Luke 19
19
Jesus‑enkuk Zacchaeus‑enkuk
1Jesus kaalluni Jericho‑mun akulngakun igleghtekaa. 2Taawanguq umiilgat tax‑meng qerngughtistet, aatgha Zacchaeus, aklungilnguq. 3Esghaghyukaa naliitanga Jesus, iwernga amsakaghtaghhaatmineng esghaamangilkanga qayughllak yugtupiglleghhii. 4Enkaam aqfaatkaq sivutghulluki yulghutet, taagken mayuqaa sycamore‑a uqfik esghaghnaluku Jesus qayughllak taakwagun naghughhnaqelghii. 5Jesus kaalluni uqfigmun, sivugfikluku pikaa, “Zacchaeus, egmiinaq ukigi qayughllak aghneghmi whani elpesinitepestaaghnaqnguunga.”
6Ukigaghlluni, ellmeggnun Jesus aglaalluku quyakepiglluku upughatkaa. 7Yulghutet esghapagluku qamaglluteng akuzimleghaatkegkaat, “Seghleghqestemun aga aqelqaayaghtughtuq!”
8Iwernga Zacchaeus‑em nekevluni Ataneq pikaa, “Ataneq, aveglluku aklungika tuunaqaqa aklumalghiinun. Enkaam puughsimakumkun kina estamaghqelluku veghulleqaqa.”
9Jesus‑em pikaa, “Aghneghmi whani, uum yugem ugpeqegkaqutmineng Kiyaghneq, ellnga kingunqaaghtepiigaa Abraham‑em. Enkaam Kiyaghneghem yugulii mangteghami whani kiyaghlleghhiit. 10Ighnegha Yugem tagikaaguq ivaghinaluni iflakaneng yugulinaluki.”
Jesus‑em Ungipaghaatkegkangi Gold‑et Coin‑et
11Yuget nagatngukangat Jesus. Sumeghmeggni kaaskumi Jerusalem‑emun Ataneghpagullgha Kiyaghneghem piinlighaghhnaqniluku pikaat. Enkaam liigikesqelluki Jesus‑em ungipaghaatkii. 12Pikii, “Aangwaaq yuuk aghulaqumalghii uyavanun nunamun umiilgughhnaluni, apeghiiqumi uteghnighyaghqaaluni. 13Aghulaqfagilgami tagsighteghluki qula qepghaghteni tunquqii gold‑meng coin‑meng. Pikii, ‘Kenlanga uteghnillemnun tukfighisiqitekillu akilpegaasiqitekillu nulastesqelluku manika.’ 14Iwernga nunalgutangita ugumikegkangat, enkaam aghulaqsan kayagtekiit yuget umiilegpigaghmun whaten pisqelluku, ‘Taana yuuk umiilkesunghitaghput.’
15“Iwernga Umiilegpigaam aangwaaq yuuk umiilgughtestekaa. Uteghnighluni nunaminun tagsiqliqii qepghaghtet manilitkani liigiknaluki naten angkaan allgeghusimatangi.
16“Sivuliim tagiluni pikaa, ‘Ataneq, taagken tagivaqaghpeneng allgeghsimaanka qulaghyaget gold‑et coin‑et.’ 17Umiilgem pikaa, ‘Seghleghhalek, pinilghiinguuten qepghaghta! Ataasiighmetutegpeneng sasqughhaghmun, igleghutistengllaghnaqamken qulaghyagnun neghllagnun.’ 18Tuunglighhaan qepghaghtem tagiluni pikaa, ‘Ataneq, taagken tagivaqaghpeneng allgeghsimaanka tallimagyaget gold‑et coin‑et.’ 19Umiilgem pikaa, ‘Elpek igleghunnaqaten tallimat neghllaget.’ 20Taagken pingayaat qepghaghtet tagiluni pikaa, ‘Ataneq, ang, gold‑a coin‑en, kakegllugiitakun iimgulluku iiqaqaqa. 21Alikamken aaghsaghqaanghitutegpeneng. Tugutkayuguuten elpek pikenghilkegpeneng, saghnakayuguutenllu piitesighaqaqenghilkegpeneng.’ 22Umiilgem pikaa, ‘Uyuq, seghleq qepghaghta. Akuziteten elpenun nanqigtusiqnaqanka. Liisimakaghpenga aaghsaghqaanghilnguugunga. Tugutkayuguunga whanga pikenghilkemneng, unataqayuguungallu piitistekaqenghilkemneng. 23Sanganꞌngam manika kanaghhnanighsigu bank‑amun? Uteghnillemni veghhnayaghaqa allgeghnelighluku.’ 24Taagken nekevghallghiit tawani, pikii, ‘Tuguluku ellnganeng gold‑a coin‑a tuuniteggu qepghaghtemun qulaghyak coin‑elegmun.’ 25Pikaat, ‘Ataneq, siingenllu qulaghyak coin‑elguuq!’ 26Umiilgem pikii, ‘Ungipaatamsi, tamaghhaghmi sameng allgeghutkaq tuunegkamneng tuunataghaghyaghqaaguq. Iwernga taana allgeghutellghilnguq, talwa salgughngaan ellnganeng iqilleqiit. 27Taagken umiilek pikaq, Naaki tamaakut anguyagenka umiilgutesunghilnguut whangamnun? Tagilluki whavek tuququghteki manumni!’”
Umiilguluni Jesus Tagilghii Jerusalem‑emun
28Ungipaghaneghmeng apeghiighyami Jesus‑em sivullgaaqii Jerusalem‑emun. 29Tughaaghaqaaklu Bethphage‑enkuk Bethany‑nkuk, Mount Olives‑melnguuk, maalghuk maligsaaghtegni kayagtekakek sivullgaaqestiisqellukek. 30Pikakek, “Tazingavek nemun aglaghtek, iitghutkelluku esghaghlleqaghtek donkey‑ghaq petugngalghii; kitum alngunak igleghusiqigalkanga. Itemulluku taginnakesek. 31Kitum aaptekangistek, ‘Sangan itemutestegnegu?’ Whaten kiimsighnaaghaghtek, ‘Atanghem atuqsugaa.’”
32Taagken aghulaqlutek esghaqaak Jesus‑em apellghatun ayuqluku. 33Itemusimaluku donkey‑ghaq yugita aaptekagket, “Sangan donkey‑ghaq itemutestegnegu?” 34Kiimsiqiik, “Atanghem atuqsugaa.” 35Enkaam Jesus‑mun tagilluku, qaaslimeggneng tefqughvikluku donkey‑ghaq, taagken Jesus aqumestekaat qaayngakun. 36Igleghsan, yuget qaasliteng saaghquqiit tuumkaghqaakun. 37Jerusalem‑emun kaasaghtughluni, kaataqaallu ukigyaghaq tumenilnguq Mount Olives‑meng, iingunaghmeng maligsaaghtelghuteghllagi quyateghllagughtekat. Iglagtupigllutengllu usuqegkaat Kiyaghneq Jesus‑em allaaghlluwhaghtilleghllaganeng esghapakameggneng. 38Pikat,
“Kiyaghneghem quyasligu Umiilek tagilghii aatghakun Atanghem!
Nekeggmelleq qilagmi, usuqnaghhaleklu Kiyaghneq uusqalleghpigaghmelnguq!”
39Taagken ilangi Pharisees‑et yulghutnilnguut pikaat, “Apeghtughista, maligsaaghteten nepiighesqiki.”
40Jesus‑em pikii, “Ungipaatamsi, nepiighngayaqata, uyghaget akilghuughllagnayaghtut.”
Jesus‑em Qiyakegkanga Jerusalem
41Jesus kaasaghtughluni Jerusalem‑emun, esghaghyamigu qiyakegkaa. 42Pikaa, “Whaa maaten liisimakegkentuq sangutanga aklukegkan kiyaghtesqelluten nekeggmelleghmi! Iwernga maaten liigikepagningitan. 43Aghneghet kaannaqnguut anguyagpek amigiiritaghvingllaghlleqaaten uzimun. Aghuliighhnaqngwaat igleghalleq iteghmunllu aanmunllu, kangllulleqaatenllu uzimun. 44Naafqelleqaaten, tuququghlleqiitlu yugten mingllutegpek ilunganilnguut, talwa ataasiq uyghak nemininnanghituq. Tamaakut qamaglluteng piyaghqaagut qayughllak liigikenghilken Kiyaghneghem yuguliyaghtuqaqsaqangaten!”
Jesus Temple‑mun Pilghii
45Taagken Jesus iitghaqngami Temple‑mun, yuget tukfightulghiitlu akilpegalghiitlu sakritutepiglluki eslatmun aanesquqii. 46Ungipaatkii, “Igaqngaaq Akuzitni Igaqegkani Kiyaghneq pikaaguq, ‘Mangteghaqa yughaghviguuq yugnun’, iwernga elpesi iighaghvingllaghaghsi teglegniightenun!”
47Aghhutanga tamaghhaan, Jesus apeghtughikaq Temple‑mi. Chief priest‑etlu, apeghtughikayugetlu Liilightuusaneng, igleghutistengitallu yuget agghitkengngukangat naten tuqutelleghqameng. 48Iwernga tuqutepagningitkaat qayughllak yulghuteghllaget kanglluluku nagatngwaaghutngukangit apeghtuusii.
Pašlaik izvēlēts:
Luke 19: ess
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2018, Wycliffe Bible Translators, Inc. All rights reserved.