Magə 9
9
1Yeso a ghɛn nə́ mbiə á mə́ sóŋ nə́ ńgə́, “Mäŋ fiʼtə̂ áwɨ́ nə́ ndə̌ŋdəŋ ńgə́, pɨ pətsə́ pə́ chîə aliʼə́ nə́ páʼ pó yǒ nə́ kě kwû tə ghə́ pó zə́ənə Anuə Nəfoonə Əsê á yǐ nə́ mətɨ mi pô.”
Yeso a Kwúblə Ńtíʼə Ŋ́ŋwaŋkə̂ Ŋwaŋkə̂ nə́
(Mat 17.1-13; Luk 9.28-36)
2Əlěmbî pɛ́n ntogə́ ə́ laŋ, Yeso a lɔgə̂ Pita pó Jɛmsə nə́ Jɔnə pó po kɔ́ʼ ńgɛnə̂ á ndu tə́sɛ nkwəənə tsɔʼə pó nə́ pó. A kwúblə ńtíʼ ŋ́ŋwaŋkə̂ ŋwaŋkə̂ nə́ á mbi pó. 3Ətsəʼ əpí ə́ tíʼə ə́fógə ńgə́ púu, ə́fóg tə ńtsɛɛlə̂ ándó mbɔʼ ŋwu tsə̌ á ndu mbîə a sogə̂ pɨ́d ə́ chîə. 4Elayija pó Mosisə jáʼ ńtíʼə ńtséebə pópə Yeso. 5Pita a sóŋə á mbô Yeso ńgə́, “Ndzéʼkə, á pɔŋ ndzaŋ pɛn chî nə́ aliʼə́ nə́. Tíʼ pəg kwúd məntaŋ mɛ́n mə́ teelə́, táʼə á mbô gho, táʼə á mbô Mosisə, táʼə yitsə̌ á mbô Elayija.” 6Pita a kə sóŋ ə́lɨ́d lə́ ńté ńgə́ a nə ńkě jîə anu mbɔʼ a sóŋ pô ńté ńgə́ pó nə ńtə́ ḿbyádnə ḿbɔ́gə.
7Əghâ yi wɨ́ alə́mə á jáʼ ńkə́bkə ághɔ́b, ngye yitsə̌ ə́ tíʼ ə́fɛ́lə á mə́m alə́m yə wɨ́ ə́sóŋ ńgə́, “Lɛ̌ lə́ móonə mə páʼ maŋ kɔŋ nə́ yə́, zóʼ nə́ á mbô yə́.” 8Tsɔʼə əghâ yi wɨ́ pó pɨ ńgə́ ńnáŋ əliʼ ńkě a ŋwu tsə́ pɨ ńjɨ́ pô tə ńdéʼtə Yeso.
9Əghâ ándó pó nə ńtə́ nə́ ńtsóolə á ndu nkwəənə wə́ lə́, Yeso a kwantə̂ ághɔ́b ńgə́ kɔ pó fiʼtə̂ ŋwu tsə́ nə́ anu pó jɨ́ nə́ tə ńkoʼə̂ alě Mɔ́ Ŋwunə a yǒ nə́ júmnə nəwûə.
10Pó nə ńdɔʼkə̂ anu yəwə́ á mə́m pó, lə́ ḿbə́ ńtíʼə ńtséebə á tətɨ pó ńgə́, “Mə́ júmnə nə́ nəwû lə́ akə̂?” 11Pó tíʼ ḿbítə yí ńgə́, “Lə́ ghɛlə̂ akə̂ ngaŋə́zéʼkə pənoŋkə pó sóŋ ńgə́ Elayija a yǒ shib yǐəə?”
12Yeso a kwěe ńgə́, “Lə́ ndə̌ŋdəŋ Elayija a yǒ peg yǐəə á mə́ tsoŋkə̂ nə́ mənu mətsəm mə́ koʼnə̂. Lə́ pə́ ńgɛlə̂ akə̂ Aŋwaʼlə Əsê á sóŋə ńgə́ Mɔ́ Ŋwunə a yǒ zɨ́ ngə́ʼ yi nɨ́ nə́ pə kǐəə yə́? 13Mäŋ fiʼtə̂ áwɨ́ ńgə́, Elayija a nə ḿbɛ́d tə ńgyǐəə, lə́, pɨ pó pə́ ə́faʼə̂ anuə atsəmə a mbɨ yí ndzaŋ ntsəm pó kɔŋ nə́, tsɔʼə ndzaŋ páʼ Aŋwaʼlə Əsê á sóŋ nə́ ńté yə́.”
