Luka 17
17
Mphurupuru
(Mateyu 18.6-7, 21-22; Marko 9.42)
1Ndipo wanguti ku ŵasambizi ŵake, “Kungaŵa cha kuti virekenge kuza viguŵisku: kweni owe kwaku iyo mwaku mweniyo vituziya! 2Mphanyi kwenga kwamandulika kwaku iyo ne mphe yinganyekezgeka kweti ku khose lake, ndi wapong'eke mu nyanja, kwakuruska kuti waguŵiske yumoza wa ŵamana yaŵa. 3Mujichenjere: asani mbali wako walakwa, muchenye; ndipo asani wape mgowoke. 4Ndipo asani kankhonde ndi kaŵimu zuŵa wangakulakwiya, ndi kankhonde ndi kaŵi wanganyongoke kwako, wakuti, ‘Ndape’; umgowokiyenge.”
Chivwanu
5Ndipo ŵakutumika ŵanguti ku Ambuya, “Tikuskiyeniko chivwanu.” 6Kweni Ambuya ŵanguti, “Asani mwe nacho chivwanu uli ndi nje ya kamganji, munganene mkuyu uwu, ‘Jimphuka, ndi pandika mu nyanja yo;’ mphanyi watinge uvwiyenge imwe.
Nchitu ya mteŵete
7“Kweni njani mwaku imwe, wakuŵa ndi muŵanda wakukusa pamwenga wakuliska, mweniyo wamuneniyenge, wachisere kutuwa ku munda, ‘Yiza ruŵi, ja pasi pa kurgha;’ 8kweni ukongwa asi wamuneniyenge, ‘Rongoso chenicho ndirghenge, ndipo, wati wajichinyiya, nditeŵete mpaka ndargha ndi ndamwa; ndipo pavuli po urghenge ndi umwenge iwe’? 9Asi wawongeka muŵanda yuwa chifukwa wanguchita vyo vyakulangulikiya iyo? 10Viyo so namwe, penipo mwachita vyose vyakulangulikiya imwe, mutinge, ‘Te ŵaŵanda ŵambura kwanduwa; kweni tachita cho tenerenga kuchita.’ ”
Yesu wachizga ŵamakhate chumi
11Ndipo kunguŵa mu kuruta kwake ku Yerusalemu kuti waporotanga iyo mukati mu Samaria ndi Galile. 12Ndipo wachisere iyo mu muzi wakuti, ŵangukumana nayo ŵanthurumi chumi, ŵamakhate, ŵeniwo ŵanguma kutari: 13ndipo iwo ŵangusamphuska mdanu, ŵakuti, “A Yesu, Ambuya, tifwiyeni lisungu.” 14Ndipo wachiwona wanguti kwaku wo, “Kaninga, kajirongoni ku ŵazukuru.” Ndipo kunguŵa ŵachiruta iwo, ŵangutozgeka. 15Ndipo yumoza waku wo, wachiwona kuti wachizgika, wangunyongoka, wakukankhuska Chiuta ndi liyowozi likuru; 16ndipo wanguwa kavunama pa marundi ghaku Yesu, wakumwonga: ndipo mweniyo wenga muSamaria. 17Ndipo Yesu wangwamuka, wanguti, “Asi wo chumi ŵangutozgeka? Wankhonde ndi ŵanayi wo ŵepani? 18Asi ŵangusanirika ŵakuwere kwachipaska unkhankhu kwaku Chiuta, kweni mlendo uyu pe?” 19Ndipo wangumunene, “Soka, rutanga; chivwanu chako chakutaska.”
Kazidu ka ufumu
(Mateyu 24.23-28, 37-41)
20Ndipo wachifumbika ndi ŵaFarisi nyengo penipo ungaziya ufumu waku Chiuta, wanguŵamuka, ndi wanguti, “Kuti utuza ufumu waku Chiuta ndi chithoŵa cha, 21chingana nkhuti ŵanenenge cha, ‘Awonani, kuno!’ pamwenga ‘Kuwa!’ chifukwa onani, ufumu waku Chiuta we mukati mwinu.”
22Ndipo wanguti ku ŵasambizi, “Ghazenge mazuŵa, penipo munwekiyenge kuona limoza la mazuŵa gha Mwana wa munthu, ndipo kuti mulionenge cha. 23Ndipo ŵanenenge namwe, ‘Onani, kuwa!’ ‘Onani, kuno!’ Mungaruta cha, chingana nkhurondo: 24chifukwa uli ndimo limphezi, pakumwetuka ku dera limoza lakusikuchanya, limbulikiya ku dera linyake lakusi kuchanya; viyo ndimo waŵiyenge Mwana wa munthu mu zuŵa lake. 25Kweni danga kutumwenere kukomwa vinandi, ndi kukanika ndi mphapu iyi. 26Ndipo mo kunguŵiya mu mazuŵa ghaku Nowa viyo ndimo kuŵiyenge mu mazuŵa gha Mwana wa munthu. 27Ŵarghanga, ŵamwanga, ŵatonga, ndi ŵaŵirwanga, mpaka zuŵa lenilo wanguserere Nowa mu chingaraŵa, ndi chinguziya chazandi, ndipo chinguŵananga wose. 28Uli ndimo kunguŵiya mu mazuŵa ghaku Lote; ŵarghanga, ŵamwanga, ŵagulanga, ŵasaskanga, ŵapandanga, ŵazenganga; 29kweni mu zuŵa lenilo Lote wangutuwiya mu Sodomu, moto ndi maka vingusolomoka kutuwa kuchanya, ndi vingwananga wose, 30viyo ndimo kuŵiyenge mu zuŵa lenilo Mwana wa munthu wavumbulikiyenge. 31Mu zuŵa liya, yose yo waŵenge pa bagha pachanya, ndi viyaŵi vyake mu nyumba, wangasika cha kuvito: ndipo wamu munda kwakukozgana wangawere kuvuli cha. 32Kumbukani muwoli yo waku Lote. 33Yose yo wapenja kwachitaska umoyo wake, wawutayenge: kweni yose yo wawutaya, wakausunganga wamoyo. 34Ndikuneniyani, mu usiku weniwo paŵenge ŵanthurumi ŵaŵi pa chita chimoza; yumoza watolekengepo, ndi munyake warekekenge. 35Ŵaŵengepo ŵanthukazi ŵaŵi ŵakupere pamoza; yumoza watolekengepo, ndi munyake warekekenge. [ 36Ŵanthurumi ŵaŵi ŵaŵenge mu munda: yumoza watolekenge, munyake wasiyikenge.]” 37Ndipo pakwamuka wangumunene, “Pani, Ambuya?” Ndipo iyo wanguti kwaku wo, “Ko kwe thupi, kweniko ghaunganenge pamoza makuŵi.”
Pašlaik izvēlēts:
Luka 17: TongaMw
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Bible Society of Malawi