Mutendeko 21
21
Kubabika kwa Yisake
1 Fumu yikamukumbuka Sara ndipo yikamuchitira ivyo yikapangana nayo. 2Ntheura Sara wakaŵa na nthumbo, ndipo wakamubabira Abrahamu mwana mwanarume mu uchekuru wakhe, pa nyengo yeneiyo Chiuta wakayizunura.#Heb 11.11 3Abrahamu wakamuthya mwana wakhe mweneuyo Sara wakamubabira zina lakhe Yisake. 4Abrahamu wakamukotora Yisake para wakaŵa na mazuŵa ghankhonde na ghatatu, nga ndi umo Chiuta wakamulangulira.#Mut 17.12; Mil 7.8 5Abrahamu wakaŵa wa virimika 100 para Yisake wakababikanga. 6Sono Sara wakati, “Chiuta wandikondweska na kundisekeska ine. Yose uyo wapulikenge ichi wati wasekerere nane.” 7Ndipo wakatiso, “Ndi njani wati wamuphalirenge Abrahamu kuti Sara wamkonkheska mwana? Kweni ndamubabira mwana mwanarume apo iyo ndi muchekuru.”
8Mwana yura wakakura, ndipo ŵakamurumura. Abrahamu wakanozgera chiphikiro chikuru pa zuŵa lakulumulira Yisake.
Hagara na Ishimaele ŵakuchimbizgika
9Zuŵa limoza Sara wakawona kuti Ishimaele, mwana mweneuyo Hagara muEguputo wakamubabira Abrahamu, wakusoŵera na Yisake mwana wakhe. 10Ntheura wakati kwa Abrahamu, “Umuchimbizge mwanakazi muzga uyu pamoza na mwana wakhe kuti mwana wa mwanakazi uyu wareke kwiza kahara chuma pamoza na Yisake mwana wane.”#Gal 4.29-30 11Chinthu ichi chikamukwenyerezga Abrahamu chifukwa cha Ishimaele mwana wakhe. 12Kweni Chiuta wakati kwa Abrahamu, “Ureke kukwenyerera mu mtima pa chifukwa cha msepuka, na pa chifukwa cha mwanakazi muzga wako. Vyose ivyo Sara wakukuphalira umupulikire, chifukwa ndi mwa Yisake umo mphapu yako yichemekerenge.#Rom 9.7; Heb 11.18 13Mwana wa mwanakazi muzga yura nayoso ndamkumuzgora kuŵa fuko, chifukwa iyo nayo ndi mphapu yako.”
14Ntheura Abrahamu wakawuka na mulenjelenje ndipo wakatora chakurya na maji mu thumba la chikumba na kumupa Hagara. Wakaviŵika pa chiŵegha chakhe pamoza na mwana ndipo wakamuphalira kuti warutenge. Hagara wakawukapo, ndipo wakayingayinga mu mapopa gha ku Beyeresheba. 15Para maji ghakamumalira mu chikumba, wakamuŵika mwana musi mu chivwati. 16Penepapo Hagara wakaruta na kukhara pasi pataliko na mwana, panji kwakuyana na mtunda wa mamita 100, chifukwa wakati, “Ndingawonanga mwana wane wakufwa ntheura chara.” Wakati wakhara penepara pafupi nayo, mwana wakalira chomene.#21.16 mwana wakalira chomene: Mazgu agha ghangang'anamulaso kuti “Hagara ndiyo wakalira”.
17Chiuta wakapulika kulira kwa msepuka ndipo mungelo wakamuchema Hagara kufumira kuchanya wakati, “Kasi ukusuzgikirachi Hagara? Reka kopa, pakuti Chiuta wapulika kulira kwa msepuka, penepara wangumugoneka. 18Wuka, munyamure mwana ndipo umukoreske na woko lako, chifukwa nditi ndimuzgore kuŵa fuko likuru.” 19Penepapo Chiuta wakajula maso gha Hagara, ndipo wakawona chisimi cha maji. Iyo wakaruta na kuzuzga maji mu thumba la chikumba, ndipo wakamupa msepuka kuti wamwe. 20Chiuta wakaŵa nayo msepuka ndipo iyo wakakura. Wakakharanga mu mapopa ndipo wakaŵa nkhocho yakufikapo. 21Wakakharanga mu mapopa gha Parani ndipo ŵanyina ŵakamutorera mwanakazi kufuma mu charu cha Eguputo.
Phangano pakati pa Abrahamu na Abimeleki
22Pa nyengo yeneyira Abimeleki na Fikolo mweneuyo wakaŵa murongozgi mukuru wa nkhondo yakhe ŵakamuphalira Abrahamu, ŵakati, “Chiuta wali nawe mu vyose ivyo ukuchita.#Mut 26.26 23Ntheura sono rapa kwa ine mu zina la Chiuta kuti uti undipusikenge chara, nanga nkhu ŵana ŵane na ku ŵazukuru ŵane. Kweni chita kwa ine kwakuyana na umo ine ndakuchitira iwe mu kugomezgeka, ndimo wize kachitire nane, ndiposo na charu icho ukukharamo nga ndi mulendo.”
24Ndipo Abrahamu wakati, “Nkhurapa.”
25Penepapo Abrahamu wakadandaula kwa Abimeleki chifukwa cha chisimi cha maji, icho ŵateŵeti ŵa Abimeleki ŵakamuphanga. 26Kweni Abimeleki wakati, “Nkhumanya chara uyo wachita chinthu ichi. Iwe kuti ulikundiphalirapo ine chara, ndipo ndindapulikepo na kale mpaka muhanya uno.” 27Ntheura Abrahamu wakatora mberere na mbuzi, ng'ombe na kumupa Abimeleki, ndipo ŵaŵiri aŵa ŵakachita phangano. 28Abrahamu wakapatulapo ŵana-mberere ŵanakazi ŵankhonde na ŵaŵiri kufuma mu mskambo. 29Abimeleki wakati kwa Abrahamu, “Kasi ukung'anamulachi pakupatulapo ŵana-mberere ŵanakazi aŵa ŵankhonde na ŵaŵiri?”
30Abrahamu wakati, “Ŵana-mberere ŵanakazi aŵa mupokerere kufuma kwa ine nga ndi chipanikizgo kuti ndine nkhajima chisimi ichi.” 31Ntheura malo ghara wakaghathya Beyeresheba,#21.31 Beyeresheba: Lizgu ili mu chiHebere likung'anamula kuti “visimi vinkhonde na viŵiri” panji “chisimi cha chirapo”. chifukwa penepara wose ŵaŵiri wuwo ŵakachita chirapo.
32Ŵakati ŵachita phangano ili ku Beyeresheba kura, Abimeleki na Fikolo murongozgi mukuru wa nkhondo yakhe, ŵakawerera ku charu cha ŵaFilisiti. 33Sono Abrahamu wakapanda khuni la kusoperako la mtaŵa pa malo gha Beyeresheba, ndipo penepara wakayisopa Fumu, Chiuta wa muyirayira. 34Abrahamu wakakhara nga ndi mulendo mu charu cha ŵaFilisiti mazuŵa ghanandi.
Pašlaik izvēlēts:
Mutendeko 21: Tumbuka
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Bible Society of Malawi