മത്തായി 5
5
ആര് ബാഗ്യക്കാറാര്
1ഏസു ആള്‌കൂട്ടണ കണ്ട് ഒരു മലേക്കുദ്ദാക്കേ്റി പോയി കുക്കാന്താ്. അദ്‌ക്കെ തന്ന് സൊല്ലുപഡി ണഡാക്കവാര്‌മ് ബന്താര്. 2അക്കുളെ ഏസു അവാര്‌ക്ക് ഇച്ചെ സൊല്ലികൊണ്ട് പഡിസ്യ പ്‌ഡിത്താ്:
3<<എല്ല കാര്യഗാക്ക്‌മ് ബേ്ണ്ടി സാമിക്കെ അണ്ടിക്കൊള്ളുറവാര് ബാഗ്യക്കാറാര്,
എന്ത്‌ക്കെന്റ അവാര് സാമി ആള്‌റാദ്‌ക്ക് പട്ടവാര് ആവാര്.
4ഇപ്പ് ദുക്കത്തോഡിര്‌ക്കവാര് ബാഗ്യക്കാറാര്,
എന്ത്‌ക്കെന്റ സാമി അവാര്‌ണ ദയ്യിരപഡ്‌സുവാ്.
5തണിമോഡെ പ്‌ളാങ്ക്‌റവാര് ബാഗ്യക്കാറാര്,
എന്ത്‌ക്കെന്റ ബൂമിന അവാര് തമ്മ് കയ്യിക്കാക്കുവാര്.
6ണേര്‌മേക്ക് ബേ്ണ്ടി മ്‌ഗ്‌ന്ത ആസെപഡ്‌റവാര് ബാഗ്യക്കാറാര്.
എന്ത്‌ക്കെന്റ സാമി അവാര്‌ക്ക് ണേര്‌മെ ഉള്ള കാര്യണ മദിവരമാട്ട്‌ക്ക് സെയ്‌ദ് കൊഡുക്കുവാ്.
7അഡ്‌ത്തവാര്‌ണ ബേ്റ്‌വേരവാര് ബാഗ്യക്കാറാര്,
എന്ത്‌ക്കെന്റ സാമിക്ക്‌മ് അവാരോഡെ ബേ്റ്‌വേവു.
8തമാണ ഒരേപെ്ട്ട് സാമിക്ക് ബേ്ണ്ടി ഒപ്പഡിത്തവാര് ബാഗ്യക്കാറാര്,
എന്ത്‌ക്കെന്റ അവാര് സാമിന കാണുവാര്.
9അഡ്‌ത്തവാര്‌ക്ക് ണിമ്മദി ഉണ്ടാക്ക്‌റവാര് ബാഗ്യക്കാറാര്,
എന്ത്‌ക്കെന്റ അവാര് സാമി പ്‌ള്ളെഗ എന്ത് പേര് കെ്ഡേസുവാര്.
10ണേര്‌മുള്ള കാര്യഗ സെയ്‌ദാദ്‌ണാലെ കൊഡിമെപഡ്‌റവാര് ബാഗ്യക്കാറാര്,
എന്ത്‌ക്കെന്റ അവാര് സാമി ആള്‌റാദ്‌ക്ക് പട്ടവാര് ആവാര്.
