創世記 44
44
銀酒杯毋見掉
1 約瑟命令管家講：「照佢等个頭牲所能揹个，將糧食裝滿逐儕个袋仔，又將逐儕个錢放轉袋肚。 2該最後生个，你愛將𠊎个銀酒杯㧯佢个錢放在佢个袋肚。」管家就照約瑟所吩咐个去做。 3第二日打早，這兜兄弟得到批准就帶等佢等个驢仔離開。 4佢等離該城無幾遠，約瑟就對管家講：「你趕緊去追該兜人，追到人个時愛問佢等講：『你等做麼介用惡報善呢？ 5做麼介偷𠊎主人个銀杯呢？#44:5 「做麼介偷𠊎主人个銀杯呢？」係根據一古譯本，希伯來文無這一句。該杯仔係佢啉酒用个，也係佢卜卦用个；你等犯到嚴重个罪了！』」
6管家追到佢等个時，就對佢等講這兜話。 7佢等應佢講：「先生！你做麼介講這種話呢？若僕人發誓，𠊎等無做恁樣个事。 8你知，𠊎等也將上擺袋肚發現該兜錢，對迦南帶轉來還你；恁樣，𠊎等樣還會偷若主人屋下个金銀？ 9先生！若係你在僕人當中，無論在麼人个袋肚尋到酒杯，該人就該死；𠊎等其他个人也甘願做你个奴才。」
10管家講：「𠊎同意你等个話。總係𠊎只有愛該偷走酒杯个人留下來做𠊎个奴才；其他个人無罪，做得自由轉去。」 11大家就遽遽將袋仔拿下來放在地上，逐儕打開自家个袋仔。 12管家詳細檢查，對做大哥个開始，搜到最細个。結果酒杯在便雅憫个袋肚尋到。 13該兜兄弟非常悲傷，就將衫扯爛，又將包袱放在驢仔个背囊，倒轉城肚去。
14 猶大㧯其他个兄弟倒轉約瑟屋下該時，約瑟還在該位；佢等就在厥面前伏在地上。 15約瑟對佢等講：「你等樣般做恁樣个事？敢毋知𠊎這種人會卜卦、知你等个行動嗎？」
16 猶大應佢：「大人啊！𠊎等還有麼介話好講呢？還敢拗抑係喊冤枉麼？上帝已經查出𠊎等个罪！這下毋單淨該被人搜到有酒杯个，𠊎等全部愛做大人个奴才了。」
17 約瑟講：「𠊎絕對毋會做恁樣个事。該拿走酒杯个正應該做𠊎个奴僕；其他个人可以平平安安轉若爸該位去。」
猶大代便雅憫求情
18 猶大行近，對約瑟講：「大人啊！求你聽𠊎講，毋好對若僕人發譴。對𠊎來講，你係像王共樣。 19大人識問過僕人講：『你等有阿爸抑係其他兄弟麼？』 20𠊎等應大人講：『𠊎等有一位年老个阿爸，還有一個滿老弟，係吾爸年老个時𫱔个。這滿老弟个親阿哥已經過身了；佢係佢等共𡟓單單留下來个孻仔，所以阿爸當惜佢。』 21你對僕人講：『將佢帶來這位，俾𠊎親眼看到佢。』 22𠊎等應大人講：『這個細人仔做毋得離開厥爸；若係離開，厥爸一定會死掉。』 23總係你對僕人講：『無若滿老弟共下來，毋使想愛見𠊎个面！』
24「𠊎等轉到若僕人 — 吾爸該位，就將大人个話㧯佢講。 25後來，佢愛𠊎等再來糴糧。 26𠊎等對佢講：『𠊎等毋敢去。滿老弟若㧯𠊎等共下去，𠊎等就敢去；滿老弟無㧯𠊎等共下去，𠊎等做毋得見該人个面。』 27你个僕人 — 吾爸對𠊎等講：『你等知吾𡜵娘蕾潔只有㧯𠊎𫱔兩個孻仔， 28其中一個已經離開𠊎去了。佢離開以後，𠊎無再看到佢；佢一定係被野獸食掉了！ 29這下你等愛連這細个也帶走。若係佢在路項堵到麼介意外，你等就會害𠊎這個滿頭白毛个老人家，悲悲慘慘落陰間去。』」
30-31 猶大繼續講：「吾爸个命㧯這細人仔个命相連。若係𠊎等無帶這細人仔轉去，若僕人 — 吾爸無看到這細人仔，佢一定會無命！𠊎等就會害若僕人 — 𠊎等个阿爸滿頭白毛，悲悲慘慘落陰間去！ 32毋單淨恁樣，𠊎有向吾爸保證，㧯佢講：『若係𠊎無將滿老弟帶轉來給阿爸，𠊎甘願一生人擔當這罪。』 33大人啊，這下求你俾𠊎留下來，代這細人仔做你个奴才。請俾佢㧯該兜阿哥共下轉去。 34若係這細人仔無㧯𠊎共下轉去，𠊎愛樣般轉去見吾爸呢？𠊎毋拌得看到災禍臨到吾爸啊！」
Pašlaik izvēlēts:
創世記 44: THV12Hdb
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© The Bible Society in Taiwan, 2012
All rights reserved
© 台灣聖經公會版權所有 2012