約翰 13
13
耶穌洗學生个腳
1𨃟過節前，耶穌知佢離開這世界轉阿爸該位去个時節到了。佢一直惜在世間屬佢自家个人，佢就惜佢等到底。
2耶穌㧯厥學生食夜个時，魔鬼已經控制加略人西門个孻仔猶大个心，使佢決心出賣耶穌。 3耶穌知阿爸已經將一切个權柄交給佢；佢知自家係對上帝該位來个，愛倒轉上帝該位去。 4佢䟘起來，離開座位，脫下外衫，拿一條手帕圍在腰圈， 5然後倒水落腳盆，開始洗學生个腳，又用該手帕拭燥。 6佢來到西門‧彼得个面前，彼得對佢講：「主啊，你愛洗𠊎个腳係麼？」
7耶穌應講：「𠊎所做个，你這下無了解，將來你就會明白。」
8 彼得講：「𠊎絕對毋俾你洗𠊎个腳！」
耶穌講：「假使𠊎無洗你个腳，你㧯𠊎就無麼介關係。」
9 西門‧彼得講：「主啊，毋單淨𠊎个腳，連手㧯頭那也愛洗！」
10耶穌講：「身洗好个人，全身就淨浰，洗腳就罅 #13:10 有兜古卷無「洗腳就罅」。。你等係淨浰个，總係毋係逐個人淨浰。」 11(耶穌已經知麼人愛出賣佢，所以佢講：「毋係逐個人淨浰。」)
12耶穌洗好佢等个腳，就將外衫著起來，坐倒轉去。佢問厥學生講：「頭下，𠊎為你等所做个，你等了解麼？ 13你等喊𠊎做先生，做主，盡著，𠊎本來就係。 14𠊎係你等个主，你等个先生，還洗你等个腳，你等也應當彼此洗腳。 15𠊎做你等个榜樣，係愛你等照𠊎所做个去行。 16𠊎實在㧯你等講，奴僕無比主人較大，受派个人也無比派佢个人較大。 17你等知這個道理，若係去實行就盡有福氣！
18「𠊎這個話毋係指你等全體講个；𠊎認識𠊎所揀選个人。總係聖經所講『該同𠊎共下食飯个人，卻用腳踢𠊎』，這句話必定會實現。 19𠊎在事情還吂發生以前就㧯你等講，係愛使你等在事情發生个時，信𠊎就係該『自有永有』个。 20𠊎實在㧯你等講，接待𠊎所派个，就係接待𠊎；接待𠊎个，就係接待該『差𠊎來个』。」
耶穌預言會被人出賣
(馬太 26:20-25；馬可 14:17-21；路加 22:21-23)
21耶穌講了這個話，心中非常痛苦，就宣佈講：「𠊎實在㧯你等講，你等當中有一個人愛出賣𠊎。」
22學生彼此相看，毋知佢係指麼人講个。 23有一個耶穌所惜个學生，側身靠在耶穌个懷中。 24西門‧彼得暗示佢講：「問佢看，佢係講麼人。」
25該學生就探身問耶穌講：「主啊，係麼人？」
26耶穌應講：「𠊎搵一垤餅仔給麼人，佢就係。」講了，佢就搵一垤餅仔，拿給加略人西門个孻仔猶大。 27猶大一接過餅仔，魔鬼就入佢个心。耶穌對佢講：「你愛做个，趕緊去做！」 28在座个人，無人知耶穌做麼介對佢講這個話。 29因為猶大係管錢个，有兜學生想耶穌係吩咐佢去買過節用个東西，抑係喊佢帶兜東西去給窮苦人。
30 猶大食該垤餅仔後，即時就出去。該時係暗晡頭。
新个命令
31 猶大出去以後，耶穌講：「這下人子已經得到榮耀了；上帝个榮耀也顯明在人子个身上。 32既然上帝个榮耀通過人子來顯明，佢也愛親自榮光人子，即時就愛榮光佢。 33細子啊，𠊎同你等共下个時間無幾久了。你等會尋𠊎，總係𠊎㧯你等講，就像𠊎㧯猶太人个領袖講過个：『𠊎愛去个所在，你等做毋得去。』 34𠊎給你等一條新命令：你等愛彼此相惜；𠊎樣般惜你等，你等也愛樣般彼此相惜。 35若係你等彼此相惜，世間人就會認出你等係𠊎个學生。」
耶穌預言彼得毋認主
(馬太 26:31-35；馬可 14:27-31；路加 22:31-34)
36 西門‧彼得問耶穌講：「主啊，你愛去㖠位？」
耶穌講：「𠊎所愛去个所在，你這下做毋得跈𠊎去，總係較慢兜仔你就會跈𠊎去。」
37 彼得講：「主啊，做麼介這下𠊎做毋得跈你去呢？𠊎肯為你拚命到死！」
38耶穌講：「你肯為𠊎拚命到死嗎？𠊎實在㧯你講，雞仔啼以前，你會三擺毋認𠊎。」
Pašlaik izvēlēts:
約翰 13: THV12Hdb
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© The Bible Society in Taiwan, 2012
All rights reserved
© 台灣聖經公會版權所有 2012