ಮತ್ತಾಯೆ 1
1
ಯೇಸು ಕ್ರಿಸ್ತನ ಸಂತಾನದ ಪಟ್ಟಿ
(ಲೂಕೆ 3:23-38)
1ಉಂದು ಯೇಸು ಕ್ರಿಸ್ತನ ಸಂತಾನದ ಪಟ್ಟಿ. ಆಯೆ ದಾವೀದನ ಸಂತಾನದಾಯೆ, ದಾವೀದೆ ಅಬ್ರಹಾಮುನ ಸಂತಾನದಾಯೆ.
2ಅಬ್ರಹಾಮು ಇಸಾಕ್‌ನ ಅಮ್ಮೆ. ಇಸಾಕೆ ಯಾಕೋಬುನ ಅಮ್ಮೆ. ಯಾಕೋಬು ಯೂದ ಬೊಕ್ಕ ಆಯನ ಮೆಗ್ಯೆ ಪಲಯಾಡ್ಲೆನ ಅಮ್ಮೆ. 3ಯೂದೆ ಪೆರೆಸ್ ಬೊಕ್ಕ ಜೆರಹನ ಅಮ್ಮೆ, ಅಕ್ಲೆನ ಅಪ್ಪೆ ತಾಮರ. ಪೆರೆಸ್ ಹೆಚ್ರೋನುನ ಅಮ್ಮೆ. ಹೆಚ್ರೋನು ಅರಾಮನ ಅಮ್ಮೆ. 4ಅರಾಮು ಅಮ್ಮೀನಾದಾಬುನ ಅಮ್ಮೆ. ಅಮ್ಮೀನಾದಾಬು ನಹಸ್ಸೋನುನ ಅಮ್ಮೆ. ನಹಸ್ಸೋನ್ ಸಲ್ಮೋನನ ಅಮ್ಮೆ. 5ಸಲ್ಮೋನು ಬೋವಜ್‌ನ ಅಮ್ಮೆ. ಬೋವಜ್‌ನ ಅಪ್ಪೆ ರಾಹಾಬ್. ಬೋವಜೆ ಓಬೆದ್‌ನ ಅಮ್ಮೆ. ಓಬೆದ್‌ನ ಅಪ್ಪೆ ರೂತು. ಓಬೆದೆ ಇಸ್ಸಾಯನ ಅಮ್ಮೆ. 6ಇಸ್ಸಾಯೆ ಅರಸು ಆದುಪ್ಪು ದಾವೀದನ ಅಮ್ಮೆ. ದಾವೀದೆ ಸೊಲೊಮೋನುನ ಅಮ್ಮೆ. ಸೊಲೊಮೋನುನ ಅಪ್ಪೆ ಉರೀಯನ ಬೊಡೆದಿ ಆದಿತ್ತಿನಾಲ್. 7ಸೊಲೊಮೋನು ರೆಹಬ್ಬಾಮುನ ಅಮ್ಮೆ. ರೆಹಬ್ಬಾಮು ಅಬೀಯನ ಅಮ್ಮೆ. ಅಬೀಯೆ ಆಸನ ಅಮ್ಮೆ. 8ಆಸೆ ಯೆಹೋಷಾಫಾಟನ ಅಮ್ಮೆ. ಯೆಹೋಷಾಫಾಟ್ ಯೆಹೋರಾಮುನ ಅಮ್ಮೆ. ಯೆಹೋರಾಮು ಉಜ್ಜೀಯನ ಅಮ್ಮೆ. 9ಉಜ್ಜೀಯೆ ಯೋತಾಮುನ ಅಮ್ಮೆ. ಯೋತಾಮು ಆಹಾಜನ ಅಮ್ಮೆ. ಆಹಾಜೆ ಹಿಜ್ಕೀಯನ ಅಮ್ಮೆ. 10ಹಿಜ್ಕೀಯೆ ಮನಸ್ಸೆನ ಅಮ್ಮೆ. ಮನಸ್ಸೆ ಅಮೋನುನ ಅಮ್ಮೆ. ಅಮೋನು ಯೋಷೀಯನ ಅಮ್ಮೆ. 11ಯೋಷೀಯೆ ಯೆಕೊನ್ಯನ ಬೊಕ್ಕ ಆಯನ ಮೆಗ್ಯೆ ಪಲಯಾಡ್ಲೆನ ಅಮ್ಮೆ. ಈ ಸಮಯೊಡು ಯೆಹೂದ್ಯೆರೆನ್ ಬಾಬೆಲ್‌ಗ್ ಕೈದ್ ಮಲ್ತ್‌ದ್ ಕೊನೊ ಪೋಯಿನವು.
12ಯೆಹೂದ್ಯೆರೆನ್ ಬಾಬೆಲ್‌ಗ್ ಕೈದ್ ಆದ್ ಪೋಯಿ ಬೊಕ್ಕದ ಸಂತಾನದ ಪಟ್ಟಿ. ಯೆಕೊನ್ಯೆ ಶೆಯಲ್ತಿಯೇಲನ ಅಮ್ಮೆ. ಶೆಯಲ್ತಿಯೇಲೆ ಜೆರುಬಾಬೆಲನ ಅಮ್ಮೆ. 13ಜೆರುಬಾಬೆಲೆ ಅಬಿಹೂದನ ಅಮ್ಮೆ. ಅಬಿಹೂದೆ ಎಲ್ಯಕೀಮುನ ಅಮ್ಮೆ. ಎಲ್ಯಕೀಮು ಅಜೋರುನ ಅಮ್ಮೆ. 14ಅಜೋರು ಸದೋಕುನ ಅಮ್ಮೆ. ಸದೋಕು ಅಖೀಮುನ ಅಮ್ಮೆ. ಅಖೀಮು ಎಲಿಹೂದನ ಅಮ್ಮೆ. 15ಎಲಿಹೂದೆ ಎಲಿಯಾಜರನ ಅಮ್ಮೆ. ಎಲಿಯಾಜರೆ ಮತ್ತಾನನ ಅಮ್ಮೆ. ಮತ್ತಾನು ಯಾಕೋಬುನ ಅಮ್ಮೆ. 16ಯಾಕೋಬು ಮರಿಯನ ಕಂಡನಿ ಆದುಪ್ಪು ಯೋಸೇಫುನ ಅಮ್ಮೆ. ಆ ಮರಿಯಡ್ದ್ ಕ್ರಿಸ್ತೆ ಪನ್ಪಿ ಯೇಸು ಪುಟ್ಟಿಯೆ.
17ಇಂಚಾದ್ ಒಟ್ಟುಗು ಅಬ್ರಹಾಮುಡ್ದು ದಾವೀದ ಮುಟ್ಟ ಪದ್ನಾಲ್ ತರೆ, ದಾವೀದಡ್ದ್ ಬಾಬೆಲ್‌ಗ್ ಸೆರೆ ಕೊನೊಪಿ ಮುಟ್ಟ ಪದ್ನಾಲ್ ತರೆ, ಐಡ್ದ್ ಬೊಕ್ಕ ಬಾಬೆಲ್‌ದ ಬಂಧನೊಡ್ದು ಕ್ರಿಸ್ತ ಮುಟ್ಟ ಪದ್ನಾಲ್ ತರೆ.
ಯೇಸು ಕ್ರಿಸ್ತನ ಪುಟ್ಟು
(ಲೂಕೆ 2:1-7)
18ಯೇಸು ಕ್ರಿಸ್ತನ ಪುಟ್ಟು ಈ ರೀತಿಡ್ ಆಂಡ್. ಆಯನ ಅಪ್ಪೆ ಆದುಪ್ಪು ಮರಿಯನ್, ಯೋಸೇಫುಗು ನಿಚ್ಚಯ ಮಲ್ತ್‌ದುಪ್ಪುನೆಡ್ದ್ ಅಕುಲು ಮದ್ಮೆ ಆವೊಡ್ದು ದುಂಬೇ ಆಲ್ ಪರಿಶುದ್ಧಾತ್ಮೊಡ್ದು ಬಂಜಿನಾಲ್ ಆಯಿನವು ತೆರಿದ್ ಬತ್ತ್ಂಡ್. 19ಆಂಡ ಆಲೆನ ಕಂಡನಿ ಆಯಿ ಯೋಸೇಫೆ ಸಜ್ಜನೆ ಆದಿತ್ತಿನೆಡ್ದ್ ಈ ಸಂಗತಿನ್ ಬೈಲ್‌ಗ್ ಕನವೆರೆ ಮನಸಿಜ್ಜಂದೆ ಆಲೆನ್ ಗುಟ್ಟುಡು ಬುಡ್ದು ಬುಡೊಡು ಪಂಡ್ದಿತ್ತೆ. 20ಆಯೆ ಇಂಚ ಆಲೋಚನೆ ಮಲ್ತೊಂದುಪ್ಪುನಗ ಕರ್ತವ ದೂತೆ ಕನೊಟು ಬತ್ತ್‌ದ್, “ಯೋಸೇಫೋ ದಾವೀದ ಸಂತಾನದಾಯಾ, ನಿನ ಬೊಡೆದಿ ಮರಿಯನ್ ಸೇರಾವೊನ್ರೆ ಪೋಡ್ಯಡ ಆಲೆನ ಗರ್ಭ ಪರಿಶುದ್ಧಾತ್ಮೊಡ್ದೇ ಆಯಿನವು. 21ಆಲ್ ಆಣ್ ಬಾಲೆನ್ ಪೆದ್ದುವಲ್. ಈ ಆ ಬಾಲೆಗ್ ಯೇಸು ಪಂಡ್ದ್ ಪುದರ್ ದೀವೊಡು, ದಾಯೆಗಂದ್ಂಡ ಆಯೆನೇ ತನ ಜನೊಕುಲೆನ್ ಅಕ್ಲೆನ ಪಾಪೊಲೆಡ್ದ್ ಬುಡ್ಪಾದ್ ಕಾಪುವೆ,” ಅಂದ್‌ದ್ ಪಂಡೆ.
22ಕರ್ತವೆ ಪ್ರವಾದಿಡ್ದ್ ಪಂಡಿನ ಪಾತೆರ ನಡಪುಲೆಕ್ಕ ಉಂದು ಮಾತ ನಡತ್ಂಡ್. ಆ ಪಾತೆರ ದಾನೆಂದ್ಂಡ, 23“ಇಂದಾ, ಒಂಜಿ ಕನ್ಯಪೊಣ್ಣು ಬಂಜಿನಾಲಾದ್ ಒಂಜಿ ಬಾಲೆನ್ ಪೆದ್ದುವಲ್. ಆಯಗ್ ಇಮ್ಮಾನುವೇಲ್ ಪಂಡ್ದ್ ಪುದರ್ ದೀಪೆರ್. ನೆತ್ತ ಅರ್ಥ, ‘ದೇವೆರ್ ನಮಡೊಪ್ಪ ಉಲ್ಲೆ,’ ಪಂಡ್ದ್.”
24ಅಪಗ ಯೋಸೇಫೆ ನಿದ್ರೆಡ್ದ್ ಲಕ್ಕ್‌ದ್ ಕರ್ತವ ದೂತೆ ಅಪ್ಪಣೆ ಕೊರಿಲೆಕ್ಕನೆ ತನ ಬೊಡೆದಿನ್ ಸೇರಾವೊಂಡೆ. 25ಅತ್ತಂದೆ ಮರಿಯ ಪೆದ್ದುನೆಟ್ಟ ಆಲೆಡ್ದ್ ದೂರ ಇತ್ತೆ. ಶರೀರ ಸಮ್ಮಂಧೊನು ಮಲ್ತ್‌ಜೆ. ಬೊಕ್ಕ ಯೋಸೇಫೆ ಆ ಬಾಲೆಗ್ ಯೇಸು ಇನ್ಪಿ ಪುದರ್ ದೀಯೆ.
Pašlaik izvēlēts:
ಮತ್ತಾಯೆ 1: ತುಳು
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
New Life Literature