MATEO 10
10
Yesu Lata Batɔkyɛntɛ Nɔɔ Lefosi Banyɔ Nwu Osie.
1Yesu lalɛɛ basaateketetɛ nɔɔ lefosi banyɔ nwu nkpo aasiisa ni aata ma osie alɛ baatososa anwuna kpile mandiki baatii kamɛ, manyɔɔsa sifiɛ ate ate kafɔɔ.
2Batɔkyɛntɛ nwu nkpo lefosi banyɔ nwu ayooto ninle n-ya mmle nɛ.
Ɔkasale ninle Simon, nwɔ mankple manlɛɛ ni Petro, ku obilɛma Andrea,
Yakobo ku obilɛma Yohane ba ninle ni Sebedeo babi
3ku Filipo ku Bartolomeo ku Toma
ku akpooto funtɛ Mateo
ku Yakobo wɔ ninle Alfeo obi ku Tadeo
4ku Simon wɔ niabɔmbɔ ni kale nɔɔ osie kanya
ku Yuda Iskariot wɔ niadiki Yesu aata nii.
Bitɔɔkyɛ Bilaayie Lɛkya Bilɛ Yaa Sɛka Olebee Ntɔɔtɛɛtɛɛ.
5Yesu lakpee basuɔtɔ lefosi banyɔ ba mmle kɔtɔ ku kufiofa ko mmle alɛ, “Bitankyɛ batii ba ninanle ni Yuda batii kasɔ ku Samaria batii okpoo kuonwii kafɔɔ kamɛ. 6Kafɔɔ bitɔɔkyɛ Israel batii ba ninte ni fɛ bafoso ba nintooyu ni nfũ. 7Bitɔɔkyɛ biɛlaayie lɛkya bilɛ, ‘Yaa sɛka olebee nwu ntɔɔtɛɛtɛɛ.’ 8Biyɔɔsa bafiɛtɛ sifiɛ, biɛsɛnkɛsa bakpi. Biyɔɔsa batii ba ninkofiɛ ni ofiɛ sɛɛle sifiɛ, bietososa anwuna kpile kafɔɔ bidiki baatii kamɛ. Diele koto biɛta biɛya nle mmle biekyeko ɔkyɛ nii. Nkpo oso ayee biyɔ bita di koto ɔtanfũ kamɛ. 9Bitan-yɔ koto kukunwii biaklee di atofo lee kamɛ. 10Bitan-yɔ asaa ɔkaalɛ kotofo biaklee di osuku lee nwu ɔkyɛ kamɛ. Bitanklee awu nyɔɔfa, ee biaklee ntokota ee ɔkyɛnwoso kuonwii. Kpɛmblatɛ biala yi, nfũ ɔɔbla ni ɔkpɛ anle.
11“Nse biebuo okpoo owo ee kakpaayotũ kawo kamɛ yi, biemiɛ otii biene wɔ nietuna alɛ oofũ ye ni. Biɛkyɛ bilaasiɛ di ɔkyɛ nɔɔ, dilaase di obe wɔ biedie ni ninfa. 12Nse biebuo leyo lewo kamɛ yi, biɛsɛɛsa ma bilɛ, ‘Atoko ɔkyɛ ole ninle ye lele.’ 13Nse leyo nwu nkpo batii letuna beefũ ye, ni biɛta atoko ɔkyɛ ole lee lɛsɛɛsa dite ninfa. Kafɔɔ nse baatuna bafũ ye, ni biɛta atoko ɔkyɛ ole lee nwu nkpo lɛsɛɛsa dikple diwa ɔkyɛ lee. 14Nse leyo lewo ee okpoo owo batii diefũ ye ee bakyɔɔ ye ɔlaa kotoko yi, bidie ninfa bisifi, biɛfɛntɛ nkpaasɔ lee kɔtɛ bitɛ ma. 15Nwaako kɔtɔkɔ ye nlɛ, di lɛkakoyi nwu nkpo suoto, Yaa manya Sodom ku Gomora batii nyaami anlenkee okpoo nwu nkpo batii.
Yesu Labuɛ Aatɔkɔ Batɔkyɛntɛ Nɔɔ Ditikanko Le Nimawa Ma Ni Di Suoto.
16“Binu! Kokyesee ye fɛ bafoso di bakplɛle kamɛ. Nkpo oso bibe anu fɛ kɔsaanwu, kafɔɔ biɛbla buɛɛ fɛ ablonumaa. 17Bilolaa binyu, diekye batii madiki ye manta, mankpaa ye mankyɛnko kakankɔ. Babapɛ ye kafɔɔ di Yuda batii nsiisakɔ. 18Ta ami oso, babakpaa ye mankyɛnko batunletɛ ku baka anu manaakanko ye. Ni biɛtɔkɔ ma ɔlaa biene nwu ku mba ninanle ni Yuda batii. 19Nse bɛɛkpaa ye bɛɛkyɛnko kakankɔ yi, bitambu diisi di ɔlaa wɔ bibabuɛ ni suoto, ku mmle bibabuɛ nwu nii. Nse obe lewo alɛ biakakatɛ yi, Yaa omu mata ye ɔlaa wɔ biabuɛ nii. 20Diekye diele aye bamu nimakakatɛ. Teeye wɔ ninle ni Yaa Ninwuna nimakakatɛ ninfenko di suoto lee.
21“Batii mayɔ babi lɛma manta alɛ balo. Balofotɛ kafɔɔ mabla nkpo di babilɛma suoto. Babi mataka di balofotɛ lɛma suoto alɛ balo ma. 22Otii biala makyidi ye ta ami oso. Kafɔɔ otii wɔ niekpee otu ɛɛlaase ni kaayɛntɛkɔ, Yaa matɔɔ nkpa. 23Nse beetikanko ye di okpoo onwii kamɛ yi, bietoso bisifi ɔbamba kamɛ. Nwaako kɔtɔkɔ ye nlɛ bilabaloo sɛkpɛ lee ɔbla di Israel sekpoo simuu kamɛ fiɛ di ami, Otii Obi nwu, makple anwa.
24“Saateketetɛ ninlenkee saatuotɛ nɔɔ, nkpo kafɔɔ di ɔlanle ninlenkee saate nɔɔ nɛ. 25Nkpo oso, saateketetɛ biala kamiɛ alɛ aate fɛ saatuotɛ nɔɔ. Nkpo okle kafɔɔ di ɔlanle kamiɛ alɛ, aate fɛ saate nɔɔ nɛ. Nse bɛɛlɛɛ leyo lewo ɔnɔɔfo alɛ anwuna kpile ɔka mɔ, ni blɔbalɛɛ leyo nwu kamɛ batii kafɔɔ ayooto kpile?
Bitanyɛkɛ Batii.
26“Nkpo oso bitanyɛkɛ batii, diekye lɛsaa lele bɛɛyɔ lɛsaa beetĩi ee bɛɛbla beekookaa yi, Yaa madiki ni kayi. 27Lɛsaa lele kafɔɔ bienu biekyeko ɔkyɛ nii diitunu kamɛ yi, bidiki ni kayi. Lɛsaa lele kafɔɔ lɛtɔkɔ ye di kawofakɔ yi, biyie ni lɛkya di lɛkpaka. 28Bitanyɛkɛ batii ba ninlo ni suoto sina, kafɔɔ mananfuo ni ninwuna olo. Kafɔɔ biyɛkɛ Yaa wɔ ninfuo ni otii suoto sina ku ninwuna ɔwɔɔsa di kawɔɔ ɔtɔ kamɛ. 29Kaplɛ kanwii kafuo bia kutĩitĩi kɔnyɔ ɔya. Kafɔɔ kukanwii ninkpa kaapɛ kaasɔ alɛ, Teeye Yaa dieye nwu ole. 30Aye yi, bia disi lee sinwini yi, Yaa n-ye sĩ lɛpɔ. 31Nkpo oso yi, bitanyɛkɛ. Diekye biefũ kɔya bilenke kutĩitĩi kpinkidi.
Odiki Yesu Obuɛ Ku Kanya Di Batii Anu.
32“Otii lele niediki eebuɛ di batii anu alɛ, ole mi ale yi, amii madiki nwɔ kanya di Teemi anu di Yaa kafa nlɛ ole mi ale. 33Kafɔɔ nse otii owo lesĩ mi di batii anu alɛ aaye mi yi, ami, masĩ nwɔ di Teemi anu di osi nlɛ ninye nwɔ.
Batii Masɛ Suoto Ta Ami Oso.
34“Bitanyu bilɛ atoko ɔkyɛ ole lɛyɔ lɛwako kanyi ka mmle. Oowo! Ninwako atoko ɔkyɛ ole. Kafɔɔ kapamii lɛwako. 35Diekye lɛwa le lɛwa ni mata alɛ,
‘obi suɔtɔbi mataka anyila di ote suoto.
Obi sankobi kafɔɔ mataka anyila di ɔya suoto.
Ɔsanko kafɔɔ mataka anyila di ɔsa nɔɔ ɔya suoto.
36Otii lo nɔɔ kasale yi, abakye di nnwɔɔ omu nɔɔ leyo nɔɔ kamɛ.’
37“Otii lele niɛbɔmbɔ ote ee ɔya eelenkee mi yi, alaafuo mi saateketetɛ ole. Olele kafɔɔ niɛbɔmbɔ obi suɔtɔbi ee obi sankobi eelenkee mi yi, aasiɛko alɛ aale mi saateketetɛ. 38Otii lele ninan-yɔ atoo nɔɔ atuka, atikanko nnafukpaa nii yi, aasiɛko alɛ aale mi saateketetɛ. 39Otii lele niemiɛ alɛ ɔɔta nkpa nɔɔ yi, abayu mi. Kafɔɔ olele nieyu nkpa nɔɔ ta ami oso yi, abawɛ mi.
Yaa Mata Batii Ba Niefũ Ni Yesu Batikankotɛ Letota Biene.
40“Otii lele niefũ ye yi, ami eefũ. Otii lele kafɔɔ neifũ mi yi, ni eefũ Yaa wɔ niekpee mi ni kɔtɔ kafɔɔ. 41Otii lele niefũ Yaa Ɔlaa Buɛtɛtɛ alɛ Yaa ɔlaa buɛtɛ ale ni oso yi, abawɛ dibia di Yaa ɔlaa buɛtɛ nwu letota kamɛ ankyeko Yaa nfũ. Otii lele kafɔɔ niefũ otii wɔ ninte ni tinini, ta tininitɛ ale ni oso yi, abawɛ dibia di tinintɛ nwu nkpo letota kamɛ ankyeko Yaa nfũ. 42Bitofo nle mmle nwaa bilɛ, otii lele niekusii ntu yɔɔle kakɔkɔɛ kanwii ɛɛta batikankotɛ nii ba mmle ɔyɛntɛle kaamɛ lɛma ta ami oso, Yaa dilabasĩ nwɔ letota biene ɔta.”
Pašlaik izvēlēts:
MATEO 10: snw
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2008, Wycliffe Bible Translators, Inc. All rights reserved.