ಮತ್ತಾಯ 12
12
ಸಬ್ಬತ್ ದಿವಸತ್‍ರ ವಿಷಯ
(ಮಾರ್ಕ 2.23–28; ಲೂಕ 6.1–5)
1ಚೆನ್ನ ದಿನ ಆನ ಪಿಂಞ, ಗೋದಿ ನಟ್ಟ ಬೇಲ್‌ಲ್, ಯೇಸು ನಡ್‌ದಂಡ್ ಪೋಯಂಡ್ ಇಪ್ಪಕಾಪಕ, ಅಂವೊಂಡ ಶಿಷ್ಯಂಗಕ್ ಕೆಲ ಪಯಿಚತ್. ಅಯಿಂಗ ಗೋದಿರ ಮುಡಿನ ಕೊಜ್ಜಿತ್ ತಿಂಬಕ್ ಸುರ್ ಮಾಡ್‍ಚಿ. ಅಂದ್ ಸಬ್ಬತ್#12.1 ಸಬ್ಬತ್ ಎಣ್ಣ್‌ಚೇಂಗಿ ಸಂಖ್ಯೆ ಏಳ್ಂದ್ ಅರ್ಥ. ಆ ದಿನತ್‌ಲ್ ಯೆಹೂದ್ಯಂಗ ಆರಾಮ್ ಮಾಡ್‌ವ ಪಿಂಞ ದೇವನ ತುದಿಪ. ನ್ಯಾಯಪ್ರಮಾಣತ್‍ರ ಪ್ರಕಾರ ದಾರೂ ಒರ್ ಕೆಲಸವು ಮಾಡ್‌ವಕ್ಕಾಗ ದಿವಸವಾಯಿತ್ಂಜತ್. 2ಚೆನ್ನ ಫರಿಸಾಯಂಗ ಇದ್‍ನ ನೋಟಿತ್, ಸಬ್ಬತ್ ದಿವಸತ್‍ಲ್ ಮಾಡ್‌ವಕ್ಕಾಗತ ಕೆಲಸತ್‍ನ ನೀಡ ಶಿಷ್ಯಂಗ ಮಾಡಿಯಂಡುಂಡಲ್ಲಾಂದ್ ಕ್‍ೕಟತ್.
3ಅದ್ಂಗ್ ಅಂವೊ: ದಾವೀದ ಪಿಂಞ ಅಂವೊಂಡ ಕೂಡೆ ಇಂಜಯಿಂಗ ಕೆಲ ಪಯಿಪಕ ಮಾಡ್‌ನಾನ ನಿಂಗ ಓದಿತ್‌ಲ್ಲೆಯಾ? 4ಅಂವೊ ದೇವಡ ಮನೆಲ್ ನುಗ್ಗಿತ್, ಯಾಜಕಂಗ ಅಲ್ಲತೆ ಬೋರೆ ದಾರೂ ತಿಂಬಕ್ಕಾಗಾಂದ್ ಇಂಜ ಒಟ್ಟಿನ ಅಂವೊ ಪಿಂಞ ಅಂವೊಂಡ ಕೂಡೆ ಇಂಜಯಿಂಗ ತಿಂದತಲ್ಲ. 5ಅದಲ್ಲತೆ, ಸಬ್ಬತ್ ದಿನತ್‌ಲ್ ಯಾಜಕಂಗ ದೇವಾಲಯತ್‍ಲ್ ಆರಾಮ್‍ಲ್ ಇಲ್ಲತೆ, ಕೆಲಸ ಮಾಡ್‍ಚೇಂಗಿಯು, ಅಯಿಂಗ ತಪ್ಪ್ ಮಾಡತನೆಕೆ ಉಂಡ್‍ೕಂದ್ ನಿಂಗ ನ್ಯಾಯಪ್ರಮಾಣತ್‍ಲ್ ಓದಿತ್‌ಲ್ಲೆಯಾ? 6ಆಚೇಂಗಿ, ಈ ದೇವಾಲಯಕಿಂಜ ಬಲ್ಯಂವೊ ಇಲ್ಲಿ ಉಂಡ್‍ೕಂದ್ ನಾನ್ ನಿಂಗಕ್ ಎಣ್ಣುವೀಂದ್ ಯೇಸು ಎಣ್ಣ್‌ಚಿ. 7ನಿಂಗ ದೇವಕ್ ಕೊಡ್‍ಪ ಬಲೀಲ್ ನಾಕ್ ಕುಶಿ ಇಲ್ಲೆ. ಆಚೇಂಗಿ ನಿಂಗ ಜನಡಮೇಲೆ ಕೂಟ್‌ವ ಕರುಣೇಲ್ ನಾಕ್ ದುಂಬ ಕುಶಿ ಉಂಡ್‍ೕಂದ್ ಎಣ್ಣುವ ದೇವಡ ವಾಕ್ಯಕ್‍ತ್‍ರ ಅರ್ಥ ಎಂತ್‍ೕಂದ್ #12.7 ಹೋಶೇಯ 6.6 ನಿಂಗಕ್ ಗೊತ್ತ್‌ಂಜತೇಂಗಿ ನಿಂಗ ಈ ಪಾಪತ್‍ರ ಜನಳ ಕುತ್ತ ಪರಿಯುಲೆ. 8ಮನುಷ್ಯಕುಮಾರ ಸಬ್ಬತ್ ದಿವಸಕೂ ಒಡೆಯನಾಯಿತುಂಡ್‍ೕಂದ್ ಎಣ್ಣ್‌ಚಿ.
ಯೇಸು ಸಬ್ಬತ್ ದಿವಸತ್‍ಲ್ ವಾಸಿ ಮಾಡ್‍ವದ್
(ಮಾರ್ಕ 3.1–6; ಲೂಕ 6.6–11)
9ಯೇಸು ಅಲ್ಲಿಂಜ ಅಯಿಂಗಡ ಸಬಾಮಂದಿರಕ್ ಪೋಚಿ. 10ಅಲ್ಲಿ ಕೈ ಊನವಾನ ಒಬ್ಬ ಇಂಜತ್. ಯೇಸುರ ಮೇಲೆ ತಪ್ಪ್ ಕಂಡ್‌ಪುಡಿಪಕಾಯಿತ್: ಸಬ್ಬತ್ ದಿನತ್‌ಲ್ ವಾಸಿ ಮಾಡ್‍ವದ್ ನ್ಯಾಯಪ್ರಮಾಣಕ್ ವಿರೋದವಾಂದ್ ಫರಿಸಾಯಂಗ ಯೇಸುನ ಕ್‍ೕಟತ್.
11ಅದ್ಂಗ್ ಅಂವೊ: ನಿಂಗಡಲ್ಲಿ ಒಬ್ಬಂಗ್ ಒರ್ ಕೊರಿ ಇಪ್ಪಕ, ಅದ್ ಸಬ್ಬತ್ ದಿನತ್‌ಲ್ ಕುಂಡ್‌ಕ್ ಬುದ್ದ್‌ಪೋಚೇಂಗಿ, ಅದ್‍ನ ಅಲ್ಲಿಂಜ ಕೊಡಿಕ್ ನೇತುವಿರಲ್ಲ? 12ಮನುಷ್ಯ, ಪ್ರಾಣಿಕಿಂಜ ಎಚ್ಚಕೋ ಬಲ್ಯಂವೊ! ಆನಗುಂಡ್ ನಂಗಡ ನ್ಯಾಯಪ್ರಮಾಣತ್‍ರ ಪ್ರಕಾರ ಸಬ್ಬತ್ ದಿನತ್‌ಲ್ ಜನಕ್ ನಲ್ಲದ್ ಮಾಡ್‍ವದ್ ನ್ಯಾಯವಾಯಿತುಂಡ್‍ೕಂದ್ ಎಣ್ಣ್‌ಚಿ.
13ಪಿಂಞ ಆ ಮನುಷ್ಯನ ನೋಟಿತ್: ನೀಡ ಕೈಯಿನ ನೀಟ್‍ೕಂದ್ ಎಣ್ಣ್‌ಚಿ. ಅಂವೊ ಕೈ ನೀಟ್‌ಚಿ, ಅಂವೊಂಡ ಕೈಯಿನ ಪೂರ್ತಿ ವಾಸಿಯಾಚಿ; ಅಕ್ಕ ಆ ಕೈ ಬೋರೆ ಕೈಯಿರನೆಕೆ ಆಚಿ. 14ಅಕ್ಕ ಫರಿಸಾಯಂಗ ಕೂಡಿತ್ ಪೊರಮೆ ಪೋಯಿತ್ ಯೇಸುನ ಎನ್ನನೆ ಕೊಲ್ಲಂಡೂಂದ್ ತಕ್ಕ್‌ಪರಿವಕ್ ಸುರ್ ಮಾಡ್‍ಚಿ.
ದೇವ ಗೊತ್ತ್ ಮಾಡ್‍ನ ಸೇವಕ
15ಯೇಸುಕ್ ಇದ್ ಗೊತ್ತಾನಗುಂಡ್ ಅಲ್ಲಿಂಜ ದೂರ ಪೋಚಿ. ಅಂವೊಂಡ ಬಯ್ಯಕ್ ದುಂಬ ಜನ ಪೋಯಂಡಿಂಜತ್, ಅಯಿಂಗಡ ಕೂಡೆ ಇಂಜ ಎಲ್ಲಾ ರೋಗಿಯಳ ಅಂವೊ ವಾಸಿ ಮಾಡ್‍ಚಿ. 16ನಾಡ ವಿಷಯತ್‍ನ ದಾರ್‌ಕು ಎಣ್ಣತೀಂದ್ ಅಯಿಂಗಕ್ ಆಜ್ಞೆ ಕೊಡ್‍ತತ್. 17ಯೆಶಾಯ ಪ್ರವಾದಿ ಯೇಸುರ ವಿಷಯತ್ ಎಣ್ಣ್‌ನದ್ ಪೂರ್ತಿ ಆಪನೆಕೆ ಇನ್ನನೆ ನಡ್ಂದತ್. ಅಂವೊ ಎಣ್ಣ್‌ನದ್ ಎಂತ ಎಣ್ಣ್‌ಚೇಂಗಿ:
18ಇದಾ, ಇಂವೊ ನಾನ್ ಗೊತ್ತ್ ಮಾಡ್‍ನ ನಾಡ ಸೇವಕ,
ನಾಡ ಆತ್ಮತ್‌ನ ಕುಶಿಪಡ್‌ತ್‌ವ ನಾಡ ಕೊದಿರಂವೊ;
ನಾಡ ಆತ್ಮತ್‌ನ ಅಂವೊಂಡ ಮೇಲೆ ಅಳ್‌ಪಕ್ ಮಾಡ್‌ವಿ,
ಅಂವೊ ನಾಡ ನ್ಯಾಯತ್‍ನ ಎಲ್ಲಾ ಜನಕ್ ಅರಿಚಿಡುವ.
19ಅಂವೊ ತಕ್‌ರಾರ್ ಮಾಡ್‌ವದು ಇಲ್ಲೆ, ಕೂತ್ ಕೊಡ್‌ಪದೂ ಇಲ್ಲೆ,
ಬೀದಿಲ್ ಅಂವೊಂಡ ಸದ್ದ್ ದಾರ್‌ಕು ಕ್‍ೕಪದು ಇಲ್ಲೆ.
20ಅಂವೊ ನ್ಯಾಯಕ್ ಜಯ ಕ್‌ಟ್ಟ್‌ವಕತ್ತನೆ,
ಜಜ್ಜಿ ಪೋನ ಓಡೆರ ದಂಟ್‍ನ ಅಂವೊ ಮುರಿಪ್‌ಲೆ,
ಆರಿ ಪೋಪ ಬೊಳ್‍ಚತ್‍ರ ತಿರಿನ ಅಂವೊ ಕೆಡ್‌ತುವದಿಲ್ಲೆ.
21ಎಲ್ಲಾ ಜನಳು ಅಂವೊಂಡ ಪೆದತ್‍ಲ್ ನಿರಿಕ್ಷೇಲ್ ಇಪ್ಪ ಎಣ್ಣ್‌ವದೇ.#12.21 ಯೆಶಾಯ 42.1–4
ಯೇಸು ಪಿಂಞ ಬೆಲ್ಜೆಬೂಲ್
(ಮಾರ್ಕ 3.20–30; ಲೂಕ 11.14–23)
22ಆ ಸಮಯತ್‍ಲ್, ಕೂಳಿ ಪುಡ್‌ಚಗುಂಡ್ ಕಣ್ಣ್ ಕಾಂಗತ, ತಕ್ಕ್ ಪರಿಯುವಕಯ್ಯತ ಇಂಜ ಒರ್ ಮನುಷ್ಯನ ಯೇಸುರ ಪಕ್ಕ ಕಾಕಿಯಂಡ್ ಬಾತ್; ಯೇಸು ಅಂವೊಂಡ ಕಣ್ಣ್ ಕಾಂಬನೆಕೆ, ತಕ್ಕ್ ಪರಿಯುವನೆಕೆ ಅಂವೊನ ವಾಸಿ ಮಾಡ್‍ಚಿ. 23ಅಲ್ಲಿಯತ್‍ರ ಜನಕೆಲ್ಲ ಆಶ್ಚರ್ಯ ಆಯಿತ್: ಇಂವೊ ನೇರಾಯಿತ್ ದಾವೀದಂಡ ಮೋಂವೊನಾಯಿತಿಕ್ಕುವಾಂದ್ ತಕ್ಕ್ ಪರ್ಂದತ್.
24ಫರಿಸಾಯಂಗ ಇದ್‍ನ ಕ್‍ೕಪಕ: ಇಂವೊ, ಕೂಳಿಯಡ ಮುಕ್ಯಸ್ತ ಬೆಲ್ಜೆಬೂಲನಗುಂಡ್ ಅಲ್ಲತೆ ಬೋರೆ ಏದ್ ಶಕ್ತಿಯಿಂಜಲು ಕೂಳಿನ ಬುಡ್‍ತಿಯಂಡಿಲ್ಲೇಂದ್ ಎಣ್ಣ್‌ಚಿ.
25ಫರಿಸಾಯಂಗ ಎಂತ ಗೇನ ಮಾಡಿಯಂಡುಂಡ್‍ೕಂದ್ ಗೊತ್ತಾನಗುಂಡ್, ಯೇಸು ಇನ್ನನೆ ಎಣ್ಣ್‌ಚಿ: ಒರ್ ರಾಜ್ಯತ್‍ರ ಜನ ಅಯಿಂಗಯಿಂಗಳೇ ಜಗಳ ಮಾಡಿಯಂಡ್ ಬೋರೆ ಬೋರೆ ಆಯಿತ್ಂಜತೇಂಗಿ, ಆ ರಾಜ್ಯ ಪಾಳಾಯಿ ಪೋಪ. ಒರ್ ಪಟ್ಟಣ ಅಥವ ಒರ್ ಮನೆಲ್ ಉಳ್ಳ ಜನ ಅಯಿಂಗಯಿಂಗಳೇ ಜಗಳ ಮಾಡಿಯಂಡಿಂಜತೇಂಗಿ, ಆ ಪಟ್ಟಣವು, ಮನೆಯು ಒರೇ ಗುಂಪಾಯಿತ್ ನಿಪ್ಪದಿಲ್ಲೆ. 26ಅನ್ನನೆ ಸೈತಾನೇ ಸೈತಾನನ ದೌತ್‌ಚೇಂಗಿ, ಅಂವೊ ಅಂವೊಂಗ್ ವಿರೋದವಾಯಿತ್ ಬಾಗ ಮಾಡ್‌ವನೆಕೆ; ಅನ್ನನೆ ಮಾಡ್‍ಚೇಂಗಿ ಅಂವೊಂಡ ರಾಜ್ಯ ಎನ್ನನೆ ಕಡೇಕತ್ತನೆ ನಿಪ್ಪ? 27ನಾನ್ ಕೂಳಿಯಳ ಬೆಲ್ಜೆಬೂಲ್‌ರ ಶಕ್ತಿಯಿಂಜ ಬುಡ್‌ತ್‌ಚೇಂಗಿ, ನಿಂಗಡ ಮಕ್ಕ ದಾಡ ಶಕ್ತಿಯಿಂಜ ಕೂಳಿಯಳ ಬುಡ್‌ತಿಯಂಡುಂಡ್? ಆನಗುಂಡ್, ಅಯಿಂಗಳೇ ನಿಂಗಕ್ ತೀರ್ಪ್ ತಪ್ಪ. 28ನಾನ್ ದೇವಡ ಆತ್ಮತ್‍ರಗುಂಡ್ ಕೂಳಿಯಳ ಬುಡ್‌ತಿಯಂಡುಳ್ಳಗುಂಡ್, ದೇವಡ ರಾಜ್ಯ ನಿಂಗಡ ಪಕ್ಕ ಇಕ್ಕಲೆ ಬಂದಿತುಂಡ್. 29ಇಂಞು ನಾನ್ ಎಂತ ಎಣ್ಣಿಯಂಡುಳ್ಳ್‌ಂದ್ ಎಣ್ಣ್‌ಚೇಂಗಿ, ಒರ್ ಗಟ್ಟಿಮುಟ್ಟಾನ ಮನುಷ್ಯನ ಕೆಟ್ಟಿ ಇಡತೆ ಪೋಚೇಂಗಿ ಅಂವೊಂಡ ಮನೆನ ಒಡ್‌ಪಂಜಿ ಅಂವೊಂಡ ಮನೆರ ಒಳ್‍ಲ್ ಉಳ್ಳದ್‍ನ ಲೂಟಿ ಮಾಡ್‌ವಕಯ್ಯುವ? ಅಂವೊಂಡ ಕೈಕಾಲ್‌ನ ಕೆಟ್ಟಿತ್ ಇಟ್ಟಿತುಂಡೇಂಗಿ ಮಾತ್ರ ಅಂವೊಂಡ ಮನೆನ ಲೂಟಿ ಮಾಡ್‌ವಕಯ್ಯು.
30ನಾಡ ಕೂಡೆ ಇಲ್ಲತಂವೊ ನಾಕ್ ವಿರೋದಿಯಾಯಿತ್‌ಪ್ಪ. ನಾಡ ಕೂಡೆ ಬೊಳೆನ ಕೂಟತಂವೊ ನಾಡದ್‌ನ ಚದ್‍ರಿಚಿಡ್‌ವ. 31ಆನಗುಂಡ್, ನಾನ್ ನಿಂಗಕ್ ಎಣ್ಣ್‌ವಿ: ಮನುಷ್ಯ ಮಾಡ್‌ವ ಎಲ್ಲಾ ಪಾಪಕು, ದೂಷಣೆಕು ಮನ್ನಿಪ್ಪ್ ಉಂಡ್, ಆಚೇಂಗಿ ಪವಿತ್ರಾತ್ಮಕ್ ವಿರೋದವಾಯಿತ್ ಮಾಡ್‌ವ ದೂಷಣೆಕ್ ಮನ್ನಿಪ್ ಕ್‍ಟ್ಟುಲೆ. 32ಆನಗುಂಡ್, ಮನುಷ್ಯಕುಮಾರಂಗ್ ವಿರೋದವಾಯಿತ್ ತಕ್ಕ್ ಪರಿಯುವಂಗಕ್ ಮನ್ನಿಪ್ ಕ್‍ಟ್ಟ್‌ವ, ಆಚೇಂಗಿ ಪವಿತ್ರಾತ್ಮಂಗ್ ವಿರೋದವಾಯಿತ್ ತಕ್ಕ್ ಪರಿಯುವಂಗಕ್, ಈ ಲೋಕತ್‌ಲು ಪರಲೋಕತ್‌ಲು ಮನ್ನಿಪ್ ಕ್‍ಟ್ಟ್‌ಲೆ.
ಮರ ಪಿಂಞ ಪಣ್ಣ್
(ಲೂಕ 6.43–45)
33ನಲ್ಲ ಮರವಾಯಿತ್ಂಜತೇಂಗಿ ಅದ್ಂಡ ಪಣ್ಣ್ ನಲ್ಲದಾಯಿತ್‌ಪ್ಪ, ಮರ ಕೆಟ್ಟದಾಯಿತ್ಂಜತೇಂಗಿ ಅದ್ಂಡ ಪಣ್ಣ್ ಕೆಟ್ಟದಾಯಿತ್‌ಪ್ಪ; ಮರ ಎಂತದ್‍ೕಂದ್, ಅದ್ಂಡ ಪಣ್ಣ್‌ಯಿಂಜ ಗೊತ್ತಾಪ. 34ಬಳೆಮುರಿ ಪಾಂಬ್ ಜಾತಿಯಳೇ, ನಿಂಗ ಕೆಟ್ಟಯಿಂಗಳಾಯಿತ್‌ಪ್ಪಕ ನಲ್ಲ ವಿಷಯತ್‍ನ ಎನ್ನನೆ ಎಣ್ಣ್‌ವಿರ? ಎನ್ನಂಗೆಣ್ಣ್‌ಚೇಂಗಿ, ಹೃದಯತ್‍ಲ್ ಎಂತ ದುಂಬಿತುಂಡೋ, ಅದೇ ನಿಂಗಡ ಬಾಯಿಲ್ ಪರಿವಿರ. 35ಒರ್ ನಲ್ಲ ಮನುಷ್ಯ ತಾಂಡ ನಲ್ಲ ಹೃದಯತ್‍ಲ್ ಕೂಟಿ ಬೆಚ್ಚಿತುಳ್ಳ ಬಂಡಾರತ್‍ಂಜ, ನಲ್ಲ ವಿಷಯತ್‍ನ ಎಡ್‌ತ್‌ ಕಾಟ್‍ವ, ಕೆಟ್ಟ ಮನುಷ್ಯ ಅಂವೊಂಡ ಕೆಟ್ಟ ಹೃದಯತ್‍ಲ್ ಕೂಟಿ ಬೆಚ್ಚಿತುಳ್ಳ ಬಂಡಾರತ್‍ಂಜ ಕೆಟ್ಟದ್‍ನ ಪರಿವ. 36ಮನುಷ್ಯ ಪರಿಯುವ ಓರೋರ್ ಪ್ರಯೋಜನ ಇಲ್ಲತ ತಕ್ಕ್‌ಕೂ ದೇವ ತೀರ್ಪ್ ಮಾಡ್‌ವ ದಿವಸತ್‍ಲ್ ಲೆಕ್ಕ ಕೊಡ್‍ಕಂಡೂಂದ್ ನಾನ್ ನಿಂಗಕ್ ಎಣ್ಣ್‌ವಿ. 37ಎನ್ನಂಗೆಣ್ಣ್‌ಚೇಂಗಿ, ನೀಡ ತಕ್ಕ್‌ಯಿಂಜಲೇ ನೀನ್ ನೀತಿವಂತಂವೋಂದ್ ಅಥವ ತಪ್ಪ್ ಮಾಡ್‍ನಂವೋಂದ್ ತೀರ್ಪ್ ಮಾಡ್‌ವಾಂದ್ ಯೇಸು ಎಣ್ಣ್‌ಚಿ.
ಯೋನಂಡ ಗುರ್‌ತ್
(ಮಾರ್ಕ 8.11,12; ಲೂಕ 11.29–32)
38ಅಕ್ಕ, ನ್ಯಾಯಪ್ರಮಾಣ ಗೊತ್ತುಳ್ಳ ಉಪಾದ್ಯಂಗ ಪಿಂಞ ಚೆನ್ನ ಫರಿಸಾಯಂಗ ಅಂವೊನ ನೋಟಿತ್: ನೀನ್ ಮಾಡ್‌ವ ಗುರ್‌ತ್ ಕಾರ್ಯತ್‍ನ ನಂಗ ನೋಟಂಡೂಂದ್ ಎಣ್ಣ್‌ಚಿ.
39ಅದ್ಂಗ್ ಯೇಸು: ದೇವಡ ಮೇಲೆ ನಂಬಿಕೆ ಇಲ್ಲತ, ಕೆಟ್ಟ ಗುಣ ದುಂಬಿತುಳ್ಳ ಈ ಸಂತಾನಕಾರಂಗ ಒರ್ ಗುರ್‌ತ್ ಬೋಂಡೂಂದ್ ತ್‍ೕಡಿಯಂಡುಂಡ್; ಆಚೇಂಗಿ, ಯೋನ ಪ್ರವಾದಿರ ಗುರ್‌ತ್ ಅಲ್ಲತೆ ಬೋರೆ ಒರ್ ಗುರ್‌ತು ಅಯಿಂಗಕ್ ಕಾಟಿತಪ್ಪುಲೆ. 40ಯೋನ ಪ್ರವಾದಿ ಮೂಂದ್ ಬಯಿಟ್ ಮೂಂದ್ ಪೋಲ್ ಬಲ್ಯ ಮೀನ್‌ರ ಕೆಲತ್‌ಲ್ ಇಂಜನೆಕೆ, ಮನುಷ್ಯಕುಮಾರನು ಮೂಂದ್ ಬಯಿಟ್ ಮೂಂದ್ ಪೋಲ್ ಬೂಮಿರ ಅಡಿಲ್ ಇಪ್ಪ.#12.40 ಯೋನ 1.17 41ನ್ಯಾಯತೀರ್ಪ್ ದಿವಸತ್‍ಲ್ ನಿನೆವೆ ಪಟ್ಟಣತ್‍ರ ಜನ ಈ ಸಂತಾನಕಾರಡ ಕೂಡೆ ನಿಂದಿತ್ ಈಂಗಳ ಕುತ್ತ ಪರಿಯುವ. ಎನ್ನಂಗೆಣ್ಣ್‌ಚೇಂಗಿ, ಯೋನಂಡ ಬೋದನೆನ ಕ್‍ೕಟಿತ್ ನಿನವೆ ಪಟ್ಟಣತ್‍ರ ಜನ ದೇವಡ ಪಕ್ಕ ತಿರ್‍ಗ್‍ಚಿ. ಇಕ್ಕ, ಯೋನಕಿಂಜ ಬಲ್ಯಂವೊ ಇಲ್ಲಿ ಉಂಡ್ ಆಚೇಂಗಿ ನಿಂಗ ಅಂವೊಂಡ ಬೋದನೆನ ಕ್‍ೕಟಿತ್‌ಲ್ಲೆ. 42ತೆಕ್ಕ್ ದಿಕ್ಕ್‌ಂಜ ಬಂದ ಶೀಬ ರಾಜ್ಯತ್‍ರ ರಾಣಿ, ಸೊಲೊಮೋನ ರಾಜಂಡ ಜ್ಞಾನತ್‍ನ ಕ್‍ೕಪಕಾಯಿತ್ ಈ ಲೋಕತ್‍ರ ಕಡೇಯಿಂಜ ಪ್ರಯಾಣ ಮಾಡಿತ್ ಬಾತ್. ಇಕ್ಕ ಸೊಲೊಮೋನ ರಾಜಕಿಂಜ ಬಲ್ಯಂವೊ ಇಲ್ಲಿ ಉಂಡ್. ಆಚೇಂಗಿ ನಿಂಗ ಅಂವೊಂಡ ಬೋದನೆನ ಕ್‍ೕಟಿತ್ತ್‌ಲ್ಲೆ. ಆನಗುಂಡ್, ನ್ಯಾಯತೀರ್ಪ್ ದಿನತ್‌ಲ್ ಶೀಬ ರಾಜ್ಯತ್‍ರ ರಾಣಿ ಈ ಸಂತಾನಕಾರಡ ಕೂಡೆ ನಿಂದಿತ್ ಈಂಗಳ ಕುತ್ತ ಪರಿಯುವ.
ಕೂಳಿ ಪುನಃ ಬಪ್ಪದ್
(ಲೂಕ 11.24–26)
43ಒರ್ ಕೂಳಿ ಒರ್ ಮನುಷ್ಯನ ಬುಟ್ಟಿತ್ ಪೋಪಕ, ಆ ಕೂಳಿ ವಾಸ ಮಾಡ್‌ವಕಾಯಿತ್ ಮಣಬೂಮಿಲ್ ಜಾಗ ತ್‍ೕಡಿಯಂಡ್ ಪೋಪ. 44ಆಚೇಂಗಿ ಜಾಗ ಕ್‍ಟ್ಟತೆ ಪೋಪಕ, ಆ ಕೂಳಿ: ನಾನ್ ಬುಟ್ಟ್ ಬಂದ ಮನೆಕ್ ವಾಪಸ್ ಪೋಪೀಂದ್ ಎಣ್ಣಿತ್, ಆ ಮನೆಕ್ ಬಪ್ಪಕ, ಆ ಮನೆ ಕಾಲಿಯಾಯಿತ್, ಶುದ್ದವಾಯಿತ್ ಒಡ್‌ಕಿತ್, ಎಲ್ಲಾ ಅದ್ಂಡದ್ಂಡ ಜಾಗತ್‍ಲ್ ಜೋಡಿತ್ ಇಪ್ಪದ್‍ನ ಕಾಂಬಕ, 45ಅದ್ ಪೊರಮೆ ಪೋಪಂಜಿ ಅದ್‍ಕಿಂಜ ಮೋಸವಾಯಿತುಳ್ಳ ಇಂಞು ಏಳ್ ಕೂಳಿಯಳ ಕಾಕಿಯಂಡ್ ಬಪ್ಪ. ಅಯಿಂಗೆಲ್ಲಾರು ಆ ಮನೆಲ್ ಪೋಯಿತ್ ವಾಸ ಮಾಡ್‌ವ; ಅಕ್ಕ ಆ ಮನುಷ್ಯ ಮಿಂಞ ಇಂಜಾಂಗಿಂಜ ಪಾಳ್ ಸ್ತಿತಿಲ್ ಇಪ್ಪ; ಇನ್ನನೆ ಈ ಸಂತಾನಕಾರಂಗಕು ಆಪಾಂದ್ ಎಣ್ಣ್‌ಚಿ.
ಯೇಸುರ ಅವ್ವ ಪಿಂಞ ತಮ್ಮಣಂಗ
(ಮಾರ್ಕ 3.31–35; ಲೂಕ 8.19–21)
46ಜನಡ ಗುಂಪ್‌ಲ್ ಇನ್ನನೆ ಯೇಸು ತಕ್ಕ್ ಪರ್‌ದಂಡ್ ಇಪ್ಪಕ, ಅಂವೊಂಡ ಅವ್ವ ಪಿಂಞ ತಮ್ಮಣಂಗ ಬಾತ್. ಅಯಿಂಗ ಪೊರಮೆ ನಿಂದಂಡ್, ಅಂವೊಂಡ ಕೂಡೆ ತಕ್ಕ್ ಪರಿಯುವಕ್ ನೋಟಿಯಂಡ್ ಇಂಜತ್. 47ಅಕ್ಕ, ಒಬ್ಬ ಯೇಸುರ ಪಕ್ಕ ಪೋಯಿತ್: ನೀಡ ಅವ್ವ ಪಿಂಞ ತಮ್ಮಣಂಗ ನೀಡ ಕೂಡೆ ತಕ್ಕ್ ಪರಿಯುವಕಾಯಿತ್ ಪೊರಮೆ ನಿಂದಂಡುಂಡ್‍ೕಂದ್ ಎಣ್ಣ್‌ಚಿ.
48ಅಂವೊಂಡ ಪಕ್ಕ ಇನ್ನನೆ ಎಣ್ಣ್‌ನಂವೊಂಗ್ ಯೇಸು: ನಾಡ ಅವ್ವ ದಾರ್? ನಾಡ ಅಣ್ಣತಮ್ಮಣಂಗ ದಾರ್‍ೕಂದ್ ಕ್‍ೕಟತ್. 49ತಾಂಡ ಶಿಷ್ಯಂಗಡ ಪಕ್ಕ ಕೈ ಕಾಟ್‌ವಂಜಿ: ಈಂಗಳೇ ನಾಡ ಅವ್ವ, ನಾಡ ಅಣ್ಣತಮ್ಮಣಂಗ! 50ಪರಲೋಕತ್‍ಲ್ ಉಳ್ಳ ನಾಡ ಅಪ್ಪಂಡ ಚಿತ್ತತ್‍ನ ಮಾಡ್‍ವಯಿಂಗಳೇ ನಾಡ ಅಣ್ಣತಮ್ಮಣ, ಅಕ್ಕತಂಗೆಯ ಪಿಂಞ ಅವ್ವಳು ಆಯಿತುಂಡ್‍ೕಂದ್ ಎಣ್ಣ್‌ಚಿ.
Pašlaik izvēlēts:
ಮತ್ತಾಯ 12: ಕೊಡವ
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2017, New Life Literature (NLL)