मत्ती 9
9
येसुए उखँ उकुइ सिउलाई ओसगराँव
(मर्कूस २:१-१२; लूका ५:१७-२६)
1हाःत ज़ येसु उसिसरास दोङ्गाल पसिद ङ़ादाङाव यालिज़्याव कफर्नहुमल ज़ बाकेर। 2नल तोबो उखँ उकुइ सिउलाई झेलोङ्गाल झाःद येसुए ल्योक रैकेर। येसुए नोराए यायुँ उहुबो रँःद नो उखँ उकुइ सिउलाई, “अ कान्छा, नयुँ होलाँ जैके, नपाप क्याल्सिके,” है दोक्यो। 3नो है ओदोव सास्त्रीराए थैद या याल, “आव मिँए काराव ब्याँ इताव परमेस्वरए उमिन ओबले·ज़्याव?” है लिकेर। 4येसुए नोराए यायुँलाव पाँ सैंद, “जे काराव जेयुँल आव ङापाँ माचाव जेथ·रैज़्याव? 5नो मिँलाई ‘नपाप क्याल्सिके’ है दान्या सैं ‘सोद बान्के’ है दान्या काताकाव सजालो उलिज़्याव? 6अब ङा मिँ मिन्सिद हुवए आव मानुवात पाप क्याल्न्या ङाकुइत उलिज़्याव सैं ओमालिज़्याव, चिऊचिके,” है दाद नो उखँ उकुइ सिउलाई, “नँ सोद नझेलोङ्गार घुर्द नझ़िमदा बान्के,” है ओदोव प़ाइँना ज़, 7नो उखँ उकुइ सिउ थर च्याँःसिद ओझेलोङ्गार घुर्द उझ़िमदा बाके। 8नो रँःज़्याव माहोल्याराए निताव य़ेनर रँःद छे·द, “परमेस्वरए मिँरालाई ब इताव अचम्बलाव सक्तीर ओराएज़्याव ओल्यो,” लिद परमेस्वरए उमिन सघ्योःदिकेर।
येसुए मत्तीलाई उसिस ओजैव
(मर्कूस २:१३-१७; लूका ५:२७-३२)
9येसु ननी ओबाज़्याक तोबो मत्ती यादोज़्यावलाई सिर्मा स्यो·न्या अद्दाक च़ुसिद उलिज़्याव रँःद नोलाई, “ङास हुन्के,” है ओदोव प़ाइँना ज़ नो च्याँःसिद येसुए उछींत बाके।
10येसु उसिसरास होए उझ़िमक बाद ज़्यान्याए जूँनी च़ुसिकेर। नो बेलाक ओलस सिप ज़्युज़्यावर सिर्मा स्यो·ज़्यावर स़ोनो पापी है यारादोज़्यावर बनै कुधु ज़ यालिज़्याव। 11फरिसीराए निताव रँःद येसुए उसिसरालाई, “जेगुर्बाए कै जैद निताव सिर्मा स्यो·ज़्यावर स़ोनो पापीरास सिप उज़्युज़्याव?” है यारादोकेर।
12येसुए नो यापाँ थैद, “याजोरो माहुज़्यावरालाई सगराँन्या मिँ माचाहिए, याजोरो हुज़्यावरालाई वाज़ चाहिज़्या। 13हिताव ज़ ङा मनी ‘गे धर्मी’ है लिज़्यावराए जूँनी ङाहुव माःक, ‘गे पापीर ज़’ है लिज़्यावराए जूँनी ङाहुव ची। आव धर्मसास्त्रलाव पाँए ओअर्थ ब सैंच्यो, ‘पाथा पल्द चरैःज़्यावरास माःक, यादया ल्योरास ङायुँ होलाँ ताज़्या।’ ”#होसे ६:६
उपासिन्या
(मर्कूस २:१८-२२; लूका ५:३३-३९)
14हो बेलाक ज़ ऱील सछैंज़्याव यूहन्नाए उसिसर येसुए ल्योक हुद, “गे स़ोनो फरिसीर गेउपासिज़्या, नँ नसिसर काराव यामाउपासिज़्याव?” है यादोक ते, 15येसुए नोरालाई, “जन्तीर ब्याहोल्यास यालेवा पै सोगोल यालिज़्याव रो? खाली जो छ्यामकिन ब्याहोल्यालाई छुतैर, हो छ्यामकिन वाज़ उपासिन्या लेर,” है दाद, 16फरी घर्ती झाःद याएक्यो, “सुए ज़ ओरे छिबो क्वालाई साःरो क्वाए मातालिउ, ओतालिकिन नो साःरोए पुराँदोलाई ओल्योदा स़ेल्द झन ज़ चीज़्याव। 17स़ोनो, साःरो दाखमद्य पुराँदो प़िर्गुलल सुए ज़ माझाःर। म़ानी उस॰ए प़िर्गुललाई सुफुद दाखमद्य ब भोन्या ले, प़िर्गुल ब खेर ज़ बान्या ले। है जैद साःरो दाखमद्य साःरो प़िर्गुलल झाःकिन वाज़ ऩेथो ज़ खेर बान्या मालिनी।”
याइरसए ओज़ा स़ोनो झी भोन्या ओबेथा ल्यो मेंमा
(मर्कूस ५:२१-४३; लूका ८:४०-५६)
18येसुए नो पाँर ओरासथैज़्याक ज़ धर्मसास्त्र झ़िमलाव याघेप्पा तोबो हुद येसुए उखँत फुलुप्सिद, “मेंमा ङाज़ा भर्ज़ा ज़ सिद ले। नँ हुद नोए ओक्याँत नकुइ नैद नएकिन नो सैंसिन्या ले,” है ओदोक ते, 19येसु ननी च्याँःसिद उसिसरास नोस बाकेर।
20येमत याबाज़्याक तोबो बाह्र बर्स भरी ओक्याँतिन झी भोन्या बेथाए क्योःद ओनैज़्याव मेंमा येसुए उछींनी हुद ओक्वाए उतुपात छाप्दिक्यो। 21नो मेंमाए उयुँल उयुँल ‘येसुए ओक्वा वाज़ छापो ङादैकिन आव बेथानी गराँन्या ङाले’ है लिद ओखामिज़्याव। 22येसु उछींदा फर्किद नोलाई रँःद, “अ माँज़ा, नयुँ होलाँ जैके, ङालाई नयुँ नसुहुबोनी ज़ नगराँके,” है ओदोव प़ाइँना ज़ नो मेंमा गराँके।
23हाःत ज़ येसु उसिसरास नो धर्मसास्त्र झ़िमलाव याघेप्पाए उझ़िमक याकेस्क नो सिउए उजूँनी सहन यातप्ज़्याव, चिर्लनी बिर्ल याघर्ज़्याव रँःद, 24येसुए नोरालाई, “लाँःदा बाचिके, ल़ुज़ा मासिए, अइज़ ङ़ल्द ले,” है यादोक्यो। येसुए ओपाँ थैद हसैकेर। 25येसुए नोरालाई लाँःदा पुलुसो परींद ओल झ़िमल पसिद नो सिउ ल़ुज़ालाई उकुइनी ओक्योःव प़ाइँना थर च्याँःसिके। 26निताव अचम्बलाव पाँ नो खन्द भरिदा ज़ थास्नाके।
येसुए निमी मारैंःवनिलाई रँःधुन्या उनिजैव
27येसु ननी पुलुस्द ओबाज़्याक ऩेब्लो निमी मारैंःवनी उछीं उछीं बाद, “अ दाऊदए ओथोलाव, गिनलाई नयुँ ओनाक,” लिद बनै चोइस क़िकिनी। 28येसु झ़िमल उपसिउत नो निमी मारैंःवनी ब ओल्योक ज़ हुकिनी। येसुए नोनिलाई, “ङालाई ‘नसगराँसिन्धुया ज़’ लिद जिनयुँ माहुप्ज़्या?” है उनिदोक ते, “गिनयुँ हुप्ज़्या, प्रभु,” है दोकिनी। 29हाःत ज़ येसुए नोनिलाई निमीत छाप्द्याद, “जिनयुँ उहुबो मिताव ज़ ओताक,” है उनिदोव प़ाइँना, 30रँःधुन्या ताकिनी। येसुए नोनिलाई फरी, “आव जिनक्याँताव ङादोव य़ेन सुए ज़ तासैंरक,” है दाद निअर्थैक्यो। 31नोनी झन ननी बाद येसुए ओदोव भरी प़ाइँङ ज़ है यारादोनाकिनी।
येसुए तोबो लातालाई पाँधुन्या ओजैव
32नोनी निबाव छींनी फरी माचाव पुरूसए क्योःद ओनैज़्याव तोबो लातालाई येसुए ल्योक रैकेर। 33येसुए नो माचाव पुरूस पले·द ओयो प़ाइँना ज़ नो लाता पाँधुन्या ताके। नो य़ेनर रँःद नक लिज़्याव माहोल्याराए, “इताव य़ेनर ते इस्राएलीराए गेपोल खर्क ज़ गेमारँःए!” लिद अचम्ब ताकेर। 34फरिसी भरिए ते, “आवए माचाव पुरूसराए याघेप्पाए उमिननी माचाव पुरूसर यापले·ज़्याव,” है लिकेर।
मिँरालाई रँःद येसुए उयुँ ओनाव
35येसु सहर सहर, नाखार नाखार यादुप्सिज़्याव धर्मसास्त्र झ़िम झ़िमक बाद परमेस्वरए ओराज्यालाव चाव था ब ओरासथैज़्याव, भाँती भाँतिलाव रोगनी याजोरो हुवरालाई मनी ओरासगराँज़्याव। 36नो ओल्योदा हुज़्याव माहोल्यारालाई यागावला माल्यो यार्च्या सिद थलिउ बेधा स्यासोरालाई रँःद, येसुए उयुँ नाद,#गन्ती २७:१७; १ राज २२:१७; २ इति १८:१६; इज ३४:५ 37उसिसरालाई है यादोक्यो, “तामर चिकार यामींःनाव मिताव, परमेस्वरए ओराज्याल हुन्यार कुधु ज़ ताद लेर। खाली नोरालाई रैन्या बाहोर्यार ते छ्या ज़ ताकेर। 38है जैद नोरालाई रैन्या मिँर ओरापरींवक लिद परमेस्वरलाई पोंखारिच्यो।”
Pašlaik izvēlēts:
मत्ती 9: NKham
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2015, Wycliffe Bible Translators, Inc. All rights reserved.