Luka 1
1
1Antu amavulu anakwati mudimu wakusoneka nikushimuna nsaŋu yakutena yuma yitunetiyi chikupu mukachi ketu netu yalala; 2mwomwatulejeleluwu kudi ayinsahu amweni namesu hatachikilili nsaŋu, adiŋi akwakukalakala mudimu wamazu. 3Dichi neli nami chachiwahi nikusonekeli nawa, eyi Tiyofwilu wasweja kulema, muloŋa nashinshiki dehi chakashinshi mwaya nsaŋu yejima hachuma hachuma, kufumisha hatachikilili nsaŋu; 4kulonda wiluki yuma yakulejeluwu, neyi akulejeli mwalala chikupu.
5Hadiŋi mwanta wawaYudeya Herodi hadiŋi kapristu wumu, ijina dindi Zakariya, wakwizanvu daAbiya, Iŋodindi wakudi anyana kaAroni, ijina dindi Elizabeta. 6Mwayedi wawu adiŋi antu aloŋa kumesu aNzambi, endelaŋa mwaya nshimbi nimuyidi ka yaYehova yejima chakadi hakuyinkela muloŋa. 7Hiyadiŋi namwanaku, muloŋa Elizabeta wadiŋi nshinta, mwayedi wawu asweja dehi kukula.
8Chakoŋelaŋayi Zakariya mudimu windi wawupristu kumesu aNzambi, mwomwakalakelaŋa akwezanvu dindi, 9mwomuchaaku chamudimu wawupristu, chakwila kapristu wukwipila mutembeli yaYehova nakwocha insensi, chiŋa yowu wakusakula nachinjikijilu chakusakula nachu hohu. 10Izaza dawantu dejima dadiŋi nakulomba hanzi hampinji yakwocha insensi. 11Kudi yena hikukumwekana kaŋelu kaYehova nemanikukameŋa kakwochela insensi, kumbadi yachikasa chachidiilu. 12Zakariya chanamumoniyi hakwakama, niwoma wumukwata nikumukwata. 13Kaŋelu hakumwila ni di, Eyi Zakariya, bayi wutiya womaku; kulembelela kweyi anakutiyi, iŋodeyi Elizabeta wakakuvwela mwana weyala, wakanamutumba ijina dindi neyi Yowanu. 14Eyi wakazaŋalala wakatiya kuwaha; amavulu akazaŋalala hakavwalikayi. 15Muloŋakamumona kulema kudi Yehova. Bayi akanwaŋa vinyu hela walwa washetanaku; wakenzala Spiritu Wajila kufumisha hakavwalikayi. 16Wakabalumuna anyana kaIsarela amavulu akatali kudi Yehova Nzambi yawu. 17Wakayaloŋahu dehi kumbidi nimuSpiritu nimuŊovu yaElija, kulonda kubalumuna nyichima yawatata jawantu yakatali kudi anyanawu, ajikwa akendi nama ana awaloŋa; akamuloŋesheli Yehova antu akawani amuloŋeshelawu dehi. 18Zakariya hakumwila kaŋelu nindi, Chumichi nukuchiluka ŋahi? Ami niipala deyala, niŋodami nasweji dehi kukula. 19Kaŋelu hakumwakula nindi, Ami yami Gabireli, nemanaŋa kumesu aNzambi; anantemeshi ninzi nihoshi neyi nikuleji nsaŋu iyi yayiwahi. 20Tiya, eyi wukwi kala kamama, hiwukutwesha kuhoshaku, kushika nihamba kamwekana yumiyi, muloŋa wunabuli kwitiya mazu ami akalumbuluka hakakweji kawu. 21Antu saŋa emenawu nakumuchiŋilila Zakariya, hiyakuhayama chadiŋi nakulabilayi mutembeli. 22Chanedikiyi kutwesha kuhosha nawu nehi, eluka nikwiluka nawu namoni chuma mutembeli; kwakwinyeka namakasindi hohu, kukanwa chochikwamwena zo. 23Chelili mafuku indi akoŋelaŋayi mudimu anawani dehi, hakuya kwitala dindi.
24Mafuku alondeli mumafuku owu, Iŋodindi Elizabeta abaaba niivumu, hakudi ŋinda tukweji tutanu, 25nindi, Dichi chanaŋiliyi Yehova chanenziyi nakuntala mafuku anu, anfumishi nsonyi yinatiyaloŋa kudi akwetu antu.
26Hakakweji kamuchitanu nakamu, owu kaŋelu Gabireli amutemesheli kudi Nzambi kumukala wamuŊaliliya wumu, ijina dawu Nazareta.
27Hakwinza kudi mumbanda wumu wakadi kudi monaŋahu dehi neyala, anakumini dakumwota kudi iyala ijina dindi Yosefu, wakumutaŋa waDavidi; ijina danowu mujiki diyi Mariya. 28Kaŋelu hakwijila mwadiŋiyi yena, hakumwila nindi, Kolaku, eyi anakutiyili luwi lwakubadika, Yehova wudi naneyi; yeyi wunakooleki hakachi kawakwenu ambanda. 29Yena chanatiyiyi izu odu hakwakama nankashi, hakujinoka mumuchima windi nindi anaŋimwishi ŋahi? 30Owu kaŋelu hakumwila nindi, Eyi Mariya, bayi wutiya womaku; wunawani wuselewa kudi Nzambi. 31Tiya, wakabaaba ivumu, wakavwala mwana weyala, wakanamutumba ijina dindi neyi YESU. 32Yena wakekala muneni, akamutena nawu Mwana kaMukwakubadika Mwiwulu, Yehova Nzambi wakamwinka itanda datata yindi Davidi dawanta; 33wakekala mwanta wakumutaŋa waYakoba naya nyaka; wanta windi hiwamba kakumaku.
34Mariya hakumwila kaŋelu nindi, Chumichi chikutwesheka ŋahi, ichi chinabuli iyala? 35kaŋelu hakumwakula nindi, Spiritu Wajila wakenza hadeyi; Ŋovu jaMukwakubadika Mwiwulu jakakuzeŋamina; dichichuma chiwakavwala akachitena nawu chajila, hiMwana kaNzambi weyala. 36Tiya, nikawusoku weyi Elizabeta niyena nawa naba abi dehi ivumu damwana weyala muwushinakaji windi, mumbanda atenenaŋawu nawu nshinta; kakweji kanu diku kaneli dehi kamuchitanu nakamu. 37Muloŋa kudi Nzambi hikwafumaŋa izu dabula Ŋovuku. 38Mariya hakwila nindi, Tala ami kambuŋambala kaYehova; mwonsu muwunahoshi mumwekani kudami. Kaŋelu hakufuma kudi yena.
39Wena mafuku owu Mariya hakunyamuka bakuya swayi kwituŋa damapidi, kumukala wamuYuda wumu; 40hakwijila mwitala daZakariya, hakumwimwisha Elizabeta. 41Elizabeta chanatiyiyi kwimwisha kwamwimwishiluwu kudi Mariya, mwana wadiŋi mwivumu dindi hakutuntoka. Elizabeta hakwinzala Spiritu Wajila. 42Hakubidika nezu daŊovu nindi, Yeyi wunakooleki hakachi kawakwenu ambanda, niwakafuma mwivumu deyi nakooleki. 43Ichi chanenziyi mama yaMwanta wami kudami chinafumi hanka? 44Talenu, izu diwunaŋimwishi, chidinepili mumatu ami, mwana wudi mwivumu dami hakutuntoka namuzaŋalu. 45Iwu mumbanda wetiya nakooleki, muloŋa yuma yanamulejuwu kudi Yehova yakamwekana.
46Mariya hakwila nindi, Muchima wami hiwukumutohesha Yehova;
47spiritu yami yinazaŋalali naNzambi Chamwinu chami. 48Muloŋa yena namoni chinabula kulema ami kambuŋindi. Tiyenu, kufumisha kulelu antu ejima akavwalikaŋa, mufwawa muhiŋawa, amba kantenaŋa nawu wakooleka. 49Muloŋa mukwaŋovu naŋili yuma yamaneni; niijina dindi dajila. 50Luwi lwindi lwamba kashikaŋa kudi antu ejima akavwalikaŋa, mufwawa muhiŋawa, amba kamwakamaŋa. 51Namwekeshi Ŋovu nachikasa chindi; naŋalaŋeshi adifuukwili nawu alema. 52Nafumishi anyanta hamatandawu awanta, natúumbakeshi akadi kulema. 53Nekutishi adiŋi nanzala nayuma yayiwahi, nahaŋi akwakuheta makasakasa. 54Nakwashi kambuŋindi Isarela aanuki luwi lwindi, 55lwatiyilili Abarahama ni anyanindi, mwomwakanininiyi ankakulula jetu kufumisha kunyaaka. 56Mariya hakushakama nindi kafwampi neyi tukweji tusatu, hakufunta cheŋi kumukala wawu.
57Chawanini mafuku akusapuluka, Elizabeta hakuvwala mwana weyala. 58Akwawu atuŋayi nindi kwakwihi, niawusoku windi, chanatiyuwu nawu Yehova namutoŋi nankashi, hiyakuzaŋalala chimu nindi. 59Chelili ifuku damu chitanu nachisatu chidinashiki dehi, hiyakwinza nawu amwalamishi mwana; elili nawu anamutumbi ijina datata yindi Zakariya. 60Kuchinka mama yindi nindi, Nehi, namutumbenu nenu Yowanu. 61Hiyakumwila nawu, Kwosi kawusoku weyi atumbawu dehi ŋinoduku. 62Hiyakumukobola tata yindi kulonda ayileji danakeŋiyi kunamutumba. 63Hakulomba ilola kulonda asonekuhu; hakusoneka nindi, ijina dindi diyi Yowanu. Wejima wawu hiyakuhayama. 64Kanwa kindi kajikuka ŋihohenohu, niidimi dindi disubuka nikusubuka, hakuhosha mazu akumusakilila Nzambi. 65Woma wuyikwata niantu ejima atuŋi mbadi oyu; yumiyi yitiyakana nimwahita ituŋa daYudeya damapidi dejima ti-li-li. 66Antu ejima ayitiyili, hiyakuyisweka munyichima yawu nawu, Iwu mwana wamba kela ŋahi? muloŋa chikasa chaYehova chadiŋi nayena.
67Tata yindi Zakariya hakwinzala Spiritu Wajila, hakuprofweta, 68nindi, Yehova Nzambi yaIsarela akisulewi, muloŋa nenzi nakutala antu indi ayikúuli; 69natunyamwini dehi wamwinu waŋovu wakumutaŋa wakambuŋindi Davidi, 70mwomwahosheliyi dehi kutunwa twawatuprofwetu twindi ajila kufumisha kushankulu. 71Wamwinu wakutwamwina kudi akwankunyi netu, nikumakasa awantu ejima atuhelaŋa; 72kulonda akatiyili ankakulula jetu luwi hakwanuka kutiyaloŋana kwindi kwajila; 73kwokusanyika kwasanyikililiyi nkakulula yetu Abarahama; 74kulonda chakutwamwinayi kumakasa awakwankunyi netu, twakamukala kelaŋa kumesu indi chakadi woma, 75nimukujila nimukuloŋa mafuku etu ejima. 76Nineyi mwana akakwilaŋa nawu wukaprofwetu kaMukwakubadika. Wakatwaminaŋahu dehi kumbidi yaYehova, kulonda kumuloŋeshelaŋahu dehi njila jindi; 77kulonda chiwakayileja neyi anayanakeni dehinyiloŋayenu, akeluki nawu anatuhandishi dehi, 78naluwi lwaNzambi yetu lwawushona. Naluwi olu twakamona nachu kucha kwakufuma mwiwulu, kwakwinza nakututala; 79kucha kwakuchiila ashakama mumwidima nimuwulelu wakufwa, kwakalomboli nyendu yetu yakaholokeli munjila yakumona kuwunda. 80Mwana wakulili, wakwatili Ŋovu muspiritu, Hakwikalaŋa mumasaŋa kushika nikwifuku damumwekesheluwu kudi aIsarela.
Pašlaik izvēlēts:
Luka 1: MW62
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
The Bible in Lunda: Ndembu (Lunda of Kalunda) © B. F. B. S. 1962.