Luglaa 4
4
Keen ni Abɛl wia
1Denii Andama ni u haaŋ chɔɔ, u kpogli hia, di lul biibaal, di dau u sɔŋ Keen. Awia, a haaŋ ŋɔ, “Kɔraawiizi hiinimbuu n lul baal.” 2Uŋ kaa ba lulaa, biibaallɛ u lul, di dau u ge sɔŋ Abɛl.
Abɛl ɛɛ penɔɔni, Keen ge ɛɛ patti.
3Saŋa bɛl n wa helle, Keen kpa u pattikuna aŋhina, di wa tɛɛ Kɔraawiizi. 4Abɛl ge lau u peezi bɛl biilugli di kpu, di lizi u bɔnanaa di wa tɛɛ Kɔraawiizi. Abɛl sunzaa la faa par Kɔraawiizi, u lɛɛu, 5ka vɛɛ Keenwaa hor la. A guŋ jaa fuuh Keen baaŋ werge maa, u nyɛm.
6Denii Kɔraawiizi pɛɛzuu, “Bɛɛ n gillɛ i baaŋ na fuuh i nyɛm kennei?” 7Di i ra ɛɛ wia la n deŋlee, mìŋ́ Kɔraawiizi daŋ lɛɛi. Ka di i wa vɛɛwɔ waa, a du tau, dikuubɛɛwiai, wichɔgaa daŋ lawii, di chɔgii. A dɛkkɔɔ hiŋ kpeglaa.
8Keen n nuu gunla, a hɔl bɛl u ŋɔ u niwee Abɛl be, “Ya lii di bar yaa laŋgara.” Baŋ liwɛɛ la, u ga lau u niwee hiŋ kpu.#1Jɔɔ 3:12
9Uŋ ɛɛ gunla, Kɔraawiizi pɛɛzuu, “I niwee la du lee?”
U bir ŋɔ, “Maa zum. Minuu ra binnuuwaa?”
10Denii Kɔraawiizi ŋɔ, “Bɛɛ i ɛɛ kennei? A nuu! I niwee la chal chɔɔ hɛrii di wii ra duŋ. 11Awia, n seeibuu nua, dikuu hiŋ kpu i niwee, u chal zuu a hɛri wia, i ŋmɛnɛ maa wàá ka wer paruu. 12Haali di i hummɔ gunla maa, ka i kumpattaa wàá ka wer lɛɛ, í na diwee di di. Di haŋ chi filaŋkeŋ di ra la, i daŋ ɛɛ nɛkuŋ, di nyaa bol. I daŋ ɔɔ ra juuri. I volaa hiŋ wàá dɔɔ tɔna maa.”
13Keen n wa nuu guŋ, u sɛɛ Kɔraawiizi nua la, di ŋɔ, “N tɔɔrɔɔ la kannɔɔ werge di siili n ni. 14I duŋŋimbuu di lii i be, di bir duŋŋiŋ lii hɛri naa miŋ duwɛɛ naa biini di jaa, di birgiŋ nɛkuŋ, maa duuribɔr dɔɔwɛ, ka ɔɔ ra juuri. Nɛr la maa n nin naŋ, u daŋ kpuŋ.”
15Ka Kɔraawiizi ŋɔ u be, “Ba wàá kpui, dikuubɛɛwiai, nɛr la maa n niŋ ɛɛ guŋ, n daŋ tɛɛ a hiŋ i tɔɔrɔɔ naa dɔŋ buniidaanɛɛ.” Denii Kɔraawiizi dau Keen pɛl bɛl, ú ra bagli lugɔ nɛr maa gilɛɛ waa kpuu. 16Awia, Keen faa lii Kɔraawiizi be di ga du a Ɛdɛn kambol wiifurii bol bɛl banna yir Nɔd.
17Denii Keen ni u haaŋ du de, u wa kpogli hia di lul biibaal, ba dau u sɔŋ Ɛnɔk. Keen ma bolzeŋ bɛl, di kpa u biibaal hiŋ sɔŋ dau a bol. 18Ɛnɔk la ge biibaala faa Irad. Irad ge biibaal ɛɛ Mɛhujɛl. Mɛhujɛl la ge biibaal faa ɛɛ Mɛtusɛl. U ge biibaal faa ɛɛ Lamɛk.
19Lamɛk izi di kpa haana banɛɛ, ba sɔnaa faa Ada ni Zila. 20Ada la lul Jabal. Waabuu faa ɛɛ banla n na dɛɛzi sela naabaal, di ɔɔ du lɔa biine la. 21U niwee ge sɔnnɛ faa Jubal. U genii faa ɛɛ nɛra la n zum kem lɔi ani tiitorii huuih naabaal. 22Zila ge lul biibaal, ba ra yiruu Tubal Keen. U ge faa ɛɛ luuri, u niuhambiere faa Naama.
23A hɔl bɛl, Lamɛk ŋɔ u haana Ada ni Zila be,
“N haana, ií ra nuu!
N kpu biipɔllii bɛllɛ
dikuu un duŋ pira wia.
24Di nɛr daŋ kpu Keen di di tɔɔrɔɔ buniidaanɛɛ,
guŋwaa, di nɛr kpu n ge
di turgi n nɛkpui la kim,
u ge daŋ di tɔɔrɔɔ
butokkoahoro ni
fidaaniidaanɛɛ.”
25Denii Andama haaŋ kaa wa kpogli hia, di lul biibaal, ba dau u sɔŋ Sɛf, dikuubɛɛwiai, u faa ŋɔwɔɔrɛ, “Kɔraawiizii kaa tɛŋ bie naa, ú chi Abɛl la u kpɛɛma n kpuwɛɛ la naazi.” 26Sɛf n wa helle, u ge lul biibaal, ba dau u sɔŋ Ɛnɔs.
U de dui saŋaa nɛra jaa faari di ra yir Kɔraawiizi sɔŋ, di ra jaamuu.
Pašlaik izvēlēts:
Luglaa 4: vag
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.