ലൂക്കോസ് 23
23
ഏസുണ പീലത്തോസ്‌ദ് പട്ട്‌ക്ക് എ്ഡ്‌ത്ത് പോരാര്
1അദ്‌ക്ക് പ്‌റ അദിലിര്‌ന്ത എല്ലാര്‌മ് സേന്ത് ഏസുണ പീലത്തോസ്‌ദ് പട്ട്‌ക്കെ എ്ഡ്‌ത്ത് പോയിര്‌ന്ത്: 2<<ഇയാള് എമ്മ്‌ദ് ആള്‌ഗാക്ക് തപ്പാന കാര്യഗണ പഡിസി, താന് ക്‌റ്‌സ്‌ത്ത് എങ്ക റാജാവു എന്ത് സൊല്ലി റോമ ണാഡ് റാജാവുക്ക് ണ്‌ഗ്‌ദി കൊഡുക്കാദ്‌ണ തഡ്‌ക്കാ്>> എന്ത് അയാള്‌ണ പറ്റി കുറ്റ സൊന്നാര്.
3അക്കുളെ പീലത്തോസ് അവാര്‌ക്കെ: <<ണീ എഗുദാര്‌ദ് റാജാവ?>> എന്ത് കേ്ട്ടാ്.
അക്കുളെ ഏസു: <<സെരിത്തെ, ണീ സൊല്ലുറ പാസെത്തെ>> എന്ത് സൊന്നാ്.
4അക്കുളെ പീലത്തോസ് എഗുദ പൂസാരി തലെവലാക്ക്‌മ് ആള്‌ഗാക്ക്‌മ്: <<ഇയാള്‌ണ കുറ്റക്കാറാ് ആക്ക്‌റാദ്‌ക്കുള്ള ഒരു കുറ്റാമ് ഇയാളോഡെ ഇര്‌ന്ത് ണാന് കാണാലെ>> എന്ത് സൊന്നാ്.
5ആന അവാര്: <<ഇയാള് എഗുദ ണാഡിലിര്‌ക്ക ആള്‌ഗണൊട്ടുക്ക് താന് പഡ്‌സ്‌റ കാര്യഗണ പഡിസി ആള്‌ഗാദ്‌ക്കുള്ളുക്ക് കലമ്പാല് ഉണ്ടാക്ക്‌റാ്. ഗെലീലെ ണാഡിലിര്‌ന്ത് എര്‌സലേമ് മാട്ട് ഇയാള് ഇച്ചെ സെയ്‌ദ് ബരാ്>> എന്ത് ഒറേപ്പായി സൊന്നാര്.
പീലത്തോസ് ഏസുണ എരോദാന്‌ദ് പട്ട്‌ക്ക് സൊല്ലിബ്‌ഡ്‌റാ്
6ഇദ്‌ണ കേ്ട്ട് പീലത്തോസ്: <<ഇയാള് ഗെലീലെക്കാറാന?>> എന്ത് കേ്ട്ടാ്. 7അക്കുളെ ഇയാള് എരോദാ് ആള്‌റ പട്ട്‌ക്ക് പട്ടവാനെന്ത് പീലത്തോസ്‌ക്ക് തെരിന്ത്‌ദ്. അദ്‌ണാലെ അയ്യി ഗള്യേലി എര്‌സലേമ്‌ക്ക് ബന്തിര്‌ന്ത എരോദാ് പട്ട്‌ക്കെ ഏസുണ സൊല്ലിബ്‌ട്ടാ്.