Yeso a Tsóʼə Mɔ́ Mbyâŋnə yitsə̌ Páʼə a Túg nə́ Ajwiə Təpɔŋə
(Mat 17.14-21; Luk 9.37-43a)
14Əghâ ándó pó nə ńtsó nə́ á ndu nkwəənə ńtéekə apuʼə ngaŋə́zoŋə́ndzəm Yeso lə́, ńjɨ́ mboŋ ŋwu məsɔŋə́ aliʼ yəwə́, ngaŋə́zéʼkə pənoŋkə pətsə́ pó nə ńtə́ ńdzɔŋnə̂ pópə ngaŋə́zoŋə́ndzəm Yeso. 15Əghâ ándó ŋwu ntsəmə a nə ńjɨ́ nə́ Yeso lə́, á kɨʼnə̂ ághɔ́b pó tíʼ ńgɛnə̂ á mə́ chaʼtə̂ nə́ yə́. 16Yeso a pítə ághɔ́b ńgə́, “Pɨ̌ po zɔŋə̂ lə́ akə̂?”
17Ŋwu tsə̌ á mə́m ŋwu məsɔŋ wə̂ a kwěe ńgə́, “Ndzéʼkə, maŋ pěʼ ńgyǐ nə́ móonə mə á mbô gho páʼə ajwiə təpɔŋ á chî nə́ á mbɨ yí ńgɛlə̂ ńgə́ kɔ a tséebə. 18Əghâ ətsəm páʼə á wam nə́ yí, á záʼkə yí ḿmaʼə̂ á ndəsê ä tíʼə ə́fwɔʼkə̂ mətwê á ntso yí, ńkɔ́lə məsɔŋ mí mbɨ əjǐ ə́ tíʼ ńtyantə̂ tsɔʼə ntsəmə. Maŋ pěʼ ə́sóŋ nə́ ngaŋə́zoŋə́ndzəm əzô ńgə́ pó kəmə̂ ajwi jɨ́d zə̂ pó pə́ ńkě chî təmbɔʼ pó kəm pô.”
19Yeso a kwěe ńgə́, “Wə̌ə, pɨ pə́ ngoʼ pɨ, pi pə́ tə mbimə́! Maŋ yǒ lánə chîə á mə́m pɨ tə koʼ lə́ ə́lɛ́? Maŋ yǒ wam ntɨ́ nə́ pɨ tə koʼ lə́ ə́lɛ́? Yǐ nə́ nə́ mɔ́ yi wə́ á mbô maŋə.” 20Pó tíʼ ńgyǐ nə́ yə́.
Əghâ ándó ajwi zə̂ a nə ńjɨ́ nə́ Yeso lə́, ńtɔ́g ńgwaamə̂ mɔ́ yi wɨ́, ńchiʼə̂ yí a tíʼ ńgwǔəə á ndəsê ńtíʼə ńkablə̂ ə́fwɔʼkə̂ mətwê a ntso yə́. 21Yeso a pítə tǎpə mɔ́ yi wɨ́ ńgə́, “Aghɔ zəənə́ á chîə á mbɨ yí lə́ ngoʼ ə́shíʼə́?”
A kwěe ńgə́, “Ə́fɛ́d pɔ̂nkə̂. 22Ä zá ḿmaʼə̂ yə́ á mə́m mógə́ kəənə á ńkǐəə á mə́ jwítə nə́ yə́. Lə́ mbɔʼ gho chî təmbɔʼ gho ghɛlə̂ anu yətsə́, gho kó mələ́ŋ mə́g ńkwáalə áwə́gə́.”
23Yeso a sóŋ ńgə́, “Gho ə́sóŋə a pə́ ńgə́ təmbɔʼ maŋ chî təmbɔʼ maŋ ghɛlə̂ anu yətsə́?” Mbɔʼə anu yətsə́ a kě ŋwu páʼə a túg nə́ mbimə́ tsɛ pô.
24Tǎ pə mɔ́ wə̂ a tɔ́g ńkyéŋ ńgə́, “Maŋ túg mbimə́ ə́ pə́ ńkə́gə; kwáalə mə ḿbeg mbimə́ mə.”
25Ndzaŋə ándó Yeso a nə ńjɨ́ nə́ ńgə́ ŋwu məsɔŋə́ a tə ńkwəŋnə̂ ńgyǐəə aliʼ yi wɨ́ lə́, ńtíʼ ə́sáʼə ajwiə təpɔŋ zə̂ ə́sóŋ ńgə́, “Ajwiə akə̌tû pó chípóʼ, maŋ sóŋ ńgə́ gho fɛ́lə á mbɨ yí tə kɔ gho láʼ ḿbɨ ńkə́ ńkwúnə.”
26Ajwi zə̂ a póʼ ngoŋ ńtíʼ ńchiʼə̂ mɔ́ wə́ nə́ mətɨ, ə́fɛ́lə á mbɨ yə́. Mɔ́ wə́ a tíʼ ńnoŋnə̂ ándó akwûə ajú tə pɨ pipə nɨ́ nə́ pə́ tíʼə ə́sóŋə ńgə́, “A kwûə.” 27Lə́ Yeso a pə́ ńgwaamə̂ apô ají ńdookə̂ yə́ á ndəsê, a tíʼ ńdǒo á ndəsê ńtə́əmə.
28Əghâ ándó Yeso a nə mbɨ nə ńtíʼ ńkwúnə á ndɛ̂, ngaŋə́zoŋə́ndzəm əjí ə́ pítə yə́ a ndzəmə ndzəm ńgə́, “Mbɔʼ pəg pěʼ ńkě kəm lə́ ńté akə̂?”
29Yeso a kwěe ńgə́, “Mbɔʼ lə́ fóg tsɔʼə achaʼtə́sê ə́fóg ndzaŋ zəənə́#9.29Pətsə́ əŋwaʼlə ə́ peg ńgə́, “Pó achaʼtə́sênjiə.” .”
Yeso a kə́ Ḿbɨ Ə́sóŋə Anu Ńté Nəwû əyǐə
(Mat 17.22, 23; Luk 9.43b-45)
30Pó fɛ́lə aliʼ yi wɨ́ ńtóokə Galiliə. Yeso a nə ńkě kɔŋ ńgə́ ŋwu tsə̌ a jîə aliʼ pó chî nə́ ə́wɨ́ pô, 31ńté ńgə́ a nə ńtə́ ńdzéʼkə ngaŋə́zoŋə́ndzəm əjíə, ə́sóŋə á mbô pó ńgə́, “Pə́ yǐ fɛ̂ Mɔ́ Ŋwunə á mbô pɨ pó jwítə yə́, əlě teelə́ ə́ laŋə̂ a pɨ ńjúmnə.”
32Atûə azóobə́ á pə́ ńkě lá nə́ anu páʼ a sóŋ nə́ lə́ pô, pó pə́ ḿbɔ́gə á mə́ pítə nə́ yə́.
Lə́ Əwə Páʼə a Tsɛ nə́ Ŋwu Ntsəmə?
(Mat 18.1-5; Luk 9.46-48)
33Pó yǐ ńkwúnə á Kapanawum, ńkwúnə á ndɛ̂ a pítə ághɔ́b ńgə́, “Nə́ pěʼə́ ńtséebə ə́sóŋə lə́ ńgə́ akə̂ á alaŋə́?”
34Pó pə́ ńnaʼə̂ ághɔ́b ńté ńgə́ pó pěʼ ńtə́ ńnyinə̂ á alaŋə́ lə́ ńtə́ ńdzɔŋnə̂ ńgə́ ŋwu páʼə a tsɛ nə́ ŋwu ntsəm lə́ əwə? 35Yeso a náanə á ndəsê ə́fóŋ ngaŋə́zoŋə́ndzəm əjí zə̂ ntsɔb pɛ̌ ə́sóŋ nə́ pó ńgə́, “Təmbɔʼ ŋwunə a tə́ ńdoonə̂ á mə́ chî nə́ á mbi, a shib ńdwegtə̂ ndzəm ńkə́ ḿbə́ ngaŋəfaʼ ŋwu ntsəmə.” 36A lɔgə̂ mɔ́ kə́nyaŋ mɔ́ yitsə̌ ńgɛlə̂ a tə́əmə á mə́m pó, a twáamə yí ńtúgə á mbô yí ə́sóŋ nə́ pó ńgə́, 37“Ŋwu ntsəm páʼə a kwá nə́ táʼ mɔ́ kə́nyaŋ mɔ́ nə́ yitsə̌ nə́ əlɛ́nə mə, a kwá lə́ mə; Ŋwu ntsəm páʼə a kə́ nə́ ńkwáalə mə, a kě lə́ mə kwá pô, ḿbə́ ńkwá lə́ ŋwu páʼə a tú nə́ mə.”
Ŋwu Ntsəm Páʼə a kě nə Məsɔŋə́ a Ndzəm Pɛn Sɔb pô, lə́ Ngaŋndzəm Əwɛ́nə
(Luk 9.49, 50)
38Jɔnə a sóŋə á mbô yí ńgə́, “Ndzéʼkə, pəg zə́ənə ŋwu tsə̌ a tə́ ńkəmə̂ pɛ̌sê nə́ əlɛ́n əghô, pəg sóŋ ńgə́ kɔ a pɨ ńkə́ fiʼ ńté ńgə́ lə́ kě táʼ ŋwu əwɛn yitsə̌ pô.”
39Yeso a sóŋə á mbô yi ńgə́, “Kɔ nə zɔŋ nə́ yí ńté ńgə́ ŋwu ntsəm páʼə a faʼ nə́ nkɨʼnənu nə́ əlɛ́nə mə, mbɔʼ a yǐ ńkě mənaŋə́ atûə mə pɨ ńjî pô. 40Ńté ńgə́ ŋwu ntsəm páʼ a kě nə́ məsɔŋə́ á ndzəm pɛn sɔb pô, lə́ ngaŋndzəm əwɛ́nə. 41Mäŋ fiʼtə̂ áwɨ́ nə́ ndə̌ŋdəŋ ńgə́, ŋwu ntsəm páʼə a fɛ̂ nə́ ndɔ́ŋ nkǐə á mbô pɨ nə́ əlɛ́nə mə ńté ńgə́ pɨ lə́ ngaŋə́zoŋə́ndzəm mə, a yǒ kě ntsɔ́ʼəfaʼ əjǐ póŋ pô.”
Akwaʼlə Páʼə ä Ghɛd nə́ Ŋwunə ä Ghɛlə̂ Təpɔŋə
(Mat 18.6-9; Luk 17.1, 2)
42Mbɔʼ ŋwu tsə̌ a ghɛd táʼ mɔ́ nə́ yitsə̌ páʼə a pí nə́ nə́ maŋ a ghɛlə̂ təpɔŋ, tə ḿbə́ a pěʼ ḿbɔŋ ńgə́ mbɔʼ pə pěʼ ńkwúlə mɛ́ tə́kɔʼ ngɔʼə aghɔʼə́péenə á ndě yí ḿmaʼə̂ á mə́m tə́kɔʼ nkǐə. 43Təmbɔʼ apô azô á ghɛd ńgə́ gho ghɛlə̂ təpɔŋ, gho lə́gə zə́ələ́. Á pɔŋ ńgə́ gho kwúnə á mə́m nchîntɨ páʼ ə́ mɛdnə̂ nə́ ngǎmɔʼə́ nə́ táʼə apô ńtsɛɛlə̂ á mə́ túg nə́ mbô mə́ mbɛ̌ ə́ pə́ ghɛnə̂ á mə́m móg Satan páʼ wɨ́d ə́ kě nə̈ pə́gnə pô.#9.43Əŋwaʼlə pətsə́ ə́ peg nkaŋ 44 páʼ pó nkaŋ 48 sóŋ nə́ lə́ táʼə anuə. 45Təmbɔʼ akoolə azô á kə́ ńgɛd ńgə́ gho ghɛlə̂ təpɔŋ, lə́gə ájɨ́d ḿmyaʼə̂! Á pɔŋ ńgə́ gho kwúnə á mə́m nchîntɨ páʼ ə́ mɛdnə̂ nə́ ngǎmɔʼə́ nə́ táʼ ntá ńtsɛɛlə̂ á mə́ túg nə́ məko mɛ́n mbɛ̌ ə́ pə́ ghɛnə̂ á mə́m móg Satanə. #9.45Əŋwaʼlə pətsə́ ə́ peg nkaŋ 46 páʼ pó nkaŋ 48 ə́ sóŋ nə́ lə́ táʼə anuə. 47Təmbɔʼ nələ́g zô nə́ kə́ ńgɛd ńgə́ gho ghɛlə̂ təpɔŋ, fwɔŋə̂ ájɨ́d ḿmyaʼ ńté ńgə́ á pɔŋə̂ á mə́ kwú nə́ á mə́mə Anuə Nəfoonə Əsê nə́ táʼ nələ́g ńtsɛɛlə̂ á mə́ túg nə́ əmə́g mə́ mbɛ̌ pə pə́ ḿmaʼə̂ gho á mə́m móg Satanə. 48Aliʼ páʼ “əkəgho əpɔ́b ə́ kě nə́ kwûə pô, móg ə́ kě kə́ ḿbə́gnə pô.
49Ńté ńgə́ pə́ yǒ tsoŋkə̂ ŋwu ntsəm nə́ móg tsɔʼə ndzaŋ páʼ pə̈ tsoŋkə̂ nə́ əpúmə afyaʼə́nu nə́ ngwáŋ lə̂.
50Ngwáŋ mə́ pɔŋə̂, lə́ mbɔʼ mə́ chî ə́ pɛ́lə ləəmə̂ pô, nə́ ghɛd ə́lɛ́ mə́ pɔŋə̂ pɨ ləəmə̂?
Túg nə́ ngwáŋə á mə́m pɨ ńjî ńgə́ mbwɔ́dnə ə́ chîə á tətɨ pəənə́.”
Pašlaik izvēlēts:
Magə 9: azo
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties