Lukasə 2
2
Ndzaŋ pə́ nə Ḿbî nə́ Yeso
(Mat 1.18-25)
1Nə́ ndɛd jɨ́d zə̂, əfo Kasa Ɔgɔstusə a sáʼ ńgə́ pə́ sháŋə ŋwu ntsəm páʼə a chî nə́ á mə́m ətú ətsəm páʼ Lomə á kə̈ sáʼ nə́. 2Lɛ̌ nə ḿbə́ ntsɛɛmbi ndɛlə́ á mə́ sháŋ nə́ pəənə, əghâ yi wɨ́ Kwilinusə a pə́ lə́ nətû nə́ Silya. 3Ŋwu ntsəmə a tíʼ ḿbəənə̂ aláʼ pó á mə́ ŋwaʼlə̂ nə́ əlɛ́n əyíə. 4Jɔsɛfə a tíʼ ńkə́ ə́fɛ́lə ajíə á Nazalɛlə á mə́mə aláʼə Galili ńkɔ́ʼ ńgɛnə̂ á Bɛtəlɛɛmə á aláʼ pə Debid á mə́m Judya, ńté ńgə́ a kə fɛ́d lə́ á mə́m əla pə Debilə. 5A nə ńgɛn ə́wɨ́ lə́ pó Mɛɛlə á mə́ ŋwaʼlə̂ nə́ məlɛ́n móobə́. Mɛɛlə páʼə a kə tə́g nə́ nə́ ngwě əyǐ lə́ a kə chî nə́ móonə. 6Ndzaŋ pó kə chî nə́ ə́wɨ́ lə́, ndɛd ə́ koʼə̂ á mə́ pî nə́ mɔ́ yi wə́. 7A pîə mɔ́ nətû əyə́, a pə́ yi mbyâŋnə, a lə́mə yí nə́ əpag ətsəʼ ńnéŋə yə́ á mə́m nəkwuʼ páʼ məna mə́ jî nə́ ə́wə́, ńté ńgə́ aliʼə́ á kə kě pɛ́d mbɔʼ pó lê ə́wə́ á mə́m ndɛ̂ pəghɨ pô.
Pətseŋnə pə́ Məna pópə Pətseŋpə́ndɛ́pə́sê
8Pətseŋnə pətsə́ pə́ nə ńchîə á kɔŋə á əlá aláʼ wɨ́d wə̂ á nətúʼ ńtə́ ńnáŋə məna móobə́, 9Ntseŋndɛ̂ Mmaʼmbîə a ghabkə̂ ə́fɛ́lə á mbi pó nkyaʼ Mmaʼmbî páʼ ə́ ŋwaŋkə̂ nə́ ə́ kyaʼ ńdíblə ághóobə́, pó pɔ́g lɛ tətətə. 10Lə́ ntseŋndɛ̂ Mmaʼmbî wə̂ a pə́ ə́sóŋə á mbô pó ńgə́, “Kɔ nə́ pɔ́gə, jɨ́ nə́, maŋ yǐ lə́ nə́ nkɨ yi əshîʼnə á mbô pəənə́, páʼ wɨ́d ə́ yǐ nə́ yǐ nə́ akɔŋtə á mbô ŋwu ntsəmə. 11Ə́sɛ̂nə̌ á mə́mə aláʼə pə Debid pə́ pîə Nchwádkə, yi páʼ Əsê a Tsəʼ nə́ lə́, a pə́ nə́ Mmaʼmbîə. 12Akyeʼə́nuə á mbô pəənə á yǐ pə́ lə́ ńgə́, nə́ yǐ zə́ənə á mɔ́ pə́ lə́m nə́ nə́ əpag ətsəʼ, ńnéŋə á mə́m nəkwuʼ páʼ məna mə́ jî nə́ ə́wə́.”
13Tsɔʼə əghâ yi wɨ́ aláʼə pətseŋpə́ndɛ́pə́sê pətsə́ pə́ jáʼ ńtégə yitsə̌ wə̂ pó po tíʼə ńgóʼkə Əsê ə́sóŋə ńgə́, 14“Ńgóʼkə á mbô Əsê páʼ ə́ chî nə́ á nəpóolə atǐə, mbwɔ́dnə ə́ kə ńchîə á mbô pəənə á ndu ndəsê páʼ mbɨ Əsê ə̈ pɔŋ nə́ ńté ághóobə́.”
