João 2
2
Hnunrowlu Nwaka Hyiywaka Jesus Piranapni
1Waneya hepi hohne hiknohinixka rawatka hnunrowlu Caná poktshi, Galileia tshijneya. Jesus hinro koxa wane hwa.
2Hiyrun-koxa Jesus hiyrunu rasruklene tshanixka hnunrowlu nwaka.
3Waneya vinho-ha nikawninixka, Jesus hinro wan-tshinru:
— Vinho-ha nikawnahatanatka.
4Waneya Jesus wan-tshinro:
— Suxo, klu tshinanhe pujhano hita? Nopapkolu hi hapokawa.
5Waneya wala wan-tshinna towrertshine:
— Klunerukta runkajinhi, wale potuko hkamhanu.
6Wanekananru seis hachhaji, sotlu kamhikolu. Judeu-nerune powratjexinriwa tshinanu. Satkaka oitenta ho cem litros honha hkachita.
7Waneya Jesus wla tshinna towrertshine:
— Honha htsepotanru hachhajkaka. Waneya htsepohapotutluna hachhajkaka haté hipto potuko.
8Waneya wla htshinatkana:
— Hsajikhatanu xawakni. Hnunrowatatshri nikle kosekatshri nwaka hanikanru.
Waneya ranikanwakatluna.
9Hnunrowatatshri nikle kosekatshri hi himatlu hanhe tuchpajya vinho-ha seyni towrertshine honha sajehatatshine himatlu. Waneya hnunrowatatshri nikle kosekatshri hetumhiniklunutkalu vinho-ha honha kamhikaluro, repuklu hnunrowatatshri.
10Wla htshinatkalu:
— Ptowru yineru niklu yinuwaklekawahapka hitakjetlu vinho-ha kihleru, waneya tnikahatkoklunutka vinho-ha kihlero waneya tutakkatka vinho-ha kayaho hihlenurutokotka. Seyni pixa vinho-ha kihleru pimreta haté xawakniwa.
11Wan-rixa yinuwakletlu Caná poktshiya, Galileia tshijne hajeruya Jesus kamhalu mitshikananu hetkaluru hkamhaleru. Ruphujetlu royaknu hiyrunu rasruklene halixatkalu.
12Waneya wane wkatanu, Jesus, runro, himolene hiyrun-koxa rasruklene Cafarnaum poktshi nwaka hyatkana. Wan-rutukatkana pimri hohnekaka.
Jesus Hoyakalupji Nwaka Hyiywaka Piranapni
13 Páscoa hohne judeu kahwakpirreru hohne wkatanuko, Jesus Jerusalém poktshi nwaka hya.
14Waneya Hoyakalupji hyoptoxyana boi-ne hichanretatshine, carneiro hichanretatshine, kamowane hichanretatshine hiyrun-koxa tiyiro hipekjetatshine wane tuplatatshine hyoptota.
15Kotshipjerewapi hkamha katsaluya. Waneya Hoyakalupji rakajyatkana ptowrunek-yine, carneiro-ne hiyrun-koxa boi-ne Hoyakalupji maleka sreta hyiywakapna. Tiyiro hipekjetatshine tiyirote rupkaka hiyrun-koxa hyotkakanru mes-kakni.
16Hiyrunu wla htshinna kamowane hichanretatshine:
— Xye ptowruka hewi hkochpajini! Hi hkamhanru maronewawakapji rixyawakapa Nurupji.
17Waneya rasruklene hichinikanretlu yonatkaluru wla tshinatshri: “Hoyakalu, pipji tshinanu njempotuthonuklu, naji halhapirata hatatjewa tshitshmero nwahajita.”
18Waneya judeu-ne hihitlu, wla htshinruna:
— Kluneru hetkaluru pekhitanwu wimaxyawakaplu towutatshriyi xyekaka pumukata kamhalexyawaka?
19Waneya Jesus wla tshinna:
— Xye Hoyakalupji hyotkakanu hixa waneya map-hohne pejnu nkamhanutnaklu hita.
20Waneya judeu-ne wla tshinru:
— Xye pantshi quarenta e seis mhale pejnu hkamhakatka. Ha pixa, pkahwakhe map-hohne pejnu tsonu tshinanu pkamhanutnaklu?
21Seyni Hoyakalupji pirana hkochtshekleru, waleni waleko himane pirana.
22Hiyáhoni Jesus hipnatshine tskala riwejiniklunutka, rasruklene hichinikaplu htshinyawakna mitshi. Waneya ralixluna Hoyakalu tokanu yonatkaluru hiyrunu Jesus tokanu htshinakanaxyawakna ralixatkana.
Jesus Himatahchinikanuxyawakna Ptowrunek-yine Piranapni
23Jerusalém poktshi rawakanaxini Jesus Páscoa nikle hohne tshinanu, rexinixkaluna himyekaklewatatshrikaka Jesus kamhaleru, hixolune yine halixlu Jesus.
24Seyni Jesus hi munanhana yine klu tshinanu rimatahchinikanutna ptowrunek-yine.
25Hiyáhoni hi rujhatkalu satu yineru hasrujyawaklu hanu rixa yineru klu tshinanu rimatatkalu yineru hchinikanu hwatshri.
Pašlaik izvēlēts:
João 2: mpdBiblia
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil