ወንጌል ዘሉቃስ 21
21
ምዕራፍ 21
በእንተ ጸሪቀ መበለት
1ወነጸረ ወርእየ አብዕልተ ዘያበውኡ መባኦሙ ውስተ ሙዳየ ምጽዋት። 2#2ነገ. 12፥9፤ ማር. 12፥41-44። ወርእየ ዕቤረ መበለተ እንዘ ታበውእ ክልኤ ጸራይቀ። 3#2ቆሮ. 8፥12። ወይቤሎሙ አማን እብለክሙ ከመ ዛቲ ዕቤር ነዳይት አብዝኀት አብኦ መባአ ለእግዚአብሔር። 4እስመ እሉ ኵሎሙ እምተረፎሙ አብኡ መባአ ለእግዚአብሔር ወዛቲሰ እምተጽናሳ ኵሎ ጥሪታ ዘባ አብአት።
በእንተ ንሥተተ ቤተ መቅደስ ወሙስናሃ ለኢየሩሳሌም
5 #
ማቴ. 24፥1-2፤ ማር. 13፥1-2። ወቦ እለ ይቤልዎ በእንተ ቤተ መቅደስ ሠናይ እበኒሁ ወሥርግው ንድቁ። 6#19፥44። ወይቤሎሙ ትሬእዩኑ ዘንተ ይመጽእ መዋዕል አመ ኢይትኀደግ ዝየ እብን ዲበ እብን ዘኢይትነሠት። 7ወተስእልዎ ወይቤልዎ ሊቅ ማእዜ ይከውን ዝንቱ ወምንት ተአምሪሁ አመ ይከውን ዝንቱ። 8#17፥23። ወይቤሎሙ ዑቁ ኢያስሕቱክሙ ብዙኃን ይመጽኡ በስምየ እንዘ ይብሉ አነ ውእቱ ክርስቶስ ወበጽሐ ዕድሜሁ ወኢትሑሩ ወኢትትልውዎሙ። 9ወአመ ሰማዕክሙ ቀትለ ወሀከከ ኢትደንግፁ እስመ ይከውን ቅድመ ከመዝ ወባሕቱ አኮ ሶቤሃ ዘየኀልቅ። 10ወይቤሎሙ ይትነሥኡ ሕዝብ ዲበ ሕዝብ ወነገሥት ዲበ ነገሥት። 11ወይመጽእ ዐቢይ ድልቅልቅ ወረኃብ በበብሔሩ ወፍርሀት ላዕለ ሰብእ ወተኣምር ዐቢይ ይከውን እምሰማይ። 12#12፥11፤ ማር. 13፥9፤ ግብረ ሐዋ. 12፥1-9። ወእምቅድመ ዝንቱ ኵሉ ይእኅዙክሙ ወይወስዱክሙ አዕዋዳተ ወይሰድዱክሙ ወይሞቅሑክሙ ወይወሰዱክሙ ኀበ ነገሥት ወመሳፍንት በእንተ ስምየ። 13ወዝንቱ ይረክበክሙ ከመ ይኩን ስምዐ ላዕሌሆሙ። 14#ግብረ ሐዋ. 6፥10። ዑቁ ኢተኀልዩ በልብክሙ ዘትብሉ። 15አነ እሁበክሙ አፈ ወጥበበ በዘኢይክሉ ተዋሥኦተክሙ ወተዋቅሦተክሙ እለ ይትነሥኡ ላዕሌክሙ 16#ሚክ. 7፥6። ወያገብኡክሙ አዝማዲክሙ ወአኀዊክሙ ወአዕርክቲክሙ ወቢጽክሙ። 17#ማቴ. 10፥21-22። ወኵሉ ይጸልአክሙ በእንተ ስምየ ወይቀትሉክሙ። 18#12፥6-7፤ ማቴ. 10፥28-31። ወኢትትኀጐል አሐቲ እምሥዕርተ ርእስክሙ። 19#2ዜና መዋ. 15፥7፤ ዕብ. 10፥36። ወበትዕግሥትክሙ ታጠርይዋ ለነፍስክሙ። 20#ዳን. 9፥26-27፤ ማቴ. 24፥16-21፤ ማር. 13፥14-19። ወአመ ርኢክሙ እምዘ የዐገትዋ ሠራዊት ለኢየሩሳሌም አእምሩ ከመ በጽሐ ሙስናሃ። 21#ማቴ. 24፥15-18። ወይእተ አሚረ እለ ውስተ ይሁዳ ይጐዩ ውስተ አድባር ወእለሂ ማእከላ ይወፅኡ እምኔሃ ወእለሂ ውስተ በሐውርቲሃ ኢይበውእዋ። 22#ኤር. 5፥29፤ ሆሴ. 9፥7። እስመ ዕድሜሃ ውእቱ በዘይትቤቀልዋ ከመ ይብጻሕ ኵሉ ዘጽሑፍ ላዕሌሃ። 23ወባሕቱ አሌ ሎን ለፅኑሳት ወለእለ የሐፅና በውእቱ መዋዕል እስመ ይከውን ዐቢይ ምንዳቤ ዲበ ምድር ወመቅሠፍት ዲበ ዝንቱ ሕዝብ። 24#ሮሜ 11፥25፤ ራእ. 11፥2፤ ዳን. 8፥13። ወይወድቁ በኲናት ወይፄወዉ ውስተ ኵሉ አሕዛብ ወይከይድዋ አሕዛብ ለኢየሩሳሌም እስከ ይበጽሕ ዕድሜሆሙ ለአሕዛብ።
በእንተ ዳግም ምጽአቱ ለእግዚእ ኢየሱስ
25 #
ኢሳ. 13፥10፤ ሕዝ. 32፥7፤ ኢዩ. 2፥31፤ 3፥15፤ ራእ. 6፥12-13። ወይከውን ተአምር ውስተ ፀሓይ ወወርኅ ወከዋክብትኒ ይወድቁ እምሰማይ ዲበ ምድር#ቦ ዘኢይጽሕፍ «ይወድቁ እምሰማይ ዲበ ምድር» ወይትመነደቡ አሕዛብ ወየኀሥሩ እምድምፀ ባሕር ወባሕርኒ ትደምፅ ወትትከወስ።#ቦ ዘኢይጽሕፍ «ወባሕርኒ ትደምፅ ወትትከወስ» 26ወትወፅእ ነፍሰ ዕጓለ እመሕያው እምፍርሀት ወእምትሕዝብት ዘይመጽእ በዓለም እስመ ይትከወስ ኀይለ ሰማያት ይእተ አሚረ። 27#ዳን. 7፥13-14፤ ራእ. 1፥7። አሜሃ ይሬእይዎ ለወልደ ዕጓለ እመሕያው እንዘ ይመጽእ በደመና ሰማይ ምስለ ኀይል ብዙኅ ወስብሐት። 28#ሮሜ 8፥21-23፤ ፊልጵ. 4፥4-5። ወአመ ኮነ ዝንቱ ኵሉ ስግዱ ወአንሥኡ ርእሰክሙ እስመ በጽሐ ዘያድኅነክሙ። 29ወመሰለ ሎሙ ወይቤሎሙ ርእዩ በለሰ ወኵሎ ዕፀወ። 30#ማቴ. 24፥32። ወእም ከመ ርኢክሙ ከመ ሠረጹ ተአምሩ ከመ አልጸቀ ማእረር። 31ከማሁ አንትሙኒ እምከመ ርኢክሙ ከመ ኮነ ዝንቱ አእምሩ ከመ በጽሐት መንግሥተ እግዚአብሔር። 32አማን እብለክሙ ከመ ኢተኀልፍ ዛቲ ትውልድ እስከ ይከውን ዝንቱ ኵሉ። 33#16፥17፤ ኢሳ. 51፥6። ሰማይ ወምድር የኀልፍ ወቃልየሰ ኢየኀልፍ።
ዘከመ ይደሉ ተዐቅቦ ወተጊህ ለጸሎት በኵሉ ጊዜ
34 #
ሮሜ 13፥13፤ ገላ. 5፥21፤ 1ተሰ. 5፥7። ዑቁ ርእሰክሙ ኢታክብዱ ልበክሙ በበሊዕ ወበስታይ ወበፈጊዕ ወበኀልዮ መንበርት ወትበጽሐክሙ ይእቲ ዕለት ግብተ። 35ከመ መሥገርት እንተ ትወርድ ዲበ ኵሎሙ እለ ይነብሩ ዲበ ምድር። 36#2ጴጥ. 3፥11፤ 1ዮሐ. 2፥28። ትግሁ እንከ በኵሉ ጊዜ ከመ ትክሀሉ አምሥጦ በጸሎትክሙ እምነ ዝንቱ ኵሉ ዘይመጽእ ወትቁሙ ቅድሜሁ ለወልደ ዕጓለ እመሕያው። 37#19፥47፤ ዮሐ. 8፥1-2፤ ማቴ. 24፥15-18። ወኮነ መዓልተ ይሜህር በምኵራብ ወሌሊተ ይወፅእ ወይበይት ውስተ ደብረ ዘይት ዘስሙ ኤሌዎን። 38ወኵሉ ሕዝብ ይገይሡ ኀቤሁ ውስተ ምኵራብ ያፅምዕዎ ቃሎ።
Pašlaik izvēlēts:
ወንጌል ዘሉቃስ 21: ሐኪግ
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties