Yohanes 6
6
At Yesus en aphwami esan a’bigat so’boru wogentesi wene
(Matius 14:13-21; Markus 6:30-44; Lukas 9:10-17)
1Pobuk e, at Yesus ik Galilea omugwe, onuk mesik Tiberias ogwi a’ge ai, ik etle akhit libaga. 2Ik etle akhit lebagoma re, naduk aphwami enebam ou a’ge elalinat obabenebisokhwe enil hegesarikmu no oluk e, aphwami enebe a’bigat esan pulholuk, at e’berlik legesa. 3E’berlik lagaihwe, at Yesus osi iak wogu legesa a’ge ebano eneminat libegesarik e, duk pam ligotluk huregesa. 4Ye, eria hegit e, is aphwami Yahudi a’ge en e,
“Allah en delnenebegei,” oluk enede ebesogo seni onuk Paskah no’gwi a’ge ano arat no hegit lau waga. 5Asogo huregesarik, at Yesus il yerentesi ’gal e, aphwami a’bik esan logolagat odoktu agaimu il yerontoluk, Filipus disogo mo’gulesi,
“Filipus. Aphwami esan yema so’boru nouwagoluk, o ’geba a’ge o’go ’balontul epegen,” oluk mo’gulesi. 6Asogo mo’gulesi ai re, at Yesus en tu a’ge aluk welarat de, at Filipus ebabut ’baliogoluk mo’gulesi ai o. 7Asogo mo’gulesimu, at Filipus en e, disogo mo’gulesi,
“Aphwami en yabuk agauwa mesik erlige togwiam ene’gik o’go uang wogontogwi ai a’ge nis en 200 pam so’boru roti a’ge o’go ’bali loma re, aphwami yema, wei-wei e’gen wokhegeik elit no? Miayat o,” oluk egeimu re, 8at Yesus osi iak wogu legesa a’ge mesik onuk Andreas, Simon onuk mesik Petrus ano ot en e, disogo mo’gulesi,
9“Nue. Yema malik wei a’ge mesik so’boru roti jelai worogo a’ge huaben, ye, hiane nin ’biren tenak oruak a’geat de, aphwami esan degenikmu re, elirat no epegen? Mia o,” oluk mo’gulesimu, 10at Yesus en e, osi ebano disogo mo’gulentesi,
“Nosi. Aphwami eba huremagoluk mo’gulentemit o,” oluk egeimu, ’bugu e’gela a’bik oruakma re, ’gwe ebano huretil legesa. Huretil legesema re, aphwami enebe a’bik a’geat de, ap nak wenakho enebe re, 5.000 wenagenebigisa. 11Asogo huretil legesema re, at Yesus en so’boru roti a’ge eriano e’gikmu wesirik e,
“Naik Allah o,” oluk hau wusogo re, aphwami a’bik huregesa a’ge ebano so’burontoluk e, hiane eriano asogoat so’burentesi. So’burentesimu, is onogola en, nele epegesa hegitsogoat onogum ningsogo ne’gesa. 12Onogum ningsogo ne’gesema re, at osi iak wogu legesa a’ge ebano disogo mo’gulentesi,
“So’boru ne’gesarik ado dedilogo ukpegesa a’ge eba alemat ema no oluk e, odoksogo mesikmu pemit o,” oluk mo’gulentesimu re, 13so’boru roti jelai a’ge worogo huaben a’ge ebano ne’gesarik, dedilogo pegesa a’ge mul sum egeik 12 a’ge emde lorophegeik yagasogo pegesa. 14Asogo yagasogo pegesema, at Yesus en ebe pobi tuagoluk elalinat tegei a’ge ano, is aphwami enil hegesarikmu no oluk e, disogo egesa,
“Ap mesik en Allah iak ’gwiangma yema mo’gulnentauma egesa ano ebe demat a’ge re, yuat o,” oluk egesa. 15Asogo egesema, at Yesus ogola en e,
“Is ebano wemarik, an is onue ’gain welemagoluk eniak ningsogo ediknobouwa hegi,” oluk enebabut enak a’ge ’balegeitik e, o eba ukpoluk omuat duk pam ligaga.
At Yesus oyuk ik ogum petne pil waga wene
(Matius 14:22-33; Markus 6:45-52)
16-17At Yesus ebe asogo lagarik, osi iak wogu legesa a’ge ebano ene’bek wom erlakma en, owan oruakhwe, o arat hik egeimu, is nak ik ye’gelak ano ik iak pam ’bu egesarik e, ik so ogola ’gwigisarik, wusogo o Kapernaum liplau mogoluk wegesa. 18Liplau wagaimu re, yasobu loksogo punhau wagama re, ik a’bik hererim-hereram hesi. 19Ik hererim-hereram hasukhwe, is ano ik so wetil-wetil ’burl heirakma 5 kilometer de a, 6 kilometer de a, walegat lau wegesa ’gal e, at Yesus ano oyuk ik ogum petne pil-pil enebe hegit horok lau wagokhwe, enil yetholuk onogorlok a’bik aga. 20Onogorlok a’bik agama re, at Yesus en e, disogo mo’gulentesi,
“Nosi. An nebeat waga legi o. Holuk e, honogorlok hagup o,” oluk mo’gulentesimu, 21is onogola enagai holuk Yesus ebe ik so ogola ’gwelakpogukhwe erianoat, ik so ano is onogola en,
“Ik esa’go eria hegit lobomul o,” oluk epegesa hegitsogoat arat lau wegesa.
Aphwami a’bik Yesus heratil wegesa wene
22Wegesarik hubet o’gwe re, is aphwami a’bik ik esa’go etle akhit o’gwe onoboluk wegesa a’ge ebano onogola en e,
“Eige. O sono ik so mesigat nak welaga a’geat de, at Yesus ebe emin erlak o. We, at osi iak wogwi a’ge nak ik so wusogo libagaimu nenil entige o,” oluk epegesa. Asogo ik so ebe erlak holugat egesa a’geat de, 23pobuk ik so mu a’geat mesik aphwami o onuk Tiberias a’ge en wusogo, nonue ’gain Onuk Logo a’ge Yesus en se’ban eselat Allah hau wusogo so’boru roti a’ge so’burentesimu ne’gesema ebano libegesarik oruakma, enil hegesa. 24Enil hegesarik onogola en opogulat e,
“Yesus ebe emin, osi iak wogwi a’ge emin, enebe yema erlak yema re,” oluk ik so ogola ’goluk, Yesus ebe heratil, o Kapernaum liplau wegesa.
At Yesus en, “So’boru enelalugabenebiso a’ge nebe anat o,” oluk mo’gulentesi wene
25Is aphwami ebano liplau wegesarik e, at Yesus o Kapernaum oruakma e’bek wegesarik e, disogo mo’gulegisa,
“Nue, hat o yema metne wegen,” oluk ebam hin wokhegesema, 26at en e, disogo mo’gulentesi,
“An wene mesik mo’gulhentaik. An nebe pobi nobuagoluk elalin a’ge tisokhwe henil niegep ano paget heranebil wegep puk. Erlak o. We, so’boru roti a’ge so’busogo wokhentegismu honogum ningsogo ne’gep ano paget heranebil wegep hentegis ai o, oluk demat mo’gulhentegis o. 27So’boru muk otluk erlak om a’ge paget yabuk nak togup o. At e, so’boru modok-modok wolom a’ge no’gulat, enelaluk modok wolom a’ge ai, an enat wokhentasu lemagoluk, naik en yo’go noboluk peraknobou wagama, abat daklau wegi ai paget yabuk togu lemis o,” oluk mo’gulentesi. 28Asogo mo’gulentasu lagama, is en at disogo mo’gulegisa,
“Nue. Allah ogola epasu a’ge hegitsogo til lagaihwe re, nis nenebabut no’gosogo tagalom o,” oluk, ebam hin wegesema, 29at en e, disogo mo’gulentesi,
“Allah ogola epasu a’ge his en tu ai ebe re, yu o. Henede an Allah en peraknobou wagama wegi a’ge yu, nebam he’berik po aiat o,” oluk mo’gulentesimu, 30is en e, disogo mo’gulegisa,
“Hebe pobi hobuagoluk, elalin a’ge mesik tisokhwe nenil hioluk en nak de, nenede hebam he’berik pul en, ebe ’ge a’ge togun. Mesik e, no’gosogo togun. 31#Kel. 16:4,15; Mzm. 78:24Nene’balak o leimu aphwami erlakma welat, so’boru no ’gela’ge, onuk manna a’ge no’gu legesa oluk, Allah iak pelal disogo oluk wogo oruak o,
Is onso’boru no’gu lemagoluk,
at en ’bogorl pam en ’belakpou waga laga,
oluk pelal wogo oruak ’gela’geat no’gu legesa,” oluk mo’gulegisa. 32-33Asogo mo’gulegisema, at en e, disogo mo’gulentesi,
“An en wene demat a’ge mesik mo’gulhentaik. So’boru ’bogorl pam en ’belakpou waga laga ai re, at Musa en puk. Erlak o. At e, so’boru ebe a’ge ai re, naik en an nebe aphwami ’gwiangma a’ge enelalugabenebiso a’ge ’bogorl pam en ’bu wegi aiat wokhentasu legi o,” oluk mo’gulentesi.
34Asogo mo’gulentesimu, is en e, disogo mo’gulegisa,
“Nue. So’boru ai a’ge woknentasu modok welemen o,” oluk mo’gulegisema, 35at en e, disogo mo’gulentesi,
“So’boru enelalugabenebiso a’ge ai re, an nebeat o. Ap sa en an ne’bek wagalat, ede nebam he’berik pasulat, tua holuk e, so’boru nele agalat, ik nele agalat, tise lema erlak o. 36A’ge re, an en wene naduk mo’gulhentegis ’gela’geat, henil niogu legep a’geat de, henede nebam he’berik po henebit o. 37-38A’ge re, an ’bogorl pam en ’bu egi ai re, an nu’gwarek nede en ’gagalogo tigoluk ’bu egi puk. We, at peraknobou aga a’ge ede epasu a’ge aiat hegitsogo tigoluk ’bu egi ai en e, aphwami an naik en woknoso a’ge enebe lo’bok ne’bek wagaiam e, an en,
His an ne’bek worogup no, oluk, wene yagentaik erlak o. 39Ye, at ede epasu a’ge an en tuagoluk peraknobou waga ai re, ebe yu,
At en aphwami an woknoso a’ge ’berlegat mesik nelakpasu erlagat, o ologun pam, an enat enelalugabonobuagoluk, 40naik ede epasu o. Asogo epasulat, aphwami en Allah omlogo nebe yu enil niogulat, enede nebam he’berik pogulat, togwi holuk, enebe lo’bok enelaluk modok welemagoluk, o ologun pam, an en enelalugabonobuagoluk ede epasu o,” oluk mo’gulentesi.
41Ye, at Yesus en asogo mo’gulentasulat,
“So’boru roti ’bogorl pam a’ge ai re, an nebeat ’bu egi o,” oluk mo’gulentesi ai en, is ap Yahudi a’ge en, at obok ngorluk-se’gip ’balugulat e,
42“At yu onuk Yesus, ap Yusuf omlogo. Ye, at aik ia nenaluk a’geat de, at en eselat e,
An nebe re, ’bogorl pam en ’bu egi, oluk egei ai re, no’gosogo oluk egei epegep,” oluk egesema re, 43at Yesus en e,
“His-his nobok ngorluk-se’gip ’balugu legep ai re, ’balogup. 44An naik peraknobou waga a’ge ano en, aphwami lis-lis an ne’bek wogonoboluk wago erlak holuk e, ne’bek wom mia o. We, at en is logon lis-lis wogonoboluk an ne’bek wagai holuk nak e, o ologun pam, an en enelalugabenebaigat o. 45#Yes. 54:13Wene ai paget is ap Allah iak mo’gulontogu legesa a’ge ebano en pelal wokho pogulat disogo egesa,
Is aphwami ’berlegat Allah enat wene mo’gulontouwa o,
oluk, pelal wokho pegesa ai ’gela’geat, aphwami an naik iak enesa’go holholuk, at en mo’gulentasukhwe mo’gulegisa holuk e, enebe lo’bok an ne’bek wagaiat o. 46Wene mo’gulhentegis yu re, is aphwami pema en, an naik ai enil hegesa oluk mo’gulhentegis puk. We, an nomuat Allah oruakma en wegi a’ge yu nak e, naik nil hegi o. 47Ap sa en ede an nebam he’berik pasu holuk e, enelaluk modok welagai a’ge eiye agarik oruak o, oluk, demat mo’gulhentegis o,” oluk mo’gulentesirik, 48wene mesik e’berlik disogo mo’gulentesi,
“So’boru enelalugabenebiso a’ge ai re, an nebeat o. 49His hene’balak o leimu aphwami erlakma welat so’boru no ’gela’ge, manna ai a’ge no’gu legesa a’geat de, enebe waretil wegesa ai o. 50Asogo waregesa a’geat de, so’boru demat a’ge ’bogorl pam en ’bu aga ai. Asogo ’bu agarikmu re, sa en so’boru ai a’ge nasu holuk e, at ebe warom erlakma en, elaluk modok welema o. 51So’boru enelalugabenebiso a’ge ’bogorl pam en ’bu ago ai re, an nebeat o. So’boru an en wogentaik a’ge ai, sa en nasu holuk e, at ebe elaluk modok welema o. Aphwami ’gwiangma a’ge enelaluk welemagoluk an nebe is enebaget wareik ai, an nebeat wogentaik o,” oluk mo’gulentesi.
52Asogo mo’gulentesimu re, is ap Yahudi a’ge ebano, is-is nak eniak sagalugulat e, wene disogo egesa,
“Ap yu logwe. An yu ebe a’ge nis nouwagoluk no’gosogo woknentaiogoluk en mo’gulnentesi epegep,” oluk egesema, 53at Yesus en e,
“An en wene mesik mo’gulhentaik. An abat daklau wegi ano nebe no’gulat, nemep no’gulat, togu legep erlak holuk, enelaluk modok welagai a’ge, his eiye om erlakma enat welegep o, oluk demat mo’gulhentegis. 54A’geat de, sa en an nebe nasulat, nemep nasulat, tiso holuk e, enelaluk modok welema a’ge ano eiye otluk oruakma, o ologun pam an en elalugap paik o. 55An nebe emin, nemep emin, ai re, honso’boru henegeik ebe a’geat o. 56Sa en an nebe nasulat, nemep nasulat, tiso holuk e, at en an nemin hwedik, ye, an en, at emin hwedik, wolomul o. 57An naik elaluk modok welago a’ge en peraknobou wagama wegi ano, at elaluk welago ai en an nelaluk welegi ai ’gela’ge, ap sa en, an nebe nasu holuk e, an nelaluk welegi ai en, at elaluk welema o. 58Ye, so’boru ’bogorl pam ’bu aga a’ge yu re, his hene’balak no’gu legesa a’ge enebe waraga legesa ai ’gela’ge re, erlak a’geat de, ap sa en so’boru ebe a’ge yu nasu holuk, elaluk modok welema o,” oluk mo’gulentesi. 59Wene Yesus en asogo mo’gulentesi ai re, at ebe o Kapernaum o aphwami Yahudi a’ge se’ban ogumu eba wene mo’gulentasulat mo’gulentesi.
Wene enelalugabenebiso wene
60At Yesus en wene asogo mo’gulentesimu, is at osi iak wogu legesa a’ge ebano logon enebe esanat wene ai enesa’go hweligisarik e, disogo egesa,
“Wene egei ai re, e’gin a’bikmu re, sa ’gela’ge en wouwa epegep. Mia o,” oluk egesa. 61Asogo at ebe mo’gulom erlakma en egesa a’geat de, at en e,
“Wene egi ano paget nosi en orlumamitsogo ’bou togwi hegi,” oluk enebabut enak a’ge ’balegeitik disogo mo’gulentesi,
“Wene mo’gulhentegis ano en,
At nenebit, oluk ’goboksogo uknobouwogoluk togu legep a? 62An abat daklau wegi ano naduk welegimu pobuk togolik ligagokhwe henil nioluk, honogola ’gesogo epagup. 63Allah Arogun en aphwami enelalugabenebiso yo. Aphwami ’gwiangma a’ge enanni pam mesik tu mia o. A’ge re, wene an en mo’gulhentasu legi ai, Allah Arogun enat oso a’ge no oluk e, enelalugabenebiso wene mo’gulhentasu legi o. 64Wene ai pam enelalugabenebiso a’geat de, his pema akhit yema demat oluk henede an nebam he’berik pogwi erlak welegep hegi,” oluk mo’gulentesi. Asogo mo’gulentesi ai re, is pema enede at ebam he’berik po erlak a’ge emin, at mesik en Yesus ebe woruagoluk yo’go louwa a’ge emin, is ai, asogo tua, oluk at page edipmu enat aluk welagarikmu no oluk e, wene asogo mo’gulentesi ai o. 65Asogo mo’gulentesirik e, wene mesik disogo mo’gulentesi,
“Asogo oluk, an en e,
Aphwami Allah en onogola ’gagaliso erlak holuk, an ne’bek wom mia oluk, mo’gulhentegis ai o,” oluk mo’gulentesi. 66Wene asogo mo’gulentasu lagama, at osi iak wogu legesa a’ge ebano enebe esan logon Yesus ukpoluk ’bogoligisarik e, pobuk e’berlik no’gulomogoluk, e’bek wom erlakma en mo egesa.
67Asogo ’bogoligisema, at Yesus en osi 12 ebano disogo mo’gulentesi,
“His ogo re, asogoat uknoboluk ’bogoluogoluk opogu legep a?” oluk mo’gulentesi. 68#Mat. 16:16; Mrk. 8:29; Luk. 9:20Asogo mo’gulentasu lagama, at Simon onuk mesik Petrus ano en e, disogo mo’gulesi,
“Eige. Nue. Nenebe nenelaluk modok wolom ebele paget e, wene hat en mo’gulnentasu legen ’gela’ge yema re, hat ukhoboluk ap sa e’bek lo epegen. 69Nis en e, nonue hat Allah u’gwarek ebaget edikhoboluk, demat at en perakhobou wagama oluk, pobi hebigerik nenede hat hebam he’berik pege o,” oluk asogo mo’gulesimu, 70at en e, is disogo mo’gulentesi,
“An en his henebe 12 yema polikhenebegi erlak no? An enat polikhenebegi o. A’geat de, hat mesigat a’ge re, Iblis en a’geat welegen o,” oluk mo’gulentesi. 71Wene asogo egei ai re, ap Simon Iskariot omlogo onuk Yudas paget egei. At ap ai ebe Yesus osi enebe 12 ebano a’geat de, pobuk Yesus ebe woruagoluk yo’go laga ai a’ge paget egei o.
Pašlaik izvēlēts:
Yohanes 6: Wul
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties