MI CILIMA 12
12
1Li Miali Diedo den yedi Abalama: «Ña a diema nni. Ŋan fii a baadogu nni, leni a baadiegu nni ki gedi min baa waani a yaa diema nni.#JTT 7.2-3; Ebl 11.8
2N baa teni ŋan tua nibociamu,
N go baa seligi a.
N baa teni a yeli n ña,
A baa tie li seli daano yaa niba n sieni po.
3N baa seligi yaaba n seligi a,
N baa soli yaaba n fali a,
Ki tinga nibuoli kuli baa baa li seli kelima a yaa po.»#Gal 3.8
4Abalama den fii ki gedi nani Li Miali Diedo n den yedi maama. *Loto den fii ki yegi leni o. 5Abalama den pia piilele n bina muu wan den ñani Halana dogu nni. Abalama den taa o pua Salai leni o waalo bijua Loto leni ban den baa yaa naacenba leni yaa piama Halana dogu nni. Bi den fii ki baa gedi Kanana yaa diema nni yeni. Bi den pundi Kanana yaa diema nni.
Abalama gedi Kanana diema nni ki yuandi ki gedi Ejipiti diema nni
6Abalama den goandi mi diema hali ki pundi yaa kaanu n yi Sikema, hali sena tiidi yaa kaanu yu n ye Mole yaa dogu nni. Kanana yaaba den ye mi diema nni laa yogunu.
7Li Miali Diedo den doagidi Abalama kani ki yedi o: «N baa pa a yaa yaabila mi naa diema.» Lane Abalama den maa li *padibinbinli Li Miali Diedo po, wani yua n den doagidi opo yeni.#JTT 7.5; Gal 3.16 8O den fii ki fuadi lankani ki gedi yaa juali n ye Betela yaa puoli po. O den tii o gbandiena lankani ke Betela ye o nintuali, ke Ayi mo ye o puoli. O go den maa li padibinbinli lankani ki jaandi ki kpiagi Li Miali Diedo yaa yeli. 9Abalama go den suagi liiga ki goadi goadi ki teli Kanana ganu po.
10Mi koma den tieni mi diema nni ke Abalama den jiidi ki kua Ejipiti diema nni ki baa ye lankani kelima mi koma den bia boncianla Kanana diema nni. 11Wan den caa ki baa kua Ejipiti diema nni yaa yogunu, Abalama den yedi o pua Salai: «Diidi, n bani ke a tie yaa pua n ŋani hali boncianla. 12Ejipiti yaaba yaa laa ŋa, bi baa yedi: ‹O tie o pua yo.› Bi baa kpa nni ki ŋa ŋa leni a miali. 13N mia ŋa ŋan yedi ba ke a tie n waalo. Lani n tie ban ga n cangu bonŋanla kelima a yaa po. Lan tie min baa ki yaa ye ke bi kan kpa nni.»#Cil 20.2; 26.7
14Abalama n den kua Ejipiti diema nni yaa yogunu, Ejipiti yaaba den laa ke o pua ŋani hali boncianla. 15Ejipiti bado koanbala mo n den laa o yeni, bi den pagi o ŋamu o bado kani. Bi den taa o pua ki gedini o badidiegu. 16O bado den tieni Abalama po mi ŋanma. Ejipiti bado den puni o i pe, i ŋuabi leni i ne, a jatuada leni a potuada, a ŋunjala leni i ŋunñoe leni ti yuoyuodi. 17Ama Li Miali Diedo den teni ke i yianbiadi cuo o bado leni o diegu yaaba kelima Abalama yaa pua Salai po. 18Lanwani o bado den yini Abalama ki yedi o: «A tieni nni be mo n yeni? Be yaa po yo ke a naa den waani nni ke o tie a pua yo? 19Be yaa po yo ke a den yedi ke o tie a waalo yo? Lani n teni ke n den taa o ke wan tua n pua. Moala, ga a pua. Cua ki taa o ki gedi yi kaanu.»
20 *Falono den ñani li ñoabonli o niba po ke ban cabi Abalama wan fii leni o pua leni wan den pia yaala kuli.
Pašlaik izvēlēts:
MI CILIMA 12: GUX03
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Gulmancema Bible © Bible Society of Burkina Faso, 2003.