出埃及記 4
4
上主應許摩西行神蹟
1 摩西應上主講：「若係以色列人毋信𠊎，毋聽𠊎个話，講你毋識向𠊎顯現過，𠊎愛樣般好呢？」
2上主問佢：「你手拿等个係麼介？」
佢應講：「係柺棍仔。」
3上主講：「將它㧒到地上。」摩西將柺棍仔一㧒下去，棍仔就變做蛇；佢就閃開。 4上主對摩西講：「伸手去捉蛇尾。」摩西就伸手捉到蛇尾，蛇又變轉柺棍仔。 5上主講：「恁樣就做得向以色列人證明，上主 — 佢等祖先个上帝，就係亞伯拉罕个上帝，以撒个上帝，㧯雅各个上帝，識向你顯現。」
6上主又對摩西講：「將手伸入胸前个衫肚。」摩西就將手伸入去；抽出來个時，手就發癩，像雪恁白。 7上主又講：「再將手伸入胸前个衫肚。」摩西就照恁樣做，再抽出來个時，手已經恢復，㧯身體个其他部份共樣。 8上主講：「若係佢等毋信你，抑係毋信第一隻神蹟，恁樣這一隻神蹟一定會使佢等相信。 9若係這兩隻神蹟還無辦法使佢等相信，佢等還係毋聽你个話，你就拿一些尼羅河个水，潑在地上，水會變做血。」
10總係摩西講：「上主啊，𠊎一溜裡無嘴碼；你㧯𠊎講話以後也無改變。𠊎本來就係一個嘴鈍舌拙个人。」
11上主對佢講：「麼人給人口才？麼人使人耳聾、啞口？麼人使人看得到？麼人使人瞙目？敢毋係𠊎 — 上主。 12你做你去；𠊎會賜你口才，𠊎會教你應該講个話。」
13總係，摩西應講：「毋好！主啊，請你派別人去。」 14所以，上主對摩西發譴，講：「你敢毋係有一個阿哥利未人亞倫？𠊎知佢當有口才。佢堵好出來迎接你；佢一定當歡喜看到你。 15你㧯佢講應該講麼介；𠊎會賜你㧯佢有口才；𠊎會教你等應該做麼介。 16佢愛做你个嘴，代你向民眾講話；你就像上帝一樣，指示佢講麼介。 17你愛帶等這支柺棍仔，因為你愛用它來行神蹟。」
摩西轉到埃及
18所以，摩西轉到厥丈人老葉特羅該位去，對佢講：「請你俾𠊎轉埃及去，看𠊎个親人係毋係還在。」葉特羅對摩西講：「做你安心去！」
19當摩西還在米甸个時，上主對佢講：「你愛轉埃及去！該兜想愛㓾你个人全部死掉了。」 20然後摩西帶等佢个𡜵娘㧯兩個孻仔，俾佢等騎驢仔，轉埃及；佢个手擎等上帝个柺棍仔。
21上主又對摩西講：「轉到埃及以後，𠊎愛賜你能力行各樣个神蹟，你愛在埃及王面前行出來。總係𠊎愛使佢心硬，毋放𠊎个子民走。 22該時，你愛㧯埃及王講：『上主恁樣講：以色列係𠊎个孻仔、𠊎个長子。 23𠊎對你講過：准𠊎个孻仔去敬拜𠊎。你毋肯，所以𠊎愛㓾你个孻仔、你个長子。』」
24在轉埃及个路上，摩西搭帳篷過夜，上主在該位堵到佢，想愛㓾佢。 25-26所以厥𡜵娘西坡拉拿一垤當利个石片，割掉厥孻仔个包皮，用它憑摩西个腳 #4:25-26 「摩西个腳」抑係譯做「厥孻仔个腳」。「腳」也可能係指「陽物」文雅个講法。。就係因為這個割禮，西坡拉正對摩西講：「你係𠊎用割禮个血換來个新郎。」恁樣，上主正無㓾摩西。
27該時，上主對亞倫講：「你去曠野迎接摩西。」所以亞倫去，在上帝个山堵到摩西，㧯佢唚。 28摩西將上主愛佢去講个話、愛佢行个神蹟全部㧯亞倫講。 29摩西㧯亞倫就去埃及，召集以色列該兜長老。 30亞倫將上主㧯摩西講个話全部㧯佢等講；摩西也在人民面前行上主愛佢行个神蹟。 31人民全部相信；以色列人一聽到上主看顧佢等，也知上主看到佢等受苦个情形，就全部伏下來敬拜。
Pašlaik izvēlēts:
出埃及記 4: THV12Hdb
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© The Bible Society in Taiwan, 2012
All rights reserved
© 台灣聖經公會版權所有 2012