Lukas 17
17
At Yesus en enesa’go weregei wene
(Matius 18:6-7,21-22; Markus 9:42)
1At Yesus en asogo mo’gulentesirik e, at osi iak wogu legesa a’ge ebano wene mesik disogo mo’gulentesi,
“Aphwami en an ’goboksogo uknobouwagoluk is nin pema en enede ’gagalua a’ge oruagat ani o. A’geat de, at ap sa en enede ’gagaliselat oruak a’ge ai Allah en ebe ai wiagap pouwa o. 2At ai en is malik wei a’ge yuat mesik en an ’gobologo uknobouwagoluk ede ’gagalumu, an ’gobologo uknebasu holuk e, at ap ede ’gagaliselat welago a’ge ai helep lok a’ge o’gorlop pam herle erlilogo re, ik laut lok omugwema hwik elepma re, op o. 3#Mat. 18:15Holuk e, henebe erlele wokho re, henebabut heberlogo welemis o. His henarilak honorokhwi a’ge mesik wiak tago holuk e, esa’go werip o. Esa’go worogup ’gal, ebabut heberliso holuk e, wiak tago a’ge ano erlagapsogo ukpomup o. 4Ap ai en agauwa mesik erlige pam, e’gik sabit hebarligen pam pobuk naduk wiagap hebasulat e, nin hwedik nan hwedik e’gik sabit enamat he’bek wotluk,
Wiagap hebegis a’ge ai nebabut heberlaga o, oluk mo’gulhosu wago holuk e, erlagapsogo ukpasu lomup o,” oluk mo’gulentesi.
“Enede Allah pam he’berik poluk tugulom o,” oluk mo’gulentesi wene
5Asogo egeimu, is osi peragenebesi a’ge ebano en e,
“Nue. Nis nenede Allah ebam he’berik pege a’ge ano hurle emagoluk logon emin nenanniapnenebemen o,” oluk mo’gulegisema, 6at nonue ’gain Onuk Logo a’ge ano en e,
“’Gebi e’gen owi wei a’ge pelogwi ai ’gela’ge, henede an nebam wei nagat he’berik poluk e, his en,
E musani yu yema en henokho re, ik laut lok omugwema etleba yaklai lak o, oluk mo’gulorogupmu re, hiak esa’go holuayat ani o,” oluk mo’gulentesi.
Ue en eragam a’ge mo’guloso wene
7Asogo mo’gulontoluk e, pobuk wene agaikhe emin disogo mo’gulentesi,
“His ap mesik heneragam a’ge heniabuk wasu lemarik de a? Honuam domba wam o’gonise lemarik a, owan ’gu agokhweat de,
Hoso’boru perlene na suk o, oluk mo’gulom epegep? Erlak o. 8We, disogo ogu legep epegi,
An noso’boru naduk sakho poluk, so’boru so’burentasulat sum ’buktogwi a’ge ano ’buksogo re, an naduk nouwagoluk woknosoam e, an arat nasu holuk en de, hat no yo, oluk ogu legep ano erlak no? 9Ue ano en eragam a’ge ano,
Disogo tip, asogo tip, oluk mo’gulema a’ge ano nak tiso holuk e, ue en hau worua no? Erlak o. 10His ai ’gela’geat o,
Disogo tip, asogo tip, oluk mo’gulhontoma ano arat takpoluk e, disogo ogu lomup,
Erlak o. Nis ebam louksogo tumu hau watnonobu a’ge tu erlak. We, heragam a’ge welat tu a’ge nak tige o, oluk ogu lomup,” oluk mo’gulentesi.
Ap enebe 10 yebil hwena’go ’gela’ge
obabenebegei wene
11Pobuk agauwa mesik erlige re, at Yesus o Yerusalem ’biselat, o Samaria ’belakholuk, o Galilea likholuk, ’burl o’gwe ’bi laga. 12’Biselat e, o seli mesik ’bisoam e, ap enebe 10 eniebil hwena’go ’gela’ge enebetne welaga a’ge en enil Yesus yethegesarik e, enebe walekma eba inlau welegesarik welat e, disogo mo’gulegisa,
13“Yesus nue! Hedeapnenebemen o,” oluk enaik loksogo egesa. 14#Ima. 14:1-32Asogo egesema, at Yesus en il yerontoluk e, disogo mo’gulentesi,
“His e, ap Allah eiye a’ge ebano en henebetne enil hontouwagoluk, onugentai lit o,” oluk mo’gulentesi. Asogo mo’gulentesimu, is ebano ebela’gwe lagaihwe, eniebil hwena’go ’gela’ge ebano erlak aga. 15Asogo erlak agama re, ap ebano a’ge mesigat a’ge nak il agap pam ’gwelakhesi ’gal e, yebil ebano arat erlak agama re, togolik wagalat, iak loksogoat, Allah erliktil waga. 16Wagarik, Yesus eragam odogorlu pam hurotluk sakhunsogo welat hau weregei. Ap hau weregei ai owi o Samaria a’ge. 17Asogo hau weregeimu, at Yesus en e, disogo mo’gulesi,
“Ap enebe 10 eriano enebetne op nak egesa a’geat de, enebe sogo a’ge ’geba legesema. 18Is ap enebe Yahudi a’ge togolik wom erlakma en mo ogukhweat de, ap momu a’ge yu nak e, Allah erliktigoluk togolik wagama ai o,” oluk mo’gulontoluk e, 19at ap waga a’ge ano disogo mo’gulesi,
“Demat obapnobua, oluk hede nebam he’berik pegen ai pam arat obaphebegis o. Holuk e, hebe inotluk howi pam lak o,” oluk perakpesi.
Allah eragam enebasu wene
(Matius 24:23-28,37-41)
20Asogo perakpesimu pobuk e, is ap Farisi a’ge en e, disogo egesa,
“At Allah en o metnerlige ’gela’ge en eragam onobou wema epegen,” oluk hin wegesema, at Yesus en e, disogo mo’gulentesi,
“At Allah eragam enebaigoluk wema ai re, aphwami en logon pobi tuagoluk elalin a’ge mesik enil pam tago erlak oruakhwe wema o. 21At Allah en eragam onobouwa ai, arat hene’gerlakma lau waga ai en e, is aphwami en,
At ebe demat yema oruak a’ge yu hau manis! ogulat,
Eba oruak a’ge etle hai lit! ogulat, owan u erlak oruakhwe wema o,” oluk mo’gulentesi. 22Asogo mo’gulontoluk, at osi iak wogu legesa a’ge ebano disogo mo’gulentesi,
“An abat daklau wegi ano nin erlige nan erlige pobuk nenemin modok wolomul a’ge owan oruakhweat de, his honogola en e,
Agauwa mesigat paget nenil holo e, oluk asogo epagup a’geat de, henil niogwi erlak wolorogup a’ge ano ogo oruagat o. 23Is aphwami en e,
At ano ebe yema oruak o.
’Gwelakhau manis, ogulat,
Eba oruak ano ’gwelakhai lit, ogulat, ogwi holuk e, honogola en e,
Demat, oluk henil yethai lagalat, ene’berlik lagalat, togup o. 24An abat daklau wegi ano weik e, o obinal yebekhasulat ’bogorl edip-edip etleba modok selak etil-etil lasu ai ’gela’ge, wema o. 25Ye, asogo tua a’geat de, ai owan tu erlak oruakhwe re, aphwami yogodak oruak a’ge yema en woknobu erlakma en, uknoboluk e, di obotut yu obotut taknobouwa ani o. 26#Kej. 6:5-8Is aphwami ap Nuh oruakhwe togu legesa eria hegit e, an abat daklau wegi ano pobuk asogoat tugukhwe weik o. 27#Kej. 7:6-24Nuh oruakhwe, is aphwami eba seni sorogulat ap en hwami wogonobogulat, is nin pema wogontugulat, tugukhwe, ap Nuh ano ik so ogola ’gwegeimu, ik lok ligagalat, is aphwami ebano perlengsogo warenebegei. 28#Kej. 18:20–19:25Ai ’gela’ge, ap Lot ano oruakhwe togu legesa ai ’gela’ge tua o. Eria hegit e, is aphwami eba onso’boru no’gulat, anggur e’gen a’bosu no’gulat, di a’ge yu a’ge o’go ’balugulat, wogulat, eniabuk horlugulat, onowi worugulat, tugukhwe, 29ap Lot ano o Sodom ukpoluk liplai lagama re, Allah ’bogorl pam en odouk de, moru ’gela’ge emin, belerang e’ben wiak a’ge emin, ’belakpou wagama re, is aphwami ebano enebe perlengsogo warenebegei. 30Ai ’gela’ge re, an abat daklau wegi ano pobuk selakmayat weik ai erlige re, asogoat tua o. 31#Mat. 24:17,18; Mrk. 13:15,16Eria hegit e, an wagokhwe, sa en a’ge o pam poluk e, ebe o dum pam ligemarik oruakma, ebe ’bu otluk a’ge o pam oruak a’ge ano wa ’gwilo mia o. ’Bekhirat louwak o. Ye, ap sa en ebe iabukmu oruakma an wagoam pobuk togolik o pam wom miayat o. ’Bekhirat louwak o. 32#Kej. 19:26Ap Lot ugwe takpesi ai henede eberit o! 33#Mat. 10:39; 16:25; Mrk. 8:35; Luk. 9:24; Yoh. 12:25Ap sa en u’gwarek ebe erlele horlouwa holuk, pobuk ebe nal ema o. A’geat de, ap sa en ebe erlele hwerlasu erlakma en, nal ema holuk e, ebe delhorlouwa o. 34Ai erlige re, ap enebe ’biren huba’go holi’bo mesikmu nogogumu re, mesik wasulat, mesik ukpasulat, tua o. 35Ye, hwami enebe ’biren so’boru weraruogoluk gandum e’gen sagalugumu mesik wasulat, mesik ukpasulat, tua ani o. 36[Ye, ap enebe ’biren yabuk worugumu, mesik wasulat, mesik ukpasulat, tuayat o, oluk mo’gulentegis,”] oluk ese lagama, 37at osi iak wogu legesa a’ge ebano en e, disogo mo’gulegisa,
“Nue o! Hat e’gen ai o ’geba en tua a’ge de, egen,” oluk mo’gulegisema, at Yesus en disogo mo’gulentesi,
“Ap werak a’ge oruak holuk e, sue ap werak a’ge no’gwi a’ge ai odokti lagai o,” oluk mo’gulentesi.
Pašlaik izvēlēts:
Lukas 17: Wul
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties