Lukas 19
19
Ap Zakheus en tegei wene
1Asogo toluk e, at Yesus o Yerikho ’gwi lagarik, o seli eba ukpoluk ’bekhirat lasumu re, 2ap mesik onuk Zakheus, uang pemerintah paget ’gonu oluk odoktogu legesa a’ge onue ’gain welat a’ge a’bigat welaga. 3Oruakma,
“Yesus ai ebe no’gorak logwe,” oluk il yethaigoluk tegei a’ge re, aphwami enebe modok a’bik en e, at ebe horokma no oluk e, no’gosogo yetho ’gela’ge aga. 4Asogo agama, at ogola en e,
“Yesus ebela ’go yu wagoma nil yethele,” oluk, is aphwami ebano pobugabonoboluk e, at ebe naduk pungtak lagarik e, e pam ligaga. 5Ligagarik oruakma, at Yesus eriano lagarik il likholuk e, onuk ’baksogo disogo mo’gulesi,
“Zakheus, yogodak hat howi pam ne’birek nogo i lul en e, perlene ’bi suk o,” oluk mo’gulesimu, 6at Zakheus ano perleneat ’bu agarik e, Yesus ebe hau wusogo wesirik e, ogola agai hil-hil, at owi pam e’birek legesa. 7E’birek lagaihwe, is aphwami logon ’berlegat en enil yerontoluk, ’bousogo eniak ngorluk-se’gip onobok ’balugulat e, disogo egesa,
“Yesus e, ap wiak tago a’ge ano owi pam e’birek nogo i louwogoluk lagai ai nonogorlok e!” oluk egesa a’geat de, 8at Zakheus ano inagarik e, at nonue ’gain Onuk Logo a’ge Yesus ano disogo mo’gulesi,
“Nue! An na’ge di a’ge yu a’ge ’berlegat ’burl heisogo me’githoluk e, is aphwami pema ena’ge erlak welat enerlagaik a’ge eba so’burentaik o. Ye, an en aphwami niak esei lalenebegis a’ge holuk e, o’go ne’gik uganam pobuk ebam loukhegeik wogentaik o,” oluk mo’gulesi. 9Asogo mo’gulesimu at Yesus en e,
“Hat hebe Abraham en dogo’gwe a’ge holuk e, yogodak yayat hat heiyagai eneminat Allah en delhenebegei yo! 10#Mat. 18:11Delhenebegei a’ge ai, an abat daklau wegi ano, is aphwami nal agai a’ge ai herasogo delenebigoluk wegi o,” oluk mo’gulentesi.
Uang emas e’gin a’ge ebam elitsogo
mo’gulentesi wene
(Matius 25:14-30)
11At Yesus en asogo mo’gulentesirik e, enesa’go hwelak oruakhweat, o Yerusalem arat horok lai legesarik en e, is aphwami ebano onogola en disogo epegesa,
“Allah en eragam nonobouwa ai yogodak yayat nenebasukhwe nenil hul ani,” oluk onogola epegesa ai en e, at Yesus en wene mesik ebam elitsogo disogo mo’gulentesi,
12“Ap ’gain en dogo’gwe a’ge mesik ogola en e,
O ap ’gaindek ononuk logo a’ge edigonobogumu eba lasuam an ’gain nonuk logo a’ge ediknobouema togolik weik, oluk epesi. 13Asogo epesirik welat e, eragam a’ge enebe 10 worlentesimu wegesema re, uang emas e’gin a’ge ebe 10 enebe lo’bok mesik-mesik so’busogo wogentasulat e, disogo mo’gulentesi,
An owan wom erlakhwe, no uang ya pam seik-’beiksogo saborogulat togu lomup, oluk mo’gulontoluk e, at ano laga. 14Lasukhwe re, is ue ari ebano ap ai enebit en e, wene ’baligisarik,
At ap ai nonue ’gain onuk logo a’ge wolom e, nenebit o, oluk mo’gulentai lu, oluk, yo’go e’berlik peragenebegesa. 15Asogo wene wusogo peragenebegesa a’geat de, ap ano ’gain onuk logo a’ge welemagoluk edikpegesema owi akhit togolik waga. Wagarik e,
Uang an en a’ge ebano is en ’gesogo sabusogo seik-’beiktak pegesa, oluk, aluk emagoluk e, eragam a’ge ebano worlentesi. 16Worlentesimu, at ap mesik naduk wagarik e, disogo mo’gulesi,
Nue. An uang emas e’gin a’ge mesigat nak woknigen ano pam, an en sabusogo re, pobuk 10 pam lo’boktak poluk sabusogo hebegimu yema o, oluk mo’gulesimu, 17at ue ano en e,
Not wa! Hat hebabut op taga legenma hegi o. Weiyat a’geat de, hebabut he’bisogo taga legenma re, yogodak e, o kota 10 yema pobuk hat eiye welat tenentarok wolorogun en edikhebegi o, oluk mo’gulesi. 18Asogo mo’gulesimu pobuk at ap mesik e’berlik wagarik e, disogo mo’gulesi,
Nue. An uang emas e’gin a’ge mesigat woknigen ano pam, an sabusogo re, pobuk huaben lo’boktak poluk sabusogo hebegimu yema i o, oluk mo’gulesimu, 19at ue ano en e,
Not wa! Holuk e, o kota huaben yema pobuk hat eiye welat tenentarok wolorogun en edikhebegi o, oluk mo’gulesi. 20-21Is asogo mo’gulentesirikmu en, pobuk at ap mesik wagarik e, disogo mo’gulesi,
Nue. Hat hebabut modok ningtak welat, hat en a’ge erlakmayat de, is muon en a’ge hwerlasulat, ye, hat en owi pelu pukmu en de, we, is en owi pelogwi a’geat de, e’gen he’gik abusak ’baliselat, taga legen ano re, hebabut ’balegistik, nogorlok en e, uang emas e’gin a’ge mesigat woknigen ano an sum nerlegisak horago a’ge pam hetsogo tenak welegirik e, wokhosu wegi yu o, oluk mo’gulesi. 22Asogo mo’gulesimu, at ap ’gain ano en e,
Not. Hat hebabut modok wiagat taga legen o. Hat hiak e’gen ai pamat wene hebam poluk wiagap hebaik o. An nebabut ningtak welat e, an en po erlak a’ge hwerlasulat, owi an en yoru erlak a’geat de, e’gen ’baliselat, tisoma, nebabut hat haluk holuk e, 23an togolik weiktik no uang ebe a’ge emin, ebam lo’boksogo mangno tua a’ge emin, an hwerlaumagoluk e, is aphwami muon uang tenak welat, sabusogo logon emin ebam louksogo pogwi a’ge ebano wogonto a’geat de, nopaget en hat wogonto erlak welegen, oluk mo’gulesi. 24Asogo mo’gulesirik e, is aphwami eragam edik welegesa a’ge disogo mo’gulentesi,
Uang emas mesigat e’gin a’ge ap ai tenakho oruak ai wik-wok e, ap mesik uang 10 sabusogo pesi a’ge ai wogomis o, oluk mo’gulesimu, 25is aphwami ebano en e, disogo mo’gulegisa,
Nue! At ap yu o uang emas e’gin a’ge 10 oruak yema re, oluk mo’gulegisema, 26#Mat. 13:12; Mrk. 4:25; Luk. 8:18at ap ’gain ano en e, disogo mo’gulentesi,
Is aphwami ena’ge oruak a’ge ai, enebe lo’bok pobuk logon emin ebam louksogo wogontouwa o. Ye, is pema ena’ge erlak a’ge ai, wei nak tenakho oruak a’ge ai re, ene’gikmu en delogo horlouwa ai en e, at ap aiat wogorogup oluk mo’gulhentegis o. 27#Mat. 25:14-30Asogo mo’gulentesirik e,
Is ap an nemin hwerlirak a’ge ’gela’ge taknoboluk ogulat e,
At ai nis nonue ’gain onuk logo a’ge wolom e, nenebit o, oluk egesa a’ge ai enebe wogonoboluk wotluk e, an nilem yayat warenebip o, oluk mo’gulentesi,” oluk e, at Yesus en aphwami ebano mo’gulentesi.
At Yesus erliktugukhwe o Yerusalem
’gwegei wene
(Matius 21:1-11; Markus 11:1-11; Yohanes 12:12-19)
28Wene arat asogo mo’gulontoluk e, aphwami ebano owan oruakhwe, at Yesus ebe naduk, o Yerusalem ligaga. 29Ligaga lagarik e, dom Zaitun edipmu o seli mesik onuk Betfage, mesik onuk Betania, eba hegit lai lagarik e, at osi iak wogu legesa a’ge logon enebe ’biren wene wusogo naduk peragenebasulat e, 30disogo mo’gulentesi,
“O seli honlogotma etle lu o. Ye, eba ’gogup ’gal e, wam keledai emalik a’ge owan aphwami o’borl pam huragaiam wogonoboluk lasu erlak a’ge ’go’bi erlelik oruakma henil hagup ani o. Ye, arat henil haguptik e, ’go’bi erlelik a’ge ai hebilogo woluk manup o. 31Asogo ’go’bi hebelogumu, is aphwami eba a’ge pema en,
Keledai ’go’bi hebelogu legep ai nopaget, oluk hin wogwi holuk e, disogo mo’gulontomup,
Nis nonue ’gain Onuk Logo a’ge en keledai yu a’ge erlak en e, woluk lul en ’go’bi hebelogu lege, oluk mo’gulontomup o,” oluk e, wene wusogo peragenebesi. 32Asogo peragenebesimu, is ebano legesa ’gal e, at en egei hegitsogoat oruakma hegesa. 33Hegesarik e, keledai ano ’go’bi hebelogumu, is ap onuam eiye a’ge en e,
“Wam keledai ai nopaget ’go’bi hebelogu legep,” oluk mo’gulentigisema 34is en e,
“Nis nonue ’gain Onuk Logo a’ge ano wam keledai yu a’ge erlak en e, woluk louwogoluk ’go’bi hebelogu lege o,” oluk mo’gulontoluk e, 35wam keledai ano woluk Yesus e’bek wegesa. Wegesarik e, onosum o’borl o’gwe ’buktak a’ge no’gorlogo wam ano o’borl pam delak poluk e, Yesus ebe wam ano o’borl pam hweriogo pegesa. 36Asogo hweriogo pegesema, wam o’borl pam huragarik lasumu re, is ebano onosum ’buktak a’ge no’gorlogo re, ebela’gwe demil legesa. 37Demil legesarik e, o Yerusalem horok lai legesarik, ebela dom Zaitun pam en ’bugumu eba ’buogoluk e, at osi e’berlik no’gu legesa a’ge enebe esan logolak ebano, at Yesus tu puk a’ge elalin taga laga a’ge ebano enil hogu legesarikmu no oluk e, onogola enagai welat eniak loksogoat amitmit supsogo Allah erliktil ’bi legesa. 38#Mzm. 118:26Amitmit supsogo ’bugulat e, disogo egesa,
“Allah en nonue ’gain Onuk Logo a’ge perakhobou wagama wegen yu, at enat obaphobuak o!
Is ’bogorl pam welagai a’ge eba enede ha’buksogo welemak o.
Ye, Allah ’bogorl pam logo welago a’ge erliktogu lomok o,”
oluk asogo il-il ’bigisa.
39Asogo il ’bugumu re, is ap Farisi a’ge pema aphwami esan ebano ene’gerlakma ’bugulat e, Yesus disogo mo’gulegisa,
“Nue! Hosi eniak erlak emagoluk enesa’go worogunmu re,” oluk egesema, 40at Yesus en disogo mo’gulentesi,
“An niak demat mo’gulhentaik. Is aphwami yu eniak u pukmu en mo elipmu re, helep yema eniak amitmit sup elibat o,” oluk mo’gulentesi.
At Yesus en aphwami o Yerusalem a’ge enebaget nge tegei wene
41At Yesus en asogo mo’gulontoluk horoksogo ’bigisarik e, at Yesus il o Yerusalem kota ano yetholuk e, ebaget nge tegei. 42Ebaget nge tagalat e, disogo egei,
“His aphwami o Yerusalem a’ge ai, honogola en,
Nis opsogo labulik wolomul en disogo tuok o, oluk yogodak yayat henede eberu a’geat de, eberak erlak welegep ai, eige! Nede o! A’ge re, yogodak wene ai his henilmu hisogo oruak en pobirak erlak welegep o. 43-44Allah en obaphenebaigoluk hene’bek waga a’geat de, his pobirak erlak welegep ai en, his pobuk honowi pam en hweiye lebema no oluk e, heneselei a’ge en leget wali’gogo werak honoboluk e, pema-pema en wale’gik poluk, hop-hop ’guma ani o. ’Gumarik e, honowi helep a’ge moruk-moruk werik a’ge eba mesik ebalema werik ukpo pukmu en moluktugulat henebe modok perlengsogo henemalik enemin ’berlek lologunsogo wathonobua o,” oluk enebaget nge tegei.
At Yesus en Allah owi werikmu ’goluk
degelegei wene
(Matius 21:12-17; Markus 11:15-19; Yohanes 2:13-22)
45Asogo mo’gulentesirik e, Allah owi werikmu ’gwegeitik, is aphwami o’go ’balugu legesa a’ge mukho-makho lebigenebasulat e, disogo mo’gulentesi,
46 #
Yes. 56:7; Yer. 7:11 “Allah en e,
An nowi werik yu re, o se’ban ogu lommayat o,
oluk, pelal wogo oruak a’geat de, his en e, is ap aphwami logon ena’ge yogorlia delogo horlogwi a’ge onowi ’gela’ge wusogo onobogu legep yema re!” oluk wene yagentesi. 47#Luk. 21:37Asogo mo’gulontoluk e, at Yesus en nin erlige nan erlige Allah owi werikmu wene mo’gulentasu modok welaga. Asogo mo’gulentasumu re, is ap Allah eiye a’ge onuelak ’gaindek emin, Allah iak pelal wogo eiye a’ge emin, aphwami Yahudi a’ge ’gaindek ononuk oruak a’ge enemin en,
“At Yesus ebe no’gosogo worul,” oluk obok ’balugu legesa. 48Asogo obok ’balugu legesa a’geat de, is aphwami lok o’gwe re, at Yesus iak osokhwe enesa’go hwelak modok welegesa ai en e, at ebe no’gosogo woru ’gela’geat aga.
Pašlaik izvēlēts:
Lukas 19: Wul
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties