मत्ती 19
19
1येसुए आव पाँर ओरासथैवत गालीलनी पुलुस्द यर्दन भै होफताव यहूदिया खन्दल बाके। 2नल ब मिँर बनै माहोल्या ओल्योक याहुज़्याव। नो हुवरानी याजोरो हुवरालाई यासगराँक्यो।
ज्यालाई माऱास्न्या
(मर्कूस १०:२-१२)
3फरिसीराए येसुलाई जाँचिन्याए जूँनी ओल्योक हुद, “जुनी तादी ब ज्यालाई ऱासो दैसिए सैं मादैसिए?” है यादोक ते, 4येसुए, “भाःङ स्रिस्तील परमेस्वरए मिँ ओजैक खेपा स़ोनो मेंमानी निजैक्यो लिन्या प़रिद जेमाले?#उत १:२७; ५:२ 5है जैद ज़ खेपाए ओबाबु ओआमालाई ऱास्द ओज्यास सिप ताद, नोनी तक्याँ ज़ ताज़्यानी।#उत २:२४ 6हाःकिन नोनी ऩेब्लो माःक, तक्याँल गनिसिज़्यानी। है जैद जोनिलाई परमेस्वरए जोरैद निनैव, होनिलाई मिँराए ताराभाःरक,” है ओरादोक ते, 7नोराए फरी, “हिताव ताकिन कै जैद मोसाए ओकानुनल ऱास्न्या कागत तोबो सर्किन ऱासो दैसिए लिन्या सर्सिउ उलिज़्याव?” है यादोक ते,#ब्य २४:१-४ 8येसुए, “जेदिउदी ल्योर जेतावए ज़ मोसाए निताव कानुन ओरायो, म़ानी ङ़ादाकिन ते हिताव ओमाल्यो। 9है जैद ङा जेलाई है ङादाचिज़्या, जोए ओज्या ओरेए ओसतत उलिज़्यावत ब नो ओज्यालाई ऱास्द छुतलाई ओरैकिन नोए जारी य़ेन ज़ दोक्यो। [फरी जोए नो ऱास्सिउ मेंमालाई रैज़्याव, होए मनी जारी य़ेन ज़ दोक्यो,”] है यादोक्यो।
10हाःत ज़ उसिसराए, “निताव ज्यालाई ऱास्क पाप गेदोव उथ॰रिकिन बुरू ज्या मादान्या पाथ लिज़्या,” है यादोक ते, 11येसुए, “बिनु ज्या, बिनु रे प़ाइँ ते मालिधुर। परमेस्वरए जोलाई बिनु ज्या, बिनु रे लिधुन्या जैद नैव हो वाज़ लिधुइ। 12ख्वार जर्मननी ज़ सिङारू ताज़्यार, ख्वार फरी मिँराए सिङारू याराजैवए ज्या मादोर, ख्वार फरी या याखुसीनी ज़ स्वर्गताव राज्यालाव य़ेन दान्याए जूँनी ज्या मादोर। खाली निताव य़ेन ते जोए सहिधुज़्याव, होए वाज़ ओदोवक।”
येसुए ल्योक हुज़्याव ल़ुज़ार
(मर्कूस १०:१३-१६; लूका १८:१५-१७)
13नकिन नलाव मिँराए ज़िम्ज़ा याज़ारालाई ‘येसुए उकुइ नैद असिक घरायोक’ लिद ओल्योक यारारैकेर। नो रैज़्यावरालाई उसिसराए सिङार्द यारावैंकेर। 14येसुए निताव रँःद उसिसरालाई, “नो ज़िम्ज़ा ल़ुज़ारालाई तारावैंच्यो, ङाल्योदा हुव याराएचिके। स्वर्गताव राज्या नितावराए जूँनी ज़ लिज़्या,” है दाद, 15नो ल़ुज़ाराए याक्याँत उकुइ नैद असिक याद येसु ननी पुलुस्द बाके।
अजम्बरी जुनी खिम्ज़्याव धनी
(मर्कूस १०:१७-३१; लूका १८:१८-३०)
16येसुए ल्योक तोबो धापाज़ाकाव मिँ हुद, “अ गुर्बा, ङा अजम्बरी जुनी दैन्याए जूँनी चाव य़ेन किताव दान्या?” है ओदोक ते, 17येसुए, “ङालाई काराव ‘किताव चाव उलिज़्याव’ है नदाँज़्याव? चाव तोबोका तोबो परमेस्वर वाज़ लिज़्या। नँ अजम्बरी जुनील बान्या युँ नदोकिन नो धर्मसास्त्रलाव सर्सिउ दान्या मादान्या य़ेन दाव ताके,” है ओदोक ते, 18“प्रभु, नो भरिनी ङा काताकाव दान्या?” है ओदोक ते, येसुए, “मिँ मासैःन्या, अर्काए ओज्याए ल्योदा माबान्या, माकुन्या, धुत गोहाई मायान्या,#प्रस २०:१३-१६; ब्य ५:१७-२० 19बाबु आमाए ओमान नैद्यान्या, स़ोनो नक्याँलाई किताव नसमारिज़्या, छुतलाई ब हिताव ज़ समारिन्या,” है दोक्यो।#प्रस २०:१२; ब्य ५:१६; लेबी १९:१८ 20नोए नो पाँर थैद, “आव भरी ते दाव ज़ ङानैज़्या, फरी मायो·व काताकाव उलिज़्याव?” है ओदोक ते, 21येसुए “नँ साचो सयो·न्या ताकिन नँस लिज़्याव भरी यो·द काता ज़ माल्योरालाई भाःद याएकेदा, नँ स्वर्गताव धन दैन्या नले। नो य़ेन भरी दाद नँ ङाछींत हुन्के,” है ओदोक ते, 22नो धापाज़ाकावए नो पाँ थैद उयुँर स्यासे सतेद ओल्द बाके। नोए ओधन सम्पती बनै कुधु ज़ ओल्योए माऱास्धुक्यो।
23नो ओबावत येसुए उसिसरालाई, “ङा जेलाई साचो है ङादाचिज़्या, धनी मिँ स्वर्गताव राज्याल पसिन्या बनै धो ताज़्या। 24फरी ब ङा जेलाई है ङादाचिज़्या, गपए उकुँल ऊँत उछिरिज़्यावकिन धनी मिँ परमेस्वरए ओराज्याल पसिन्या झन धो ताज़्या,” है यादोक्यो। 25उसिसर आव पाँत अचम्ब ताद, “इताव ताकिन ते सुए ची अजम्बरी जुनी ओदैधुरिज़्याव?” है यादोक ते, 26येसुए, “मिँर यानी सु ज़ माबाँचिधुर, खाली परमेस्वरनी मातान्या काता ज़ माले,” है यादोक्यो।
27हाःत ज़ पत्रुसए, “गे ते प़ाइँ ज़ ख्यानैद नछींत हुद गेले, गे काता दैन्या?” है ओदोक ते, 28येसुए, “ङा जेलाई साचो है ङादाचिज़्या, आव जुक त़ोसिद प़ाइँ साःरो ओतावत ङा मिँ मिन्सिउ बनै ज़गै मगैव ङाराज्या ङाचलैहुवत जे ङाछींत हुद लिज़्यावराए बाह्र थर इस्राएलीराए याङ़ैतावर ताद याय़ेन फाल्द्यान्या जेले। 29आव बेलाक जोए ङाजूँनी ओएँःर उझ़िमर, ओदाज्यु भाइर, ओनाना बैंनीर, ओबाबु ओआमार, ओज़ार ऱास्द याख्यानैज़्याव, होए आव उजिउत ज़ सय दोबोर ब दैन्या ले, अजम्बरी जुनी ब दैन्या ले। 30खाली ख्वा ख्वा ङ़ातावर छींत तारिज़्यार, छींतावर ङ़ात तारिज़्यार।”#19:30 छुत बुझिन्या — ख्वा ख्वा यामिन थासोर ज़िम्ज़ा थ॰रिन्या लेर, ज़िम्ज़ार घ्योःव थ॰रिन्या लेर।
Pašlaik izvēlēts:
मत्ती 19: NKham
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2015, Wycliffe Bible Translators, Inc. All rights reserved.