Lukas 16
16
Tug Thawj Tubkhai Kws Muaj Tswvyim
1Yexus has rua Nwg cov thwjtim tas, “Muaj ib tug tuabneeg npluanuj, nwg muaj ib tug tubkhai kws saib nwg lub vaajtse. Muaj tuabneeg lug qha rua tug npluanuj has tas nwg tug thawj tubkhai muab nwg tej khoom vaaj khoom tsev coj moog siv phuamlaam ntsuav taag lawm. 2Yogle ntawd, tug npluanuj txhaj hu tug thawj tubkhai lug hab has rua nwg tas, ‘Zaaj kws kuv nov koj ua ntawd yog muaj lecaag tag? Koj cale muab tej ntaub ntawv kws teev txug koj kev siv kuv tej khoom vaaj khoom tsev huvsi lug rua kuv, ruaqhov koj yuav ua tsi tau tug kws saib kuv lub vaajtse moog ntxiv lawm.’
3“Tug thawj tubkhai ntawd txawm xaav tas, ‘Kuv tug tswv tub yuav muab kuv rhu tawm ntawm kuv tegnum, es kuv yuav ua lecaag txhaj zoo? Kuv yuav moog khawb aav los tsi muajzug, yuav moog thovkhawv noj los txaajmuag. 4Zagnua, kuv paub tas kuv yuav ua lecaag lawm, sub thaus kuv poob dlejnum los txhaj tseem muaj tuabneeg hu kuv moog huv puab tej tsev.’
5“Tes nwg txawm hu txhua tug kws tshuav nwg tug tswv nqe tuaj cuag nwg. Nwg nug thawjtug has tas, ‘Koj tshuav kuv tug tswv nqe npaum lecaag?’ 6Tug ntawd teb tas, ‘Kuv tshuav nwg 100 thoob roj.’ Tug thawj tubkhai has rua tug ntawd tas, ‘Nuav yog koj dlaim ntawv tshuav nqe, koj cale nyob quastsawg hab sau kag ua 50 thoob rua.’
7“Tug thawj tubkhai txawm nug dlua ib tug has tas, ‘Koj neb, koj tshuav npaum lecaag?’ Tug ntawd teb tas, ‘Kuv tshuav 100 seev nplej.’ Tug thawj tubkhai has rua tug ntawd tas, ‘Nuav yog koj dlaim ntawv tshuav nqe, koj cale sau kag ua 80 seev rua.’
8“Tug tswv qhuas tug thawj tubkhai kws tsi ncaaj ntawd vim nwg muaj tswvyim kawg le; ruaqhov cov tuabneeg kws nyob huv nplajteb nuav tseem muaj tswvyim ua num nrug rua puab tam tuabneeg heev dlua le cov tuabneeg kws nyob huv qhov kaaj hab.”
9Yexus has ntxiv tas, “Kuv qha rua mej has tas, mej cale muab tej nyajtxag huv nplajteb nuav coj moog zeem kev phooj kev ywg, sub thaus tej nyaj ntawd taag lawm, puab txhaj yuav txaistog mej moog rua huv lub tsev kws yuav nyob moog ibtxhis. 10Tug kws ncaajnceeg rua tej yaam miv-miv, nwg yeej yuav ncaajnceeg rua tej yaam kws luj; tug kws tsi ncaajnceeg rua tej yaam miv-miv, nwg yeej yuav tsi ncaajnceeg rua tej yaam kws luj hab. 11Yog tas mej tub tsi ncaajnceeg rua tej khoom huv nplajteb nuav, leejtwg yuav kaam muab tej kws tseem nyaj rua mej saib? 12Hab yog mej tub tsi ncaajnceeg rua tej kws yog lwmtug le, leejtwg txhaj yuav kaam muab tej kws yog mej le rua mej?
13“Tsi muaj ib tug tubkhai twg kws yuav ua tau dlejnum rua ob tug tswv. Nwg yeej yuav ntxub ib tug hab nyam ib tug; nwg yeej yuav fwm ib tug hab saib tsi taug ib tug. Yog mej yuav muab Vaajtswv hab nyajtxag saib hlub ib yaam nkaus yeej tsi tau hlo le.” #Math 6:24
Qeeyaam Kws Yexus Qha
(Mathais 11:12-13; 5:31-32; Malakaus 10:11-12)
14Thaus cov Falixais nov txug tej ntawd, puab txawm ua saib tsi taug Yexus, ruaqhov puab ntshaw nyaj heev. 15Yexus has rua puab tas, “Mej yog ib co kws laam uatxuj coj zoo-zoo ntawm tuabneeg lub qhovmuag xwb, tabsis Vaajtswv tub paub mej lub sab taag lawm. Ruaqhov yaam kws tuabneeg suav has tas muajnqes kawg le, yaam ntawd yog yaam kws ntxim ntxub tshaajplawg nyob rua ntawm Vaajtswv lub qhovmuag.
16“Txij thaus Mauxes txuj Kevcai hab tej kws cov xwbfwb cev Vaajtswv lug tau sau tseg lug txug rua Yauhaas tug kws muab tuabneeg ua kevcai rausdlej, tub yeej muaj tuabneeg qha Txuj Moo Zoo kws has txug Vaajtswv lub Tebchaws lawm, hab suavdlawg yeej sistxeeb moog rua huv lub tebchaws ntawd. #Math 11:12-13 17Qhov kws ua kuas lub ntuj hab lub nplajteb pluj moog tseem yoojyim dlua le muab ib tug nyuas tsajntawv kws miv dlua ndlais huv txuj Kevcai tsotseg. #Math 5:18
18“Yog leejtwg muab nwg tug quaspuj nrauj hab moog yuav dlua ib tug quaspuj, tes yog nwg ua kev nkauj kev nraug; hab yog tug txivneej twg moog yuav ib tug pujnrauj, tes yog nwg ua kev nkauj kev nraug. #Math 5:32; 1Klt 7:10-11
Tug Npluanuj Hab Laxalus
19“Muaj ib tug npluanuj kws naav tej tsoogtsho tsaamxem kws zoo-zoo hab kim-kim, hab najnub muaj noj seem noj so. 20Nyob ntawm nwg lub roojvaag, muaj tuabneeg coj ib tug txivneej thovkhawv hu ua Laxalus, kws ibce mob ua paug quas mag tuaj tso rua ntawd, 21vim casab has tas nwg yuav tau noj tej mov kws poob sau tug npluanuj lub rooj lug. Txawm le ntawd los dlev tseem lug yaim nwg tej qhovtxhaab hab. 22Tug tuabneeg kws thovkhawv ntawd txawm tuag, hab cov timtswv ceebtsheej tau lug coj nwg moog nyob rua ntawm Anplahaas ib saab. Tug npluanuj los kuj tuag ib yaam nkaus, tes luas coj nwg moog log lawm hab.
23“Nyob huv tubtuag teb,#16:23: Tubtuag teb: Yog qhov chaw kws cov tuabneeg tuag moog nyob. nwg txomnyem heev, nwg tsaa qhovmuag saib sau, nwg txawm pum Anplahaas nyob dleb-dleb, hab pum Laxalus nyob ntawm Anplahaas ib saab. 24Nwg txhaj hu has tas, ‘Txiv Anplahaas 'e! Thov koj hlub kuv hab lau; thov koj khaiv Laxalus muab nwg tug ntsis ntivteg moog rausdlej lug tub rua kuv tug nplaig kuas laaj mivntsiv, ruaqhov kuv nyob huv cov nplaimtawg nuav mas txomnyem kawg le!’
25“Tabsis Anplahaas teb tas, ‘Mivtub 'e, koj puas ncu has tas thaus koj tseem ua neej nyob, koj tau txais txhua yaam kws zoo, tabsis Laxalus tau txais txhua yaam kws phem. Tabsis nwgnuav nwg tau zoo nyob ntawm qhov chaw nuav, koj ho raug kev txomnyem. 26Tsi taag le ntawd xwb, tseem muaj ib lub haav tub-tub kws quas peb hab mej lawm, kuas cov saab tim peb nuav txhaj yuav hlaa tsi tau tuaj rua saab tim mej, hab cov saab tim mej los txhaj yuav hlaa tsi tau tuaj rua saab tim peb.’
27“Tug npluanuj has tas, ‘Yogle ntawd, txiv Anplahaas 'e, kuv thov koj khaiv Laxalus rov moog kuas txug kuv txiv lub tsev, 28ruaqhov kuv tseem tshuav tsib tug kwvtij. Kuas Laxalus moog qha rua puab, sub puab txhaj yuav tsi tau lug nyob huv qhov txomnyem nuav hab.’ 29Anplahaas teb tas, ‘Koj cov kwvtij tub muaj Mauxes hab cov xwbfwb cev Vaajtswv lug tej lug qha lawm, ca puab maamle noog tej lug qha ntawd xwb.’ 30Tug npluanuj teb tas, ‘Txiv Anplahaas 'e, tsi tau le lau! Yog muaj ib tug kws tuag lawm sawv kag rov moog cuag puab, mas ntshe puab txhajle yuav tso puab tej kev txhum tseg xwb.’ 31Tabsis Anplahaas has tas, ‘Yog puab tsi noog Mauxes hab cov xwbfwb cev Vaajtswv lug, tes txawm yog ib tug kws tuag lawm sawv kag rov moog qha los puab yeej yuav tsi ntseeg le.’ ”
Pašlaik izvēlēts:
Lukas 16: HNJ2022
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2022 United Bible Societies. All rights reserved.