Məfaʼə 5
5
Ananyas pó Safilya ə́ Tsɨd Ntsəələ
1Lə́ ŋwu tsə̌ a nə ńchî ə́wɨ́ pə́ fóŋə yí nə́ Ananyasə, pó ngwě əyǐ Safilya ə́ kə́ finə̂ azɔ́b yə́ aliʼə́ ndəsê. 2Pó ngwě əyǐ pímnə ə́fagə̂ yitsə̌ nkáb yi wɨ́ ńdɔʼkə̂ ńtíʼ ńdɔgə̂ apuʼ ńgyǐ ńnoŋkə̂ á məko məntú mə́ Yeso. 3Pita a tíʼ ə́sóŋə á mbô yí ńgə́, “Ananyas, lə́ ghɛlə̂ akə̂ Satanə a chígə́ ńkwúnə á ntɨ́ gho ndɛn ghɛn tə gho tíʼ ńtsɨ́d ntsəələ á mbô Ajwǐəsê ə́fagə̂ yitsə̌ nkáb zə̂ páʼ gho fi nə́ aliʼə́ ndəsê ə́wɨ́ lə́ ńdɔʼkə̂? 4Gho nə ńjǐ tə́ finə̂ aliʼə́ ndəsê yə wɨ́ lə́ a kě lə́ azô pô? Gho nə ḿbɛn finə̂ ájɨ́d lə́ nkáb yi wɨ́ ə́ kě lə́ əzo pô? Akə̂ á nə ḿbɛn ńtíʼ ńgɛd gho kwaŋə̂ á mə́ ghɛd nə́ apə́ŋə anu zəənə́? Gho kě tsɨd ntsɨd lə́ á mbô ŋwu mbî pô. Gho tsɨd lə́ á mbô Əsê.”
5Ndzaŋ Ananyasə a nə ńdzóʼ nə́ anu jɨ lə́ ńgwǔəə á əsê ńkwûə yə́. Ŋwu ntsəm páʼ a nə ńdzóʼ nə́ anu páʼ á laŋ nə́ a nə ńchígə́ ḿbɔ́gə. 6Nkaŋŋwu ə́ yǐ ńdə́mə akwûə ají nə́ əpag ətsəʼ ńtwám ə́fɛ́d ńgɛn ńtwə́ŋə. 7Pəmə́nu pə́ kə́ ńgə́ laŋə̂ ándó pə́ teelə́ ngwě əyǐ a kwúnə, ḿbə́ ḿběʼ ńkě jîə anu páʼ á laŋ nə́ pô. 8Pita a pítə yí ńgə́, “Fiʼtə̂ á mə ńgə́ lɛ̌ ndɛn nkáb páʼ pɨ ndú əgho ə́ fi nə́ aliʼə́ ndəsê zə̂ ə́wə́?”
A kwěe ńgə́, “Lə́ ndə̌ŋdəŋ lə́ ndɛn yə́.”
9Pita a sóŋə á mbô yí ńgə́, “Lə́ ghɛlə̂ akə̂ nə́ pímnə á mə́ kwaʼlə̂ nə́ Ajwǐəsê? Zə́ənə! Pɨ páʼ pə́ pěʼ nə́ ńtwə́ŋə a ndú əgho pó chîə á ntsǒndɛ̂ əghâ nə́, pó yǐ kə́ twáamə gho ə́fɛ́d ghɛn twə́ŋə.”
10Tsɔʼə əghâ yi wɨ́ a wǔəə á mbi Pita ńkwûə yə́. Nkaŋŋwu zə̂ ə́ tíʼ ńkwúnə á ndɛ̂ ńjɨ́ ńgə́ a pɛ́dtə ńkwûə yí ńtíʼ ńtwáamə yí ə́fɛ́d ńgɛn ńtwə́ŋə á nəpɛnə́ ndú əyǐə. 11Nkyeetə pɔ́ pə́ Əsê pópə ŋwu ntsəm páʼ a nə ńdzóʼ nə́ anu yə wɨ́ ə́ nə ńchígə́ ḿbɔ́gə.
Məntú mə́ Yeso mə́ Tsóʼ Pɨ pipə Nɨ́ nə́
12Məntú mə́ Yeso mə́ nə̈ ńgɛd əkɨʼnəmə́nu pipə nɨ́ nə́ pópə mənu mimə yɛ́d nə́ á mbô pəənə́. Pɨ pətsəm páʼ pó nə ḿbí nə́ nə́ Yeso pə́ nə ńdzá ńkyeetə̂ aliʼə́ mɔʼə́ á alaakə Solomunə. 13Ŋwunə apeŋ yi ndaʼə a nə ńkě fiʼə̂ á mə́ kwú nə́ á mə́m pó pô, páʼ pó nə ḿbǎ nə́ tə ńtsáb əshîʼnə ńté ághɔ́b lə̂. 14Pɨ pipə nɨ́ nə́ pó nə̈ ḿbeg ndɛn əghɔ́b ńgɛnə̂ nə́ mbi əlě ətsəm ńdzoŋ ḿbéenə apoŋə mbyâŋnə pópə pəngyě páʼ pó nə ḿbí nə́ ndzoŋ ndzəm Yeso. 15Ńdaŋ ə́lɨ́d, pɨ pə́ lɔg pəghɔ pɔ́b ńgyǐ nə́ pə́ələ́ á nkaŋə́ alaŋə́ ńnoŋkə̂ á ndu məkwu pópə pəmə́ta ńjî ńgə́ əghâ páʼ Pita a tə́ nə́ ńdaŋə̂, tsɔʼə mə́lə́glə əyǐə á wǔəə á ndu pətsə́. 16Ŋwu məsɔŋə́ a nə ə́fɛ́d nə́ əláʼ páʼ ə́ páatə nə́ Jɛlusalɛm ńgyǐ nə́ pəghɔ pɔ́b pópə pɨ páʼ əjwi təpɔŋ ə́ jwaʼ nə́ ághɔ́b pə́ tsóʼə ághɔ́b pətsəmə.
Pə́ Tsaŋkə̂ Məntú mə́ Yeso
17Mbêsê yi Ngweŋ pópə pətɔ́mtə pí páʼ pó nə ḿbə́ nə́ ngǎŋ nkyeetə Pəsadusi pó nə ńtə́ ŋ́ŋwéetə məntú mə́ Yeso. 18Pó wam məntú mə́ Yeso ńnéŋə ághóobə́ á nkáʼə atsáŋə aláʼə atsəmə. 19Lə́ á yǐ ḿbə́ á nətúʼ, ntseŋndɛ̂ Mmaʼmbîə a yǐ ŋ́ŋáʼ ntsǒnkáʼə atsáŋ ə́fógə ághɔ́b ə́sóŋ nə́ pó ńgə́, 20“Ghɛn nə́ ńtə́əmə á mə́m Tə́kɔʼndɛ̂sê ə́fiʼtə̂ pɨ nə́ anuə atsəm ńté nchîmbî yi fî zəənə́.”
21Mbî ə́ fóg, pó tíʼ ńtsó ńgɛnə̂ á Tə́kɔʼndɛ̂sê ndzaŋ pə́ pěʼ nə́ ə́sóŋ nə́ pó lə́, ńchúʼə á mə́ zéʼkə nə́ pəənə.
Mbêsê yi Ngweŋ pópə pətɔ́mtə pí pə́ fóŋ pəkəm pə́ aláʼə Pəjus tsɔʼə pətsəm pópə ngaŋə́sáʼə́məsáʼ tsɔʼə ətsəm ńgə́ pó po tsɛntə̂. Ńtíʼ ńtú nkəənə á nkáʼə atsáŋ ńgə́ pə tsɛɛkə̂ məntú mə́ Yeso mə̂ á mbô pó. 22Pɨ pə̂ páʼ pə́ nə ńtú nə́ lə̂ pó ghɛn ńkwúnə á nkáʼə atsáŋ ḿbə́ ńkě məntú mə́ Yeso mə̂ ə́wɨ́ jɨ́ pô. Ńtíʼ ḿbɨ ńkwə̂ ə́fiʼtə̂ ághɔ́b ńgə́, 23“Pəg jɨ́ nkáʼə atsáŋ ə́ pyádnə ńkə́ ḿbə́ yi fwɔn nə́, pəsoye pə́ kə́ ńtə́əmə á ntso ə́wə́. Pəg pə́ ŋ́ŋáʼ ńkě ŋwunə á mə́m ə́wɨ́ jɨ́ pô.” 24Əghâ ándó nətû nə́ pəsoye páʼ pó nə̈ ḿbyáb nə́ Tə́kɔʼndɛ̂sê lə̂ pópə pətə́kɔʼ pə́ ngaŋə́pêsê ə́ nə ńdzóʼ nə́ anu jɨ lə́, á pyádnə ńkɨʼnə̂ ághɔ́b pó tíʼə ńkwaŋə̂ ńgə́ anu zəənə́ á yǐ chîə pə́ ə́lɛ́. 25Ŋwu tsə̌ a tíʼ ńgyǐ ə́sóŋ nə́ pó ńgə́, “Jwə́ʼtə nə́! Pɨ pə̂ pɨ nə ńnéŋ nə́ á atsáŋ lə́ pó chîə á Tə́kɔʼndɛ̂sê ńtə́ ńdzéʼkə pɨ ə́wə́.” 26Nətû nə́ ngaŋə́pyáabə Tə́kɔʼndɛ̂sê zə̂ nə́ tíʼ ńdɔg pɨ pí pó po ghɛn ńdɔg məntú mə́ Yeso mə̂ ńgyǐ nə́ pó. Pó nə ḿbə́ ńkě mətɨ lɔg pô ńté ńgə́ pó nə ńtə́ ḿbɔ́gə ńgə́ ŋwu məsɔŋə́ a yǐ tə́mtə ághɔ́b nə́ məngɔʼə.
27Pó lɔg məntú mə́ Yeso mə̂ ńgyǐ nə́ pó ńgɛd pó tə́əmə á mbi ngaŋə́sáʼə́məsáʼə, Mbêsê yi Ngweŋə́ a tíʼ ḿbítə ághɔ́b nə apítə atsáb ńgə́, 28“Pəg nə ḿbyádnə ńkwantə̂ áwɨ́ ńgə́ kɔ nə́ pɨ ńdzéʼkə anu ńté əlɛ́n Yeso ghɛnə́. Nə́ pɛn ńkə́ ḿbɛ́d ńgɛn nə́ mbiə á mə́ fɛ̂ nə́ nkɨ yí yi wə́ á Jɛlusalɛm ntsəmə, ńkə́ ńdəbə̂ apô azə́ənə́ á ndəsê ńgə́ pɨ yǐ ghɛd ŋwu ntsəmə a jî ńgə́ a ŋwu nə́ lə́ kə jwítə pəgə́.”
29Pita pópə ngaŋə́ko əjí ə́ kwěe ńgə́, “Pəg chîə á mə́ zóʼnə nə́ Əsê, pəg kě lə́ á ŋwu mbî yǐ zóʼnə pô. 30Əsê pətǎ pə́ pətǎ pə́g ə́ nə ńjúmkə Yeso á nəwûə. Yeso páʼ pɨ nə ńkwumtə̂ nə́ yə́ á atǐə apagləpaglə ńjwítə yí lə̂, 31Əsê a kɔ́ʼkə yi ńnáakə á əlá apô yi yə tɨ ándó nətû ńkə́ ḿbə́ nchwádkə, ŋ́ŋáʼ əsêndú ə́fɛ̂ á mbô pɨ pə́ Islɛl ńgə́ pó kwúblə ńjî ńgə́ pə́ ləgnə̂ pətəpɔŋ póobə́ 32Pəg nə ńjɨ́ ndɛn mənu ghɛn tsɔʼə ətsəm ńkə́ ḿbí ńgə́ lə́ ndə̌ŋdəŋə́. Pəg pə́ Ajwǐəsê páʼ Əsê a nə fɛ̂ nə́ á mbô pɨ páʼ pó zóʼnə nə́ yə.”
33Ndzaŋ pó nə ńdzóʼ nə́ atsáb jɨ lə̂, məndě mɔ́b mə́ pyádnə ńdzáŋə, pó tíʼə ńdoonə̂ á mə́ jwítə nə́ Pita pópə ngaŋə́ko əjíə. 34Lə́ ŋwu Falasi yitsə̌ a nə ńchîə á ndzɔʼ pó ḿbə́ ndzéʼkə pənoŋkə pə́ fóŋə yí nə́ Gamalya. Gamalya a nə ḿbə́ lə́ ŋwu pɨ pətsəm pə́ ghóʼkə yə́, a tíʼ ńdǒo əsê á mbi ngaŋə́sáʼə́məsáʼ ə́sóŋ ńgə́, pə́ lɔg məntú mə́ Yeso mə̂ ə́fɛ́d nə́ pó apeŋ nə́ mɔ́ akəmə ndɛlə́. 35A tíʼ ńtséebə á mbô ngaŋə́sáʼə́məsáʼ zə̂ ə́sóŋ ńgə́, “Pɨ pə́ Islɛl, kwaŋ nə́ atûə ajɨ́ əshîʼnə nə́ anu páʼ nə̈ lɔ nə́ á mə́ ghɛd nə́ nə́ pɨ pəənə́. 36A nə ḿbə́ nə́ ndɛd yitsə̌, ŋwu tsə̌ a yǐ pə́ fóŋə nə́ Tadiosə ə́sóŋə ńgə́ yí lə́ atyǎntə ŋwunə, pɨ pə́ zoŋ ndzəm əjǐ ńkoʼ nkɛd nəkwa. Pə́ nə ḿbɛn ńjwítə yí ńtíʼ ə́shamkə̂ ngaŋə́zoŋə́ndzəm əjí tsɔʼə ətsəmə, anuə atsəm páʼ a nə̈ ńgɛd nə́ á laŋ kətaŋə. 37Ndzaŋə ándó Tadiosə a nə ńkwû nə́ lə̂, Juda páʼ a nə fɛ́d nə́ a Galili a yǐ nə́ ndɛd pə́ nə̈ sháŋ nə́ pəənə, ə́soŋ pɨ pipə nɨ́ nə́ ńnéŋə á ndzəm yə́. Lə́ pə́ yǐ ńkə́ ḿbɛ́d ńjwítə yí ńkə́ ə́shamkə̂ ngaŋə́zoŋə́ndzəm əjíə. 38Lə́ələ́ pə́ ńgə́ nə́ zəənə́ anu əghâ nə́, maŋ yǐ tə́gtə áwɨ́ ńgə́ nə́ mɛdtə̂ pɨ pɨ pó ghɛnə̂. Anu pó kwaŋ nə́ ńkə́ ńgɛlə̂ lə́ təmbɔʼ zə́ələ́ a fɛ́d lə́ á mbô ŋwu mbî, tə ḿbə́ zə́ələ́ á kě anu yǐ kwú pô, 39lə́ təmbɔʼ zə́ələ́ a fɛ́d lə́ á mbô Əsê, tə ḿbə́ mbɔʼ nə́ kě á mbô pó zɔŋ pô, tə ḿbə́ nə́ yǐ jɨ́ mbɨ əjɨ ńgə́ nə́ tíʼə ḿbóʼnə lə́ pɨ̌pə Əsê!”
40Atséebə ajíə á nə́ ńgɛd mbô mə́ ŋwu ntsəm mə́ póolə. Pó tíʼ fóŋ məntú mə́ Yeso mə̂ á mə́m ndɛ̂ ńgɛd pə́ shúmə ághóobə́, ńkwantə̂ ághɔ́b ńgə́ kɔ pó láʼ ḿbɨ ńtsáb nə́ əlɛ́n Yeso, ńtíʼ ḿmɛdtə̂ pó ghɛnə̂. 41Məntú mə́ Yeso mə́ fɛ́lə aliʼ yi wɨ́ nə́ akɔŋtə ńté ńgə́ Əsê a ghɛd pó səglə̂ á mə́ twá nə́ əshɨ́ nə́ əlɛ́n Yeso. 42Əlě ətsəm əlě ətsəm, pó kwúnə á Tə́kɔʼndɛ̂sê, ńkə́ ə́fɛ́lə nə́ táʼ ndɛ̂ ńkwúnə nə́ yitsə̌ ńnáŋkə nkɨ yi əshîʼnə ńté Yeso páʼ a pə́ nə́ yi Ńtsəʼ nə́.
Pašlaik izvēlēts:
Məfaʼə 5: azo
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties