Lukas 14
14
Yexus Khu Tug Txivneej Kws Muaj Mob
1Muaj ib nub kws yog nub Xanpataus, Yexus moog noj mov huv cov Falixais ib tug thawj lub tsev; mas muaj tuabneeg saibntsoov Yexus. 2Muaj ib tug txivneej teg taw xaab-xaab lug cuag Yexus, 3Yexus txawm nug cov xwbfwb kws qha Kevcai hab cov Falixais has tas, “Peb txuj Kevcai tsocai rua peb khu mob rua nub Xanpataus hab los tsi tso?”
4Tabsis puab tsi teb le. Yogle ntawd, Yexus txhaj tuav nkaus tug txivneej ntawd, khu nwg zoo mob, hab kuas nwg moog tsev. 5Tes Yexus txawm has rua puab tas, “Nub Xanpataus, yog mej leejtwg muaj ib tug mivnyuas lossis ib tug nyuj moog poob rua huv qhovdlej lawm, mej yuav moog muab nwg nqug tawm taamsim ntawd lug hab los tsi nqug?” #Math 12:11
6Puab yeej teb tsi taug Yexus ib lus txug qhov nuav le.
Kev Txu Fwjchim Hab Kev Txaistog Qhua
7Yexus pum tas ibtxha tuabneeg kws raug caw tuaj noj mov ntawd muaj qeeleej xaiv nyob cov chaw saamxeeb xwb, Yexus txhaj has ib zaaj lug pevtxwv rua puab has tas, 8“Thaus muaj tuabneeg caw koj moog noj tshoob, koj tsi xob xub moog nyob ntawm lub chaw saamxeeb, nyobtsaam tug tswvtsev ho caw ib tug kws tseemceeb dlua koj tuaj hab, #Paaj 25:6-7 9tes tug tswvtsev kws caw meb ob leeg tuaj ntawd, yuav lug has rua koj tas, ‘Ca tug nuav nyob koj lub chaw ko.’ Thaus ntawd koj yuav poob ntsejmuag heev, hab koj yuav tau moog nyob lub rooj kws qeg kawg nkaus.
10“Tabsis thaus twg yog muaj tuabneeg caw koj, cale xub moog nyob ntawm lub rooj kws qeg kawg nkaus, sub thaus tug tswvtsev lug, nwg txhaj yuav has rua koj tas, ‘Phoojywg, koj cale txaav zog moog nyob rua ntawm lub chaw saamxeeb.’ Qhov nuav yuav ua rua koj tau ntsejmuag taabmeeg txhua tug kws nrug koj tuaj noj mov uake ntawd. 11Ruaqhov txhua tug kws tsaa nwg lub fwjchim, yuav raug muab txu kuas qeg, hab tug kws txu nwg lub fwjchim, yuav raug muab tsaa kuas sab.” #Math 23:12; Lukas 18:14
12Yexus has rua tug tswvtsev ntawd has tas, “Thaus koj ua ib pluag su lossis ib pluag mo noj, koj tsi xob caw koj tej phoojywg, koj tej kwvtij neejtsaa, hab tej tuabneeg zejzog kws npluanuj tuaj xwb, ruaqhov puab yeej yuav ua ib rooj hab caw koj rov moog nrug puab noj kws yog puab ua pauj rua koj. 13Thaus koj npaaj ib rooj noj rooj haus, koj cale caw tej tuabneeg pluag, tej qhuavteg qhuavtaw, tej cegtawv, hab tej dligmuag tuaj noj; 14koj txhaj yuav tau txais koobmoov, ruaqhov puab cov ntawd yuav tsi muaj peevxwm pauj taug koj tej txajntsig. Tabsis thaus cov tuabneeg ncaajnceeg sawv huv qhovtuag rovqaab lug, Vaajtswv yuav pauj rov rua koj.”
Zaaj Lug Pevtxwv Has Txug Rooj Mov Luj
(Mathais 22:1-10)
15Muaj ib tug txivneej kws nyob ntawm rooj mov nov Yexus has le ntawd, nwg txawm has rua Yexus tas, “Tug kws tau moog noj rooj mov huv Vaajtswv lub Tebchaws mas ntshe yuav zoosab kawg le lau!”
16Yexus has rua nwg tas, “Muaj ib tug txivneej ua ib rooj mov luj hab nwg caw ntau leej tuaj noj. 17Thaus txug lub sijhawm noj lawm, nwg khaiv ib tug tubqhe moog has rua cov tuabneeg kws nwg tub caw lawm has tas, ‘Mej cale moog, taamsim nuav txhua yaam tub txhij lawm!’
18“Tabsis puab txhua tug yig has tas tsi khoom moog. Thawjtug has rua tug tubqhe ntawd has tas, ‘Kuv yuav tau ib thaaj laj hab kuv tseem yuav moog saib; thovtxim ntau, kuv yuav moog tsi tau.’
19“Muaj dlua ib tug has tas, ‘Kuv yuav tau tsib nkawm nyuj, kuv tseem yuav moog muab cov nyuj ntawd sim laijlag; thovtxim ntau, kuv yuav moog tsi tau.’
20“Muaj dlua ib tug has tas, ‘Kuv nyavnyuas yuav quaspuj, yogle ntawd kuv yuav moog tsi tau.’
21“Tug tubqhe rov moog qha tej nuav rua nwg tug tswv. Tug tswv chim heev, nwg has rua tug tubqhe has tas, ‘Koj cale maajnroog moog rua tom tej kev luj hab kev miv huv nroog, coj tej tuabneeg pluag, tej qhuavteg qhuavtaw, tej dligmuag, hab tej cegtawv tuaj noj.’ 22Tuabplag xwb, tes tug tubqhe rov lug has rua nwg tug tswv tas, ‘Tug tswv, kuv tub moog ua lawvle tej kws koj has lawm, tabsis tseem tshuav chaw seem hab.’ 23Tug tswv txhaj has rua tug tubqhe ntawd tas, ‘Koj cale moog rua tom tej kev luj hab kev miv, hab nquahu kuas tuabneeg cale tuaj, sub kuv lub tsev txhaj yuav puv. 24Kuv qha rua mej has tas, cov tuabneeg kws tau raug caw lawm, yeej tsi muaj ib tug kws yuav tau saaj kuv rooj mov hlo le!’ ”
Tug Nqe Kws Ua Yexus Le Thwjtim
(Mathais 10:37-38)
25Muaj tuabneeg coob-coob nrug Yexus uake moog, Nwg txawm tig lug has rua puab tas, 26“Tug kws lug cuag Kuv, yog nwg tsi ntxub nwg nam nwg txiv, nwg quaspuj mivnyuas, nwg kwv nwg tij, nwg nkauj nwg muam, hab ntxub nwg tugkheej, mas nwg ua tsi tau Kuv le thwjtim. #Math 10:37 27Hab tug kws tsi kwv nwg tug ntoo khaublig hab nrug Kuv moog, tug ntawd ua tsi tau Kuv le thwjtim. #Math 10:38; 16:24; Malak 8:34; Lukas 9:23
28“Yog mej ib tug twg npaaj yuav ua ib lub chaw tsomfaaj, nwg yeej xub lug nyob quastsawg ua tuabzoo xaav seb yuav siv nyaj npaum lecaag, hab seb nwg puas yuav muaj nyaj txaus ua kuas qhov ntawd tav. 29Yog nwg tsi xub ua le ntawd, tes txawm yog nwg tub ua tau lub quatsev taag lawm los nwg yuav ua lub chaw tsomfaaj ntawd tsi tav. Thaus tej tuabneeg pum le ntawd, puab yuav thuam nwg 30has tas, ‘Tug tuabneeg nuav pib ua lawm ntaag, tabsis nwg tsi muaj peevxwm ua kuas tav!’
31“Lossis pevxaam has tas ib tug vaajntxwv kws muaj tubrog 10,000 leej; thaus nwg yuav moog uarog rua ib tug vaajntxwv kws muaj tubrog 20,000 leej, nwg yeej yuav xub lug nyob quastsawg ua tuabzoo xaav seb nwg puas yuav muajzug txaus kws moog ntaus yeej tug vaajntxwv tom u. 32Yog nwg xaav tas nwg yuav tua tsi yeej, thaus nwg tseem nyob dleb, nwg yeej yuav xub khaiv tuabneeg moog thov tug vaajntxwv tod, kuas ob tog sis raugzoo.” 33Yexus xaus lug has tas, “Ib yaam nkaus le ntawd, tug kws tsi kaam tso txhua yaam kws nwg muaj tseg, tug ntawd yuav ua tsi tau Kuv le thwjtim.
Cov Ntsev Kws Tsi Muajnqes
(Mathais 5:13; Malakaus 9:50)
34“Ntsev yeej zoo, tabsis yog ntsev tsuag lawm, yuav ua lecaag txhaj rov dlaw tau? 35Cov ntsev ntawd txawm yuav muab tso rua huv aav hab muab xyaw chiv los yeej tsi zoo, kawg muab povtseg lawm xwb. Yog leejtwg muaj qhovntsej, cale noog!”
Pašlaik izvēlēts:
Lukas 14: HNJ2022
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2022 United Bible Societies. All rights reserved.