Məfaʼə 7
7
Stifənə a Sóŋə Anǔəsê á Mbô Ngaŋə́sáʼə́məsáʼə
1Mbêsê yi Ngweŋə́ a pítə Stifən ńgə́, “Lɛ̌ ndə̌ŋdəŋə́ anu pə́ sóŋ nə́ ńté gho?” 2Stifənə a kwěe ńgə́, “Pəlimə́ mə pópə pətǎ mə, jwə́ʼtə nə́! Əsê páʼ a túg nə́ nəgháʼ a nə ńgabkə̂ ə́fɛ́lə á mbi tǎpətǎ əwɛ̂n Ablaam əghâ ándó a nə ńchî nə́ á məsopotemya záʼ a yǒ ḿbɔŋə́ fɛ́d ghɛn chî á Alanə 3ə́sóŋ nə́ yí ńgə́, Fɛ́d ḿmɛdtə̂ ngwud əzo pópə aláʼə azô, ńgɛnə̂ aliʼ páʼ maŋ yǐ nə́ nəələ̂ gho ə́wə́.”
4Ablaamə a tíʼ ə́fɛ́d ḿmɛdtə̂ aláʼə pɨ pə́ Chaldanə ńtíʼ ńgɛn ńchîə á Alanə. Əghâ ándó tǎ əyǐə a nə ńkwú nə́ lə̂, Əsê a ghɛlə̂ a fɛ́lə á Alan ńtíʼ ńgyǐəə aliʼ páʼ nə́ chî nə́ ə́wɨ́ əghâ nə́ lɛ̌. 5Ablaamə a nə ńchî ə́wə́, lə́ Əsê a pə́ ńkě mɔ́ aliʼə́ ndəsê təmbɔʼ a tə́g tsɔʼə akoolə ají ə́wɨ́ nə́ yí ə́fɛ̂ pô. Ḿbə́ ńdaʼnə̂ ńgə́ a yǐ fɛ̂ zə́ələ́ á mbô yə́. Zə́ələ́ a pə́ ají pópə ngwud əjǐ páʼ Ablaamə a nə ḿbǎ nə́ tə ńkě mɔ́ túg pô lə̂. 6Əsê a sóŋə á mbô yí ńgə́, Ngwud əzo ə́ yǒ pə́ pəghəənə a aláʼə atú yi ndaʼə, pɨ pipə wɨ́ pó lɔgə̂ ághɔ́b ə́sɛd əpoʼ ə́wə́, ńnɨd ngə́ʼ nə́ pó nə́ ngoʼ nkɛd nəkwa. 7Lə́ maŋ yǐ pə́ ńnéŋ ngə́ʼə atûə aláʼ páʼ a lɔg nə́ ághɔ́b ə́sɛd əpoʼ ə́wɨ́ lə̂. Ndɛd yitsə̌ ə́ laŋ, ngwud əzo ə́ fɛ́lə aláʼ yi wɨ́ ńtíʼ ńgóʼkə mə a aliʼə́ nə́. 8Əsê a tíʼ ńgwad əka pó Ablaam. Aleŋkə a nə ḿbə́ lə́ ńgə́ pə́ póʼ pɔ́ pə́ mbyâŋnə. Ablaamə yǐ ńtíʼ ḿbîə Azigə, ḿbóʼə yí páʼ a nə ḿbə́ nə́ əlěmbîə nəfeemə́. Azigə a pîə Jekɔb ńkə́ ḿbóʼə yí páʼ a nə ḿbə́ nə́ əlěmbî nəfeemə́. Jekɔb a yǒ ńtíʼ ḿbə́ tǎpə pɔ́ ntsɔb pɛ̌ páʼ pó nə ńtíʼ nə́ ḿbə́ pətǎ pə́ məla mə́ Islɛl ntsɔb pɛ̌.
9Pɔ́ pə́ Jekɔb pó yǒ ńtə́ ŋ́ŋwéetə mɔ́mɛ́ əghɔb Jɔsɛf ńtíʼ ńgwaamə̂ yí ə́finə̂ ándó apoʼə á Ijibə. Lə́ əsê a nə ḿbə́ ńchî pó yə́ 10ńchwádkə yə́ á mə́m məngə́ʼ mí tsɔʼə mətsəmə. A nə fɛ̂ ajíənuə á mbô Jɔsɛf ńtíʼ ńgɛd Fɛlɔ páʼ a nə ḿbə́ nə́ əfo Ijib lə́ a kɔŋə yí ńtíʼ ə́fɛ̂ mətɨ nə́ yí ńgə́ a sáʼə aláʼə Ijib tsɔʼə atsəm pópə ntɔ́ʼ əjǐə. 11Nji ə́ yǐ ńtíʼ ńgwǔəə á aláʼə Ijib tsɔʼə atsəm pó Kanan ńnéŋ ngə́ʼ yi ngweŋə́ á mbɨ pəənə, ńgɛd pətǎ pɛn pə́ tíʼə ńchwaalə̂ məjî kə́káŋə́. 12Əghâ ándó Jekɔbə a nə ńdzóʼ nə́ ńgə́ məjî mə́ chîə á aláʼə Ijib lə́, ńtú pɔ́ pí páʼ pó nə ḿbə́ nə pətǎ pɛn ə́wə́. Lə́ nə ḿbə́ ntsɛɛmbiə alě əghoobə́ á mə́ ghɛn nə́ ə́wə́. 13Pó nə mbɨ ńdzoŋkə̂ ńgɛn ə́wɨ́ lə́, Jɔsɛfə a fiʼtə̂ pɔ́pə́mɛ́ pí nə́ ŋwu páʼ yə́ a nə ḿbə́ nə́ wə́ələ́. Fɛlɔ a tíʼ ńjîə anu ńté əla pə Jɔsɛfə. 14Jɔsɛfə a tíʼ ńtú nkəənə á mbô tǎ əyǐ pópə əla əghɔ́b tsɔʼə ətsəm ńgə́ pó yǐəə Ijibə, pó nə ḿbə́ lə́ pó məghə́mə asaambɛ̂ nə́ pɨ pə́ tênə. 15Jekɔbə a tíʼ ńtsó ńgɛnə̂ Ijib ńgyǒ ńtíʼ ńkwû ə́wɨ́ pópə pətǎ pə́ pətǎ pɛnə̂. 16Pə́ lɔg əkwû əpɔ́b ḿbɨ nə́ pə́ələ́ á Shekem ńtíʼ ńtwə́ŋə ághóobə́ á mə́m nəse páʼ Ablaamə a nə ńjú nə́ á mbô pɔ́ pə́ Amɔ nə́ ndɛn nkáb yitsə̌.
17Ndzaŋə ándó ndɛd nə ńtə́ nə́ ńkoʼə̂ á mbô Əsê á mə́ ghɛd nə́ anu páʼ a nə ńdaʼnə̂ nə́ Ablaam ə́wɨ́ lə̂, ngwud əzɛ̌n páʼ ə́ nə ńchî nə́ Ijib ə́ pyádnə ńkwíŋə. 18Əfo yitsə̌ páʼ a nə ńkě nə́ anu yətsə́ ńté Jɔsɛf kwíʼnə ńjî pô, a jî nəfoonə á Ijibə. 19A kə fɨg ngwud əzɛ̌n ḿbɨ ə́fyád pətǎ pə́ pətǎ pɛn ńgə́ pó mɛdtə̂ pɔ́ póobə́ apeŋ ńjî ńgə́ pó kwúkə. 20Pə́ nə ḿbîə Mosisə lə́ nə ndɛd jɨ́d zəənə́. A pə́ ashwiə mɔ́ yitsə̌ á mbi Əsê, pə́ kə kóg nə́ yí nə́ sáŋ teelə́ á ndɛ̂ tǎ əyǐə. 21Pə́ nə mbɛn ə́fógə yə́ á ndɛ̂ ə́fɛ̂ apeŋ, mɔ́ əfo Ijib yí məngyě a yǐ ńtwáamə yí ńkógə yə́ ándó ndə̌ mɔ́ əyǐə. 22Mosisə a nə ńkɔ́ʼ nə́ ayáŋə pɔ́ pə́ Ijib ńtíʼ ḿbə́ mɛ́ ŋwu nə́ anuə atsəm páʼ a nə̈ sóŋ nə́ ńkə́ ńgɛlə̂.
23Əghâ ándó Mosisə a nə ńkoʼ nə́ ngoʼ məghə́m mɛ́n nəkwa lə̂, ńkwaŋ ńgə́ mbɔʼ a ghɛn ńgá pəlim pí pɔ́ pə́ Islɛl. 24Ńgɛn ńjɨ́ ŋwu Ijibə a tə́ ḿbóʼə táʼ ŋwu əghɔb yitsə̌, a tíʼ ḿbəŋə̂ ají məlaʼ mimə wɨ́ ńjwítə ŋwu Ijibə. 25Mosisə a kwaŋ ńgə́ pɨ pí pə́ yǐ leŋ ńgə́ Əsê a túmə yí ńgə́ a yǐ ńkwáalə ághóobə́ á mə́m ngə́ʼ əzoobə́, pó pə́ ńkě leŋ pô. 26Mbî ə́ fóg, Mosisə a yǐ ńjɨ́ pɨ pə́ Islɛl pó pɛ́n pɛ̌ pə́ tə́ ḿbóʼnə, a náŋ ndúmə á mə́ məgtə̂ nə́ azɔŋə azɔ́b ńtíʼ sóŋ nə́ pó ńgə́, Pəshu, ńgə́ pɨ lə́ pɔ́pə́mɛ́; nə́ zɔŋə̂ lə́ akə̂?
27Lə́ ŋwu páʼ a nə ńchúʼ nə́ məlaʼ lə̂ a kəmə̂ Mosisə ə́sóŋ ńgə́, “Əwə a tsɔ́ʼ nə́ gho ńgə́ gho pə́ nətû zə́g ńkə́ ə́sáʼ əsáʼ əwə́gə́? 28Gho kə́ ńdoonə̂ lə́ á mə́ jwítə nə́ mə ndzaŋ páʼ gho nə ńjwítə nə́ ŋwu Ijib wə̂ á əzoonə́ lə̂? 29Ndzaŋ Mosisə a nə ńdzóʼ nə́ atsáb jɨ lə́ ńtíʼ ńkə ńgɛnə̂ yə́ á Midyanə, ńchî ə́wə́ ándó ngɨ nə́ ndɛd yitsə̌ mbî pɔ́ pə́ mbyâŋnə pí pɛ́n pɛ̌.”
30Ngoʼ məghə́m mɛ́n nəkwa ə́ laŋ, ntseŋndɛ̂sê a ghabkə̂ ə́fɛ́lə á mbi Mosisə á mə́mə alə́əmə mógə́ á nəchúʼ nə́ akoobə́ á tə nə́ ńkɛ́lə á kɔŋ məŋkwâʼlə̌, ḿbáatə nkwəənə Sinayi. 31Anu páʼ Mosisə a nə ńjɨ́ nə́ lə́ a nə ńkɨʼnə̂ yí lɛ̌ tətə a tíʼ ńgɛn ḿbáatə akɔb yəwə́ á mə́ chígə́ nə́ náŋ ə́zə́ənə anu páʼ á laŋ nə́. Ḿbə́ ńtíʼ ńdzóʼ ngye Mmaʼmbî ə́ sóŋ nə́ yí ńgə́, 32Maŋ lə́ Əsê tǎpətǎ əgho, Əsê Ablaamə, yi Azigə ḿbɨ ḿbə́ nə́ Jekɔbə. Mosisə a pɛ́nkə nə́ apɔ́g ńkě pɨ fiʼə̂ á mə́ náŋ nə́ pô. 33Mmaʼmbîə a tíʼ sóŋ nə́ yí ńgə́, tsɔ́ʼtə ngwub əzô ńté ńgə́ aliʼ gho tɨ́ nə́ ə́wɨ́ lə́, lə́ aliʼ yə ŋwaʼ nə́. 34Maŋ náŋ ńjɨ́ mbô ngə́ʼ páʼ pəənə mə pə̈ jɨ́ nə́ á Ijibə. Maŋ zóʼə á nəkyéŋ əghɔb ńtíʼ ńtsó ńgyǐəə á mə́ kwá nə́ ághóobə́. Lə́ pə́ ńgə́, əghâ nə́, yǐəə, maŋ yǐ túmə gho á Ijibə.
35“Lɛ̌ lə́ tsɔʼə Mosisə yi wɨ́ páʼ pɨ pə́ Islɛl pə́ nə ńkǐ nə́ yí ḿbítə ńgə́, Əwə a tsɔ́ʼ nə́ gho ńgə́ gho pə́ nətû zə́g ńkə́ ńtsɔ́ʼtə əsáʼ əwə́gə́?” Lə́ yí páʼ Əsê a nə ńtú nə́ ńgə́ a yǐ ḿbə́ nətû nə́ pɨ pə́ Islɛl ḿbɨ ḿbə́ nchwádkə əghoobə́, ntseŋndɛ̂sê páʼ a kə ghabkə̂ nə́ ə́fɛ́lə á mbi yə́ á nəchuʼnə́ nə́ akɔb yə kɛ́d nə́ lə́ á tíʼə ńkwáalə yə́. 36Mosisə nə ńdɔg nə́ ághɔ́b ə́fɛ́lə á mə́mə aláʼə Ijib lə́, a kə ghɛd əkɨʼnəmə́nu pi nɨ́ nə́ pópə mənu mimə yɛ́d nə́ yɛ́d nə́ á Ijibə, á Paŋ Nə́ənə ḿbɨ ḿbə́ á kɔŋ məŋkwâʼlə̌ á mə́m ngoʼ məghə́m mɛ́n nəkwa.
37Lə́ Mosisə wɨ́d ghɛn páʼ a nə sóŋ nə́ á mbô pɨ pə́ Islɛl ńgə́, Əsê a yǒ tú ntûsê yitsə̌ ándó maŋə á mbô pəənə́, páʼ á yǒ nə́ fɛ́d lə́ tsɔʼə á mə́m pəənə́. 38Lə́ tsɔʼə yí páʼ a nə ńchî nə́ pópə pɨ pə́ Izlɛlə páʼ pó nə ńkyeetə̂ nə́ á kɔŋ məŋkwâʼlə̌ pópə ntseŋndɛ̂sê páʼ a nə ńtsáb nə́ á mbô yə́ á nkwəənə Sinayi lə́, ńdzoŋ ḿbá pətǎ pə́ pətǎ pɛnə̂. Ńtíʼ ńkwáalə atséebə Əsê páʼ ä fɛ̂ nə́ nchîmbî ńtsɛɛkə̂ á mbô pɛnə̂.
39“Lə́ pətǎ pə́ pətǎ pɛn pó pə́ ńkǐəə ághóobə́ á mə́ zóʼnə nə́ yə́. Ńkě pɨ ńkɔŋ ńgə́ təmbɔʼ a pěʼ ḿbə́ nətû zɔ́b pô. Akwaŋə azóobə́ a kə́ ńnəələ̂ ághɔ́b tsɔʼə ńgə́ mbɔʼ pó pěʼ ḿbɨ ḿbəənə̂ ághóobə́ á Ijibə. 40Pó tíʼ sóŋə á mbô Alɔn ńgə́, Tsoŋkə̂ məsê mətsə́ páʼ mə́ yǐ nə́ kwá mbi əzɛnə̂. Pɛn kě jîə anu páʼ á laŋ nə́ nə́ ŋwu wə̂ páʼ pə́ fóŋ nə́ nə́ Mosisə lə̂ pô, páʼ a nə ńdɔg nə́ áwɛ̂n ə́fɛ́lə á Ijib lə̂#7.40 Ezo 32.1. 41Əghâ yi wɨ́ lə́ pó tíʼ ńtsoŋkə̂ mɔ́ pəkóomə́ á chîə ándó ndú na mbɛlə́lóʼə́. Ńtíʼə ńgwaalə̂ məna ə́fyaʼə́nu ə́wə́ á ndu mɔ́ pəkɔ́ yi wɨ́, ńjî əpú ńkɔŋtə̂ ńgóʼkə ajú páʼ pó tsoŋkə̂ nə́ nə́ mbô móobə́. 42Əsê a tíʼ ńtə́m ndzəm əjǐ nə́ pó ḿmɛdtə̂ ághɔ́b ńgə́ pó tə́ ńgóʼkə mə́nu pópə sáŋ nə́ pɔ́ pə́ sáŋə á nəpóolə. Tsɔʼə ndzaŋ pə́ ŋwaʼlə̂ nə́ á mə́mə aŋwaʼlə məntú mə Əsê ńgə́,
Pɨ pə́ Islɛl, pɨ nə ńjwítə məna ə́fyaʼə́nu wə́ á mbô maŋ nə́ ngoʼ zə̂ məghə́m mɛ́n nəkwa páʼ pɨ nə ńchî nə́ á kɔŋ məŋkwâʼlə̌ lə́.
43Pɨ nə ńtwá ntaŋ mɔ́ pəkɔ́ Molek ḿbɨ ḿbə́ nə́ mɔ́ sáŋ əsê Lafen ńnyinə̂ nə́ pə́ələ́,
lə́ nə́ ḿbə́ pɔ́ pə pəkɔ́ páʼ pɨ nə ńgɛd nə́ á mə́ tə́ nə́ ghóʼkə.
Ńdaŋ ə́lɨ́d, maŋ yi ghɛd pə fɨ́dkə áwɨ́ pɨ ghɛn tə ńtóokə Babilɔnə#7.43Amos 5.25–27.”
44Pətǎ pə́ pətǎ pɛn pó nə́ ńtúg ntaŋ wə̂ páʼ wɨ́d nə̈ nɨd nə́ ńgə́ Əsê a chî pópə pɨ pí lə̂ á kɔŋ məŋkwâʼlə̌. Pə́ nə ńkwúlə áwɨ́d lə́ nə́ əsêndú páʼ Əsê a nə ə́sóŋ nə́ nə́ Mosisə ńgə́ pə́ kwúlə áwə́ələ́, wɨ́d ə́ nə ńchî lə́ tsɔʼə ndzaŋ páʼ Əsê kə nɨd nə́ yí wɨ́ lə̂. 45Pətǎ pɛn páʼ pó kə kwá nə́ ntaŋ wə́ á mbô pəpɔ́b pətǎ pó twá ntaŋ wɨ́d wə̂ ńkwúnə aláʼ páʼ Joshwa a nə ńdɔg nə́ ághɔ́b ńgə́ pó po ghɛn ńkwáalə zə́ələ́ á mbô ətú páʼ Əsê a nə ńkəm nə́ á ághɔ́b ə́wɨ́ lə̂. Pó nə ńtúg ntaŋ yi wɨ́ tə ńkoʼ nə́ ndɛd páʼ Debilə a nə ḿbə́ nə́ əfo. 46Əsê á nə ńkɔŋə̂ Debid, Debilə á tíʼ ḿbítə ńgə́ á mɛdtə̂ yə́ a pɔ́ ndɛ̂ á mbô Əsê Jekɔbə. 47Lə́ ndɛ̂ yi wɨ́ lə́ nə ńtíʼ ḿbɔ́ Solomun ə́fɛ̂ nə́ yə́.
48Lə́ Əsê páʼ ə́ tsɛ nə́ ajúmə atsəmə ä kě chîə á mə́m ndɛ̂ páʼ pɨ pə́ pɔ́ nə́ nə́ mbô pô. Ńdzoŋ ndzaŋ páʼ ntûsê a nə sóŋ nə́ ńgə́:
49Mmaʼmbîə a sóŋ ńgə́ nəpó lə́ aləŋənə́foonə mə,
ndəsê ə́ pə́ aliʼə́ a tə́gtə məkoolə mə.
Lə́ zə́ənə́ apə́ŋə ndɛ̂ mbɔʼ pɨ tíʼ ḿbɔ́ ə́fɛ̂ nə́ maŋə?
Aliʼ mbɔʼ maŋ jwitə̂ ə́wə́ a tíʼ ńchî ə́fó?
50Əpú pɨ ətsəm lə́ nə ńkě maŋ nə́ mbô mə tsoŋkə̂?
51Stifənə a ghɛn nə́ mbiə á mə́ sóŋ nə́ ńgə́, “Atûə azə́ənə́ a chígə́ ńtě lɛ ə́lɛ́, məntɨ́ mɨ́ mə́ chîə ándó pɨ pə́ tə jî Əsê pə́ kə́bkə nə́ mətôglə mɔ́b ńgə́ kɔ pó zóʼə atséebə Əsê. Nə kə́ ńgɛnə̂ ajɨ́ tsɔʼə nə́ mbiə á mə́ tyantə̂ nə́ atûə á mbô Ajwǐəsê tsɔʼə ándó pətǎ pə́ənə́. 52Ntûsê yitsə̌ ə́ nə ńchî ə́wɨ́ páʼ pətǎ pə́ pətǎ pɨ́ pó nə ńkě nə́ tsaŋkə̂? Pó nə ńgɛd tə ńkə́ ńjwítə məntú mə́ Əsê páʼ pó nə ńdáʼ nə́ ə́sóŋə a ngoʼ pəchə́ ńgə́, Yí Páʼə á Tɨ́ nə́ ndə̌ŋdəŋə́ á yǐ yǐəə. Lə́ yí páʼ pɨ nə ńtsɔ́ʼ nə́ nə́ akəmə ndɛd jɨ ə́finə̂ yə́ á mbô ngaŋkə́pa əjí ńgɛd pó jwítə yə́. 53Lə́ pɨ páʼ pɨ nə ńkwá nə́ məntəgə́ mə́ Əsê páʼ ntseŋndɛ̂sê a nə fɛ̂ nə́ á mbô pəənə́, lə́ nə pə́ ńkě pɛ́d ńdzóʼnə á mɨ́d pô.”
Pə́ Tə́mə Stifən nə́ Məngɔʼə
54Ndzaŋ ngaŋə́sáʼə́məsáʼ ə́ nə ńdzóʼ nə́ anu páʼ Stifənə a nə sóŋ nə́ lə́, məndě mɔ́b mə́ záŋ lɛ̌ tətə pó kɔ́d məsɔŋ mɔ́b ńté yə́. 55Lə́ Ajwǐəsê a pə́ ńdwɛ́nkə Stifən a tíʼ ḿbɨgə̂ atûə ají ńnáŋ nəpó ńdzə́ənə nəgháʼ Əsê, ńkə́ ńdzə́ənə Yeso a tə́əmə a əlá apô Əsê yi təənə. 56A jɨ́ ə́lɨ́d lə́ ńtíʼ ə́sóŋ ńgə́, “Jɨ́ nə. Maŋ jɨ́ nəpó nə́ ŋáʼnə Mɔ́ Əsê a tə́əmə á əlá apô Əsê yi təənə.”
57Ndzaŋ pó nə ńdzóʼ nə́ ə́lɨ́d lə́ ńkə́bkə mətôglə mɔ́b ḿbóʼ ngoŋ ńkwəŋnə̂ ńdzoŋə̂ yə́, 58ə́soŋə̂ yí ə́fógə yə́ á mə́m tə́kɔʼ tɔ̂ŋ ńchúʼə á mə́ tə́mtə nə́ yí nə́ məngɔʼə. Pɨ pə́ nə ńjɨ́ nə́ ńkə́ ḿbí pó nə ńtsɔ́ʼ ətsəʼ pɔ́b pi wáatə nə́ ńnoŋkə̂ á məko Mɔ̂nkə̂ nkaŋŋwu yitsə̌ páʼ pə nə̈ fóŋ nə́ yí nə́ Sɔl.
59Əghâ ándó pó nə ńtə́ nə́ ńtə́mtə yí nə́ məngɔʼ Stifənə a chaʼtə́sê ə́sóŋ ńgə́, “Mmaʼmbî Yeso, lɔg ntə́əmə mə!” 60Ńkwə́ʼtə á ndəsê ńkyéŋ ngye əjǐ ə́ kɔ́ʼə atǐ ńgə́, “Mmaʼmbî, ləgnə̂ təpɔŋ əghoobə́.” A kə sóŋ ə́lɨ́d lə́ ńkwûə yə́.
Pašlaik izvēlēts:
Məfaʼə 7: azo
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties