ഓഗന്നാ് 1
1
സാമി സൊല്ലുസുലാക്ക മന്‌സനാറ്റ്
1എല്ലാദ്‌ണാമ് ദ്‌ട്ട്‌സ്‌റാദ്‌ക്ക് മുദാഗെ സാമി സൊല്ലുസുലാക്ക ഇര്‌ന്തിര്‌ന്ത്‌ദ്. അയ്യി സൊല്ലുസുലാക്ക ആനവാ് സാമിദ് ഒപ്പ ഇര്‌ന്തിര്‌ന്താ്. അയ്യി സൊല്ലുസുലാക്ക ആനവാ് സാമി ആയിര്‌ന്താ്. 2എല്ലാദ്‌ണാമ് ദ്‌ട്ട്‌സ്‌റാദ്‌ക്ക് മുദാഗെ അവാ് സാമിദ് ഒപ്പ ഇര്‌ന്തിര്‌ന്താ്.
3അവാന ബെത്ത്‌ത്തെ സാമി എല്ലാമെ ഉണ്ടാക്കിനാദ്. അവാന ബെത്തല്ലാദെ സാമി ഒന്റുണാമ് ഉണ്ടാക്കാമില്ലെ. 4അവാനിലി ഉജുറു ഇര്‌ന്ത്‌ദ്. അയ്യി ഉജുറു മന്‌സാര്‌ക്ക് ബെ്ള്‌സ അഡിത്ത് കൊഡുത്ത് കൊണ്ടിര്‌ന്ത്‌ദ്. 5അയ്യി ബെ്ള്‌സ ഇ്റ്‌ട്ടിലി ബെ്ള്‌സ ബീസ്‌ദ്. ആന അയ്യി ബെ്ള്‌സണ ഇ്റ്‌ട്ട്‌ക്ക് കെ്ഡ്‌സ്യെക്ക്യ മുഡ്യാലെ.
6ഓഗന്നാ് എങ്ക ഒരുത്താ് സാമി സൊല്ലിബ്‌ട്ട് ബന്താ്. 7അയ്യി ബെ്ള്‌സണ പറ്റി ആള്‌ഗാക്ക് സൊല്ല്യ ബേ്ണ്ടിത്തെ അവാ് ബന്താദ്. അച്ചെ അവാ് ആള്‌ഗാക്ക് സൊല്ലുറാദ്‌ണാലെ അയ്യി ബെ്ള്‌സണ ആള്‌ഗ ണമ്പുവാര്. 8ആന അവാ് ബെ്ള്‌സല്ല, ബെ്ള്‌സണ പറ്റി ആള്‌ഗാക്ക് സൊല്ല്യ ബേ്ണ്ടി ബന്തവാ്ത്തെ. 9എല്ല മന്‌സാര്‌ക്ക്‌മ് ബെ്ള്‌സ കൊഡുക്ക സത്ത്യ ബെ്ള്‌സ ഈ ഉലഗാക്കെ ബന്ത് കൊണ്ടെ ഇര്‌ന്ത്‌ദ്.
10അവാ് ഉലഗാത്തിലി ഇര്‌ന്തിര്‌ന്താ്. അവാന ബെത്ത്‌ത്തെ സാമി ഉലഗണ ഉണ്ടാക്കിനാദ്. എന്ത്‌ട്ട്‌മ് ഉലഗാത്തില്യ ആള്‌ഗാക്ക് അവാന തെര്യാലെ. 11അവാ് തന്ന് കൂട്ടാര്‌ക്കെ ബന്താ്. ആന അവാര് അവാന കയ്യേന്താലെ. 12ആന അവാന കയ്യേന്തിമ് അവാന ണമ്പാമ് സെയ്‌ര ഏവാര്‌ക്ക്‌മ് സാമിദ് പ്‌ള്ളെഗ ആയ ഉള്ള ഉരിമെ അവാ് കൊഡുത്താ്. 13ഉലഗാത്തിലി പ്‌ള്ളെഗ പ്‌റാക്ക പാസെഗൊ, മന്‌സാന്‌ദ് ആസെപഡി പ്‌റാക്ക പാസെഗൊ അല്ല ഇവാര് പ്‌റാന്താദ്, സാമിത്തെ ഇവാര്‌ണ പ്‌റാത്തിര്‌ക്കാദ്.
14സാമി സൊല്ലുസുലാക്ക മന്‌സാ് പ്‌റാവി എ്ഡ്‌ത്ത്‌ദ്. അവാ് ഗവാമ് സത്ത്യാമ് തുമ്പിനവാനായി ണമ്മ് പട്ടിലി പെ്ളേത്തിര്‌ന്താ്. അപ്പനാന സാമിദ് ഒരേ ഒരു മഗാന്‌ദ് മദ്‌പ്പ്‌ണ സാമി സൊല്ലുസുലാക്ക ആനവാനിലി എമ്മ കണ്ടേര്.
15ഓഗന്നാ് അവാന പറ്റി ആള്‌ഗാക്ക് ആലാത്ത് ഇച്ചെ സൊന്നാ്: <<അവാ് എനാക്ക്‌മ് മുദ ഇര്‌ന്തിര്‌ന്തവാ് ആനാദ്‌ണാലെ <എനാക്ക് പ്‌റ ബരവാ് എനാണ ബ്‌ഡ ബെല്ല്യവാ് ആയി തീന്താ്> എന്ത് ണാന് ആള്‌ഗാക്ക് സൊന്നവാ് ഇവാ്ത്തെ.>> 16അവാ് തുമ്പ ഗവ ഇര്‌ക്കവാ് ആനാദ്‌ണാലെ പിന്നേമ് പിന്നേമ് ണമാണ ഗവപട്ടിര്‌ക്കാ്. 17മോസെ ബെത്ത സാമി സട്ട മോസെ മേലെ ണമാക്ക് കെ്ഡേത്ത്‌ദ്. ആന സാമിദ് ഗവാമ് സത്ത്യാമ് ഏസു ക്‌റ്‌സ്‌ത്ത് മേലെ ണമാക്ക് കെ്ഡേത്ത്‌ദ്. 18സാമിന ആര്‌മ് ഒരു ണാള്‌മ് കാണാഗെ ഇല്ലെ. ആന അപ്പാന്‌ദ് പട്ടിലിര്‌ക്ക തന്ന്‌ദ് ഒരേ ഒരു മഗനാന സാമിത്തെ ണമാക്ക് സാമിന ബെ്ളിപഡ്‌സി തന്തിര്‌ക്കാദ്.
ഓഗന്നാ് ഏസുണ പറ്റി സൊല്ലുറാ്
19ഓഗന്നാന <<ണീ ആര്>> എന്ത് കേ്ക്ക്യ ബേ്ണ്ടി എര്‌സലേമിലിര്‌ന്ത് ലേവ്യാര്‌ണാമ് എഗുദ പൂസാരിഗണാമ് എഗുദാര് തലെവലഗണാമ് ഓഗന്നാ് പട്ട്‌ക്കെ സൊല്ലിബ്‌ട്ടാര്. 20അക്കുളെ ഓഗന്നാ്: <<ണാന് ക്‌റ്‌സ്‌ത്ത് അല്ല>> എന്ത് അവാര്‌ക്കെ മറേസാദെ തുറാന്ത് സൊന്നാ്.
21അക്കുളെ അവാര് അവാന: <<ണീ ആര് ഏല്യാവ?>> എന്ത് കേ്ട്ടാര്.
അക്കുളെ <<അല്ല>> എന്ത് അവാ് സൊന്നാ്.
<<ഇല്ലെ സാമി സൊല്ലിബ്‌ഡുവെ എന്ത് സൊന്ന അയ്യി സാമിദാസ?>> എന്ത് കേ്ട്ടാര്.
<<അല്ല>> എന്ത് അവാ് ബദ്‌ള് സൊന്നാ്.
22അക്കുളെ അവാര്: <<പിന്നെ ണീ ആര്? ണിനാണ പറ്റി കേ്ട്ട് ബര്യ സൊല്ലിബ്‌ട്ടവാര്‌ക്കെ പോയി എമ്മ ബദ്‌ള് സൊല്ലുഡൊ. അദ്‌ണാലെ ണീ ണിനാണ പറ്റി എന്ത സൊല്ലുറെ?>> എന്ത് കേ്ട്ടാര്.
23അദ്‌ക്ക് ഓഗന്നാ് എസയ്യാ് സാമിദാസ് സൊന്ന പാസെ, << <ആണ്ടവാ് ബര്യ ബേ്ണ്ടി ബയ്യി ഒരിക്കിരി>#എസയ്യാ് 40:3 എന്ത് ബെ്ട്ടെകാഡിലി ആലാത്ത് സൊല്ലുറവാന്‌ദ് ജദ്ദ ണാന്‌ത്തെ>> എന്ത് അവാര്‌ക്കെ സൊന്നാ്.
24ഓഗന്നാ് പട്ട്‌ക്ക് പോനവാര് പരിസലാക്ക് പട്ടവാരിലി ലേസ ആള്‌ഗ ആയിര്‌ന്താര്. 25അവാര് ഓഗന്നാന: <<ണീ ക്‌റ്‌സ്‌ത്ത്‌മ് അല്ല, ഏല്യാവുമ് അല്ല, സാമി സൊല്ലിബ്‌ഡുവെ എന്ത് സൊന്ന അയ്യി സാമിദാസ്‌മല്ല. എന്ത പിന്നെ ണീ എന്ത്‌ക്ക് തണ്ണിക്കെ മുളുഗ്‌സ്‌റാദ്?>> എന്ത് കേ്ട്ടാര്.
26അദ്‌ക്ക് ഓഗന്നാ്: <<ണാന് ആള്‌ഗണ തണ്ണിക്കെ മുളുഗ്‌സ്‌റെ. ആന ണിമാക്ക് തെര്യാത്ത ഒരുത്താ് ണിമ്മ് കൂട്ടാത്തിലി ണിന്റിര്‌ക്കാ്. 27അയാള് എന്ന് പിന്ന്‌ക്ക് ബരവാ്ത്തെ. അയാള് ഇക്കിര്‌ക്ക സെര്‌പ്പ് കണ്ണിന ഉക്ക്യ ഗൂഡി എനാക്ക് തഗ്‌ദില്ലെ>> എന്ത് സൊന്നാ്.
28ഓഗന്നാ് തണ്ണിക്കെ മുളുഗിസി കൊണ്ടിര്‌ന്ത ഓറ്‌ദ്ദാ് ബാനിദ് അയ്യേ്ട്ടിര്‌ക്ക ബെദനിലിത്തെ ഈ കാര്യ ണഡാന്താദ്.
ഏസു സാമിദ് കൊറ്യാഡ്‌കുട്ടി
29മറ് ണാള് ഏസു തന്ന് പട്ട്‌ക്ക് ബരാദ്‌ണ ഓഗന്നാ് കണ്ട്: <<ഇദാ ണോഡി, ഉലഗാത്തില്യ പാവണ തീക്ക്യ ബേ്ണ്ടി സാമി തന്ത കൊറ്യാഡ്‌കുട്ടി. 30<എന്ന് പിന്ന്‌ക്ക് ഒരുത്താ് ബരാ്. അവാ് എനാക്ക്‌മ് മുദ ഇര്‌ന്തിര്‌ന്തവാ് ആനാദ്‌ണാലെ എനാണ ബ്‌ഡ ബെല്ല്യവാ് ആയി തീന്താ്> എന്ത് ണാന് സൊന്നാദ് ഇവാന പറ്റിത്തെ. 31എനാക്ക് അവാന തെര്യാദിര്‌ന്തെ. ആന ണാന് തണ്ണിക്കെ മുളുഗ്‌സ്‌റവാനായി ബന്താദ് അവാന ഇസ്‌റേല്‌ക്കാറാര്‌ക്ക് കാട്ടി കൊഡുക്ക്യ ബേ്ണ്ടിത്തെ>> എന്ത് അവാ് സൊന്നാ്.
32ഓഗന്നാ് പിന്നേമ് അയാള്‌ണ പറ്റി ഇച്ചെ സൊന്നാ്: <<സാമിണിഗാല് സോറെ പക്കിന പാസെ മേലോഗാത്തിലിര്‌ന്ത് ഇ്റാങ്കി ബന്ത് അയാള്‌ക്കുദ്ദാക്ക് ഇര്‌ക്കാദ്‌ണ ണാന് കണ്ടെ. 33അപ്പ്‌മ് എനാക്ക് അവാന ആരെന്ത് തെര്യാലെ. ആന എനാണ തണ്ണിക്കെ മുളുഗിസ്യ സൊല്ലിബ്‌ട്ട സാമി <സാമിണിഗാല് ഇ്റാങ്കി ബന്ത് ഒരുത്താനിലി ഇര്‌ക്കാദ്‌ണ ണീ കാണുവെ അവാ്ത്തെ സാമിണിഗാലിലി മുളുഗ്‌സ്‌റവാ്> എന്ത് എനാക്ക് സൊന്നാ്. 34ഇദ്‌ണ ണാന് കണ്ടെ അദ്‌ണാലെ അവാ് സാമിദ് മഗാ് എന്ത് ണിമാക്കെ ണാന് സൊല്ലുറെ.>>
ഏസുദ് സൊല്ലുപഡി ണഡാക്ക്യ ബന്ത മുദാത്തില്യ ആള്‌ഗ
35മറ് ണാള് ഓഗന്നാ് തന്ന് സൊല്ലുപഡി ണഡാക്കവാരിലി റണ്ട് ആളോഡെ പിന്നേമ് അദിലി ണിന്റിര്‌ക്കാട്ടി, 36അദ്‌മേലെ ണഡാന്ത് പോര ഏസുണ ഓഗന്നാ് സൊക്കാന ണോഡിരിന്ത്: <<ഇദാ ണോഡിരി സാമി തന്ത കൊറ്യാഡ്‌കുട്ടി#1:36സാമി തന്ത കൊറ്യാഡ്‌കുട്ടി കൊറ്യാഡ്‌കുട്ടിന പലി കൊഡുക്ക പാസെ സാമി ഏസുണ എ്ഡ്‌ത്ത് ബെത്തിര്‌ക്കാ്.>> എന്ത് സൊന്നാ്.
37ഓഗന്നാ് സൊന്നാദ്‌ണ കേ്ട്ട് തന്ന് സൊല്ലുപഡി ണഡാക്ക അയ്യി റണ്ട് ആള്‌മ് ഏസു പിന്ന്‌ക്ക് പോനാര്. 38ഏസു പിന്ന്‌ക്ക് തിലിമ്പി ണോഡുഗാട്ടി അവാര് തന്ന് പിന്ന്‌ക്ക് ബരാദ്‌ണ കണ്ട്: <<ണിമ്മ എന്ത്‌ക്ക് എന്ന് പിന്ന്‌മേലെ ബരേര്>> എന്ത് അവാര്‌ണ കേ്ട്ടാ്.
അക്കുളെ അവാര്: <<റബ്ബി>> (എന്ത് സൊന്ന ഗുരുവെ എന്ത്‌ത്തെ അര്‌ത്ത) <<ണീ ഏദിലി ഇര്‌ക്കാദ്>> എന്ത് കേ്ട്ടാര്.
39അക്കുളെ ഏസു അവാര്‌ക്കെ: <<ബന്ത് ണോഡിരി>> എന്ത് സൊന്നാ്.
അച്ചെ അവാര് ഏസു ഇര്‌ക്ക പട്ട്‌ണ കണ്ടാര്. അക്കുളെ ഒപ്പത്തപ്പ ണാല് മണി ആയിര്‌ക്കു. അയ്യി ണാള് അവാനോഡെ അവാര് തങ്കിനാര്.
40ഓഗന്നാ് സൊന്നാദ്‌ണ കേ്ട്ട് ഏസു പിന്ന്‌ക്ക് പോന റണ്ട് ആളിലി ഒരുത്താ് സീമോന് പത്ത്‌റോസ് എങ്കവാന്‌ദ് തമ്പി അന്ത്‌റോസ് ആയിര്‌ന്ത്‌ദ്. 41അവാ് തന്ന് അണ്ണാ് സീമോന്‌ണ മുദ കണ്ടാദ്‌മ്: <<എമ്മ മസിഗെന കണ്ട്‌പ്‌ഡിത്തേര്>> എന്ത് സൊന്നാ്. (മസിഗെ എന്ത് സൊന്ന ക്‌റ്‌സ്‌ത്ത് എന്ത്‌ത്തെ അര്‌ത്ത) 42അച്ചെ തന്ന് അണ്ണന ഏസു പട്ട്‌ക്ക് കൂട്ടി പോനാ്.
ഏസു അവാന ണോഡി: <<ണീ ഓഗന്നാന്‌ദ് മഗാ് സീമോന്‌ത്തെ. ണിനാക്ക് കേപ എന്ത് പേര് പ്‌ഡിക്കു>> എന്ത് സൊന്നാ്. (എന്ത് സൊന്ന പത്ത്‌റോസ് എന്ത്‌ത്തെ.)
ഏസു പീലിപ്പോസ്‌ണാമ് ണദനയേല്‌ണാമ് ഒളേക്കാ്
43മറ് ണാള് ഏസു ഗെലീലേക്കെ പോയ എന്ത് മുഡിവെ്ഡ്‌ത്തിര്‌ക്കാട്ടി പീലിപ്പോസ്‌ണ കണ്ട്: <<എന്ന് പിന്ന്‌ക്ക് ബാ>> എന്ത് സൊന്നാ്.
44പത്ത്‌റോസ്‌മ്, അന്ത്‌റോസ്‌മ് ബേദ്‌സെയ്‌ദെ പട്ടണക്കാറാര്‌ത്തെ. അദേ പട്ടണക്കാറാ്ത്തെ പീലിപ്പോസ്‌മ്. 45പീലിപ്പോസ് ണദനയേല്‌ണ കണ്ട് അവാന്‌ക്കെ: <<മോസെ ബെത്ത സാമി സട്ടാത്തിലി മോസെ സൊല്ലിര്‌ക്കവാനാമ് സാമിദാസ്‌ഗ എ്ള്‌ദി ബെത്തിര്‌ക്കവാന്‌മാന ആള്‌ണ എമ്മ കണ്ട്‌പ്‌ഡിത്തിര്‌ക്കേര്. അവാ് ഓസേപ്‌ദ് മഗനാന ഏസു എന്ത് സൊല്ലുറ ണസറത്ത്‌ക്കാറാ്ത്തെ>> എന്ത് സൊന്നാ്.
46അക്കുളെ ണദനയേല് അവാന്‌ക്കെ: <<ണസറത്തിലിര്‌ന്ത് ണല്ല കാര്യ എന്താറ്റ് കെ്ഡേക്കുമ?>> എന്ത് കേ്ട്ടാ്.
അക്കുളെ പീലിപ്പോസ് അവാന്‌ക്കെ: <<ബന്ത് ണോഡു>> എന്ത് സൊന്നാ്.
47തന്ന് പട്ട്‌ക്ക് ണദനയേല് ബരാദ്‌ണ ഏസു കണ്ട് അവാന പറ്റി: <<ഇദാ ഇദ്‌ത്തെ സെരിക്കുള്ള ഇസ്‌റേല്‌ക്കാറാ്. ഇയാള് മനേസ്സിലി കള്ളകവാഡൊന്റുമില്ലെ>> എന്ത് ഏസു സൊന്നാ്.
48ണദനയേല് ഏസുക്കെ: <<ണിനാക്ക് എച്ചെ എനാണ തെര്യു>> എന്ത് കേ്ട്ടാ്.
അദ്‌ക്ക് ഏസു: <<പീലിപ്പോസ് ണിനാണ ഒളേക്കാത്ത മുദ ണീ അത്തി മ്‌ണ്ടേക്കഡി ഇര്‌ക്കാട്ടി ണാന് ണിനാണ കണ്ടെ>> എന്ത് സൊന്നാ്.
49അക്കുളെ ണദനയേല് ഏസുക്കെ: <<ഗുരുവെ, ണീത്തെ സാമിദ് മഗാ്, ണീ ഇസ്‌റേല്‌ക്കാറാര്‌ദ് റാജാവുത്തെ>> എന്ത് സൊന്നാ്.
50ഏസു അവാന്‌ക്കെ: <<ണാന് ണിനാണ അത്തി മ്‌ണ്ടേക്കഡി ഇര്‌ക്കാട്ടി കണ്ടെ എന്ത് സൊന്നാദ്‌ണാലെത്തേഗ ണീ എനാണ ണമ്പ്‌റാദ്? ആന ഇദ്‌ണ ബ്‌ഡ ബെല്ല്യ ബെല്ല്യ കാര്യഗണ ണീ കാണുവെ>> എന്ത് സൊന്നാ്. 51<<ണേര്‌മായിമ് ണാന് ണിമാക്കെ സൊല്ലുറെ, മേലോഗ തുറാന്തിര്‌ക്കാദ്‌ണാമ് മന്‌സാനായി പ്‌റാന്തവാന്‌ദ് പട്ട്‌ക്ക് സാമിദൂദല ഏ്റി ബരാദ്‌ണാമ് ഇ്റങ്ക്‌റാദ്‌ണാമ് ണിമ്മ കാണുവേര്>> എന്ത് ഏസു അവാര്‌ക്കെ സൊന്നാ്.
Pašlaik izvēlēts:
ഓഗന്നാ് 1: സാമിദ് സേദി
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
New Life Literature