MATEO 11
11
Juaṉ ni rchôbnihs no meññ-pshahl me lee
(Lc. 7:18-35)
1Bylux ra Jesúz meññ ni nac tzipychop xmeññ me xnahc ctzoo, za me zrieñ guiedzy de lo ṟegioṉ-wé, zigluu me meññ no zigyuno me lee xtiidz Dioz.
2Per Juaṉ ni rchôbnihs, nyagü me lidzyguiib, bieññ me ni gatzoo Crist. Were pshahl me chohp xmeññ me 3zignabdiidz yâme lee, ra yâme lee:
―¿Ulihbu lii ni nac diidz guiaad ni ne Dioz cshahl me lee la, o cuiaaz noꞌ zrieñ?
4Were ra Jesúz leeyâme:
―Lâ tza, no lâ gu diidz lo Juaṉ gyre ni gawieꞌ laꞌd no ni gayieññ laꞌd. 5Lâ ga leeme meññ-ngaḻ ba rwieꞌ, meññ-ndang ba rzeꞌ, meññ-gayudz lady riaḻ de xguîlguihdz, meññ-nguat ba rieññ, mînguty rbahñ, no meññ-pobr ba gayieññ xtiidz Dioz. 6No dxu ñahc beeiy meññ ni nehx riatrxan de ni rlíladzy naa.
7Lóni zia meññ-pshahl Juaṉ lee, guzlo Jesúz gaya me meññ de ni rtzoo Juaṉ:
―Hor-güya laꞌd lo yu-bihdzy ru ziaad Juaṉ, ¿bia bigüieꞌ laꞌd? ¿To ni zidguiahc beeiy gobgui ni rchaḻ mbeꞌ lee la? 8O bâḻ yac, ¿bia bigüieꞌ laꞌd? ¿To mpyquie ni ruhtz lar-rsahc la? Zoꞌn yacu, porni nann laꞌd, meññ-ruhtz lar-rsahc, li ṟeiy‑e riuꞌ yâme. 9Were ¿bia bigüieꞌ laꞌd? ¿To profet la? Ze we leeu, no gapyaꞌ laꞌd, mazy que to profet‑e mpyquie ni bigüieꞌ laꞌd lee. 10De Juaṉ‑e ganii lo Guehtzy ru queꞌ xtiidz Dioz, ni ne:
Naa cshaalaꞌ to dmeññaꞌ ni sunier loꞌy, tziyno me dtiidzaꞌ lo meññ;
leeme guistziaawy me ru tedyiꞌ scâsy ractziaawy to ñahz.#11:10 Mal. 3:1
11Gapyaꞌ laꞌd ni uli, lahd gyre meññ, ndruhty nehx niygahl beeiy Juaṉ ni rchôbnihs; per ni ma lwiñ ru rtzoo Dioz mdad, wé ma qysahc que Juaṉ.
12’Glohdy dze-biahd Juaṉ ni pchôbnihs meññ no glo hôrrieꞌ, nu meññ ni garuu yahc contr ni ne Dioz ni nu gybaa, no gayo yâme xnahc gyniꞌdy yâme ni rtzoo me mdad. 13Antzy ni guiaad Juaṉ, günii profet yahc no xleiy Moiséz ni nu yahc par gac. 14No bâḻ ne laꞌd gylíladzy laꞌd nirieꞌ la, Juaṉ, leeme we profet-Elíaz ni nac diidz guiaad. 15Bâḻ racladzy laꞌd gann laꞌd bia ganin la, lâ yquee ihqy laꞌd dtiidzaꞌ.
16’¿Dxu nsacaꞌ meññ-nu ni naꞌ? Rluu yâme beeiy mbiux ni rbia rguichiñ lóguiaꞌ no rquee yâme riedz zrieñ zâ-mbiux yâme, ne yâme: 17“Pcuadz noꞌ bdzia, per di nyeꞌ laꞌd; biiḻy noꞌ cancioṉ-trixd, per di ñuun laꞌd.” 18Porni biahd Juaṉ, nehx rahgü me sca ni rahgü laꞌd, ni nehx roo me sca ni roo laꞌd, no ne laꞌd bêndzab we nu leeme. 19No zegahc rwieꞌ laꞌd naa, Mpyquie-Pshahl Dioz Lee, rahguaꞌ no roon. Wé ba rnii laꞌd, ne laꞌd to meññ-la no meññ-roo nistzuuñ‑e naa. No ne laꞌd zegahc, naa we xmígü nyug meññ-rcuquix mpuezd no zrieñ meññ-nehx rlaby ni ne leiy. Ze ne laꞌd, per xguîlnann Dioz rdee diidz por ni mos ni rtzoo xmeññ me.
Guiedzy ru nu meññ-di rzobdiidz
(Lc. 10:13-15)
20Luxu guzlo ganii Jesúz mod-gashacladzy me no meññ-nu yahc guiedzy ru ba güya me no ru ma xtahl milagür ptzoo me, porni nehx psaan yâme ni nahcsy ni nac yâme, ra me:
21―¡Baazy dzii de meññ-nu yahc guiedzy-Corasíṉ, no meññ-nu yahc guiedzy-Betsaida! Bâḻ meññ-Tiro no meññ-Sidóṉ nwieꞌ yâme gyre milagür ni ptzon leññ xguiedzy laꞌd la, ba xtze naꞌ psaan yâme ni nahcsy ni nac yâme, ñuhtz yâme lar-nahtz no ndziib yâme dé ihqy yâme. 22Per gapyaꞌ laꞌd, dze-gac xguîlnadz Dioz ma xroꞌ guîlné we ni gabiahz laꞌd que ni gabiahz meññ-Tiro no meññ-Sidóṉ. 23No laꞌd, meññ-nu guiedzy-Capernaum, ne laꞌd guiahs laꞌd, gybiꞌ laꞌd gybaa, per to ru nadz‑e tza laꞌd. Porni bâḻ gyre milagür yahc ni guhc ru nu laꞌd ñahcu guiedzy-Sodom la, ñuꞌ guiedzy-wé we xtâ ni naꞌ. 24Per gapyaꞌ laꞌd, dze-gac xguîlnadz Dioz, ma xroꞌ guîlné we ni gabiahz laꞌd que meññ-güyuꞌ guiedzy-Sodom.
Lâ te ru nun lehdy guisladzy laꞌd
(Lc. 10:21-22)
25No byluxu ne Jesúz:
―Rguguian lii, Dad, lii ni rtzoo mdad gybaa no guiedzylie, porni gülungaꞌdzyiꞌ gyre nirieꞌ lehdy di ñieññ meññ-nann no meññ-nniꞌ ihqy leeu, no bluuyu meññ-zidguiahc beeiy mbiux. 26Ze ptzooyu, Dad, porni ze biuꞌladzyiꞌ gacu.
27’Gyre ni nu, ba bdee dTadaꞌ leeu lo dñan. Ndruhty nehx rzaclo naa mod-rzaclo dTadaꞌ naa, no ndruhty nehx rzaclo dTadaꞌ mod-rzacloꞌn leeme; no dxu racdadzyaꞌ gzaclo dTadaꞌ, zacnon lee. 28Lâ te ru nun, gyre laꞌd ni ba bydzahg de gyre ni rtzoo laꞌd no de ni nuu laꞌd beeiy to yu-naꞌy, no naa gdedyaꞌ ru guisladzy laꞌd. 29Lâ gzobdiidz naa, scâsy mod-yuhz ni riyno to yug rtzoo maꞌ gyre ni ne xbixwaan maꞌ, no zegahc lâ gyzeedy ni rlun; porni rtzon mdad no guîlndoo no nehx rniguian; no tzu leññ xguîlmbahñ laꞌd mos. 30Porni ni ren ctzohd zidguiahcu beeiy to yug ni nehx ngann par tziynot, no nsehzy ni zidguiahc beeiy yuu ni rdedyaꞌ dmeññaꞌ.
Pašlaik izvēlēts:
MATEO 11: zpg
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2019, Wycliffe Bible Translators, Inc. All rights reserved.