KEJADIAN 14
14
Abram en Lot telhikhe wene
1Andem sambul, ap raja ekhe welagaukwa, ekhe re, enu Amrafel aiba Babylonia mene, ekhe re, Ariokh aiba Elasar mene, ekhe re, Kedorlaomer aiba Elam mene, ekhe re, Tideal aiba Goyim mene, ap raja inebe enggaminogo andem welagaukwa. 2Nen, it inaselei mene ap raja ekhe inebe 5 nen inom weim yafi lagaukwa. Ap kaindek inebe 5 andi, ekhe re, Bera aiba Sodom mene, ekhe re, Birsya aiba Gomora mene, ekhe re Syinab aiba Adma mene, ekhe re, Syemeber aiba Zeboim mene, ekhe re, ap kain enupogot aiba o Bela igik, Zoar igik, agarek mene inom, inom weim yafi lagaukwa. 3It ap kaindek inebe 5 nen andi inendawinggen misigat logolik, inagoromi tentara o Sidim tonggwe yogondak enu i Laut ambut lagarek lek yenggelek mondok welagare'ma, iluk agarek oba andoma andogotukwa. 4Andogotukwa andi re, at ap kain Kedorlaomer en ferinarek werek kwelek, huli 12 tahun hilinglagaikhe. Hilinglagaikhesi'mo nen, 13 tahun oba nen folim hibirogo at kain Kedorlaomer ebe wasuogeluk isukwa andi. 5A'nogo wasuogeluk isukwa meneat he, tahun ekhe 14 oba re, at kain Kedorlaomer inom fanorogo lambul fesukwasik inagoromi tentara mene inom waga logolik he, afuni inunggulenu Refaim mene, o Asyerot-Karnaim andoma mabenetfisigik, afuni inunggulenu Zuzim mene o Ham andoma mabenetfisigik, afuni inunggulenu Emim mene, o Syawe-Kiryataim andoma mabenetfisigik, 6afuni inunggulenu Hori mene o tom Elom-Oba andoma mabenetfisigik, isukwasik inebe muginarek o leimo esanggoma yatmaat enu El-Paran andoma fisa wagaukwa. 7A'nogo mugisogo fisa wagaukwasik, inambotkwe o En-Mispat yogondak enu Kades agarek oba andoma lagaukwa. Laga logolik he, afuni Amalek mene inanggweang mene mondogat sebelik-sebelik kwi laga logolik, afuni Amori mene o Hazezon-Tamar welagaukwa mene mondok mabenet fisasukwaat.
8A'nogo muginarek lagunem, it kaindek o Sodom mene inom, Gomora mene inom, Adma mene inom, Zeboim mene inom, Bela mene inom, inagoromi tentara hokhorogo o Sidim tonggwe andoma esa hokhorogo inaloak halogo nen inom weim yafukwa. 9A'nogo it ap kaindek inebe 5 inagoromi inomen it ap kaindek inebe 4 o Elam mene inom, Koyim mene inom, Babylonia mene inom, Elasar mene inom, inom weim yafukwa. 10O tonggwe weim yafukwaba andoma, aspal mene abi weagengge yenggelek welagaikhe. Were'ma, it ap kaindek o Sodom, Gomora mene weim heise wilibugun ha'ma re, it inebe aspal mene abi weagengge yenggele'ma andoma pile pisukwa. A'nogo pugu kwelek it ap kaindek inebe henagan ekhe nek he, elok heise wulifukwasik o tom oba andoma wagaukwa. 11A'nogo hilingitukwama, it ap kaindek inebe enggaminogo inomame agaukwa mene nen, hugul kwikhi logolik yi mene ti mene afuni o Sodom, Gomora mene nenggarek mene inom, fisogo welagaikharek mene inom mondok felelenghogo helaluk lagaukwa. 12At Lot Abram agot amlogo a'nogo o Sodom were'ma andi nen he, it inaselei mene omanogo nen at ebe hele warogo waluk laga logolik, angge yi mene ti mene inom, helaluk lagaukwa.
13A'nogo hilingitukwama, at ap ekhe weim heise wagaikhe mene nen wene hilinglagaikhe mene andi Abram Ibrani mene a'nogo, ebe e Allah agayo ap enu Mamre unggulenu Amori mene anggweangma Allah fogerati logogun oba andoma were'ma, pilingisogo yagasi wagaikhe. At Mamre ebe inom, agaila'lak Eskol, Aner emberek inom, andi Abram agaila'lak inom fano mene. 14Ap wene yagasi wagaikhe a'nogo nen he, ”Abram, hagot amlogo Lot a'nogo aben hele warogo waluk lagaikha o,” iluk yagatikhemo esanggo holhikhesik he, at agoromi o tenda salogo welagaukwa mene omanogo andogerinafikhe. Andogerinafunem, ap weim yafu inelu mene re, inebe 318 hilinglagaikhemo re, it ap kaindek inebe enggaminogo a'nogo muginarek huli o kota Dan lagaukwa. 15O andoma nen Abram agoromi a'nogo esa inamunek logalfigik fisasikhe. A'nogo fisasikhesik he, o hubanggo o lathi logolik inebe inoarik-inoarik muginarek laga lagaukwasik huli o kota Damsyik en abel elikwe o enu Hoba andoma fisa lagaukwa. 16A'nogo fisa lagaukwasik, at Lot ebe inom, angge yi mene ti mene inom, ap inom hemi inomat, inambotkwe telogo woginarek wagaukwa.
Melkisedek en Abram fanot fesikhe wene
17At Abram en kain Kedorlaomer inom, agaila'lak kaindek ekhe at inom fano mene inom, mabenetfisaluk ambotkwe wagaikhe. Wagunem at ap kain Sodom mene Abram elokhoma o Syawe tongge enu ekhe Raja Awi tongge, iluk agarek oba andoma lagaikhe. 18Andoma ap enu Melkisedek ebe, it afuni o Salem mene inoe kain enupogot logolik, Allah Mondok Lego mene eisewerek welagaikhe mene nen sumburu roti mene inom, i anggur enggen amusu inom, wogetikhe.#Ibr. 7:1-10 19A'nogo wogetikhesik mel yagatikhe:
”Allah Mondok Lego mene logolik,
pogot inom, kweang inom,
elalhikhe mene a'nogo nen hat Abram fanothafi logouwago.
20Allah Mondok Lego mene
a'nogo nen haselei mene
henggiba fikhemo mabenet fisaluk wagen o,” iluk yagatikhe.
A'nogo yagatikhemo, at Abram en he, yi mene ti mene hugulengge kwikhi logolik helasukwa mene ambotkwe telogo waluk wagaikhe mene omanogo ebe lombok enggi wenakhigik, 10 asi lagunem, 9 nen at fakfikhi logolik, 10 mene re andogorogo at Melkisedek wogetikhe. 21A'nogo hilingitikhemo, at ap kain enupogot Sodom mene nen Abram mel yagatikhe: ”Yi mene ti mene hugulengge wanha mene telogo waluk wagen mene andi, helikhi logolik he, afuni an mene inebe nek he, wo'nom o,” iluk yagatikhe. 22A'nogo yagatikhemo, at Abram en he, mel yagatikhe: ”Neisena Allah Enupogot esin mene logolik, pogot kweang elalhikhe mene andi oak, iluk hombuk palogo igiri'mo. 23An nen hat hannge yi mene ti mene wanhi logolik, yosi he a, hele ineisok agut yelik mene he a, ekhe wanigin mondok lego. A'nogo wanigin lek andi nen, haren he, an nen Abram enggi werek hilingfigi, iluk yaganesigin mondok legaro. 24Yi mene ti mene an nonggwarek mene faget, ekhe wanigin nabiro. We, an asu hak he, an nagoromi nen arat nengga andi o. A'nogo meneat he, ap an ninom hundik mene Aner inom, Eskol inom, Mamre inom, it mene halok it inonggwaregat heloago,” iluk yagatikhe.
Pašlaik izvēlēts:
KEJADIAN 14: inohap
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties