Mutendeko 50
50
1Penepapo Yosefe wakawa panthazi pa ŵawiske ndipo wakalira chomene na kumufyofyontha. 2Sono Yosefe wakalangulira ŵateŵeti ŵakhe awo ŵakaŵa zing'anga kuti ŵaphakazge thupi la ŵawiske na minkhwara yakukanizga kuvunda. Ntheura ŵateŵeti ŵakhe ŵakaphakazga thupi la Yakhobe. 3Mlimo uwu ukaŵatorera mazuŵa 40 pakuti ndigho ghakukhumbikwa pakuphakazga thupi na minkhwara yakukanizga kuvunda. ŴaEguputo ŵakamulira Yakhobe mazuŵa 70.
4Para mazuŵa ghakutengerera ghakamara, Yosefe wakayowoya ku ŵa mu nyumba ya Faro wakati, “Usange ndasanga uchizi panthazi pinu nkhumuŵeyani mundiyowoyere kwa Faro mwakuti wapulike kuti, 5‘Para ŵadada ŵakaŵa pafupi kufwa ŵakandirapizga kuti nkhaŵasunge mu dindi ilo ŵakajinozgera mu charu cha Kanani. Ntheura nkhumuŵeyani mundizomerezge kuti ndirute nkhasunge ŵadada. Para ndakaŵasunga ndamkwizaso.’ ”#Mut 47.29-31
6Faro wakati, “Ruta, ukasunge ŵawuso nga ndi umo ŵakakurapizgira.”
7Ntheura Yosefe wakaruta kuya kasunga ŵawiske. Ŵateŵeti wose ŵa Faro, ŵakuruŵakuru ŵa mu nyumba yakhe pamoza na ŵakuruŵakuru wose ŵa mu charu cha Eguputo ŵakaruta pamoza nayo. 8Wakarutaso na mbumba yakhe yose ya Yosefe, na mbumba za ŵabali ŵakhe, ndiposo na ŵa mu nyumba ya wiske. Ku chigaŵa cha Gosheni kukakhara waka ŵana ŵawo pera pamoza na mberere na mbuzi ndiposo na ng'ombe. 9Ŵasilikari ŵakukwera pa magareta na pa mahachi nawo ŵakaruta. Ukaŵa wumba ukuru chomene.
10Ŵakati ŵafika pa luwugha lwa Atadi ulo luri ku sirya linyakhe la mronga wa Yorodani, ŵakawuska chitengero chikuru na cha chitima. Wakamulira wiske mazuŵa ghankhonde na ghaŵiri. 11Sono para ŵenecharu cha Kanani ŵakapulika chitengero pa luwugha lwa Atadi ŵakati, “Ichi nchitengero cha chitima chikuru ku ŵaEguputo.” Pa chifukwa ichi malo ghara ŵakaghachema Abelu Mizirayimu,#50.11 Abelu Mizirayimu: Zina ili likung'anamula kuti, “kulirira ŵaEguputo”. ghali ku sirya linyakhe la mronga wa Yorodani.
12Ntheura ŵana ŵa Yakhobe ŵakachita nga ndi umo wiskewo ŵakaŵalayizgira. 13Ŵana ŵakhe ŵakamuyeghera ku Kanani, na kumusunga mu mphanji ya mu munda wa Makipela. Mphanji iyi, Abrahamu wakagulira pamoza na munda kwa Efuroni muHiti, ku mafumiro gha dazi kwa Mamure, kuti ghaŵe chiharo chakhe chakusungapo ŵakufwa.#Mil 7.16 14Yosefe wakati wamusunga wiske, wakawerera ku Eguputo, pamoza na ŵana ŵanyakhe na wose awo ŵakaruta nayo kuya kasunga wiske.
Yosefe wakawuskamo wofi mu ŵana ŵanyakhe
15Para ŵana ŵanyakhe na Yosefe ŵakawona kuti wiskewo wafwa, wakati, “Kasi tizamkuchita uli usange Yosefe watitinkha ndipo usange wakukhumba kutiwezgera uheni uwo ise tikamuchitira?” 16Ntheura ŵakatuma mazgu kwa Yosefe ghakuti, “Ŵachali ŵandafwe ŵawiskemwe, ŵakayowoya mazgu ghakuti, 17‘Mukati kwa Yosefe: Nkhuŵeya ugowokere ŵana ŵanyakhe uheni wawo uwo ŵakakuchitira.’ Ndipo sono tikumuŵeyani mugowokere kwananga kwa ta ŵateŵeti ŵa Chiuta wa ŵawiskemwe.” Yosefe wakalira masozi para ŵakapulika mazgu agha.
18Sono ŵana ŵanyakhe ŵakiza panthazi pakhe na kumulambira wakati, “Tiza panthazi pinu nga mbateŵeti ŵinu.”
19Kweni Yosefe wakati kwa iwo, “Mungopanga! Kasi ine ndili mu malo gha Chiuta? 20Imwe mukaghanaghana kundichitira uheni, kweni Chiuta wakachizgora kuŵa uweme. Wakachichita mwakuti ŵanandi ŵasungilirike ŵamoyo, nga ndi umo ŵaliri muhanya uno. 21Sono mungopanga. Ine nditi ndimuleraninge imwe na ŵana ŵinu.” Ntheura ndimo Yosefe wakaŵapanikizgira na kuŵasanguruskira.
Nyifwa ya Yosefe
22Yosefe wakakhara ku Eguputo pamoza na ŵa mu mbumba ya wiske. Apo wakafwiranga wakakhara virimika 110. 23Wakawona ŵana ŵa Efurayimu ŵa muwiro wa chitatu. Ndiposo para ŵana ŵa Makiri, mwana wa Manase, wakababikiranga Yosefe wakaŵakhazika pa chipata chakhe. 24Sono Yosefe wakati ku ŵana ŵanyakhe, “Ndili pafupi kufwa, kweni Chiuta wizamkumupemphurani na kumufumyani mu charu ichi na kumutorerani ku charu icho wakarapa kupereka kwa Abrahamu, kwa Yisake, na kwa Yakhobe.” 25Pamanyuma Yosefe wakaŵaphalira ŵana ŵanyakhe kuti ŵarape, wakati, “Murape kuti para Chiuta wizamkumupemphurani, ndipo mwizakayeghanga viwangwa vyane kufuma kuno na kuwera navyo.”#Kuf 13.19; Yos 24.32; Heb 11.22 26Ntheura Yosefe wakafwa wali na virimika 110. Ŵakaphakazga thupi lakhe na minkhwara yakukanizga kuvunda, ndipo ŵakaliŵika mu bokosi ku Eguputo kwenekura.
Pašlaik izvēlēts:
Mutendeko 50: Tumbuka
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Bible Society of Malawi