Yohanes 4
4
Hwe Samaria a’ge Yesus e’birek weneane
egesa wene
1Asogo togu legesema, is aphwami en e, disogo egesa,
“Is aphwami enebe weisogo ’gela’ge nak Yohanes osi omogoluk eragam wagaiam ik olomu ’belabenebiso a’geat de, is logon enebe a’bigat Yesus osi omogoluk eragam wagaiam ik olomu ’belabenebiso yo,” oluk ogwiam, at Yesus en e,
“Wene ai, is ap Farisi a’ge enesa’go hweligisa hegi,” oluk aluk aga. 2Asogo egesa ai re, at Yesus ebe yen e, ik olomu ’belabenebise laga erlak. We, at osi iak wogu legesa a’ge eba en ’belabonobogu legesa a’geat de, egesa. 3Asogo ogwiam,
“Enesa’go hweligisa o,” oluk, Yesus aluk agarik e, at o Yudea ukpoluk o Galilea togolik orlu weigoluk orlu waga. 4Asogo orlu waga ai re, ebela mu’gwe erlak. We, ebela o Samaria ’gweat orluom hegit agama orlu aga. 5#Kej. 33:19; Yos. 24:32Orlu agalat, o Samaria o kota mesik onuk Sikhar horoksogo ’guogoluk, ’gwiang mesik ap Yakub en nadugat omlogo Yusuf wogesimu eba orlu aga. 6O erlige ede ’burl jam 12 orlu agarik, at Yesus ano ebela en werak no oluk e, ik ap Yakub egeik omugwe delakma ik na’gugu legesema ebano huragarik welaga. 7-8Eba hweriogo oruakhwe, osi iak wogu legesa a’ge ebano so’boru o’go ’baluogoluk o kota ma ebano ’gwigisema, at hwe Samaria a’ge mesik ik na’gwigoluk liplau waga. Liplau wagama, at Yesus en e, disogo mo’gulesi,
“Nerei yo. An ik logon na’gogo woknemin o,” oluk, ’gonu mo’gulesimu, 9#Ezr. 4:1-5; Neh. 4:1,2is aphwami Yahudi a’ge aphwami o Samaria a’ge enemin il ’belak welegesa ai en e, at hwe Samaria a’ge ano en at Yesus disogo mo’gulesi,
“Hat ap Yahudi a’ge. Ye, an e, hwe Samaria a’geat de, nopaget,
Ik nangnemin, oluk ’gonu mo’gulnigen,” oluk mo’gulesimu, 10at Yesus en e, disogo mo’gulesi,
“Allah ebabut op en weat o’go erlak wogentasu a’ge ai emin, ye, an en,
Ik logon na’gogo woknemin, oluk ’gonu mo’gulhegis ai, nebe emin, pobirak nebelenma re, hat en ik logon ’gonu mo’gulnosokhwe, an en ik enelalugabenebiso a’ge demat wokhetli o,” oluk mo’gulesi. 11Asogo mo’gulesimu, at hwe ano en e, disogo mo’gulesi,
“Nue. Hat ik e’be erlak. Ye, ik yu ogorlukmu orogobuat a’ge re, hat en ik enelalugabenebiso a’ge ai, ’geba a’ge na’gogo wokneriogoluk en egen. 12Ik yu nis nene’ba ’gain Yakub en delegeitik, at ebe emin, eiyagai emin, uam emin, no’gu legesarik en, nis pobuk no’gu lemagoluk woknentesi a’ge ai, hat hogola en e,
At ebe mia ’gela’ge. Ye, an nak e, nebe ’gain, oluk epegentik en e’gen a?” oluk mo’gulesi. 13Asogo mo’gulesimu, at Yesus en e, disogo mo’gulesi,
“Is aphwami ik yu a’ge no’gwi holuk e, pobuk ik nele ema a’geat de, 14ik an en wogontoma no’gwi holuk e, is onogola en ik elaruk ’gela’ge porlolu tago modok welema ai en e, enelaluk modok welat, is pobuk ik nele aga lema modok erlak o,” oluk mo’gulesi. 15Asogo mo’gulesimu, at hwe ano en e, disogo mo’gulesi,
“Nue. An ik nele en ik yu na’gu aga leik erlak holuk e, ik hat en e’gen a’ge ai woknemin o,” oluk ’gonu mo’gulesi. 16Asogo mo’gulesimu at Yesus en e, disogo mo’gulesi,
“Hat hogun e’birek yema worogup en e, worlhai lak o,” oluk mo’gulesi. 17Asogo ese lagama, at hwe ano en e,
“An nogun erlak o,” mo’gulesimu, at Yesus en e, disogo mo’gulesi,
“An nogun erlak e’gen ai demat e’gen o. 18Hat hogun mesik wasulat, ukpasulat, mesik wasulat, enebe huaben wogenebigentik en, yogodak ap mesik he’birek welegep ai re, hat hogun puk. Is mu a’ge de ai en e, hat wene demat e’gen o,” oluk mo’gulesi. 19Asogo ’baksogo mo’gulese lagama, at hwe ano en, at disogo mo’gulesi,
“Eige. Nue. Hat hebe re, demat Allah iak mo’gulentasu legen a’ge hegi o, oluk arat pobi hebegis o. 20Ye, nis nena’bu nene’balak en e, dom ya pam welat Allah erliktogu legesa a’geat de, his Yahudi a’ge en e, Allah o wema erliktogwi erlakma re, we, o Yerusalem eba en nagat erliktu o, oluk egepma o,” oluk mo’gulesimu, 21at Yesus en e, disogo mo’gulesi,
“Hwe yu nerei yo. Wene mo’gulheik a’ge yu re, demat opomup o. O dom yu pam emin, o Yerusalem emin, eba nak Allah erliktugulom puk. His agauwa Allah erliktugulom a’ge hegit e, o pobuk mesik dakha ua a’ge oruak o. 22Allah en aphwami ’berlegat delenebigoluk, nis aphwami Yahudi a’ge en wene mo’gulontouwagoluk yo’go nenebesi ai en e, nis Yahudi a’ge en Allah ebe nenaluk a’ge erliktogu lege a’geat de, his nak e, ebe heneperlak welarat erliktogu legep ai o. 23Asogo Allah erliktogu lege a’geat de, is aphwami en pobuk Allah erliktugulat e, mubelesogoat ’gela’ge erliktua a’ge oruagat o. At Allah ogola en e,
An Narogun e,
Allah ebe ai ’gela’ge, oluk mo’gulentasuam hegitsogo demat erliknobogu lemak, oluk, epasu ai en e, yogodak ya en asogo erliktugulom o. 24Allah ebe re, Arogun a’ge ai en e, at erliktuogoluk Arogun emin hwedik welat demat erliktu a’geat erliktu o,” oluk mo’gulesi. 25Asogo mo’gulesimu, at hwe ano en e, disogo mo’gulesi,
“Aphwami delnonobuagoluk Allah en ’gain onuk Kristus ai perakpouma. Perakpou wagoam e, ebe wemarik e, di wene yu wene ’berlegat nis mo’gulnentasu lema ani o, oluk an naluk o,” oluk mo’gulesi. 26Asogo mo’gulesimu, at Yesus en e, disogo mo’gulesi,
“Ap e’gen ai ebe re, an nemin weneane ogu lege a’ge nebe yuat o,” oluk mo’gulesi. 27Asogo mo’gulosokhwe, at Yesus osi iak wogu legesa a’ge ebano togolik liplau wegesa ’gal e, Yesus hwe a’ge mesik e’birek weneane ogumu, enil ontoluk e,
“Nogorlok e,” oluk, erliktigisa a’geat de, is nin pema en hin wogontugulat e,
“Hwe yu, hat no hagai en wegen,” oluk ogulat,
“Yesus. Hat hwe yu he’birek weneane ai no oluk ogu legep,” oluk ogulat, mo’gulonto pukmu en mo egesa. 28Asogo mo egesarik oruakhwe, at hwe ano ik e’be eba ukpoluk e, pungtak o kota eba ’gwi lagarik aphwami eba a’ge wene disogo oluk mo’gulentil denaga laga,
29“Ap mesik en an di bele, yu bele, tagalat denaga legi a’ge ’berlegat ’baksogo modok mo’gulnesi a’ge ebe eria ’gela’ge oruak o. At ebe Kristus Allah en delnenebigoluk perakpouma ano hwi a? Ye, muat a. Henil hagup en manis o,” oluk mo’gulentil laga. 30Asogo mo’gulontoluk lagama, is aphwami ebano o kota eba ukpoluk liplau wegesarik e, Yesus ebe haumogoluk wegesa. 31Haumogoluk owan wagaihwe, Yesus osi iak wogu legesa a’ge ebano en, at disogo mo’gulegisa,
“Nue. Hat so’boru naduk men o,” oluk mo’gulegisa. 32Asogo mo’gulegisa a’geat de, at en e, disogo mo’gulentesi,
“So’boru an en a’ge oruak a’geat de, ebe ’ge a’ge hwe, his heneperlak o,” oluk mo’gulentesimu, 33at osi iak wogu legesa a’ge ebano en is-is nak hin wogulat e, disogo egesa,
“Aphwami en di a’ge yu a’ge mesik at nouwagoluk wogosu wegesema en egei hwi a?” oluk egesa. 34Asogo egesema at Yesus en e, disogo mo’gulentesi,
“At en an peraknobou waga a’ge ano ede epasu a’ge hegitsogo taga legi ai emin, an tuagoluk yo’go nebesi a’ge ai ologun ’balogo dakhaigoluk taga legi ai a’ge emin, an noso’boru re, aiat o. 35Ye, his en ogulat e,
Dugwi henagan wolotluk en de, uganak a’ge holuk en e’gen egesik a’ge ano arat ’balul o, oluk ogu legep a’geat de, an en wene mesik mo’gulhentaik o. Gandum owi yogo’gwe henil yethemit! E’gen egesik a’ge hurle agarik ’balu hegit agama oruak o. 36Ebe arat ’balogwi holuk e, ap mesik owi yeriso a’ge emin, ye, akhen e’gen ’baliso a’ge emin, e’birek onogola enagai houwagoluk, yogodak at mesik e’gen ’baliso a’ge ai o’go hwerlasuat o. O’go hwerlasu ai ebe re, e’gen ’balogo odoksogo pogwi ai ’gela’ge, aphwami enelaluk modok welemagoluk odoksogo enebasu aiat o. 37Wene yu re, eniak lagaksogo ogulat e,
At ap mesik en owi yeriselat, at ap mesik en e’gen ’baliselat, togwi oluk ogwi ai demat o. 38Is pema en yabuk set wiaksogo wegesa a’ge, his en we sawesogo welegep a’ge yu, e’gen nak ’balogup en yo’go honoboluk perakhenebegi ai o. Is logon yabuk set wiaksogo wegesarik enemak pegesa a’ge, his en e’gen nak ’balogu lorogup en perakhenebegi o,” oluk mo’gulentesi.
39Ye, at hwe ano o pam ’gwegeitik e, wene disogo mo’gulentesi,
“At ap ai en, an di bele yu bele tagalat, taga legi a’ge ’berlek ’baksogo modok mo’gulnesi,” oluk mo’gulentil nese laga ai en e, aphwami o Samaria a’ge eba enebe a’bigat enede Yesus ebam he’berik pegesa. 40Asogo he’berik pegesarik e, pobuk Yesus e’bek liplau wegesarik, disogo mo’gulegisa,
“Hat nenemin yema wolomok o,” oluk tenak pegesema, enemin eba agauwa ’biren welegesa. 41Yesus enemin eba welat, naduk enebe wei nak enede at ebam he’berik pegesa a’geat de, pobuk wene at ebe en mo’gulentasumu, enesa’go hweligisarik e, enebe modok a’bik enede at ebam he’berik poluk, 42hwe ano disogo mo’gulegisa,
“Yogodak nis nenede at ebam he’berige yu re, wene hat en mo’gulnentigen ai pam nak nenede at ebam he’berik pege puk. Erlak o. At e, at ebe en wene mo’gulnentasuam nonu’gwarek en nenesa’go domok holugulat,
Aphwami ’gwiangma a’ge ’berlegat delnenebiso a’ge ebe yuat o, oluk pobirak poluk nenaluk agalat, tige ai pam en e, nenede at ebam he’berik pegeat o,” oluk mo’gulegisa.
At Yesus pobuk o Galilea orlu agarik ap pemerintah ’gain a’ge omlogo ou obaptegei wene
43At Yesus agauwa ’biren eba enemin welegesarik e, o Galilea arat orlu aga. 44#Mat. 13:57; Mrk. 6:4; Luk. 4:24Orlu aga ai re, at u’gwarek en eselat,
“Ap Allah iak mo’gulentasu a’ge ai re, onu’gwarek onowi pam a’ge onue enari en hau do’goksogo waronobogwi modok erlak o,” oluk, pageat mo’gulentesi a’geat de, 45#Yoh. 2:23is aphwami o Galilea a’ge o Yerusalem seni Paskah sorugumu ’bigisarik oruakma, Yesus en di a’ge yu a’ge tisokhwe enil hegesarikmu no oluk e, at ebe orlu agokhwe hau wusogo wegesa.
46 #
Yoh. 2:1-11
At Yesus ebe asogo hau wusogo wegesema re, nadugat ik we egeik a’ge anggur e’gen a’bosu tegeimu ano o Galilea kota onuk Kana ano waga. Wagarik oruakma, ap ’gain pemerintah a’ge mesik, owi o Kapernaum a’ge, omlogo ebam ou a’bik welaga. 47Oruakma, aphwami en e,
“Yesus ano o Yudea en Galilea orlu wagarik oruak o,” oluk egesema esa’go holholuk e’bek wagarik e, disogo mo’gulesi,
“Nue. An nomlogo ou en wareriogoluk ’gela’ge oruak en, hat loluk obap togun en yo’go hebegi o,” oluk mo’gulesimu re, 48at Yesus en e, ap ’gain ano disogo mo’gulesi,
“His aphwami yema henebabut e, an en his henaluk emagoluk elalin a’ge logon tagokhwe henil nioluk nak e, henede nebam he’berik po hentasu legi o. Elalin a’ge tiso erlak holuk e, henede nebam he’berik po puk hentasu legi o,” oluk mo’gulesimu, 49ap ’gain ano en mo’guleselat e,
“Nue o. An nomlogo ebe owan warom erlak oruakhwe eriayat obap togun en louwok o,” oluk mo’gulesimu, 50at Yesus en e, disogo mo’gulesi,
“Homlogo ai arat ou selang ua o. Holuk e, togolik lak o,” oluk mo’gulesimu, ap ano ogola en epasulat e,
“Wene mo’gulnesi ai demat mo’gulnesi hegi,” oluk, ede Yesus ebam he’berik poluk laga. 51Asogo ede ebetluk ebela pam owan lasumu, at eragam a’ge mesik wene woluk wegesa ’gal emin sarlok tigisarik e, disogo mo’gulegisa,
“Hat homlogo ano arat ou selang agama en wege ai o,” oluk mo’gulegisema, 52at en is enebam hin wogentasulat e,
“O mo ’ga hegit en selang egei,” oluk mo’gulentesimu, is en e, disogo mo’gulegisa,
“Erlige de, hopmu akhit jam 1 hegit agama ou aganhan ano arat horl aga o,” oluk mo’gulegisema, 53at ap ano ogola en eberiselat e,
“Erlige hopmu’gwe o mo eria hegit, at Yesus en e,
Homlogo ou selang ema o, oluk, mo’gulnesi hegitsogoat selang agama hegi,” oluk, ogola eberegeitik lagarik e, at ebe emin, eiyagai ’berlegat emin, enede Yesus ebam he’berik pegesa. 54Pegesema, at Yesus ebe o Yudea en Galilea naduk orlu agarik aphwami en ebe pobi tuagoluk wene elalin a’ge naduk mesik tegeitikmu en, pobuk orlu agarik mesik tegei ai o.
Pašlaik izvēlēts:
Yohanes 4: Wul
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties