Piligu 7
7
Kokpɛɣu din di dunia
1Di saha maa ka Yawɛ daa yɛli Nuhu, “A min’ a malibu zaa kpɛm’ ŋariŋ maa ni, dama n nyaya ka nyini n-nyɛ wuntizɔra n sani ʒiɛmani ŋɔ ni. 2Zaŋm’ biŋkɔb’ shɛb’ bɛn be kasi la zaɣ’ lɔri ayopɔin mini zaɣ’ nyama ayopɔin, ka zaŋ biŋkɔb’ shɛb’ bɛn bi be kasi la zaɣ’ lɔɣu mini zaɣ’ nyaŋ, 3ka zaŋ noonsi gba zaɣ’ lɔri ayopɔin mini zaɣ’ nyama ayopɔin niŋ ŋariŋ maa ni n-gbib’ ba ka bɛ birili ku kpihim dunia ŋɔ ni. 4Dama zaŋ chaŋ daba ayopɔin dali, n ni chɛ ka saa lu dunia ni na m-mi wuntaŋ’ ni mini yuŋ zaa biɛɣ’ pihinahi n-ku n ni nam binshɛɣukam niŋ tiŋgban’ ni ŋɔ zaa.” 5Ka Nuhu daa niŋ Yawɛ ni yɛl’ o ni o niŋ shɛm maa zaa.
6Nuhu yuma daa nyɛla yuun’ kɔbisiyɔbu saha shɛli kom ni daa di dunia maa. 7#Mat 24.38-39; Luk 17.27 Ka Nuhu min’ o paɣa ni o bidibisi ni bɛ paɣiba daa kpe ŋariŋ maa ni ni bɛ yi kom maa dibu ni. 8Ka biŋkɔb’ shɛb’ bɛn be kasi mini biŋkɔb’ shɛb’ bɛn bi be kasi ni noonsi ni binnɛma bɛn gbamdi tiŋ’ zaa bɛba ayiyi, zaɣ’ lɔɣu mini zaɣ’ nyaŋ 9daa kpe ŋariŋ maa ni m-pahi Nuhu zuɣu kaman Naawuni ni daa pun yɛli Nuhu shɛm. 10Daba ayopɔin nyaaŋa ka kokpɛɣu daa kpe m-pali dunia ŋɔ.
11 #
2 Pita 3.6
Nuhu yuun’ kɔbisiyɔbu puuni gol’ so ŋun pah’ ayi biɛɣ’ pinaayopɔin dali, ka tiŋgban’ ni kɔbil’ nin’ kara zaa daa puhigi, ka zuɣusaa sagbana kɔsoya gba yooi. 12Ka saa daa luna m-mi wuntaŋ’ ni mini yuŋ biɛɣ’ pihinahi. 13Dindali maa ka Nuhu min’ o paɣa ni o bidibisi bɛn yuya daa booni Shɛm mini Ham ni Jafɛt ni o bidibisi maa paɣiba ata la daa kpe ŋariŋ maa ni. 14Bɛ mini mɔɣu ni biŋkɔbiri balibu kam ni yiŋ’ biŋkɔbiri balibu kam ni biŋgbamda balibu kam ni noonsi balibu kam ni binyiɣira zaa n-daa kpe di ni. 15Ka binnɛma balibu kam zaa bɛba ayiyi bɛn mali nyɛvili daa kpe ŋariŋ maa ni m-pahi Nuhu zuɣu. 16Ka binnɛma balibu kam zaa zaɣ’ lɔɣu mini zaɣ’ nyaŋ daa kpe ŋariŋ maa ni kaman Yawɛ ni daa pun yɛli Nuhu shɛm; ka Naawuni daa yo Nuhu niŋ ŋariŋ maa ni. 17Ka kokpɛɣu din galisi pam maa daa kul kpɛri pahiri hal ti paai biɛɣu pihinahi, ka kom maa kul zoori pahira, ka kpuɣi ŋariŋ maa zuɣusaa, ka di du ka chɛ tiŋgbani. 18Ka kom maa daa kpe m-pali dunia, ka ŋariŋ maa du m-pa di zuɣu. 19Ka kom maa daa kpe pam pali dunia hal ka zoya din du pam zaa ti lim. 20Ka kom maa daa zooi lim zoya maa, ka di ziliŋ daa nyɛ mita ayopɔin zoya maa zuɣu. 21Ka binnɛɔŋ balibu kam bɛn be dunia ŋɔ ni, noonsi mini yiŋ’ biŋkɔbiri ni mɔɣu ni biŋkɔbiri ni binnɛma balibu kam zaa bɛn be dunia ni zaŋ tabili ninsalinim’ zaa 22ni binshɛɣukam din mali nyɛvili be dunia ŋɔ ni zaa daa kpi. 23O daa kpihim binnɛma balibu kam bɛn be dunia ŋɔ ni birili; ninsalinim’ zaŋ tabili biŋkɔbiri ni biŋgbamda ni noonsi zaa bɛn be dunia ŋɔ ni. Kulla Nuhu mini ninvuɣ’ shɛb’ bɛn daa be o sani ŋariŋ maa ni kɔŋko n-daa naɣ’ tiligi. 24Ka kom maa daa kul be lala dunia ŋɔ ni hal ti paai biɛɣ’ kɔbiga ni pihinu.
Pašlaik izvēlēts:
Piligu 7: DBwDB
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Dagbani Bible with Deuterocanonical Books © Bible Society of Ghana, 2011.