Lukas 15
15
“Wam domba nelakpoluk pobuk hwi-hwiak, onogola enagai hogwi o,” oluk ebam elitsogo mo’gulentesi wene
(Matius 18:12-14)
1 #
Luk. 5:29,30 Asogo mo’gulentesirik, pobuk agauwa mesik erlige re, is ap pemerintah paget uang ’gonu oluk odoktogwi a’ge emin, wiak togwi a’ge emin, enebe ’berlek Yesus iak enesa’go holuogoluk e, hau wegesa. 2Asogo wegesa ’gal e, is ap Farisi a’ge emin, is ap Allah iak pelal wogo eiye a’ge emin, enil ontoluk e, eniak ngorluk-ngorluk ogulat e, disogo egesa,
“Ap yu en aphwami wiak togwi a’ge wogenebegeitik so’boru enemin mesikmu no’gwi ai, nonogorlok o!” oluk egesema re, 3at Yesus en e, wene ebam elitsogo disogo mo’gulentesi,
4“Ap his a’ge mesik wam domba wam 100 welago a’ge re, mesik nak nalomma 99 eriano o leimu onoboluk e, mesik nak nalago a’ge ano ukpo erlakma en modok heratil-palil denagalat e, arat hwiariso erlak no? 5Asogo arat hwiakhorloluk e, ogola agai holuk odogun pam sukhensogo woluk e, 6ue ari emin, aphwami pema onowi seli mesikmu a’ge emin, ’berlegat worlontoluk e,
An nuam nalaga a’ge ano arat hwiakhorloluk wegi ai en, nonogola nenagai houwok o, oluk mo’gulentasu ano erlak? 7Ai ’gela’ge, aphwami enebe 99 a’ge ebano en,
An wiak logon tegistik no oluk e, nebabut heberleik no? Erlak o, oluk, enebabut heberlom mia en e, is ’bogorl pam welagai a’ge ai onogola enagai houwa erlak o. A’geat de, is aphwami wiak togwi a’ge mesigat a’ge en ebabut heberliso holuk e, is ’bogorl pam welagai a’ge ai onogola enagai a’bik houwa o, oluk mo’gulhentegis o,” oluk mo’gulentesi.
“Hwe mesik en uang sen a’ge nalaga a’ge
hwiaregei,” oluk ebam elitsogo
mo’gulentesi wene
8Asogo mo’gulentesirik e, wene mesik disogo mo’gulentesi,
“Hwe mesik uang sen a’ge ebe 10 tenak oruakma mesik nalago holuk e, ukpo erlakma en esaga ’gwielak poluk, o holu’gwe ollong hosogo lebikpoluk degeliselat e, arat hwiakhwerlasu ano erlak no? 9Asogo arat hwiakhorloluk e, hwami, at agarulak emin, onowi seli mesikmu welagai a’ge emin, worlentasuam odoktu agaiam e,
No uang sen a’ge nalaga a’ge an arat hwiakhwerlegi ai en e, nis ’berlegat nonogola nenagai houwok o, oluk mo’gulentasu ano erlak? 10Ai ’gela’ge, aphwami wiak togwi a’ge mesigat a’ge ebabut heberliso holuk e, is malaikat Allah en yo’go peragonobou wago a’ge ebano onogola enagai a’bik houwa o, oluk demat mo’gulhentegis o,” oluk mo’gulentesi.
“Ap mesik omlogo nalaga a’ge togolik waga,”
oluk ebam elitsogo mo’gulentesi wene
11Asogo mo’gulentesirik e, wene mesik disogo mo’gulentesi,
“Ap mesik eiyagai ap enebe ’biren welegesa. 12A’ge re, ap labo a’ge en aik mo’guleselat e, disogo mo’gulesi,
Naik! Hat waromma hemening woknum a’ge holuk e, yogodak yayat woknemin o, oluk mo’gulesimu re, at enaik ano en e, at emening a’ge so’buronto a’ge hegitsogo perlengsogoat eiyagai e’birek so’busogo wogentesi. 13Asogo so’burentesimu, omlogo labo a’ge ano agauwa mesik emin wolom erlakma en, di a’ge yu a’ge, at hwerlesi a’ge modok perlengsogo o’go ’balogo uang sabuthorloluk e, o walekma eba laga. Lagarik eba welat e, ogola eberu erlakma en, we, yogunat til denagalat o uang ebano modok nal-pal takpesi. 14Modok nal-pal takpoluk oruakma, o eba so’boru modok obuk a’bik agama re, ap ano so’boru nele a’bik aga. 15So’boru nele a’bik agama re, ap ano ogola en e,
Ap owirak a’ge mesik iabuk tisokhwe noso’boru woknese lemagoluk, e’bek laik, oluk laga. Lagama re, ap owirak a’ge ano en e, o igowi uam pekharok welemagoluk perakpesi. 16Perakpesimu eba welat e, ogola en e,
Nogum ning uagoluk e, so’boru esing wam nasu a’ge ai nasulle e, oluk epesi a’geat de, wogogu legesa erlak en e, 17weat welat ebabut heberlagarik e,
“Eige! An naik ano owi eragam a’ge iabuk togwi a’ge ebano enebe esanat so’boru a’bik dedilogo pogulat no’gukhweat de, an yu nak e, so’boru nele en wareik hegi! 18Holuk e, an pobuk yema en naik e’bek laiktik e, disogo mo’guleik,
Naik! At Allah ’bogorl pam a’ge ai emin, hat emin, henil salogo wiak modok tegismu o. 19Asogo wiak tegismu re, hat en e,
Yu an nomlogo, oluk pobuk u modok mia o. We, hat heragam a’geat nebemen o, oluk mo’gulesi laik, oluk ede epesi. 20Asogo opoluk, o welagama ebano ukpoluk e, aik ano e’bek weigoluk owan wagoma, at aik ano en e, walekma wagokhwe il yetholuk e, ede pu egeitik, pungtak lagarik e, ebagase parliksogo hau emde motok-motok weregei. 21Asogo tegeimu, at omlogo ano en e, disogo mo’gulesi,
Naik! An e, at Allah ’bogorl pam a’ge ano emin, hat emin, henil salogo wiak tegis o. Asogo tegismu re,
Yu an nomlogo, oluk pobuk u modok mia o, oluk mo’gulesi. 22Asogo mo’gulesi a’geat de, at aik ano en eragam a’ge ebano worlentesirik e, disogo mo’gulentesi,
Laguptik e, sum op a’ge ano woluk perleneat ’buktakpou wagalat, tigene op a’ge e’gik pam ’buktakpou wagalat, sepatu oyuk pam ’buktak pasulat, perleneat tit o. 23Asogo toluk e, sapi wam emalik esei a’bik a’ge ano wokho, at ebaget nonogola nenagai hogulat ebaget wusogo soruok o. 24An nomlogo yu waraga epege a’ge elaluk agarik wagama re! Modok nalaga a’geat de, pobuk hwiarige ai o, oluk, onogola enagai a’bik hegesa.
25Asogo tugukhwe erianoat, at ue ano yabukmu welagarik waga ’gal e, gitar worogulat weni worogumu eniak esa’go hwelegei. 26Hwelegeitik e, aik eragam a’ge ebano a’ge mesigat worlhasuam wagama re, disogo mo’gulesi,
Eniak olema eba no’gosogo togwi, oluk, hin wesimu, 27at ano en e,
Erlak o! Hot ano wagama o. At ebe ebam ou erlak op a’ge wagama re, haik en uam sapi emalik esei a’bik a’ge ano waresimu togwi o, oluk asogo egeimu, 28at ap naduk dogo a’ge ano olot het agarik e, owi pam ’gwi lo ede modok ’buk agarik oruakma, aik ano liplau wagarik e, iak sakhosogoat,
’Gwi lus o, oluk mo’gulesi. 29Mo’gulesimu omlogo ano en aik mo’guleselat e, disogo egei,
Hesa’go hwelin. An e, di tahun yu tahun hat hebaget hiabuk modok a’bik taga legi o. Asogo tagalat e, hat en,
Di tin, yu tin, oluk mo’gulnese legen a’ge ano mesik nebit oso erlakma en tago a’geat de, sapi emalik mesigat a’ge an narilak nenemin nonogola nenagai hogulat sakho nouwagoluk woknum erlagat. 30A’geat de, hat homlogo ai hwami yogunat tenentil neselat hat warorogunmu hemening eiye om a’ge hegitsogo wogigen a’ge ano modok nal-palsogo ukpoluk waga a’ge ai nak e, sapi emalik esei a’ge ano wusogo ebaget serigen yema re! oluk mo’gulesimu, 31at aik ano en e,
Nomlogo yo! Hat ne’birek welege a’ge yu re, an na’ge di a’ge yu a’ge ’berlegat e, hat en a’geat o. 32A’geat de, hat hot yu re, waraga epege a’ge re, elaluk agarik waga o. Ye, ebe ogo re, nalaga a’ge hwiakhwerlege o, ai en e, nonogola nenagai hogulat tu a’geat togu lege o, oluk mo’gulesi,” oluk Yesus en mo’gulentesi.
Pašlaik izvēlēts:
Lukas 15: Wul
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties