Lukas 10
10
At Yesus en ap enebe 70 yo’go onoboluk peragenebesi wene
1Asogo mo’gulentesirik e, nonue ’gain Onuk Logo a’ge en ap enebe 70 poligonoboluk, at u’gwarek da ya o seli lo’bok laigoluk ede epesi o’gwe lo’bok, is ai naduk enebe ’biren lo’bokhegeik peragenebesi. 2#Mat. 9:37,38Asogo peragenebasulat e, disogo mo’gulentesi,
“E’gen a’bik egeik a’ge arat hurle agarik oruak a’geat de, aphwami e’gen ebe ’balu a’ge enebe weiyat o. Ai en e, ap iabuk Eiye a’ge ano en, aphwami e’gen ’balu a’ge logon peragonobouwagoluk, at yo’go pogu lemis o,” oluk mo’gulentesi. 3#Mat. 10:16Asogo mo’gulentesirik e,
“His lit o. An en his e, henebabut wam domba wam ebabut ’gela’ge is aphwami enebabut mene orlomene ebabut wiak a’ge ’gela’ge ene’gerlakma hialogo perakhenebaik o. 4Ye, perakhenebaikmu re, his en, uang sum ogola yagarak a’ge ai emin, di a’ge yu a’ge wokhontogwiam sum yagasogo woluk lo a’ge ai emin, sepatu mesik sum yagarak a’ge emin, modok woluk lagup o. Ye, ebela’gwe lagalat, aphwami pema heniak ebisogo hau warenebil lagup o. 5Ye, aphwami onowi pam ’gugulat e,
Henebe yema Allah en obaphonobuak o, oluk hau warenebil ’gwi lu o. 6Hau warenebil ’gogup ’gal e, enebabut obabonobu a’ge holuk e, Allah en obabonobuayat ani o. Ye, asogo a’geat de, is akhen enebabut asogo erlak a’ge holuk e, hau waronobogup a’ge heniak uak womup o. 7#1Kor. 9:14; 1Tim. 5:18Is aphwami his wokhonobu a’ge oruakma ’gogup holuk e, ebayat henemin wolomup o. Welat e, is aphwami en yabuk worogwiam ene’gik o’go di a’ge yu a’ge wogontogwi o, oluk, is en di a’ge yu a’ge nouwagoluk wokhontogwi holuk e, aiat no’gu lomup o. O akhenma en hokhomsogo akhenma lagalat, o akhenma en hokhomsogo akhenma lagalat, denaga lorogup o. 8O kota mesik ’gogup ’gal, hau wusogo wokhonobuema ebayat, is en so’boru wokhontouwa a’ge aiat no’gu lomup o. 9O kota eba welat, is pema enebam ou oruak holuk, his en obabonobogulat e,
Allah en eragam onobouwa ano yogodak arat onobouwa o, oluk wene mo’gulontogu lomup o. 10#Per. 13:51A’geat de, o kota mesik his ’gogupmu eba en hau wusogo wokhonobogwi erlak holuk e, henebe liplau wotluk ebela pam lai laguptik e, disogo ip,
11 #
Mat. 10:7-14; Mrk. 6:8-11; Luk. 9:3-5 Nis his honowi pam welat ’gwiang ollong nonoyuk pam lo’bok egei a’ge yu, his wiak oluk henil pam hosogo ukpege a’ge yu. Honogola en,
Allah en eragam onobouwa ano yogodak arat onobouwa o, oluk, opsogo pobi togu lomup o, oluk mo’gulontomup. 12#Kej. 19:24-28; Mat. 10:15; 11:24 Pobuk o ologun pam eba re, is aphwami o Sodom a’ge eba Allah en wene enebam poluk wiagabonobua ai re, se ’gela’ge o. A’geat de, is aphwami o kota his wokhonobogwi erlak ukhonobouwa a’ge ai nak e, Allah en wene e’gin a’ge enebam poluk modok wiagabonobua o, oluk, mo’gulhentasu legi o,” oluk mo’gulentesi.
At Yesus en aphwami wene yagentesi wene
(Matius 11:20-24)
13 #
Yes. 23:1-18; Yeh. 26:1–28:26; Yoe. 3:4-8; Amo. 1:9,10; Zak. 9:2-4 Asogo mo’gulentesirik e, pobuk aphwami ’berlegat disogo mo’gulentesi,
“His aphwami o Korazim a’ge emin, o Betsaida a’ge emin, eige. Nede e. Aphwami en elalin tu puk a’ge an en elalinat, his henemin welat taga legi ano, o Tirus Sidon eba tagallema re, is aphwami o eba a’ge enebabut heberlotluk e, ’belagwi poluk togwi ’gela’ge, onosum wiak a’ge ’buktugulat, ul ’gwiang ena’gul pam ’bo pogulat, tugulat e, wiak togu legesa a’ge ebano ukpoluk, enebabut pageat heberlelep a’geat de, his e, asogo tu henebit ai en e, wiagaphonobua ai o! 14Ye, pobuk o ologun pam Allah en wene enebam pasulat, no’gorliselat, tua ai erlige re, is aphwami o Tirus Sidon eba a’ge wene enebam poluk sesogo ’gela’ge waronobua a’geat de, his nak e, modok e’ginsogoat wathonobua o. 15#Yes. 14:13-15Ye, his aphwami o Kapernaum a’ge yu honogola en e,
Allah en ’bogorl pam nonobouwarik logo nonobouwa, oluk honu’gwarek en erlikhorlogu legep a? Modok erlak o. We, aphwami warotluk lagaimu eba modok ’belakhenebaik o,” oluk mo’gulentesi. 16#Mat. 10:40; Mrk. 9:37; Luk. 9:48; Yoh. 13:20Asogo mo’gulontoluk e, at osi iak wogu legesa a’ge ebano disogo mo’gulentesi,
“Is aphwami en his heniak hologwi holuk e, an niagat hologwi o. Ye,
His heniak nenebit, oluk ukhonobogwi holuk e, anat uknobogwi o. Ye, an uknobogwi holuk e, an peraknobou waga a’ge ano ebeat ukpogwi o,” oluk asogo mo’gulentesirik e, peragenebesi.
Is ap enebe 70 ebano togolik wegesa wene
17Pobuk is ap enebe 70 peragenebesi a’ge ebano onogola enagai holuk, togolik wegesarik e, disogo mo’gulegisa,
“Nonue! Nis en mu’gat ebabut wiak a’ge ai, hat honuk ’balogo mo’gulogwiam e, neniak esa’go hwelise laga o,” oluk mo’gulegisema, 18at Yesus en e, disogo mo’gulentesi,
“Iblis ai ebinal yebekhau wago ’gela’ge, ’bogorl pam en ’bu agoma nil hegi ani o. 19#Mzm. 91:13Holuk e, yethemit! Herlegetie emin, erlelim emin, honoyuk en al ’besilogo ’bo pugulat, Iblis emin hwerlirak a’ge ano anni erlagap pogulat, togu lemagoluk, an nanni wokhentegistik eiye takhenebegi o. Eiye takhenebegirikmu re, di a’ge yu a’ge logon en wiagaphonobua modok erlak o. 20Asogo a’geat de, is mu’gat enebabut wiak a’ge en his heniak hologwi ai pam, honogola henagai hagup o. At e, hononuk ’bogorl pam pelal wogo oruak ai paget nak e, honogola henagai hogu lomup o,” oluk mo’gulentesi.
At Yesus ogola agai hasulat Allah hau
weregei wene
(Matius 11:25-27; 13:16-17)
21Asogo mo’gulentesirik ai erlige re, Yesus ogola Allah Arogun oruakma no oluk e, ogola agai hasulat aik Allah disogo mo’gulesi,
“Naik Allah o. ’Bogorl ’gwiang eiye harat o. Wene ’berlek ai, is aphwami enede ’gagalak a’ge emin, di wene yu wene enaluk a’ge emin, enaluk ema no oluk hisogo poluk e, is enebabut malik ’get dogo a’ge ’gela’ge nak e, ’baksogo mo’gulentigen ai re, hat hogola hagai epegen a’geat mo’gulentigen ai en hau wathebise legi o, naik!” oluk mo’gulesi. 22#Yoh. 3:35; 10:15Asogo mo’gulesirik, is aphwami ebano disogo mo’gulentesi,
“An naik en di a’ge yu a’ge ’berlegat eiye welemagoluk woknesi. Allah omlogo ai sa oluk aphwami ’berlek en eneperlak a’geat de, an naik ematek nak e, aluk welago yo. Ai ’gela’ge re, an naik Allah ai sa, oluk aphwami ’berlek en eneperlak a’geat de, omlogo an nematek nak e, naluk welago yo. Ye, Allah omlogo an enat nede opoluk e, naik ebe aphwami agaikhen enaluk emagoluk niak ’baksogo mo’gulentaik a’ge aiat enaluk agai o,” oluk mo’gulentesi. 23Asogo mo’gulontoluk e, osi iak wogu legesa a’ge ebano enematekma ’geksogo wogonoboluk lagarik orogole edenogo enakhit poluk e, disogo mo’gulentesi,
“His henil ho a’ge arat hogu legep a’ge yu, honogola henagai opogu lemis o. 24Is ap Allah iak mo’gulontogu legesa a’ge emin, ’gain ononuk logo a’ge emin, enebe esanat his henil hogu legep a’ge ai,
Nenil holo e, oluk onogola opogu legesa a’geat de, enil hogwi erlak welegesa. Ye, wene henesa’go holugu legep a’ge ai,
Nenesa’go hollu e, oluk, onogola opogu legesa a’geat de, enesa’go hologwi erlagat welegesa,” oluk mo’gulentesi.
Ap Samaria a’ge mesik ebabut op o, oluk wene ebam elitsogo mo’gulentesi wene
25 #
Mat. 22:35-40; Mrk. 12:28-34 Wene asogo mo’gulentasu lagama re, pobuk ap Allah iak pelal wogo mo’gulentasu laga a’ge mesik ebabut ’baligoluk e’bek wagarik e, disogo mo’gulesi,
“Nue. An nelaluk modok weleik en e, nebabut no’gosogo taga leik o,” oluk mo’gulesimu, 26at Yesus en disogo mo’gulesi,
“Wene Allah en nenesa’go weregei wene ano pelal no’gosogo wogo oruakma onuk mo’gulise legen,” oluk mo’gulesimu, 27#Ima. 19:18; Ula. 6:5 ap ano en e, disogo mo’gulesi,
“At Musa en e,
Henede emin, henebabut emin, henanni emin, honogola emin, mesigat otluk,
nenaik Allah ’gain Onuk Logo a’ge ebe aiat henede hwedik wolomup o.
Ye, mesik e,
His honu’gwarek henebe henede hwedik
welegep ai ’gela’ge,
is aphwami agaikhen henemin
welegep a’ge ai henede hwedik welemis o,
oluk egeimu pelal wogo oruak o,” oluk mo’gulesi. 28#Ima. 18:5Asogo mo’gulesimu, at Yesus en e, disogo mo’gulesi,
“Ai wene hegitsogoat e’gen o. Hat hebabut wene e’gen ai ’gela’geat hegitsogo taga lorogun holuk e, helaluk modogat wolorogun o,” oluk mo’gulesimu, 29at ap ano ogola en e,
“Yesus en,
Ap ai re, op tiso a’ge, oluk opou wak,” oluk, disogo mo’gulesi,
“Aphwami nemin welege a’ge nede hwedik wolom ai, enebe salak no,” oluk asogo mo’gulesimu, 30at Yesus en e, disogo mo’gulesi,
“Ap mesik o Yerusalem en o Yerikho ’begei. ’Bigoluk ebela pam ’bisoma re, ap yogorlia wil no’gwi a’ge en ap ano tenak poluk e, ebe ’go’bu modok damuk-demaksogo warom ’gela’ge ebayat wusogo peberak pegesarik, a’ge di a’ge yu a’ge horloluk legesa. 31Horloluk legesarikmu re, at ap mesik Allah eiye a’ge ebela’gwe ano ’bigoluk ’begei ’gal e, ap ano werak oruakma il hesi a’geat de, ebela ugwalogo ukpoluk ’bekhirat ’begei. 32At ’begei ’gela’geat, ap a’gul onuk Lewi a’ge mesik ebela’gwe ano ’bigoluk, ap ano werak oruakma il hesirigat de, ebela ugwalogo ukpoluk ’bekhit ’begeiyat. 33#2Taw. 28:15Is asogo tigisema re, ap o Samaria a’ge mesik ebela’gwe ano ’bigoluk ’begei ’gal e, at ap werak a’ge ano oruakma il holuk e, edeaptegei. 34Edeaptegeitik e, ebe horoksogo eragam lagarik e, agap lebil-lebalsogo werigisa a’ge ebano anggur e’gen a’bosu emin, minyak a’bosu emin, yebil pam egelik poluk e, herle hetsogo, at uam keledai o’borl pam lagabak poluk, o aphwami o’go ’balogo nogogumu eba pei lagarik e, pekharok nogosi. 35Pekharok nogoluk e, loruk o’gwe re, ap ano en e, ap o ai eiye a’ge uang perak ’biren wogeselat e, disogo mo’gulesi,
Ap yu pekharok welemen o. Pekharok welat e, hat ha’ge di a’ge yu a’ge wogese lorogun a’ge, o’go wokhegis yu erlak ago holuk e, an pobuk weiktik o’go wokheik ani o, oluk mo’gulesi,” oluk, Yesus en ap Allah iak pelal wogo eiye a’ge ano mo’gulesi. 36Mo’gulesirik e, wene mesik disogo mo’gulesi,
“Is ap yogorlia wogwi a’ge en ap werigisa a’ge ai, Allah en,
Aphwami henemin welegep a’ge henedesogo wolom o, oluk egei ano hegitsogo, ap enebe henagan ai, sa ’gela’ge en edeaptegei epegen,” oluk asogo mo’gulesimu, 37ap ano en disogo mo’gulesi,
“Ap ai werak oruakma ap mesik wagarik ede en lethesi aiat o,” oluk mo’gulesimu, at Yesus en disogo mo’gulesi,
“Holuk e, hat asogo til lak o,” oluk mo’gulesi.
Yesus en Marta Maria e’birek mo’gulentesi wene
38 #
Yoh. 11:1
Asogo mo’gulentesirik e, pobuk at Yesus osi iak wogu legesa a’ge ebano enemin legesarik e, o seli mesik ’gwigisa. O eba hwe mesik onuk e, Marta welaga. At en e,
“Yesus ai an nowi pam ’gumak o,” oluk yo’go pesirik wesi. 39At Yesus, hwe Marta ai ot onuk Maria e’birek oruakma ’gwegeimu, hwe Maria ano Yesus eragam welat iak esa’go hwelak welaga. 40A’geat de, at Marta en,
“Ap ’bok ’gela’ge wagarikmu o,” oluk at ebaget set hoposogo seriselat, werariselat, takpoluk wagarik Yesus mo’guleselat e, disogo mo’gulesi,
“Nue. An nomuat taga lemagoluk, an not yu letnio erlakma en uknebesi yu op epegen a? Letniouwagoluk mo’gulemin o,” oluk mo’gulesimu, 41-42at Yesus en e, disogo mo’gulesi,
“Marta. Hat e, di a’ge yu a’ge paget hede perik welat setsogo taga legen hegi. A’geat de, wene mesik nak tu a’ge oruakhweat de, hat en di bele yu bele taga legen. Hot Maria yu re, wene op a’ge mesigat aiat u’gwarek en pulogo eiye agarikmu re,
Ukpemen, oluk mo’gulom e, mia o,” oluk mo’gulesi.
Pašlaik izvēlēts:
Lukas 10: Wul
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties