Luke 21
21
Ugingigham Tunusaa
1Jesus Temple‑mesimaluni, esghapakii aklungilnguut tunusameggneng manilghutagnun kanaghtilghiit. 2Taagken esghapakaa aklumalghii ugingighaq manilghutagnun kanaghtilghii maalghugegneng coin‑ngiighhaagneng. 3Jesus‑em pikii, “Ipa ungipaatamsi, una aklumalghii ugingighaq kanaghtinguuq uglaghataghaghluku tamaakuneng aklungilngughneng. 4Tamaakut tunquugut aklungighllagmeggneng, iwernga ugingigham aklumaghllagmini qamaglluku tuunaa kiyaghusighqaqsaqeni.”
Naafqelleghqaa Temple‑em
5Ilangita maligsaaghtengan akuzitkegkaat Temple‑a. Pinighyagutkiit pinighnaghllaget uyghaget, tunusatlu tuunegkat Kiyaghneghmun pinighnaghsaasiqegkiit Temple‑mun. Iwernga Jesus‑em pikii, 6“Tamaakut esghaghteghasi, pilleghqaq kaasaghqaaguq talwa ataasiq uyghak tawanlenguq nemininnanghituq, qamaglluteng ulleghqughyaghqaagut.”
Seghleliillghetlu Amyuqetaatkellghetlu
7Ilangita maligsaaghtengan aaptekaat, “Apeghtughista, qakun tamaakut piyaghqaawat? Sangulleqa liisimakusighqaghput tamaakut piyaghqaaghtekata?”
8Kiimsiqii, “Kelengatek, puughtestegpenasi, qayughllak uglaq taginaqnguuq aatqa atuqluku whaten pimaghmeng, ‘Whanga Christ‑anguunga!’ piiqellequtlu, ‘Pilleghqaq kaatuq!’ Iwernga maligsaqunaki. 9Kakavegpenasi nagaququfsiki nunat pillugutnguniluki, nunalgutkullghiitlu pillugutnguniluki. Sivukluni tamaana piyaghqapestaaghuuq, iwernga tawaninginaq iqugtelleq pinaanghituq.”
10Taagken pikii, “Nunat pillugullequt, ataneghpagullghetlu pillugutullequt. 11Nani alngunak nunat uvelegtaghllagllequt, neqangisagllagllequt, allegvikikayugetlu aqnighneghet pillequt. Yuget esghaghlleqiit sangwaat qilagami, kakavaataghnalghiit, allaaghlluwhaghyugnalghiitlu. 12Iwernga qamaglluki tamaakut pistegpenaki, tugulusi amyuqetaatkelleqiisi. Synagogue‑nun aglaallusi nanqiglleqiisi enkaam anusimingllaghlleqiisi. Aglaalleqiisi umiilegnunllu governor‑nunllu nanqigtesqellusi whanga apalluqlunga. 13Taana pilleghqaqaghsi ungipaqesqellunga whanga. 14Enkaangam sumeghtaghaatkekestaghpenaan sameng pilleghqaghsi. 15Whanga akuzitkaghqalilleqamsi, peghqinellelilleqamsillu repall anguyagpesi kipullginaaghpagningitiit akuzillesi nalighmeng temnginguninaanghitiit. 16Talwa angayuqaghpesi, anglegutegpesi, ilakwaaghpesi, ilakumtaaghpesi uveghpagulleqiisi igleghutistenun, enkaam ilasi tuqulleqiit. 17Whanga apalluqlunga tamaghhaghmi yugem ugumikeraaghlleqiisi. 18Iwernga naasqughpesineng ataasiq nuyaq iflanaanghituq. 19Ugpeqillesi ayepsugitestekufsiki allgeghlleqaghsi unguvalleghsi.
Jesus‑em Akuzitkegkanga Jerusalem‑em Naafqelleghqaa
20“Tawani esghaqufsigu Jerusalem kangllukangat pilluwaghtet, taawa liisimakelleqaghsi qantaghaqun naafqelleghqaa. 21Taagken Judea‑melnguut anagniighhaat naayghanun, Jerusalem‑emelnguutlu aghulaqelghaat, eslataanilnguutlu itefqaameng pilghaat. 22Qayughllak tamaakuni aghneghni Kiyaghneghem aghyuughlleqii Jews‑et. Enkaam uuknaliqistet igaquqiit taakuneng aghneghneng qamaglluteng apeghiighllequt. 23Seghleghwaaghunaqnguut qumilgetlu mamaghtalgetlu anagniighnaqutkelleghqiit. Seghleliighllagem kaannaqngwaa Israel‑em nunanga qayughllak Kiyaghneghem aghyuughnaqngwii yugi. 24Ilangi tuqulleqiit savigpagkun, ilangi tuguluki aghulaqulleqiit tamanganun nunanun. Enkaam Gentile‑et kayaalqelleqaatlu igleghulleqaatlu Jerusalem, kenlanga pilleghqaat kenletghuutellghanun.
Tagilleghqaa Ighneghan Yugem
25“Taakwaningani sangwaat alingruughnalghiit pillequt siqineghqun, tanqikun, ighaleqetaaghteggun. Nunami, nunataghhaani tamaghhaani yuget alingruughllagllequtlu kukragyugllequtlu sangami kellii qallaghtelleghllaganengllu qagingughtelleghllaganengllu. 26Yuget esghaqumegteki aghtughyaghqaanghillghet qilagami qapraghqesleghhiit igleghneghmeggneng, teggellghiighutkeghllaglleqaat saaqutanga nuna. Enkaam alingruughem tuquraagllequt. 27Taagken esghaghlleqaat Ighnegha Yugem tagilghii qilagwaaghqun aghtughyaghqaanghillelighlunillu nighughqellelighllaglunillu. 28Tamaana tawaten pikestaqan, nekevlusi sivuglleghhaasi, qayughllak yugulillengyaghtungestaghtusi.”
Uqfiga Figs‑em Liitusighqaq
29Taagken Jesus‑em ungipaghaatkii, “Esghaqaghteggu figs‑em uqfiga, qamagllukillu uqfilghutet. 30Esghaneghpesiki ququngangekestanghata, liisimakaqaghsi kiigyaghtulghii. 31Tawateghpigaq qamagtengngwaaghluki aapqanka esghaqufsiki, liisimakelleqaghsi Ataneghpagullgha Kiyaghneghem kaasaghtungestalghii. 32Ipa ungipaatamsi, maaten unguvalghiit tuqulaghaatestegpenaki qamaglluteng tamaakut piyaghqaagut. 33Qilagenkuk, nunankuk aviighusaghqaaguk, iwernga whanga akuzitenka aviighunnaanghitut.
Kelengalleghqaq
34“Kelengalusi, aghsaghpaagtegpenasi neqenghaghqemmeng, meghuutelleghmeng, nalighmeng sumeghyaligpenasi nunam pinganeng. Tawaten pikufsi taam aghneghem kaatqaghnayukangisi naapleghhiistun. 35Taana Aghneq kaasaghqaaguq iingunaghhaanun yugnun nunamelngughnun. 36Enkaam kelengatek quunpeng! Yughaghtek anagyaqlegesqelluki tamaakut qamaglluki pikata, nekevyaqlegesqellusi sivungakun Ighneghan Yugem.”
37Aghhutanga tamaghhaan Jesus apeghtughiiqelghii Temple‑mi, iwernga aaneghmini unugmi Mount Olives‑metaqelghii. 38Unaanguluku yuget qamaglluteng aglaghtuutaqelghiit Temple‑mun nagannaluku.
Pašlaik izvēlēts:
Luke 21: ess
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2018, Wycliffe Bible Translators, Inc. All rights reserved.