11ണിമ്മ എന്ന് സൊല്ലുപഡി ണഡാക്കവാര് ആനാദ്‌ണാലെ ണിമാണ ണാണഗെ്ഡ്‌സ്‌ഗാട്ടിമ്, കൊഡിമെപഡ്‌സ്‌ഗാട്ടിമ്, എല്ല ദിന്‌സ് കെ്ട്ട കാര്യഗ സെയ്‌രവാരെന്ത് ണിമാണ പറ്റി ഉറുട്ടു സൊല്ലുഗാട്ടിമ് ണിമ്മ ബാഗ്യക്കാറാര്‌ത്തെ. 12മേലോഗാത്തിലി സാമി ണിമാക്ക് തര കൂലി എത്തറാഗൊ ബെല്ല്യാദായിര്‌ക്കാദ്‌ണാലെ ണിമ്മ പിര്യപൊങ്കിമറിരി. എന്ത്‌ക്കെന്റ ണിമാക്ക് മുദ പെ്ളേത്തിര്‌ന്ത സാമിദാസ്‌ഗണാമ് ആള്‌ഗ ഇദേപാസെത്തെ കൊഡിമെപഡ്‌സിര്‌ക്കാരല്ല.>>
ഉപ്പുമ് ബെ്ള്‌സാമ്
13<<ണിമ്മ ബൂമിലിര്‌ക്കവാര്‌ക്ക് ഉപ്പായിര്‌ക്കേര്. ആന ഉപ്പുക്കിര്‌ക്ക രുജി ഇല്ലാദെ പോന അദ്‌ണ എച്ചെ പിന്നേമ് രുജി ബര്‌സ്യ മുഡ്യു? അദ്‌ണ ബെ്ള്യെ ബീസെക്ക്യാത്തെ പറ്റു. അദ്‌ണ പിന്നെ ആള്‌ഗെല്ല മെ്ട്ടി തൊഗേത്തെക്കുവാര്. അല്ലാദെ ബേ്റെ ഒന്റുക്ക്‌മ് ഉവഗാരപഡമാട്ട.
14ണിമ്മ ഉലഗാത്തില്യവാര്‌ക്ക് ബെ്ള്‌സായിര്‌ക്കേര്. മലേക്കുദ്ദാക്കിര്‌ക്ക പട്ടണാക്ക് മറേന്തിര്‌ക്ക്യ മുഡ്യമാട്ട. 15ബ്‌ളാക്ക്‌ണ കത്തിസി ആര്‌മ് തെക്ക്‌ണ കമ്‌സി ബെക്കമാട്ടാര്. അദ്‌ണ മദ്‌ള്‌ക്കുദാക്ക്‌ത്തെ ബെക്കുവാര്. അപ്പ്‌ത്തെ കൂരേല്യ എല്ലാര്‌ക്ക്‌മ് ബെ്ള്‌സ തട്ടു. 16അദേപാസെ ണിമ്മ സെയ്‌ര ണല്ല കാര്യഗണ കണ്ട് മേലോഗാത്തില്യ ണിമ്മ് അപ്പനാന സാമിന അഡ്‌ത്തവാര് പെര്‌മെപഡ്യ ബേ്ണ്ടി ണിമ്മ് ബെ്ള്‌സ അവാര്‌ക്കെ അഡിക്കുഡൊ.>>
സാമി സട്ടണ പറ്റി പഡ്‌സ്‌റാ്
17<<മോസെ ബെത്ത സാമി സട്ടഗണാഗൊ, സാമിദാസ്‌ഗ സൊന്ന ണായഗണാഗൊ ഇല്ലാദാക്ക്യാത്തെ ണാന് ബന്താദ് എന്ത് ണിമ്മ ണെനേക്കാദി. ഇല്ലാദാക്ക്യ അല്ല, അദിലി സൊല്ലിര്‌ക്ക പാസെ സെയ്‌ദ് മുഡിക്ക്യ ബേ്ണ്ടിത്തെ ണാന് ബന്തിര്‌ക്കാദ്. 18ണേര്‌മായിമ് ണാന് ണിമാക്കെ സൊല്ലുറെ, ഈ ബാന്‌മ് ബൂമിമ് ഇര്‌ക്കമാട്ട്‌ക്ക് മോസെ ബെത്ത സാമി സട്ടാത്തിലിര്‌ക്ക എല്ല കാര്യഗാമ് ണഡാക്ക മാട്ട്‌ക്ക് അദിലിര്‌ക്ക സിന്നൊരു എ്ള്‌ത്തൊ, ഒരു കുത്തോ മാറി പോഗമാട്ട. 19അദ്‌ണാലെ ഈ സട്ടാത്തിലി സൊല്ലിര്‌ക്ക കല്‌പനെഗളിലി ബെല്ല്യാദല്ല എന്ത് ണെനേക്ക ഒരു കല്‌പനെ പഡി ണഡാക്കാദെ അഡ്‌ത്തവാര്‌മ് അയ്യി കല്‌പനെ പഡി ണഡാക്ക ബേ്ഡ എന്ത് പഡ്‌സ്‌റവാന സാമി ആള്‌റാദിലി എല്ലാര്‌ണ ബ്‌ഡ സിന്നവാ് എന്ത് സൊല്ലുവാര്. ആന ഈ കല്‌പനെ പഡി ണഡാന്ത് അഡ്‌ത്തവാര്‌മ് ഈ കല്‌പനെ പഡി ണഡാക്കുഡൊ എന്ത് പഡ്‌സ്‌റവാന സാമി ആള്‌റാദിലി എല്ലാര്‌ണ ബ്‌ഡ ബെല്ല്യവാ് എന്ത് സൊല്ലുവാര്. 20സാമി സെയ്യ സൊല്ലിര്‌ക്ക കാര്യഗണ സെയ്‌രാദിലി പരിസലണാമ് ബേദ ബാത്ത്യലണാമ് ബ്‌ഡ ണമ്പ്യമുഡിരവാര് ആഗാദെ പോന സാമി ആള്‌റാദ്‌ക്ക് എജേഗമാട്ടേര് എന്ത് ണാന് ണിമാക്കെ സൊല്ലുറെ.>>
മൊനേക്ക് പഡ്‌റാദ്‌ണ പറ്റി പഡ്‌സ്‌റാ്
21<< <ആര്‌ണാമ് കൊല്ലുറാക്കില്ലെ#പയണ 20:13 എന്ത്‌മ്, കൊലെ സെയ്‌ദവാ് ദണ്ടണെ ബിദിക്ക് സിക്കുവാ്> എന്ത്‌മ് മുന്തുക്കേത്ത കാലാത്തില്യ പാട്ടലാക്കെ സൊന്നാദ്‌ണ ണിമ്മ കേ്ട്ടിര്‌ക്കേരല്ല? 22ആന ണാന് ണിമാക്കെ സൊല്ലുറാദ് എന്തായെന്റ, അഡ്‌ത്തവാന മൊനേക്ക് പഡ്‌റവാനെല്ല ദണ്ടണെ ബിദിക്ക് സിക്കുവാ്. അഡ്‌ത്തവാന കെമ്‌ഡ എന്ത് സൊന്ന എഗുദാര് ഗോഡ്‌ദിക്കെ ബദ്‌ള് സൊല്ല്യ ബേ്ണ്ടിവരു. അഡ്‌ത്തവാന തൊലേന്തവാ് എന്ത് സൊല്ലുറവാനൊ കെ്ഡാത്ത തീ ണരഗാക്കെ എരെ ആവാ്.
23അദ്‌ണാലെ ണീ ണേര്‌സെ കൊഡുക്ക്യ പലി കൊഡുക്ക മദ്‌ള്‌ക്കെ ബര്‌ഗാട്ടി ണിന്നോഡെ ആരാറ്റ്‌ക്ക് മൊനെ ഇര്‌ക്ക്‌ദ് എന്ത് ണിനാക്ക് ണെനേവു ബന്താക്കി, 24എ്ഡ്‌ത്ത് ബന്ത ണേര്‌സെന പലി കൊഡുക്ക മദ്‌ള്‌ക്കെ ബെത്ത് തള്ളി, മുദ ണീ പോയി ണിന്നോഡെ മൊനെ ഇര്‌ക്കവാനോഡെ റാജി കൂഡു. അദ്‌ക്ക് പ്‌റ ബന്ത് ണിന്ന് ണേര്‌സെന കൊഡു.
25ണിന്ന് പോട്ടിക്കാറാ് ണിനാണ ഗോഡ്‌ദിക്കെ എ്ഡ്‌ത്ത് പോഗാട്ടി എ്ഡെ ബയ്യിലി താനെ ണീ ണിന്ന് പോട്ടിക്കാറാനോഡെ റാജി കൂഡി കൊള്ളുഡൊ. അല്ലാദെ പോന ണിന്ന് പോട്ടിക്കാറാ് ണിനാണ ണായക്കാറാന്‌ദ് കയ്യിക്ക്‌മ് ണായക്കാറാ് ണിനാണ ജെയില് അദിഗാരി കയ്യിക്ക്‌മ് ഒപ്പഡിക്കുവാ്. അച്ചെ ജെയില് അദിഗാരി ണിനാണ ജെയില്‌ക്കേമ് അഡേക്കുവാ്. 26തപ്പ് കെ്ട്ട്യ സൊന്ന പണാണ കെ്ട്ടി മുഡിക്കമാട്ട്‌ക്ക് ണീ ജെയിലിലിര്‌ന്ത് ബെ്ള്യെ ബരമാട്ടെ എന്ത് ണേര്‌മായിമ് ണാന് ണിമാക്കെ സൊല്ലുറെ.>>
ബേസ്യാഡ്‌റാദ്‌ണ പറ്റി പഡ്‌സ്‌റാ്
27<< <ബേസ്യാഡ ബേ്ഡ>#പയണ 20:14 എന്ത് സൊല്ലിര്‌ക്കാദ്‌ണ ണിമ്മ കേ്ട്ടിര്‌ക്കേരല്ല? 28ആന ണാന് ണിമാക്കെ സൊല്ലുറാദ് എന്തായെന്റ, ഒരു പൊമ്പുളേന ണോഡി ആസെപഡ്‌റവാനെല്ല അവാ് തന്ന് മനേസ്സിലിതാനെ അവാളോഡെ ബേസ്യാഡി മുഡിന്ത്‌ദ്. 29ആന ണിന്ന് ബല കണ്ണ് ണിനാണ പാവ സെയ്യ ബയ്യി ബെത്താക്കി അദ്‌ണ സൊളോണ്ടി എ്ഡ്‌ത്തെക്ക്. ണിന്ന് സരിഗല മുച്ചുഡ ണരഗാക്കെ ബീ്റാദ്‌ണ ബ്‌ഡ ണിന്ന് സരിഗലാത്തിലി ഇര്‌ക്കാദിലി ഒന്റു ഇല്ലാദെ ആരാദ് ണിനാക്ക് ണല്ലാദ്. 30ണിന്ന് ബലകയ്യി ണിനാണ പാവ സെയ്യ ബയ്യി ബെത്താക്കി അദ്‌ണ ബെ്ട്ടി എ്ഡ്‌ത്തെക്ക്. ണിന്ന് സരിഗല മുച്ചുഡാമ് ണരഗാക്കെ പോയി ബീ്റാദ്‌ണ ബ്‌ഡ ണിന്ന് സരിഗലാത്തിലി ഇര്‌ക്കാദിലി ഒന്റു ഇല്ലാദെ ആരാദ് ണിനാക്ക് ണല്ലാദ്.>>
ആളാ്ന്‌പെ്ണ്ട് പ്‌റ്‌റാദ്‌ണ പറ്റി പഡ്‌സ്‌റാ്
31<< <ആരാറ്റ് തന്ന് പെ്ണ്ട്‌ണ ബ്‌ട്ടെക്ക്‌റദാനാക്കി, അവാണ ബ്‌ട്ടെക്കിര്‌ക്കെ എന്ത് എ്ള്‌ദിര്‌ക്ക എ്ള്‌ത്ത് അവാള്‌ക്ക് കൊഡുക്കുഡൊ>#മറ്‌ദെ സൊല്ലുറ സട്ട 24:1 എന്ത് സൊല്ലിര്‌ക്ക്‌ദല്ല? 32ആന ണാന് ണിമാക്കെ സൊല്ലുറെ, തന്ന് പെ്ണ്ട് ബേ്റെ ഒരുത്താന ബെത്ത് ണഡാക്കവാളായിര്‌ന്ത അവാണ ബ്‌ട്ടെക്കില. അല്ലാദെ പെ്ണ്ട്‌ണ ബ്‌ട്ടെക്ക്‌റവാനെല്ല അവാണ ബേസ്യാഡ്യ ബെക്കാ്. ആളാ് ബ്‌ട്ടെക്കിനവാണ ആരാറ്റ് എ്ഡ്‌ത്താക്കി അവാ് ബേസ്യാഡ്‌റാ്.>>
സത്ത്യ അഡിക്കാദ്‌ണ പറ്റി പഡ്‌സ്‌റാ്
33<< <ണിമ്മ ഒരു ആള്‌ക്ക് സത്ത്യ അഡിത്ത് കൊഡുത്ത കാര്യണ സെയ്യാദെ ഇര്‌ക്ക ബേ്ഡ എന്ത്‌മ് ആണ്ടവാന്‌ക്ക് സെയ്‌വെ എന്ത് സത്ത്യ അഡിത്ത കാര്യണ സെയ്‌ഡൊ> എന്ത്‌മ് മുന്തുക്കേത്ത പാട്ടലാക്ക് സൊല്ലിര്‌ക്കാദ്‌ണാമ് ണിമ്മ കേ്ട്ടിര്‌ക്കേരല്ല? 34ആന ണാന് ണിമാക്കെ സൊല്ലുറാദ് എന്തായെന്റ, ണിമ്മ സത്ത്യഗെ അഡിക്കാക്കില്ലെ. മേലോഗണ സൊല്ലി സത്ത്യ അഡിക്കാക്കില്ലെ. എന്ത്‌ക്കെന്റ അദ് സാമിദ് കുറിഞ്ചി. 35ബൂമിന അഡിത്ത് സത്ത്യ അഡിക്ക ബേ്ഡ. എന്ത്‌ക്കെന്റ അദ് സാമി ആള്‌റ പട്ട്. എര്‌സലേമ് പേര്‌ണ സൊല്ലി സത്ത്യ അഡിക്കാക്കില്ലെ. എന്ത്‌ക്കെന്റ അദ് മഗാറാജാവാന സാമിദ് പട്ടണ. 36ണിന്ന് തലേന അഡിത്ത് സത്ത്യ അഡിക്കാക്കില്ലെ. എന്ത്‌ക്കെന്റ തലെമൂര്‌ണ ണരേസ്യാഗൊ കറ്‌സ്യാഗൊ ണിന്നാലെ മുഡ്യമാട്ട. 37അദ്‌ണാലെ ഇര്‌ക്ക്‌ദ് എന്ത് സൊന്ന ഇര്‌ക്ക്‌ദ് എന്ത്‌മ്, ഇല്ലെ എന്ത് സൊന്ന ഇല്ലാദേമ് ഇര്‌ക്കുഡൊ. അദ്‌ക്ക് അച്ചാരി സൊല്ലുറ ണായഗളെല്ല കെ്ട്ടവാനോഡിര്‌ന്ത് ബരാദ്‌ത്തെ.>>
പളി എ്ഡ്‌ക്കാദ്‌ണ പറ്റി പഡ്‌സ്‌റാ്
38<< <കണ്ണ്‌ക്ക് ബദ്‌ള് കണ്ണ്‌മ്, പല്ല്‌ക്ക് ബദ്‌ള് പല്ല്‌മ്>#പയണ 21:14; ലേവ്യാര് 24:20; മറ്‌ദെ സൊല്ലുറ സട്ട 19:21 എന്ത് സൊല്ലിര്‌ക്കാദ്‌ണ ണിമ്മ കേ്ട്ടിര്‌ക്കേരല്ല? 39ആന ണാന് ണിമാക്കെ സൊല്ലുറാദ് എന്തായെന്റ, ണിനാക്ക് കെ്ട്ടാദ് സെയ്‌രവാനോഡെ ണീ കെ്ട്ടാദ് സെയ്യാദെ, ണിന്ന്‌ദ് ബല പഗ്‌ഡ്‌ണ അഡിക്കവാന്‌ക്ക് ഇ്ഡ പഗ്‌ഡ്‌ണാമ് കാട്ടി കൊഡു. 40ണിന്നോഡെ പോട്ടിക്ക് ണിന്റ് ഗോഡ്‌ദിക്കെ പോയി ണിന്ന് കമ്‌സ്‌ണ എ്ഡ്‌ക്ക്യ ആസെപഡ്‌റവാന്‌ക്ക് ണിന്ന് കോട്ടുണ ബീസാക്ക് ഊരി കൊഡു. 41ഒരുത്താ് തന്ന് മൂട്ടെന ഒരു മയില് ദൂര സുമാക്ക്യ ണിനാണ ണത്തിന അവാന്‌ദൊപ്പ റണ്ട് മയില് ദൂര എ്ഡ്‌ത്ത് പോ. 42ണിന്നോഡെ ഉദാവി കേ്ക്കവാന്‌ക്ക് ഉദാവി സെയ്‌ദ് കൊഡു. ണിനാണ കുറ്യാപ്പെ കേ്ക്കവാന ബെ്റ്‌ങ്കയ്യോഡെ ബ്‌ഡാദെ.>>
പോട്ടിക്കാറാരോഡെ സീവാ് ബ്‌ഡുഡൊ
43<< <ണിമ്മ് എ്ണേവുക്കാറാര്‌ണ ണിമ്മ സീവാ് ബ്‌ഡുഡൊ#ലേവ്യാര് 19:18 എന്ത്‌മ് ണിമ്മ് പോട്ടിക്കാറാര്‌ണ സീവാ് ബ്‌ഡ ബേ്ഡ> എന്ത്‌മ് സൊല്ലിര്‌ക്കാദ്‌ണ ണിമ്മ കേ്ട്ടിര്‌ക്കേരല്ല? 44ആന ണാന് ണിമാക്കെ സൊല്ലുറാദ് എന്തായെന്റ, ണിമ്മ് പോട്ടിക്കാറാരോഡെ ണിമ്മ സീവാ് ബ്‌ട്ട് ണഡായി. ണിമാണ കൊഡിമെപഡ്‌സ്‌റവാര്‌ക്ക് ബേ്ണ്ടി പരേസിരി. 45ഇച്ചെ സെയ്‌രാദ്‌ണാലെ ണിമ്മ മേലോഗാത്തില്യ ണിമ്മ് അപ്പനാന സാമിക്ക് പ്‌ള്ളെഗ ആവേര്. എന്ത്‌ക്കെന്റ സാമി കേ്ഡ്‌ഗെ്ട്ടവാര്‌ക്ക്‌മ് ണല്ലവാര്‌ക്ക്‌മ് തന്ന് ണേരണ കഡാത്ത്‌റാ്. ണേര്‌മെക്കാറാര്‌ക്ക്‌മ് ണേര്‌മെക്കാറാര് അല്ലാത്തവാര്‌ക്ക്‌മ് മഗേന അഡ്‌സ്‌റാ്. 46ണിമാണ സീവാ് ബ്‌ട്ട് ണഡാക്കവാര്‌ണ താനെ ണിമ്മ സീവാ് ബ്‌ട്ട് ണഡാന്ത ണിമാക്ക് ഒരു കൂലിമ് കെ്ഡേക്കമാട്ട. ണ്‌ഗ്‌ദി പിരിക്കവാരാന കെ്ട്ടവാര്‌മ് അച്ചെത്തെ സെയ്‌രാരല്ല? 47എ്ണേവുക്കാറാരോഡെമാട്ട് ണിമ്മ ണായ പേസി ണഡാക്കദാനാക്കി അഡ്‌ത്തവാര് സെയ്‌രാദ്‌ക്ക്‌മ് അദിഗ ണിമ്മ എന്ത സെയ്‌രേര്? സാമിന തെര്യാത്ത ആള്‌ഗാമ് അദേപാസെ സെയ്‌രാരല്ല? 48അദ്‌ണാലെ മേലോഗാത്തില്യ അപ്പനാന സാമി എല്ല ണല്ല ഗുണഗാമ് തുമ്പിര്‌ക്കവാ് ആയിര്‌ക്ക പാസെ ണിമ്മാമ് എല്ല ണല്ല ഗുണഗാമ് തുമ്പിര്‌ക്കവാരായിരിരി.>>
Pašlaik izvēlēts:
മത്തായി 5: സാമിദ് സേദി
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
New Life Literature