8എരോദാന്‌ക്ക് ഏസുണ കാണ്‌ഗാട്ടി റമ്പ പിര്യ ബന്ത്‌ദ്. എന്ത്‌ക്കെന്റ അയാള്‌ണ പറ്റി കേ്ട്ട ണാളിലിര്‌ന്തെ എരോദാ് അയാള്‌ണ കാണ്യ മ്‌ഗ്‌ന്ത ആസെപട്ടിര്‌ന്താ്. അയാള് എന്താറ്റ് അദിസ്യമാന അഡ്യാളഗ സെയ്‌രാദ്‌ണ കാണില എന്ത് അയാള് ണെഞ്ചഡെ ബെത്തിര്‌ന്താ്. 9എരോദാ് ഏസുണ എത്തിന്യൊ കേ്ള്‌വിഗ കേ്ട്ടാ്. ആന ഏസു ഒരു ബദ്‌ള്‌മ് സൊല്ലാലെ. 10അദിലി ണിന്റിര്‌ന്ത എഗുദ പൂസാരി തലെവലാമ്, ബേദ ബാത്ത്യലാമ് അയാള് മ്‌ഗ്‌ന്ത കുറ്റക്കാറാ്ത്തെ എന്ത് സൊല്ലികൊണ്ടിര്‌ന്താര്. 11എരോദാന്‌മ് അയാള്‌ദ് പഡെയാളിഗാമ് ഏസുണ ണാണഗെ്ഡ്‌സി ഒരു ബെലെ ഇല്ലാത്തവാ് ആക്കിന പ്‌റ ദഗദഗാത്ത് മിന്ന്‌റ ഉഡുപ്പുണ ഇക്കിസി പീലത്തോസ്‌ദ് പട്ട്‌ക്കെ തിലിപ്പി സൊല്ലിബ്‌ട്ടാര്. 12പീലത്തോസ്‌മ് എരോദാന്‌മ് അന്നാരമാട്ട്‌മ് പഗെക്കാറാര് ആയിര്‌ന്താര്. ആന അയ്യി ണാളിലിര്‌ന്ത് അവാര് റാജി കൂഡിനാര്.
13പീലത്തോസ് എഗുദ പൂസാരി തലെവലണാമ് എഗുദ മണ്യഗാറാര്‌ഗണാമ് ആള്‌ഗണാമ് ഒളേത്ത് ബര്‌സി 14അവാര്‌ക്കെ ഇച്ചെ സൊന്നാ്: <<ഇയാള് ആള്‌ഗാക്ക് താന് പഡ്‌സ്‌റ കാര്യഗണ പഡിസി ആള്‌ഗാദ്‌ക്കുള്ളുക്ക് കലമ്പാല് ഉണ്ടാക്കിനാ് എന്ത് സൊല്ലി ണിമ്മ എന്ന് പട്ട്‌ക്ക് ഇയാള്‌ണ കൂട്ടി ബന്തേരല്ല. ണാന് ഇയാള്‌ണ ണിമ്മ് മുന്തുക്ക് ബെത്ത് കേ്ള്‌വി കേ്ട്ട് ഗൂഡി ണിമ്മ ഇയാള്‌ക്ക് ണേരെ കുറ്റ സൊന്നേര്. ആന ഒരു കുറ്റാമ് ഇയാളോഡെ ഇര്‌ന്ത് ണാന് കാണാലെ. 15കൊലെ കുറ്റാക്ക് ബിദിക്കാദ്‌ക്കുള്ള ഒന്റുമ് അയാള് സെയ്യാലെ എന്ത് എരോദാ് കണ്ടാദ്‌ണാലെ ഇയാള്‌ണ എന്ന് പട്ട്‌ക്ക് തിലിപ്പി സൊല്ലിബ്‌ട്ടിര്‌ക്കാനല്ല. കണ്ടിപ്പായി ഇയാള് കൊലെ കുറ്റാക്ക് ബിദിക്കാദ്‌ക്കുള്ള ഒന്റുമ് സെയ്യാലെ. 16അദ്‌ണാലെ ഇയാള്‌ണ സാട്ടെബാറ്‌ക്കെ അഡിസി ബ്‌ഡ്‌റെ.>> 17എല്ല പെസഗെ ണോമ്പിക്ക്‌മ് ജെയില്‌ക്കെ ഇക്കി ബെത്തിര്‌ക്കവാരിലിര്‌ന്ത് ഒരു ആള്‌ണ ഇ്റാക്കി ബ്‌ഡ്‌റ പദുവിര്‌ന്ത്‌ദ്.#23:17എല്ല പെസഗെ ണോമ്പിക്ക്‌മ് ജെയില്‌ക്കെ ഇക്കി ബെത്തിര്‌ക്കവാരിലിര്‌ന്ത് ഒരു ആള്‌ണ ഇ്റാക്കി ബ്‌ഡ്‌റ പദുവിര്‌ന്ത്‌ദ്. മുദ എ്ള്‌ദിന കായിദണ ണോഡി എ്ള്‌ദിന ലേസ ഗ്‌റീക്ക് കായിദാത്തിലി ഈ സൊല്ലുസുലാക്ക ഇല്ല.
18ആന ആള്‌ഗ മുച്ചുഡാമ്: <<ഇയാള്‌ണ കൊന്റെക്കുഡൊ. ബറവാസ്‌ണ ഇ്റാക്കി ബ്‌ഡുഡൊ>> എന്ത് ഒരേ ഒപ്പ ആലാത്ത് സൊന്നാര്. 19ഈ ബറവാസ് എങ്കവാ് പട്ടണാത്തിലി ണഡാന്ത കൊലേക്ക്‌മ് കലമ്പാല്‌ക്ക്‌മ് കുറ്റക്കാറാ് ആയിര്‌ന്താ്. അദ്‌ണാലെ അവാന ജെയില്‌ക്ക് ഇക്കിര്‌ന്താര്.
20ഏസുണ ബെ്റ്‌ദെ ബ്‌ഡുഡൊ എന്ത് പീലത്തോസ് ആസെപട്ട് അവാര്‌ണ പിന്നേമ് ഒളേത്ത് ബര്‌സി ണായ പേസിനാ്. 21ആന ആള്‌ഗ: <<അയാള്‌ണ കുരുസ്‌ക്കെ സേത്തി ആണി അഡിത്ത് കൊല്ലുഡൊ, കുരുസ്‌ക്കെ സേത്തി ആണി അഡിത്ത് കൊല്ലുഡൊ>> എന്ത് ആലാത്താലാത്ത് സൊന്നാര്.
22പീലത്തോസ് മൂണാവദ്‌മ്: <<ഇയാള് ണിമാക്ക് എന്ത കുറ്റ സെയ്‌ദാ് എന്ത് ണിമ്മ സൊല്ലുറേര്?>> എന്ത് അവാര്‌ണ കേ്ട്ടാ്. <<ഇയാള്‌ണ കൊലെ കുറ്റാക്ക് ബിദിക്കാദ്‌ക്കുള്ള ഒരു കുറ്റാമ് ണാന് കാണാലെ. അദ്‌ണാലെ അയാള്‌ണ സാട്ടെബാറ്‌ക്കെ അഡിസിന പ്‌റ ബ്‌ഡ്‌റെ>> എന്ത് സൊന്നാ്.
23ആന അവാര്: <<ഏസുണ കുരുസ്‌ക്കെ സേത്തി ആണി അഡിത്ത് കൊല്ലുഡൊ>> എന്ത് ആലാത്ത് ക്‌ളാമ്പി കൊണ്ടെ ഇര്‌ന്താര്. അച്ചെ ആലാത്ത് ക്‌ളാമ്പിനാദ്‌ക്കുള്ള കാര്യ ണഡാന്ത്‌ദ്. 24അവാര് കേ്ട്ട പാസെതാനെ ഏസുണ കൊല്ല്യ പീലത്തോസ് മുഡിവെ്ഡ്‌ത്താ്. 25കലമ്പാല് ഉണ്ടാക്കിനാദ്‌ക്ക്‌മ് കൊലെ സെയ്‌ദാദ്‌ക്ക്‌മ് കുറ്റക്കാറാനായി ജെയില്‌ക്കെ ഇക്കിര്‌ന്ത ബറവാസ്‌ണ അവാര് സൊന്ന പാസെതാനെ ഇ്റാക്കിമ് ബ്‌ട്ടാ്. ആള്‌ഗ ആസെപട്ട പാസെതാനെ സെയ്യ ഏസുണ അവാര് കയ്യിക്കെ കൊഡുത്താ്.
ഏസുണ കുരുസ്‌ക്കെ സേത്തി ആണി അഡിത്ത് കൊല്ലുറാര്
26പഡെഗ ഏസുണ കൊല്ല്യ എ്ഡ്‌ത്ത് പോഗാട്ടി ഗദ്ദേലിര്‌ന്ത് പട്ടണാക്ക് ബന്ത കുറേനെക്കാറാ് സീമോന്‌ണ പ്‌ഡിത്ത് അയാള് സിവാല്‌ക്ക് കുരുസ്‌ണ അവാര് ഏ്റ്‌സി ഏസു പിന്ന്‌ക്ക് ണഡാത്തിനാര്. 27അദ്‌ക്ക് പിന്ന്‌ക്ക് ബെല്ല്യൊരു ആള്‌കൂട്ട പോയി കൊണ്ടിര്‌ന്താര്. അയാള്‌ണ സൊല്ലി ദുക്കാക്ക് ബിക്കിബിക്കി അഗ്‌റ എത്തിന്യൊ പെ്ണ്ണ്‌മക്ക അയ്യി കൂട്ടാത്തിലിര്‌ന്താര്. 28ഏസു തിലിമ്പി അവാര്‌ണ ണോഡി: <<എര്‌സലേമ് പെ്ണ്ണ്‌മക്കാളെ, എനാണ ണെനേത്ത് അഗാദി. ണിമാണാമ് ണിമ്മ് പ്‌ള്ളെഗണാമ് ണെനേത്ത് അഗിരി. 29എന്ത്‌ക്കെന്റ: <ബറാഡിഗാമ്, ബേ്റാഗാത്ത പെ്ണ്ണ്‌മക്കഗാമ്, പച്ചെ പ്‌ള്ളെ ഇല്ലാത്ത അവ്വാസിലാമ് ബാഗ്യക്കാറാര്‌ത്തെ> എന്ത് ആള്‌ഗ സൊല്ലുറ കാല ബര്‌ദ്. 30അയ്യി കാലാക്ക്
<മലെഗണ ണോഡി: <<എമ്മ് കുദ്ദാക്ക് ബന്ത് ബീ്>>
എന്ത്‌മ് ഗുഡ്ഡെഗണ ണോഡി: <<എമാക്കെ ബന്ത് മുച്ചു>> എന്ത്‌മ് സൊല്ല്യ പ്‌ഡിക്കുവാര്.>#ജോസയ്യാ് 10:8
31മര പച്ചോഡിര്‌ക്കാട്ടി ആള്‌ഗ ഇച്ചെ സെയ്‌രദാനാക്കി അയ്യി മര ഉണാന്ത അദ്‌ണ എന്തെല്ല സെയ്‌വാര്>> എന്ത് സൊന്നാ്.
32കെ്ട്ട കാര്യഗ സെയ്‌ദ് കൊലെ കുറ്റാക്ക് ബിദിത്ത റണ്ട് ആള്‌ണാമ് ഏസുദൊപ്പ കൊല്ല്യ എ്ഡ്‌ത്ത് പോനാര്. 33തലെ ഓഡ് എങ്ക എ്ഡേക്ക് പോയി എജ്ജിന പ്‌റ കെ്ട്ട കാര്യഗ സെയ്‌ദ അയ്യി ആള്‌ഗണ ഏസുദ് ബല സാരിമ് ഇ്ഡ സാരിമ് ബെത്ത് കുരുസ്‌ക്കെ സേത്തി ആണി അഡിത്താര്. 34അക്കുളെ ഏസു: <<അപ്പ, ഇവാര് സെയ്‌രാദ് എന്തായെന്റ് ഇവാര്‌ക്കെ തെരിരാദില്ലെ. അദ്‌ണാലെ ഇവാര്‌ണ പൊറുക്കുഡോമെ>> എന്ത് പരേസിനാ്.
അച്ചെ അവാര് ണറ്‌ക്ക് ബീ്ത്തി അയാള്‌ദ് ഉഡുപ്പുണ പങ്കി എ്ഡ്‌ത്താര്. 35ആള്‌ഗെല്ല ഇദ്‌ണ ണോഡികൊണ്ട് അര്‌ഗെ ണിന്റിര്‌ന്താര്. <<ഇയാള് ബേ്റെ ആള്‌ഗണെല്ല കാപാറ്റിനാ്. സാമി സൊല്ലിബ്‌ട്ട ദെങ്ക്‌സ്‌റ ക്‌റ്‌സ്‌ത്ത് ആയിര്‌ന്ത ഇയാള് തനാണതാനെ കാപാറ്റുഡൊ>> എന്ത് സൊല്ലി എഗുദ തലെവല ണാണഗെ്ഡ്‌സിനാര്.
36അദേപാസെ താനെ പഡെയാളിഗാമ് ബന്ത് ഏസുണ ണാണഗെ്ഡ്‌സിനാര്. അവാര് പുളിര്‌ക്ക മുന്തിരി സാരണ അയാള്‌ക്ക് ഊട്ട്‌സ്യ ണോഡിനാര്. 37പ്‌റ അയ്യി പഡെയാളിഗ: <<എഗുദാര്‌ദ് റാജാവു ആനാക്കി ണിനാണ താനെ കാപാറ്റ്>> എന്ത് സൊന്നാര്.
38അച്ചെ <<ഇയാള് എഗുദാര്‌ദ് റാജാവു>> എന്ത് എ്ള്‌ദിര്‌ക്ക ഒരു എ്ള്‌ത്ത് കുരുസ്‌ദ് തലേപ്പ്‌ക്കെ ണേറ്റി ബെത്താര്.
39കെ്ട്ട കാര്യഗ സെയ്‌ദാക്ക് കുരുസ്‌ക്കെ സേത്തി ആണി അഡിത്തവാരിലി ഒരുത്താ് ഏസുണ: <<ണീ ക്‌റ്‌സ്‌ത്ത് താനെ? എന്ത പിന്നെ ണിനാണാമ് എമാണാമ് ഇദിലിര്‌ന്ത് കാപാറ്റ്>> എന്ത് സൊല്ലി ണാണഗെ്ഡ്‌സിനാ്.
40ആന പിന്നെ ഒരുത്താ് അയാള്‌ണ: <<ണീമ് അദേ ദണ്ടണേക്ക് സിക്കി ഗൂഡി ണീ സാമിന അഞ്ച്‌റാദില്ലെഗ? 41ണമ്മ സെയ്‌ദ കുറ്റാക്ക് തഗ്‌ന്ത ദണ്ടണെ ണമാക്ക് കെ്ഡേത്തിര്‌ക്ക്‌ദ്. ആന ഇയാളോ, ഒരു കുറ്റാമ് സെയ്യാലെ>> എന്ത് സണ്ടെ കൊഡുത്താ്.
42അക്കുളെ അയാള് ഏസുക്ക്: <<ഏസുവെ, ണീ റാജാവായി ആള്യ ബര്‌ഗാട്ടി എനാണാമ് സെറ്റെ ണെനേക്കുഡോമെ>> എന്ത് സൊന്നാ്.
43അക്കുളെ ഏസു അയാള്‌ക്കെ: <<ണീ ഇന്റ് എന്ന്‌ദൊപ്പ പറ്‌ദിസേലി ഇര്‌ക്കുവെ എന്ത് ണേര്‌മായിമ് ണാന് ണിനാക്കെ സൊല്ലുറെ>> എന്ത് സൊന്നാ്.
ഏസു ഉജുറുണ ബ്‌ഡ്‌റാ്
44-45അക്കുളെ ണേര ഉച്ചി ആയിര്‌ന്ത്‌ദ്. ഉച്ചി ണേരാത്തിലിര്‌ന്ത് മൂണ് മണിമാട്ട് ണാഡൊട്ടുക്ക് ഇ്റ്‌ട്ട്‌കെ്ട്ടിര്‌ന്ത്‌ദ്. അയ്യി ഗള്യേലി സാമികൂരേദ് അരാങ്ക കുച്ചുണ അലാക്ക പ്‌റ്‌ത്ത് ബെത്തിര്‌ക്ക തെരെസീലെ മേലിര്‌ന്ത് അഡിമാട്ട് റണ്ടായി കീ്റി എക്കിറ്റ്. 46<<അപ്പ, എന്ന് ഉജുറുകെ്ളേന ണിന്ന് കയ്യിക്കെ ഒപ്പഡിക്കെ>> എന്ത് ഏസു ബെല്ല്യാദ്‌ക്ക് അഗാറി ഉജുറുണ ബ്‌ട്ടാ്.
47ണൂറ് പഡെയാളിഗാദ് തലെവാ് ആയിര്‌ന്തവാ് ഇച്ചെ ണഡാന്താദ്‌ണ കണ്ട് <<ഈ മന്‌സാ് ണേര്‌മായിമ് ണേര്‌മെക്കാറാ് ആയിര്‌ന്താ്>> എന്ത് സൊല്ലി സാമിന ഒഗെ ഇക്കിനാ്. 48അദിലി ണഡാന്താദ്‌ണ കാണ്യ ബേ്ണ്ടി ബന്ത ആള്‌ഗ മുച്ചുഡ ദുക്കപട്ട് ണെഞ്ച്‌ണ മാര്‌ണ അഡിത്ത് കൂരേക്ക് തിലിമ്പി പോനാര്. 49ഏസോഡെ പളാക്ക ഇര്‌ന്തവാര്‌മ് ഗെലീലേലിര്‌ന്ത് ഏസു പിന്ന്‌ക്ക് ണഡാന്തിര്‌ന്ത പെ്ണ്ണ്‌മക്കഗാമ് ഇദ്‌ണ ണോഡികൊണ്ട് ദൂരാത്തിര്‌ന്താര്.
ഏസു സാവുണ പൊദേക്കാര്
50-51എഗുദ ണാഡ്‌ക്ക് പട്ട അരിമദ്ദ്യെ എങ്ക എ്ഡേല്യ ണല്ലവാന്‌മ് ണേര്‌മെക്കാറാന്‌മ് ആയിര്‌ന്ത ഓസേപ് എങ്ക ഒരുത്താ് ഇര്‌ന്താ്. ഇയാള് സാമി ആള്‌റാദ്‌ണ കാത്തിര്‌ന്തവാന്‌മ്‌ത്തെ. അയാള് എഗുദ ഗോഡ്‌ദില്യ ഒരു ആളായിര്‌ന്ത് ഗൂഡി ഏസുണ കൊല്ല്യ സട്ടകെ്ട്ടി മുഡിവെ്ഡ്‌ത്തിര്‌ന്ത കാര്യ ഇയാള്‌ക്ക് പ്‌ഡിക്കാദിര്‌ന്ത്‌ദ്. 52അയാള് പീലത്തോസ് പട്ട്‌ക്കെ പോയി ഏസു സാവുണ എ്ഡ്‌ത്ത് പോയ ബ്‌ഡുഡൊ എന്ത് കേ്ട്ടാ്. 53അദ്‌ക്ക് പ്‌റ ഓസേപ് ഏസു സാവുണ ഇ്റാക്കി, സാവുക്ക് ബെ്ഡിപ്പുള്ള സീലെ ഇക്കി, കല്ലിലി താനെ കൊദേന്ത് അളെ ഉണ്ടാക്കി ആര്‌ണാമ് ബെക്കാദിര്‌ന്ത ഒരു അളേക്കെ സാവുണ ബെത്താര്. 54അയ്യി ണാള് ഒയിവു ണാള്‌ക്ക് ബേ്ണ്ടി ഒരുങ്ക്‌റ ണാള് ആയിര്‌ന്ത്‌ദ്. എഗുദാര് ഒയിവു ണാള്‌മ് ആയാറ്റ്.
55ഗെലീലേലിര്‌ന്ത് ഏസു പിന്ന്‌മേലെ ണഡാന്തിര്‌ന്ത പെ്ണ്ണ്‌മക്കഗ ഓസേപോഡെ പോയി കല്ലളേനാമ് സാവുണ ബെത്ത ദിന്‌സ്‌ണാമ് എ്ഡേനാമ് കണ്ടാര്. 56അദ്‌ക്ക് പ്‌റ അയ്യി പെ്ണ്ണ്‌മക്ക തിലിമ്പി പോയി ഏസുദ് സാവുക്ക് പൂസ്യുള്ള ബാഡെ അഡിക്ക ജാദിഗണാമ് തയ്യിലണാമ് എ്ഡ്‌ത്ത് ഒരിക്കി ബെത്തിര്‌ന്താര്. മോസെ ബെത്ത സാമി സട്ടപഡി ഒയിവു ണാള് ഒരു ബേലേമ് സെയ്യാദെ ഒയിവു എ്ഡ്‌ത്താര്.
Pašlaik izvēlēts:
ലൂക്കോസ് 23: സാമിദ് സേദി
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
New Life Literature