15Pətseŋpə́ndɛ́pə́sê pə̂ pə́ mɛdtə̂ pətseŋnə pə́ məna pə́ ńgɛnə̂ ághóobə́ á nəpóolə. Pətseŋnə pə́ məna pə̂ Pó tíʼ ə́sóŋə á tətɨ pó ńgə́, “Yǐ nə́ pɛn ghɛnə̂ á Bɛtəlɛɛmə, ńdzə́ənə anu jɨ páʼə á laŋ nə́ ə́wɨ́, Mmaʼmbîə a tíʼ ńkyaʼə̂ áwɛ̂n lɛ.”
16Pó tíʼ ńgə́glə ńgɛn ńdzə́ənə Mɛɛlə pó Jɔsɛf nə́ mɔ́ yi wə́ a noŋnə̂ á mə́m nəkwuʼ páʼ məna mə́ jî nə́ ə́wə́. 17Pó tíʼ fiʼtə̂ a ŋwu ntsəm nə́ anu páʼ á laŋ nə́, ńkə́ ḿbɨ ḿbə́ nə́ anu páʼ ntseŋndɛ̂sê a pěʼ nə́ ə́fiʼtə̂ ághɔ́b ńté mɔ́ yi wə́. 18Á kə kɨʼnə̂ ŋwu ntsəm páʼ a kə zóʼ nə́ anu páʼ pətseŋnə pə́ məna pə́ pə́ sóŋ nə́. 19Lə́ Mɛɛlə a pə́ ńdɔʼkə̂ mənu mɨ mətsəmə á ntɨ́ yə́, ńnáanə ńkwaŋə̂ mɨ́d əghâ ətsəmə. 20Pətseŋnə pə́ məna pə́ pó pəənə̂, ńdzoobə̂ ńgóʼkə Əsê nə́ anuə atsəm páʼ pó zóʼ nə́ ńkə́ ńdzə́ənə á kə́ ńchî tsɔʼə ndzaŋ páʼ pə́ nə ə́fiʼtə̂ ághóobə́. 21Ngab ə́ kə tə́m lə́, ndɛd ə́ koʼə̂ á mə́ póʼ nə́ mɔ́ yi wə́, pə́ tíʼ ə́fɛ̂ əlɛ́n yí nə́ Yeso, á pə́ əlɛ́n ntseŋndɛ̂sê a kə fɛ̂ nə́ záʼ pə́ yǒ ḿbɔŋə̂ chî nə́ yə́.
Pə́ Nəələ̂ mɔ́ Páʼə a pə́ nə́ Yeso lə́ á Mə́m Tə́kɔʼndɛ̂sê
22Ndɛd ə́ kə koʼ páʼ Jɔsɛf pó Mɛɛlə pó kə chî nə́ á mə́ yǐ nə́ nə́ akáŋə́sê pə́ sogə̂ ághɔ́b ndzaŋ Noŋkə Mosisə á kə nɨd nə́; pó tíʼ ńdɔgə̂ mɔ́ yi wɨ́ ńgɛn nə́ yə́ á Jɛlusalɛmə á mə́ nɨd nə́ yə́ á mbô Mmaʼmbîə. 23Pə́ ŋwaʼlə̂ á mə́m noŋkə Mmaʼmbî ńgə́, “Mbɔʼ ŋwunə a pîə mɔ́ nətû əyǐ yi mbyâŋnə a yǐ nə́ wɨ́d ə́fɛ̂ á mbô Mmaʼmbîə.” 24Pó kə ghɛn lə́ á mə́ kə́ nə́ ə́ tû fyaʼə́nuə á mbô Əsê nə́ əlúʼə pɛ́n pɛ̌ kɨ pɔ́ pəsə́ŋ pə́ məkálə́ pɛ́n pɛ̌ ńdzoŋ ndzaŋ noŋkə Mmaʼmbîə a kə nɨd nə́.
25A kə pə́ nə́ ndɛd yi wɨ́ lə́, ŋwu tsə̌ a chîə Jɛlusalɛm pə̈ fóŋə nə́ Saamunə ḿbə́ ndə̌ŋdəŋ ŋwu ḿbɔ́g Əsê ńkə́ ńdwɛ́nkə nə́ Ajwǐəsê. A kə náanə lə́ ńtə́ ḿbyáb ndɛd páʼ yi páʼ Əsê a Tsəʼ nə́ lə́ a yǐ nə́ legtə̂ məntɨ́ mə́ pɔ́ pə́ Islɛlə. 26Ajwǐəsê a kə fiʼtə̂ yí ńgə́ a kě yǐ kwû tsɔʼə tə ghə́ a zə́ənə yi páʼ Əsê a Tsəʼ nə́ lə́, páʼ Mmaʼmbîə a kə sóŋ nə́ ńgə́ á yǒ yǐ lə̂ pô. 27Á kə pə́ nə́ ndɛlə́ ándó pətǎ pə́ Yeso pə́ nə ńdɔg nə́ yí ńgɛn nə́ Tə́kɔʼndɛ̂sê á mə́ faʼ nə́ mənu páʼ noŋkə á kə lɔ nə́ á mbô pó lə́, Ajwǐəsê a kwumə̂ Saamun, a yǐəə á mə́m Tə́kɔʼndɛ̂sê ghɛnə́, 28ńkwáalə mɔ́ wə̂ ńtúgə á mbô yí ńtíʼə ə́fɛ̂ ndǎ á mbô Əsê ə́sóŋə ńgə́, 29“Mmaʼmbî, ndzaŋə ándó gho zoŋnə̂ nə́ ndaʼnə əzo lə́, mɛdtə̂ ngaŋəfaʼ gho a ghɛn nə́ mbwɔ́dnə.” 30Maŋ lɔg əmə́gə mə ńdzə́ənə mɔ́ nə́ páʼ gho tú nə́ ńgə́ a yǐ ńchwádkə pɨ lɛ. 31Gho tyáŋtə nə́ ńgə́ ŋwu ntsəm ntsəmə a zə́ənə yə́. 32A yǐ pə́ lə́ nkyaʼ páʼ ə́ yǐ nə́ nɨd məndú mô á mbô pɨ pə́ atú pi ndaʼə, ə́ pɨ yǐ nə́ ngóʼkə á mbô pɨ pô páʼ pó pə́ nə́ pɔ́ pə́ Islɛlə lə̂.
33Anu pə́ nə ə́sóŋ nə́ ńté mɔ́ nə́ á nə ńkɨʼnə̂ mǎ əyǐ pó tǎ əyǐ lɛ tətətə. 34Saamun a kə sóŋ lə́ ə́fɛ̂ mbwɔ́dnə nə́ pó, ńtíʼ ə́sóŋ nə́ Mɛɛlə páʼə a pə́ nə́ mǎ əyǐ lə́ ńgə́ “Əsê a túmə mɔ́ nə́ lɛ̌ lə́ ńgə́ a yǐ ńgɛd pɨ pipə nɨ́ nə́ pó wukə̂ á Islɛlə, a pɨ ńkə́ ńdookə̂ pətsə́. A yǒ pə́ lə́ akyeʼə́nuə á lǒo nə́ á mbô Əsê páʼ pɨ pi nɨ́ nə́ pə́ yǒ nə kǐəə ághóobə́. 35Ə́laŋ ə́lɨ́d ə́ kyaʼ məntɨ́ móobə́, anu yəwə́ á ghɛd gho fɨnə̂ tə á chîə pə́ ándó təmbɔʼ ntɨ́ əgho ə́ lə́gnə ńgwǔəə á mə́m ə́wə́.”
36Ntəŋkaŋ məngyě yitsə̌, ḿbə́ ntûsê, a nə́ ńkə́ ńchî ə́wɨ́ pə̈ fóŋə nə́ Ana, á pə́ mɔ́ fanuɛlə ə́fɛ́d nə́ əla Asha. A kə chîə á ndɛ̂ ndzɔʼə́ lə́ tsɔʼə ngoʼə́ asaambɛ̂, 37ndú əyǐə a kwûə yə́ a tíʼ ḿbə́ nkog məngyě, tə ńkoʼ ngoʼ məghə́m nəfeemə́ nə́ ngoʼ nəkwa. A kə̈ ńchîə lə́ tsɔʼə á mə́m Tə́kɔʼndɛ̂sê á nətúʼ pó nənumnə ńchîə tə jî məjî ńchaʼtə́sê. 38Ndzaŋə ándó Saamunə a kə məgtə̂ nə́ atséebə ají lə́, Ana a yǐəə á mbi pó əfɛ̂ ndǎ á mbô Əsê ńtíʼ ə́sóŋə anu ńté mɔ́ wɨ́d wə́ á mbô ŋwu ntsəmə a kə náanə nə́ ńtə́ ḿbyáabə ńgə́ pə́ yǐ ə́fógə Jɛlusalɛm á mə́m ngə́ʼə.
39Əghâ ándó Jɔsɛf pó Mɛɛlə ə́ kə məgtə̂ nə́ mənu mətsəmə ándó noŋkə Mmaʼmbîə á kə nɨd nə́ ńgə́ pó faʼ lə́, ńtíʼ ḿbəənə̂ á aláʼ pó á Nazalɛlə á chî nə́ á mə́m Galiliə. 40Mɔ́ wə̂ a kwéŋ ńkə́ ńtyantə̂, ńdwɛ́nkə nə́ ajíənuə ḿbɨ ńtúg mbwɔ́dnə Əsê á mə́m yə́.
Yeso a Mə́m Tə́kɔʼndɛ̂sê á Əghâ páʼ a nə Ḿbɛ́d nə́ Ńkə́gə
41Tǎ pə Yeso pó mǎ əyǐ pó nə̈ ńgɛnə̂ á Jɛlusalɛm á ngoʼ ntsəm nə́ ndɛlə akɔŋtə ndzáʼkə. 42Yeso á nə ḿbɛn ḿbə́ ngoʼ ntsɔb pɛ̌ lə́, pó kɔ́ʼ ńgɛnə̂ aliʼə́ akɔŋtə yi wɨ́ ndzaŋ pó ghə́ pěʼə̈ ńgɛnə̂. 43Ndzaŋ akɔŋtə á kə měe nə́ lə́, pó chúʼə á mə́ kwə̂ nə́, lə́ mɔ́ əghɔb Yeso a pə́ ńgɔ́ŋə yə́ á Jɛlusalɛmə. Tǎ əyǐ pó mǎ əyǐ ə́ pə́ ńkě jî ńgə́ a pɛ́lə á ndzəm pô. 44Akwaŋə azóobə́ á kə nɨd ńgə́ a chîə á mə́m ənoonə, pó nə ḿbɛn ńnyi tə alěmbîə á měe pó náŋə á mə́m pəlim pópə pəshu ńkě yí jɨ́ pô. 45Pó nə ńkě yí jɨ́ pô lə́, ńtíʼ ə́sɛdnə̂ ḿbəənə̂ á Jɛlusalɛmə á mə́ chwa nə́ yə́. 46Á laŋ əlě teelə́ pó zə́ənə yə́ á mə́m Tə́kɔʼndɛ̂sê, a náanə pópə ngaŋə́zéʼkə pənoŋkə, ńjwə́ʼtə á mbô pó ḿbəənə̂ ḿbítə ághɔ́b nə́ əpítə ətséebə. 47Á kə kɨʼnə̂ á ŋwu ntsəm ndzaŋə a kə̈ zóʼ nə́ a kwěe mənu nə́ ajíənuə. 48Tǎ əyǐ pó mǎ əyǐ ə́ kə zə́ənə yí lə́ anu yəwə́ á kɨʼnə̂ ághóobə́, mǎ əyǐə a sóŋə á mbô yí ńgə́, “Mɔ́, lə́ ghɛlə̂ akə̂ gho ghɛd nə́ pəg ə́lênə̌? Pəg tǎ əgho pěʼ ńtə́ ńdánə ńnáŋə gho ńdzoŋə̂ ḿbɔ́gə ńgə́ əghâ tsə̌ gho péŋə.” 49A sóŋə á mbô pó ńgə́, “Nə́ pěʼə́ ńnáŋə mə lə́ ńgə́ akə̂? Nə́ kě jî ńgə́ maŋ kə pěʼ ńchîə á mə́ chî nə́ á ndɛ̂ Tǎ mə?” 50Atûə azóobə́ á pə́ ńkě lá nə́ anuə ándó páʼ a sóŋ nə́ lə́ pô. 51Pó po kə pəənə̂ á Nazalɛlə a ghɛn nə́ mbiə á mə́ zóʼnə nə́ ághóobə́. Lə́ mǎ əyǐə a pə́ ńdɔʼkə̂ mənu mɨ mətsəmə á ntɨ́ yə́ 52Yeso a ghɛn nə́ mbiə á mə́ kwíŋ nə́ nə́ ajíənuə pópə nkɔ̌ʼmbɨ əyə́. Əsê pópə ŋwu məsɔŋ ə́ kə́ ńkɔŋə̂ yə́.
Pašlaik izvēlēts:
Lukasə 2: azo
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties