LUKAS 20
20
”Yesus, hat nena mene eisewerek agendik hilingiti lagen,” iluk anema wanhukwa wene
(Mat. 21:23-27; Mrk. 11:27-33)
1Hobuk inenggi ekhe sambul he, at Yesus Allah awi wuri'mo kwisikhesik logolik afuni wene fano wene furogo yagaisigik komorinafik, ugunem, it ap Allah eisewerek inogogwi kaindek inom, Allah ane lisu palek inelu mene inom, inaluendek omanogo inom, inomat Yesus oba wagaukwa. 2Wagaukwasik he, mel yagatukwa: ”Haren he, nena mene eise agendik yi hilingitik, ti hilingitik, ikhi lagen. Nen, ap sa nen eisewerek logouwageluk menhobagaikhemo hilingiti lagen. Yaganisan o,” iluk yagatukwama, 3at Yesus nen he, ”An ogo re, hiren yaganesubagaigen iluk, heinok misigat wokhisagat. 4At Yohanes nen ima pelaginafi lagaikhe a'nogo re, Allah pogoroba mene nen yagatikhemo pelaginafi lagaikhe a? Athe, afuni kweangma mene nen yagatukwama pelaginafi lagaikhe a. Yagane'ni ta!” iluk yagaisasikhemo, 5it-it ikhi logolik he, ”Allah pogoroba mene nen yagatikhemo pelaginafi lagaikhe, iluk yagasumo re, aren he, halok he, hiren Yohanes ane eberogoat iluk futfigi'lek welagagip andi nenahalok, iluk yaganisanogo. 6Nen, afuni nen yagatukwama pelaginafi lagaikhe, iluk umo re, Eige! It afuni mondogaren Yohanes andi Allah aneat yaganisikhi lagaikhe iluk anggagarek andi nen he, helep oba ninebe mondok tamukhogo ninoasinogo,” iluk isukwasik he, 7hobuk Yesus mel yagatukwa: ”Wene andi ero nit ninonggoro,” iluk yagatukwama, 8at Yesus nen he, mel yagaisasikhe: ”Halok he, an nen ogo re, andi mene eisewerek agarik hilingiti lagi iluk hit yagahisagain legaro,” iluk yagaisasikhe.
”Ap ekhe anggur yabu kagalek welagaukwa,” iluk oba lirogo yagaisasikhe wene
(Mat. 21:33-46; Mrk. 12:1-12)
9At Yesus nen a'nogo yagaisasikhesik he, hobuk afuni omanogo wene ekhe oba lirogo mel yagaisasikhe: ”Ap ekhe eabumo anggur awi yatikhe. Yakfuluk he, ap ekhe kagalek logouwageluk fisaluk he, o yatmaat lambik enggi ekhe inomat logombigen wesigeluk lagaikhe.#Yes. 5:1 10O andoma lagaikhesik werek kwelek, anggur enggen palharek oba higit agaikhemo re, ap eabu eisewerek mene a'nogo it ap omanogo nen enggen ekhe palogo wogosuageluk, amingmingengge mene ekhe inoba lakfei wagaikhe. Lakfei wagaikhemo re, it ap yabu kagalek welagaukwa mene omanogo inoba wagaikhe mene re, ebe yei warogo enggen paleti'lek weat ambotkwe lakfesukwa. 11Lakfesukwama lagaikhemo re, hobuk amingmingengge mene ekhe lakfei wagaikheat. Lakfei wagaikhemo wagaikhe mene re, iren enggali warogo yei watfuluk he, enggen paleti'lek weat ambotkwe lakfesukwaat. 12Enggi pireba lakfisa wagaikhe mene a'nogo hilingitukwa andi nen he, hobuk amingmingengge mene ekhe lakfei wagaikheat. Mene re, at hobuk lakfei wagaikhe mene andi wagaikhemo iren a'nogoat yei amep wulagaisogo warogo anggur yabumo nen waganogo wulakfisasukwa. 13A'nogo mondok hilinginafukwama re, at kain eabu eisewerek mene a'nogo endawimo nen he, hobuk he, ninggi'nogo hilingitasik he. An nonggwarek namlogo nendawinggen hundik mene yiat inoba lakfoumo re, inane agaukhogo hai warogo wanugun anggikhi lagi, iluk anggasikhesik lakfei wagaikhe. 14Lakfei wagaikhemo wagunem, it ap yabu kagalek welagaukwa mene omanogo ineilenggen yethasukwasik it-it ikhi logolik he, mel isukwa: Eisena obali'mo yabu eisewerek asigin mene a'nogo ebe waga a'li. Halok yabu yi nirat eisewerek asuogen he, ebe wasuogo, iluk, 15amlogo a'nogo yabumo nen leget enda'ma waganogo wulakfisasukwasik he, ebe mondok watukwa. It a'nogo hilingitukwa andi nen he, ap kain eabu eisewerek mene andi nen it ap andi ninggi'nogo hilinginabigin anggegep? 16At ebe wesimbik he, it andi inebe mondogat warogo wulakfisambik he, inobali'mo yabu anggur yabu a'nogo kagalek logouwageluk he, ap ekhe hunogoat mene menfisagain aro,” iluk yagaisasikhemo, it omanogo nen he: ”Eige! A'nogo hilingisigin lego!” iluk yagatukwama, 17at Yesus ebe hebekhogo it omanogo eilenggen yerisasikhesik he, mel yagaisasikhe: ”It ap ekhe nen lisu palogo fikhi logolik he,
It ap tukang o helep meneba wutarek mene nen, o ebe wuti logolik he,
Helep yi weak, iluk herakfisasukwa mene andi ubuleat ya'lagama o,
iluk lisu palogo fesukwa andi nenangge faget isukwa anggegep?#Mzm. 118:22
18Ap sa nen ebe pile helep andiba pi waga halok he, ebe mondok wolelenggen tagalasigin o. Nen, helep andi sa oba sebeli waga halok he, ebe mondok al perelogo wasigin o,” iluk yagaisasikhe.
”Uang pemerintah faget kino ugunem wogisogoin a? Lega,” iluk heinok Yesus oba wanhukwa wene
(Mat. 22:15-22; Mrk. 12:13-17)
19At Yesus nen wene a'nogo yagaisasikhemo re, it ap Allah ane lisu palek inelu mene inom, Allah eisewerek inogogwi kaindek omanogo inom, inesanggo holhukwasik he, ”Wene andi nit faget oba lirogo yaganisikhe higi,” iluk futfesukwasik he, andi sambul, at Yesus ebe fakfouwogeluk isukwa meneat he, afuni omanogo inailo nen he, kamo isukwa. 20Kamo isukwasik hobuk, aren ane igin oba ebe enggin oba fouwogeluk, at gubernur afuni ferinarek logolik wene inoba figik, kotik, ikherek mene eisewerek mene nen wene oba fouwageluk, ap ekhe inobabut fano hangge Yesus ineil wani loageluk lakfisa wagaukwa. 21Lakfisa wagaukwama, Yesus oba wagaukwasik he, heinok wokhikhi logolik, mel yagatukwa: ”Noe! Hat he, wene yagaisikhi logolik afuni ekhe helokhoma fisigik, ekhe hambotma fisigik, egendek lek. We, hane higithogoat ikhi logolik, Allah endawimo nen he, afuni yi'nogo hilingiti logouwak, iluk endawimo anggikherek mene eberogoat yaganisikhi lagen andi, nit ninelu o. 22Halok he, nit Yahudi mene hilingitorek higithogo, uang pemerintah faget, kain enupogot Kaisar wogosugun eloga? Elo'lega,” iluk yagatukwama, 23at Yesus nen he, ”It ap yi an lalnabuogeluk inane lagokhogo yaganeta,” iluk, enegat futfisasikhesik he, mel yagaisasikhe: 24”Uang perak yabu inenggi misigam faget hilingitunem inenggi onggo wogisagarek a'nogo mene ekhe inuk neani,” iluk yagaisasikhemo inuk hasukwama re, ”Yi re sa ebe hilingik werek, nen sa enu palek werek,” iluk yagaisasikhemo, iren he, ”Ari Kaisar aro,” iluk yagatukwa. 25A'nogo yagatukwama, at Yesus nen he, mel yagaisasikhe: ”Halok he, Kaisar mene halok Kaisar at wogetik, Allah mene halok he, Allah at wogetik, ikhi logoino o,” iluk yagaisasikhe. 26A'nogo yagaisikhi lagaikhemo, afuni ineilhanem ane ikhe mene a'nogo wene oba fou mene elo'lek agaikhemo, iren he: ”Wene onggo higithogo ikhe andi ninailo e!” iluk, inane igi'lek kamo isukwa.
Ap Saduki mene nen afuni wa'la'lugen ineluk asugun mene faget, Yesus oba heinok wokhasukwa wene
(Mat. 22:23-33; Mrk. 12:18-27)
27A'nogo werek kwelek, hobuk it ap Saduki mene nen, ”Afuni wa'la'lugen he, hobuk ineluk asugun mondok lek,” iluk agarek mene fena Yesus oba wagaukwasik oba heinok wokhikhi logolik he, mel yagatukwa:#Kis. 23:8
28”Noe! At Musa nen mel yaganisasikhe:
Ap ekhe agwe helaluk againafuri taginafi'le'ma,
ebe wa'laga halok he, obali'mo omalik ekhe tagesuageluk,
he sogwe andi ap andi agorat wanigin o,
iluk yaganisasikhesik lisu palogo fesikhemo werego.#Ul. 25:5
29A'nogo isikhe mene were'ma re, ap inebe 7 nen ineisena misigaren tago mene welagaukwa. Logolik, inoe manggusa mene andi agwe wanhikhesik, againafuri taginafi'le'ma wa'lagaikhe. 30Wa'lagaikhemo re, agot ombo'ne mene andi nen, he sogwe andi wanhikhesik wa'lagaikheat. 31Wa'lagaikhemo, hobuk inagot inombo'ne mene andi nen wanhikhe mene re, a'nogoat againafuri taginafi'lek wa'lagaikheat. A'nogoat, it ap inebe 7 nen andi nen, he misigat andiat wanhukwasik he, inagainafuri taginafi'le'ma wa'larik enek wagaukwa. 32Nen, hobuk, he andi ebe wa'lagaikheat. 33Halok he, it ap inebe 7 nen andi, he misigat andiat wanhukwasi'mo re, hobuk Allah nen afuni warek mene inelugerinabigin andi sambul he, he andi sa agwe asigin anggegen,” iluk heinok wokhasukwa. 34A'nogo heinok wokhasukwama, at Yesus nen he, mel yagaisasikhe: ”O yogondak kweangma ya logolik he, aben hemi ikhigik, it ekhe igisigik, ili'lagwi meneat he, 35it afuni wa'lagunem en, Allah nen inelugerinabumo nen, o hobuk logogun oba andi re, elok logouwak, iluk anggikherek mene nek andoma logolik, hemi ikhigik, it ekhe igisigik, ikhi logogun mondok lego. 36Afuni wa'lagunem Allah nen inelugerinabigin andi nen he, inebe Allah againafuri, it malaikat pogoroba yonggo nikharek mene inom higit logolik, hobuk wa'laga logogun mondok lego. 37It afuni wa'lagunem Allah nen inelugerinaferek andi faget he, at Musa nen, e panggi eroma Allah ebe eilenggen hasikhe wene andiba mel isikhe:
Abraham inom, Ishak inom, Yakub inom, ineisena Allah re misigaro,
iluk lisu palogo fesikhe andi.#Kel. 3:6
38At Allah eilhanem it inebe mondogat ineluk werek andi nen he, Allah ebe re, afuni warek mene ineisena fuk. Ineluk mene ineisena o,” iluk yagaisasikhe. 39A'nogo yagaisasikhemo re, it ap Allah ane lisu palek inelu mene fena nen mel yagatukwa: ”Noe. Hat wene onggo fano yagaisegen o,” iluk yagatukwama, 40it ekhe nen, heinok wanu inailo agaikhemo re, heinok wanhi'lek kamo isukwa.
”At Kristus andi ebe sa anggegep,” iluk yagaisasikhe wene
(Mat. 22:41-46; Mrk. 12:35-37)
41A'nogo kamo isukwa meneat he, at Yesus nen it mel yagaisasikhe: ”Kristus Allah nen ayonggo fesikhesik lakfei wesigin isikhe a'nogo, ebe Daud en tagongge mene o, iluk ili'lagwi andi, ninggi'nogo halok ili'lagwi anggegep. 42-43At Daud onggwaregen Mazmur weneba ikhi logolik he, mel isikhe:
An Neisena Tuhan nen an noe Enupogot yagati logolik he,
Afuni hat haselei mene omanogo heisogen al perelogo fisanogen,
an nen oan hoba inobagai wagi'lek werek kwelek,
An nera'lu nenggi ebekwe hebe kainat logoinok, iluk Tuhan nen Kristus yagatikhe,
iluk lisu palogo fesikhe andi re,#Mzm. 110:1 44at Daud en Kristus ebe faget,
Noe Enupogot, iluk isikhe meneat he, it afuni nen,
Kristus telinaferek mene andi Daud en tago mene ugun andi re,
ninggi'nogo nen ugun anggegep.
A'nogo ugun elo'lego,” iluk yagaisasikhe.
”It ap Allah ane lisu palek inelu mene andi nen lalhinabinogo,” iluk isikhe wene
(Mat. 23:1-36; Mrk. 12:38-40)
45At Yesus nen wene a'nogo yagaisugunem afuni mondogat inesanggo holek werek kwelek, it at agoromi ane wanhi lagaukwa mene omanogo mel yagaisasikhe. 46”It ap Allah ane lisu palek eisewerek mene inobabut hilingiri'lagwi andi nen lalhinabinogo iluk, hinebe hebelogo logoino o. It andi inobabut he, inasu uandek mene laberaluk pasar onggo wanhare'ma andoma afuni nen inane agaukhogo hai warinabuageluk lagik, o afuni Yahudi mene samban agarek oba tulem healogo hu'lasi kwigik, afuni seni hokho isago nunggunem ap kaindek hu'lagaikharek oba healogo hu'lagik, ikhi logou inamolo welagaikharek andi.#Luk. 11:43 47A'nogo logolik, hemi sogwe mene inawi wurik inom, inagarek inom, sebelikhi logoligat he, afuni nen inesanggo holiluk, it fano, anggoageluk samban uan-awan lithaluk lagaikharek a'nogo hilingiti'lek logoilepma re, Allah nen wene endebat inoba fuluk logoilep. Mene re a'nogo hilingitarek andi nen, wene enggin mene inoba fuluk weagerinabigin o,” iluk yagaisasikhe.
Pašlaik izvēlēts:
LUKAS 20: inohap
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties