJ
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES