LUKAS 16
16
Ap ekhe amingmingengge mene nen eilmasirogo hilingiti lagaikhe wene
1A'nogo yagaisasikhesik he, hobuk, at Yesus nen agoromi ane wanhi lagaukwa mene omanogo yagaisikhi logolik he, mel yagaisasikhe: ”Ap kain ekhe amingmingengge mene nen oe agarek yi mene ti mene fisogo were'ma re, it afuni ekhe nen he, at oe a'nogo yagati logolik: Hat hamingmingengge mene andi nen he, hagarek omanogo mondok hesanggeat sumbut-sambathogo hilingiri'logo o, iluk yagatukwa. 2A'nogo yagatukwama, at kain a'nogo nen amingmingengge mene a'nogo wolhasikhemo wagaikhemo re, mel yagatikhe: Hat hilingiti lagen mene nesanggo holhi andi re, ninggi'nogo hilingiti lagen. Yogondak hat an naiba yoma logolik an nagarek fisogo logogin lek hilingi'mo re, fisogo logolik hilingiti lagen mene lisu palek mene andi pilingisogo yaganesimbik he, wo'nom o, iluk yagatikhe. 3A'nogo yagatikhemo, at amingmingengge a'nogo endawimo nen he: Noe nen, an naiba logolik nagarek fisogo logogin lek. Wulak nobagagin, ikhe andi, an ninggi'nogo hilingisigin. Wulaknobagaikhe halok, an yabu helikhi logogin he, nenggi maben. Nen, nambe kino weak yagaisilik nikhi logogin he, nenggali o. 4A'nogo enda'ma wulaknobagaikhe halok he, afuni nen an it inaiba andoma wo'nabuageluk, an hilingisigin nendawimo ebeti o, iluk endawimo anggikhesik he, 5it afuni, at oe a'nogo agarek inoba palegengge welagaikhe mene omanogo inebe lombok wolisasikhemo ekhe attagat wagaikhe mene yagati logolik he: An noe agarek he miren hak hat oba palegengge werek nogo, iluk isikhemo, at ap a'nogo nen he, 6Minyak goreng oak hokho mene ebe 100 nen hinago palegengge noba werego, iluk isikhemo, aren he, mel yagatikhe: Palegengge andi faget, lisu palek yi waluk he, hobuk lisu ket mene ekhe palhi logolik he, 50 nen hinago mene palegengge noba werek, iluk lisu weak-weak palin o, iluk a'nogo yagatikhesik he, 7hobuk ap ekhe yagati logolik: Hat he, palegengge miren hoba werek, iluk isikhemo, at ap a'nogo nen he, mel yagatikhe: Gandum enggen palek su hokhondek mene ebe 1.000 nen kwalek mene palegengge noba werego, iluk isikhemo, aren he, palegengge hoba werek andi faget, lisu palek yi waluk he, hobuk lisu ket mene ekhe palhi logolik, 800 nen palegengge noba werego, iluk lisu palin o, iluk yagatikhe 8A'nogo hilingitikhe mene andi, at abok oe a'nogo esanggo holhikhesik he, mel isikhe: Egi! Endawinggen mondok kagalek andi nailo e, iluk amingmingengge mene weak hilingiti lagaikhe mene a'nogo fogeratikhe. A'nogo fogeratikhe andi re, it afuni kweangma yoma mene inobabut he, it mene hilingisuogeluk inendawimo mondok kagalek meneat he, it Allah againafuri inendawimo selek hilingisogo fisasikhe mene andi, inobabut he, it hangge lek andi nen he, a'nogo isikhe andi.
9Andi halok he, an wene ekhe yagahisak: ”Hinagarek yi mene ti mene kweangma mene, ineilmasirogo weak hilingitarek mene andi lek aga halok, hinawi fano mondok logogun oba wokhinabuageluk he, yogondak ya hinagarek andiba hinagaila'lak hinom enggawerakhikhi logoni o,” iluk yagaisasikhe.
10A'nogo yagaisasikhesik mel isikhe: ”Sa nen endebat mene fisogo logouwageluk wogetunem higithogo hilingite halok he, hokho mene wogosumo, higithogoat hilingiti logogin o. Nen, sa nen endep mene fisogo logouwageluk wogetunem, higithogo hilingiti'lek halok he, hokhorogo wogosumo higithogo hilingisigin legaro. 11Andi hak, hit hinagarek yi mene ti mene kweangma mene ineilmasirogo hilingitarek mene andi wokhisamo fisogo logolik, higithogo welagi'lek halok he, ebe fano mene andi eise logobagaigeluk sa nen wokhisagain. 12Hiren ap ekhe agarek higithogo fisogo welagi'lek halok he, hirogo hinonggwarek hinagarek mene andi eise logobagaigeluk sa nen wokhisagain anggegep.
13Ap misigat mene ap kaindek inebe pire mene inamingmingengge logolik ineabu hilingiti logogun mondok elo'lego. A'nogo logogin halok he, inamingmingengge andi nen, neisena ekhe yi fano, nendawi. Nen, ekhe andi weak, nabit, iluk ikhi logolik he, endawi mene andi emberek lombokhogo logolik he, ekhe abit mene andi, aberalit fikhi logogun o. Andi hangge, hit he, Allah amingmingengge logolik, uang amingmingengge logogun elo'lego,” iluk yagaisasikhe.#Mat. 6:24
Komorinafikhe wene
(Mat. 11:12-13, 5:31-32; Mrk. 10:11-12)
14A'nogo yagaisasikhemo re, it ap Farisi mene omanogo uang mondok inendawinggen hundik welagaukwasi'mo andi nen he, Yesus nen wene a'nogo ugunem inesanggo holhukwasik he, inane asegen wokhikhi logolik endo yatukwa. 15A'nogo isukwama re, at Yesus nen it yagaisikhi logolik he: ”An higit hilingiti lagi, iluk afuni ineilhanem hinobabut higit mene hangge hilingiti lagep. Meneat he, Allah nen hinendawinggen mondok elu o. Yi mene ti mene it afuni nen fano iluk esinet fisagarek mene andi re, at Allah mondok abiro.”
16”At Yohanes ima pelaginafi lagaikhe mene a'nogo oan wagi'lek werek kwelek, wene Allah nen komotninafikhe mene a'nogo inom, it Allah ane yagaisikhi lagaukwa wene a'nogo inom, wene andiat esin welagaikhe. Mene re, at Yohanes wagaikhe andi huli nen he, fano wene Allah awe a'ma fisikherek wene a'nogo yagaisilik nugunem, afuni mondogaren wene wanuogeluk inomamerogo sebelik-sebelik kwi weri'lagwi andi.#Mat. 11:12-13 17A'nogo kwi weri'lagwi mene re, pogot inom, kweang inom, legasigin meneat he, wene Allah nen komotninafikhe mene andi wurep endebat ekhe legasigin mondok lego.”#Mat. 5:18
18”Ap sa nen agwe waganek mene lologo herakfisaluk he, hobuk he hunogoat mene ekhe wanhe halok he, pailagat hilingisigin o. Nen, ap sa nen, he agun nen lologo hebisagain mene wanhe halok he, pailagat wanigin o,” iluk yagaisasikhe.#Mat. 5:32; 1Kor. 7:10-11
Ap kain enggi werek mene inom, Lazarus enggi lek mene inomen hilingitukwa wene
19A'nogo yagaisasikhesik he, hobuk at Yesus nen wene ekhe mel yagaisasikhe: ”Ap ekhe kain angge mondok hokhorogo logolik he, asu onggo hokho fano mene nek laberaluk, yi mene ti mene fano mene anggele'ma heakhogo logolik, hundik-handik endawimo agaiyekhogo nek welagaikhe. 20Meneat he, ap ekhe enggi lek mene enu Lazarus, ebene oumo mondok hokhorogo welagaikhe mene, ap kain enggi werek mene a'nogo awi kweba andoma fei waga lagaukwa. 21Fei wagunem wengik logolik, endawimo nen he, ap kain mene a'nogo amburu nunggunem enggen pilelogo o hulumo pugunem andogorogo nalabut ninghogo ninggi logoile e, iluk anggikhi logolik were'ma, mene we'luk he, oumo ebene omanogo ameli nen melanget higik ninggi lagaikhe. 22A'nogo ninggi logolik were'ma, at Lazarus enggi lek mene a'nogo wa'lagaikhe. Wa'lagaikhemo re, it malaikat pogoroba Allah nen yonggo pelakfisa wagarek mene omanogo ekhe wagaukwasik, ebe waluk he, ap Abraham era'lu fei lagaukwa. Fei lagaukwama nen he, hobuk ap kain enggi werek mene a'nogo wa'lagaikheat. Wa'lagaikhemo re, kweangma salhukwa. 23Nen, ebe re, wa'la'luk lagaikhare'ma andoma lagaikhesik mondok weagat logolik he, elokhe hebekhogo liakhasikhe re, Lazarus Abraham era'lu were'ma eilenggen liagisasikhe. 24Eilenggen liagisasikhesik, ane hokhorogo mel yagatikhe: Abraham neisena e! An endu aik hokhoma yoma heinet hokho wati lagi yoma hendawi nean o. Lazarus nen enggi tum ima pelakfembigen, i magaisogo re, nameliba sakho uageluk, fei wesuageluk yagasin o, iluk yagatikhemo, 25at Abraham en he, mel yagatikhe: Namlogo e. Hat heluk logolik he, fano mene nek ninggik, wanhik, ugu kwelek, Lazarus yi nek he, weagat welagaikhe mene a'nogo hendawimo ebesin! Nen, yogondak he, at Lazarus yi yoma wagasik endawimo fano agasik werek kwelegat he, hat enek he, heinet hokhorogo warikhi lagen andi. 26Nen, ekhe re, afuni nit were'ma yoma nen hat were'ma andoma hoba wagik, nen, hit andoma nen nit ninoba wagik, inogo iluk tulem andoma pile uan mene hulirogo fesikhemo werego, iluk isikhe. 27-28A'nogo yagatikhemo, at ap kain enggi werek mene a'nogo nen he, mel yagatikhe: Halok he, neisena e! An naiba andoma noe nagot inebe 5 nen werek andi re, heinet watare'ma yoma wesinogo nen he, at Lazarus ari yonggo yagaisa loageluk yagaheti lagi o, neisena, iluk yagatikhemo re, 29aren he, mel yagatikhe: It andi Musa wene andi inom, ap Allah ane yagaisikhi lagaukwa mene omanogo inane andi inom, fisogo weregaro. Halok he, wene andiat holhi logouwago, iluk yagatikhemo, 30ap a'nogo nen he, mel yagatikhe: A'nogo egen meneat he, ap ekhe wa'la'luk lagaikhare'ma nen eluk a'luk isa lamo nek he, inobabut hebelasugun o, neisena e, iluk yagatikhemo, 31at Abraham en he, mel yagatikhe: It hoe hagot andoma Musa wene inom, it ap Allah ane yagaisikhi lagaukwa mene inane andi inom, inesanggo holhi'lek halok he, ap ekhe wa'la'luk lagaikharek oba nen eluk a'luk yagaisa lamo, it andi inendawimo nen he, eberogoat anggaluk inesanggo holugun elo'lek aro, iluk yagatikhe,” iluk Yesus nen yagaisasikhe.
Pašlaik izvēlēts:
LUKAS 16: inohap
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties