Chiyambo 5
5
Mbumba yaku Sete
(1 Mikoka 1.1-4)
1Ili ndi buku la mphapu zaku Adamu. Penipo Chiuta wangulenga munthu, wangumuchita muchikozgu chaku Chiuta. 2Munthurumi ndi munthukazi wanguŵalenga, ndipo wanguŵatumbika, ndi wanguŵadana Munthu penipo ŵangulengeka. 3Penipo Adamu wanguŵa wa virimika machumi pe chumi pachanya machumi ghatatu (130) wangupapa mwana munthurumi wakukozgana nayo, wachikozgu chake, ndi wangumudana zina Sete. 4Mazuŵa ghaku Adamu pavuli wati wapapa Sete ghenga virimika machumi pe chumi ghankhonde ndi ghatatu (800) ndipo wenga ndi ŵana ŵanthurumi ŵanyake ndi ŵana ŵanthukazi. 5Viyo mazuŵa ghose gho Adamu wanguŵa wamoyo ghenga virimika machumi pe chumi ghankhonde ndi ghanayi pachanya machumi ghatatu (930); ndi wangufwa. 6Penipo Sete wanguŵa wa virimika machumi pe chumi ndi vinkhonde (105) wangupapa Enoshe. 7Sete wanguŵa wamoyo pavuli pa kawi kaku Enoshe virimika machumi pe chumi ghankhonde ndi ghatatu pachanya vinkhonde ndi viŵi (807), ndipo wenga ndi ŵana ŵanthurumi ŵanyake ndi ŵana ŵanthukazi. 8Viyo mazuŵa ghose ghaku Sete ghenga virimika machumi pe chumi ghankhonde ndi ghaŵi pachanya chumi ndi viŵi (912); ndipo wangufwa. 9Penipo Enoshe wanguŵa wa virimika machumi ghankhonde ndi ghanayi (90) wangupapa Kenani. 10Enoshe wanguŵa wamoyo pavuli pa kawi kaku Kenani virimika machumi pe chumi ghankhonde ndi ghatatu pachanya chumi ndi vinkhonde (815) ndipo wenga ndi ŵana ŵanthurumi ŵanyake ndi ŵana ŵanthukazi. 11Viyo mazuŵa ghose ghaku Enoshe ghenga virimika machumi pe chumi ghankhonde ndi ghanayi pachanya vinkhonde (905); ndipo wangufwa. 12Penipo Kenani wenga wa virimika machumi ghankhonde ndi ghaŵi (70); wangupapa Mahalalele. 13Kenani wanguŵa wamoyo pavuli pa kawi kaku Mahalalele virimika machumi pe chumi ghankhonde ndi ghatatu pachanya machumi ghanayi (840), ndipo wenga ndi ŵana ŵanthurumi ŵanyake ndi ŵana ŵanthukazi. 14Viyo mazuŵa ghose ghaku Kenani ghenga virimika machumi pe chumi ghankhonde ndi ghanayi, pachanya chumi limoza (910); ndipo wangufwa. 15Penipo Mahalalele wanguŵa wa virimika machumi ghankhonde ndi limoza pachanya vinkhonde (65) wangupapa Yarede. 16Mahalalele wanguŵa wamoyo pavuli pa kawi kaku Yarede, virimika machumi pe chumi ghankhonde ndi ghatatu pachanya machumi ghatatu (830), ndipo wenga ndi ŵana ŵanthurumi ŵanyake ndi ŵana ŵanthukazi. 17Viyo mazuŵa ghose ghaku Mahalalele ghenga virimika machumi pe chumi ghankhonde ndi ghatatu ndi machumi ghankhonde ndi ghanayi, pachanya vinkhonde (895); ndipo wangufwa. 18Penipo Yarede wanguŵa wa virimika machumi pe chumi ndi machumi ghankhonde ndi limoza pachanya viwi (162) wangupapa Enoke. 19Yarede wanguŵa wamoyo pavuli pa kawi kaku Enoke virimika machumi pe chumi ghankhonde ndi ghatatu (800), ndipo wenga ndi ŵana ŵanthurumi ŵanyake ndi ŵana ŵanthukazi. 20Viyo mazuŵa those ghaku Yarede ghenga virimika machumi pe chumi ghankhonde ndi ghanayi ndi machumi ghankhonde ndi limoza, pachanya viŵi (962); ndi wangufwa. 21Penipo Enoke wanguŵa wa virimika machumi ghankhonde ndi limoza ndi vinkhonde (65) wangupapa Metusele. 22Enoke wangwenda ndi Chiuta pavuli pa kawi kaku Metusele virimika machumi pe chumi ghatatu (300) ndipo wenga ndi ŵana ŵanthurumi ŵanyake ndi ŵana ŵanthukazi. 23Viyo, mazuŵa ghose ghaku Enoke ghenga virimika machumi pe chumi ghatatu ndi machumi ghankhonde ndi limoza, pachanya vinkhonde (365). 24Enoke wanguti wenda ndi Chiuta, kuti wanguwoneka so cha, chifukwa Chiuta wangumuto. 25Penipo Metusele wenga wa virimika machumi pe chumi ndi machumi ghankhonde ndi ghatatu, pachanya vinkhonde ndi viŵi (187) wangupapa Lameke. 26Metusele wanguŵa wamoyo pavuli pa kawi kaku lameke virimika machumi pe chumi ghankhonde ndi ghaŵi ndi machumi ghankhonde ndi ghatatu pachanya viŵi (782), ndipo wenga ndi ŵana ŵanthurumi ŵanyake ndi ŵana ŵanthukazi. 27Viyo mazuŵa ghose ghaku Metusele ghenga virimika machumi pe chumi ghankhonde ndi ghanayi, ndi machumi ghankhonde ndi limoza, pachanya vinkhonde ndi vinayi (969); ndipo wangufwa. 28Penipo Lameke wenga wa virimika machumi pe chumi ndi machumi ghankhonde ndi ghatatu, pachanya viŵi (182) wangupapa mwana munthurumi, 29ndi wangudana zina lake Nowa, ndi wanguti, “Kutuwa mu nyata yeniyo Ambuya akutemba, uyu wakatitoliyanga ifwe chisangarusku ku nchitu zidu ndi kukutakataka kwa manja ghidu”. 30Lameke wanguŵa wamoyo pavuli pa kawi kaku Nowa virimika machumi pe chumi ghankhonde ndi machumi ghankhonde ndi ghanayi pachanya vinkhonde (595), ndipo wenga ndi ŵana ŵanthurumi ŵanyake ndi ŵana ŵanthukazi. 31Viyo mazuŵa ghose ghaku Lameke ghenga virimika machumi pe chumi ghankhonde ndi ghaŵi ndi machumi ghankhonde ndi ghaŵi pachanya vinkhonde ndi viŵi (777); ndipo wangufwa. 32Pavuli penipo Nowa wenga wa virimika machumi pe chumi ghankhonde (500), Nowa wangupapa Shemu, Hamu, ndi Yafete.
Pašlaik izvēlēts:
Chiyambo 5: TongaMw
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Bible Society of Malawi