TOWUNÖT 8
8
1Kunan Tororöt Noa nko tyonkïn lapay cho kimi meli nko nyinte. Kïlenyona, kwigh Tororöt yomöt kïkut pöghechay. 2Kïkörisyö konyichay pö pögh kikosunö ngwïny nko kukotichay kimi yïm. Kupech ropay, 3kïtos pöghechay ompö osis 150, 4kïrökyï melinay kutïng pö Ararat asista nyo pö 17 nyo pö arawa mut nko odeny. 5Kïtos pöghechay kutang tagh, ato mi asista nyo pö tagh nyo pö arawa taman, kesïwa walisayi kutïngkot.
6Nyini kiwer osiswö cho le tömönut angwan, kïyat Noa tïrisya ompö melinay, 7kulut kukay sany amelö kitökïmïla wölo kipil wölnö nko wölnö ntökïtenö kïteny pögh ompö ngwïny. 8Atolapay kulut Noa chepïrïm sany tökunkïtï lö kikwapta pöghechay, 9wölo kïle wölini kitökulumate pögh ngwïny kïmïkul, kïmökïnyorïnye chepïrïmnay wölo pilchini, kïlenyona kïmïla meli wölo mi Noa. Kughïto Noa egh akïnam akuyokyï melinay ori. 10Kïtöpö Noa ngat osiswe walaka cho le mut nko odeny, kulut sany chepïrïmnay ngat. 11Kïmïla ato le asïna akitïng sökon nyo nyaril nyo pö orolwö nyo kimi kutinyi. Kunkïtï nyu Noa lö kitos pögh ompö ngwïny. 12Atolapay kïtöpö ngat osiswe walaka cho le mut nko odeny, kulut sany chepïrïmnay. Melö kitökïmïla ngat wölö mi nyinte.
13Kiteny pögh lachim otini kitïngetö Noa könyis 601 asisto tagh nyo pö araweto tagh. Kïngany Noa köröwonto melinay, kïsïwa lö kipïs ngwïnya. 14Kïpïs ngwïnya asisto 27 nyo pö arawa odeny.
15Kïlenchï Tororöt Noa, 16“Ngetena meli nko korkengu nko werköku nko korukwa. 17Apkana tïkwïl nko törit lapay nko tyonkïn lapay tökïyiyö akïtösisyö tökïghömï ngwïny kïmïkul.” 18Kïlenyona, kïngetunö melinay Noa nko korkenyi nko werkachi nko korukwa 19nko tïpö wudïn löwïr cho chuto kegh ngwïny nko tarit anka tïkwïl. Kipka tyonchoni ompö ortïnekwa.
Karopta Noa amöros
20Kïtekyï Noa ECHOTYON ato kïpelo amöros. Kicheng nyinte kïgh akonga akonga nyo pö tyonchoni kimi meli nko tarit akïpel chane kïlïkwï amörostin. 21Kïnguchï ECHOTYON sikaka nyo anyïn nyo pö amöros, kïngölonchï kegh nyinte lö, “Melö tochïpan ngwïny ngat ompö kïgh nyo ighöy chi. Onkïtön lö ghach kinonutkachi kïngata mïnïngityenyi. Melö towuran ngat tïkwïn löwïr cho sötote, kïle wölini kaghan ye. 22Otini tökïmito ngwïnya, kï mewonyocha osiswo katkata nko ilö, kömöy nko pengat, nangat nko pöghet.”
Pašlaik izvēlēts:
TOWUNÖT 8: PIPÏLIA
Izceltais
Dalīties
Kopēt
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Flv.png&w=128&q=75)
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
©Bible Society of Kenya, 2019