Luka 12
12
Yesu wacheŵeska ndi fuvyu la ŵaFarisi
(Mateyu 10.26-27)
1Mwaku vyenivyo, vichongerana vikwivikwi vya mzinda wo, viyo kuti ŵakandirizgananga, wangwanda kuŵanene ŵasambizi ŵake danga, “Jichenjeriyeni ndi mtupu wa ŵaFarisi wo, ŵeniwo ndi fuvyu. 2Kweni palive kanthu kakubenekereka ko karekenge kuvunulika: ndi kakubisika keniko karekenge kuziŵikwa. 3Chifukwa chenicho vyose vyo mwarongorore mu mdima, mu ukweru vivwikenge; ndipo chenicho mungurongorole mu gutu mu vipinda vitaulikiyenge pa mabagha pachanya.
Yo ngwakwenere kopeka
(Mateyu 10.28-31)
4“Ndipo ndikuneniyani mwa ŵabali ŵangu, mungopanga cha ŵakubaya liŵavu, ndipo pavuli pake mbakuŵavi kanyake kakuruska kwachichita. 5Kweni ndazamrongo imwe yo mopenge: mopeni yo ngwakuŵa ndi mtufu, wati wabaya, kupong'amu mu Gehena; nadi, ndikuneniyani, mopeni mweniyo. 6Asi ŵaphwitu ŵankhonde ŵasaskika tumatambala tuŵi? Ndipo kuti waruwika yumoza waku wo cha pa maso ghaku Chiuta. 7Kweni masisi nagho gha mutu winu ghapendeka ghose. Mungopa cha; muruska ŵaphwitu ŵanandi.
Kuzomera ndi kukana Kristu
(Mateyu 10.32-33; 12.32; 10.19-20)
8“Ndipo ndikuneniyani, yose yo wangazomera ine paurongo pa ŵanthu, Mwana wa munthu nayo wamzomerenge iyo paurongo pa ŵangelo ŵaku Chiuta; 9kweni yo ngwakukana ine pa maso gha ŵanthu, wakanikiyenge mu maso gha ŵangelo ŵaku Chiuta. 10Ndipo yose yo wakambiyenge mazu pa Mwana wa munthu, kurekekiyenge iyo; kweni ku wakutuka, pa mzimu Wakupaturika kuti kumurekekiyenge cha. 11Ndipo penipo ŵakutoliyeninge ku masinagoge gho, ndi ku ŵara, ndi ku mitufu, mungakweŵeka cha chenicho muŵamukenge, chingana nchenicho mukambenge: 12chifukwa Mzimu Wakupaturika warunguchizgenge imwe mu ora leniliya vyo mutenere kukamba.”
Ntharika ya msambasi wakupusa
13Ndipo yumoza wamu mzinda wangumunene, “Muwomba, munene mbali wangu kugaŵana nane chihara cho.” 14Kweni iyo wanguti kwaku iyo, “Wamunthu, njani wangumika ine mweruzgi ndi mgaŵi paku imwe?” 15Ndipo wanguti kwaku wo, “Mucheŵe ndi muchwe ku mbunu yose: pakuti umoyo wa munthu kuti uŵiya mu ufurwi waku vyo we navyo cha.” 16Ndipo wanguŵanene ntharika, wakuti, “Charu cho cha mromba ngana chingupasa umampha: 17ndipo wajipimiyanga mwaku yija, wakuti, ‘Ndichitenge chine, pakuti ndirive po nkharonganga vipasi vyangu?’ 18Ndipo wanguti, ‘Chenichi ndichitenge; nkhapanyuwanga nkhokwe zangu, ndipo nkhazenganga zikuruku; ndipo mwenimo nkharonganga mbutu yangu yose ndi vyuma vyangu. 19Ndipo ndineniyenge mzimu wangu, Wamzimu, we navyo vyuma vinandi vyakuŵikikiya ku virimika vinandi; pumuwapo; irgha, imwa, kondwa.’ 20Kweni Chiuta wanguti kwaku iyo, ‘Wakupusa we, usiku uno ŵawufumbiyenge mzimu wako; ndipo vyenivyo warongoso, viŵenge vyaku yani?’ 21Viyo ndimo waliri wakujiŵikiya mbiku, ndi kuti ndi mromba cha kuchiri kwaku Chiuta.”
Gomezgani mwaku Chiuta
(Mateyu 6.25-34)
22Ndipo wanguti ku ŵasambizi ŵake, “Chifukwa chenichi ndikuneniyani, mungakweŵeke umoyo winu, chenicho mungargha; chingana nkhu liŵavu cho mungavwara. 23Chifukwa umoyo ngwakuzungura chakurgha, ndi liŵavu ndakuzungura chivwaru. 24Pimiyanipo ŵachahore wo, pakuti kuti ŵaseŵa cha chingana nkhuvuna, wo ŵalive chipinda chingana ndi nkhokwe; ndipo Chiuta watuŵalera: uli ukongwaku muzungura imwe viyuni vyo! 25Ndipo njani wamwaku imwe pakukweŵeka ngwanthazi kukuskiyako ku msinkhu wake mkonu umoza? 26Viyo asani mulive nthazi kuchita chingana nchimana viŵi, mukweŵekiyanji vyakujapo? 27Pimiyanipo ŵabwatinda wo, mo ŵamere: kuti ŵatakataka cha, chingana kusona saru; kweni ndikuneniyani, chingana ndi Solomoni mu unkhankhu wake wose kuti wavwaliranga cha nge njumoza waku wo. 28Kweni asani Chiuta wavwalika viyo uteka, wakuŵa mu dondu le ndi mawa wakupong'eka mu ng'anjo; uli ukongwaku wavwalikenge imwe, mwaŵachivwanu chimana? 29Ndipo mungapenjanga cha chenicho mungargha ndi chenicho mungamwa, ndipo mungakangang'anga cha. 30Chifukwa vyose vyenivyo mitundu ya charu yilembe: Auskemwe ŵaziŵa kuti mukavuka vyenivyo. 31Kweni penjani ufumu wake, ndipo vikuskikiyengeko ivi kwaku imwe.
Usambasi kuchanya
(Mateyu 6.19-21)
32“Ungopanga, wakamskambu kamana; pakuti Auskemwe ŵakondwa kumpaskani ufumu wo. 33Saskani vyo mwe navyo, ndi paskani chawezi. Jichitiyeni vikwama vyambura kuguga, mbiku yambura kupere mu machanya, kweniko munkhungu kuti wandere kufupi cha, chingana ndi chipupuruzu kuti chitananga cha. 34Chifukwa ko kwe mbiku yinu, kweniko kuŵenge mtima winu nawo.
Ntharika ya muŵanda wakucherezga
35“Viunu vinu viŵe vyakuchinyirika, ndi nyali zinu zakukole; 36ndipo muŵe imwe ŵakukozgana ndi ŵanthu ŵakulereze mbuyau waku ŵija, penipo wawenge ku chakurgha cha nthengwa; alinga kuti, wati waza ndi wagong'oska, ŵangamjuriyako sosonukweni. 37Mbamwaŵi ŵaŵanda yaŵa ŵeniwo mbuya yo, wakuti waza, waŵasaniyenge mbakukhazga; nadidi ndikuneniyani, kuti wajichinyiyenge ndi waŵajarikenge pa kurgha, ndi wazamkuŵamiriya. 38Ndipo asani wazenge mu lindu lachiŵi, ndi asani mu lachitatu, ndipo wasaniyenge viyo, mbamwaŵi iwo. 39Kweni ziŵani chenichi, kuti asani wanguziŵa mweninyumba ora lakuti munkhungu yo waziyenge, mphanyi wangukhazga, ndi mphanyi kuti wangureka nyumba yake kubukutulika cha. 40Namwe so muŵe ŵakurongosoleka; pakuti mu ora lo mulive kughanaghana ndimo Mwana wa munthu wakaziyanga.”
Mteŵete wamagomekezgeka, ndi wambura magomekezgeka
(Mateyu 24.45-51)
41Ndipo Petro wanguti, “Ambuya, kumbi mukambiya ifwe ntharika iyi, pamwenga so wose?” 42Ndipo Mbuya wanguti, “Njani na mlinda yo wamagomekezgeka ndi wazeru, mweniyo mbuyake wamikenge pa mbumba yake kwachipaska kamba mu nyengo yakwene? 43Ngwamwaŵi muŵanda yuwa mweniyo mbuyake, wachiza, wamsaniyenge wakuchita viyo. 44Ndikuneneskiyani, kuti wamumikenge paku vyose vyo we navyo. 45Kweni asani muŵanda yo wanenenge mu mtima wake, ‘Waswera kuza mbuyangu;’ ndipo wambenge kupuma ŵahurwa ndi ŵasungwana, ndi so kurgha ndi kumwa, ndi kuloŵe: 46wazenge mbuyake wa muŵanda yuwa mu zuŵa lenilo walive kulereze, ndi mu ora lenilo walive kuziŵa, ndipo wamdumuwenge, ndi waŵikenge chigaŵa chake pamoza ndi ŵambura magomekezgeka. 47Kweni muŵanda wakuziŵa khumbo la mbuyake, ndi wambura kurongoso pamwengakuchita uli ndi khumbo lake, wakwechulikenge zinandi. 48Kweni wambura kuziŵa yo, ndi wakuchita vyakwenere zimbumu, wakwechulikenge zimanavi. Ndipo kwaku mweniyo yose chipaskika chinandi, chinandi chilembezekenge kwaku iyo: ndipo kwaku mweniyo wapazgiya chinandi wafumbenge kwaku iyo chakuruska.
Yesu mpangi wagaukano
(Mateyu 10.34-36)
49“Ndinguza kwachipong'a moto pa charu; ndipo ndikhumba kuti mphanyi ukukole kali! 50Kweni chibatizo nde nacho kwachibatizikiyamo, ndipo uli ndifinyirizgika mpaka penipo chingafiskika; 51kumbi mupima kuti ndikuziya kwachipaska chimangu mu charu? Ndikuneniyani, Awa na; kweni ukongwa gaukano. 52Chifukwa kwanda ku sono mu nyumba yimoza ŵaŵenge ŵankhonde ŵakugaŵikana, ŵatatu pa ŵaŵi, ndi ŵaŵi pa ŵatatu. 53Agaukanenge, wiske pa mwana, ndi mwana pa wiske; nyina pa mwana munthukazi, ndi mwana munthukazi pa nyina; mpongozi pa mkumwana wake, ndi mkumwana pa mpongozi.”
Kuziŵa kwazinyengo
(Mateyu 16.2-3)
54Ndipo waneniyanga mizinda nayo, “Muchiwona mtambo wakusoke ku zambwe, sosonu mutiti, ‘Vuwa yituza;’ ndipo kutuŵa viyo. 55Ndipo muchiona mwera uputa, mutiti, ‘Chiŵengepo chifundizi,’ ndipo kutuŵiya. 56Mwaŵakufuvya, chisku cha charu ndi cha kuchanya muziŵa kurozga; kweni mureka uli kuziŵa kurozga nyengo yeniyi?
Sopana ndi mphindikwa yako
(Mateyu 5.25-26)
57“Ndipo chifukwa chine kwaku mwaŵeni mureka kweruzga cho nchakurunjika? 58Chifukwa penipo urongozgana ndi mphindikwa yako, muruta ku bwaro la mweruzgi, mu nthowa yo pamphuka kutatauka kwaku iyo, vinu kokuli yingakuguguziya pauronga pa mweruzgi yo, ndi mweruzgi yo wangakupereka ku msilikali yo, ndi msilikali yo wangakupong'a mu ulinda. 59Ndikukuneniyani kuti ungatuwa mwenimo cha, mpaka walipa katambala kakumariya.”
Pašlaik izvēlēts:
Luka 12: TongaMw
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Bible Society of Malawi