Lukas 11
11
Yexus Qha Txug Kev Thov Vaajtswv
(Mathais 6:9-13; 7:7-11)
1Muaj ib nub Yexus moog thov Vaajtswv ntawm ib qhov chaw. Thaus Nwg thov taag lawm, Nwg ib tug thwjtim has rua Nwg tas, “Tug Tswv, thov Koj qha kuas peb paub thov Vaajtswv ib yaam le Yauhaas qha nwg cov thwjtim hab.”
2Yexus has rua puab tas, “Thaus mej thov Vaajtswv, mej has le nuav:
“ ‘Leejtxiv,
thov kuas suavdlawg fwm Koj lub npe;
thov kuas Koj lub tebchaws lug.
3Thov Koj najnub pub mov rua peb noj.#11:3: najnub pub mov rua peb noj; lossis pub mov rua peb noj pigkig.
4Thov Koj zaamtxim rua peb,
ruaqhov peb tub zaamtxim rua txhua tug kws ua txhum rua peb lawm.
Thov Koj tsi xob coj peb moog raug kev simsab.’ ”
5Hab Yexus has rua Nwg cov thwjtim tas, “Pevxaam has tas thaus ib taagmo, mej cov muaj ib tug moog rua tom nwg tug phoojywg tsev hab thov has tas, ‘Phoojywg, thov txais koj peb lub ncuav rua kuv, 6ruaqhov kuv ib tug phoojywg dlua kev tuaj su huv kuv tsev, tabsis kuv tsi muaj dlaabtsi rua nwg noj le!’ 7Tug phoojywg kws nyob huv tsev teb tas, ‘Tsi xob tuaj txob kuv! Kuv tub laag qhovrooj lawm, hab kuv cov mivnyuas los tub nrug kuv pw taag lawm. Kuv yuav sawv tsi tau moog muab ib yaam dlaabtsi rua koj le.’ 8Kuv qha rua mej tas, txawm obtug yog phoojywg zoo npaum lecaag los nwg yuav tsi sawv moog muab ncuav rua nwg tug phoojywg, tabsis vim nwg tug phoojywg pheej taij tsi tseg le, nwg yeej yuav sawv moog muab tej kws nwg tug phoojywg cheemtsum rua tug phoojywg.
9“Yogle ntawd, Kuv qha rua mej has tas: Mej thov, mej yuav tau; mej nrhav, mej yuav ntsib; mej khob, lub qhovrooj yuav qheb rua mej. 10Ruaqhov txhua tug kws thov yeej tau, txhua tug kws nrhav yeej ntsib, hab txhua tug kws khob, lub qhovrooj yeej qheb rua nwg. 11Mej cov kws yog leejtxiv, yog mej tug mivnyuas thov ib tug ntseg, mej puas yuav muab ib tug naab rua nwg? 12Lossis yog mej tug mivnyuas thov qai, mej puas yuav muab raubris teb rua nwg? 13Txawm mej yog tuabneeg phem npaum lecaag los mej tseem paub muab yaam kws zoo rua mej tej mivnyuas. Yogle ntawd, mej Leejtxiv kws nyob sau ntuj ceebtsheej, yimfuab yuav muab Vaaj Ntsujplig tug Dlawbhuv rua txhua tug kws thov Nwg!”
Yexus Hab Npexenpus
(Mathais 12:22-30; Malakaus 3:20-27)
14Yexus taabtom ntab ib tug dlaab kws has tsi tau lug; thaus tug dlaab tawm lawm, tug txivneej ntawd txawm rov has tau lug. Cov tuabneeg coob-coob kws nyob ntawd xaav tsi thoob le. 15Tabsis muaj qeeleej has tas, “Tub yog Npexenpus kws yog cov dlaab tug thawj pub fwjchim rua Nwg ntab cov dlaab ntawd tawm.” #Math 9:34; 10:25
16Muaj qeeleej xaav sim Yexus, yogle ntawd puab txhaj has kuas Yexus ua ib yaam txujci tseemceeb kws yog lug sau ntuj lug. #Math 12:38; 16:1; Malak 8:11 17Yexus tub paub tej kws puab xaav lawm, Nwg txhaj has rua puab tas, “Lub tebchaws twg kws faib ua paab ua pawg hab muaj kev sis tawmtsaam, tes tsi ntev xwb lub tebchaws ntawd yuav pluj moog; tsev tuabneeg twg kws faib ua paab ua pawg, tes tsev tuabneeg ntawd yeej yuav tawg taag moog. 18Yogle ntawd, yog Xataas tseem faib ua ntau paab hab rov sis tawmtsaam, puab lub tebchaws yuav ua lecaag khov taug? Mej has tas qhov kws Kuv ntab tau cov dlaab ntawd tawm yog Npexenpus pub fwjchim rua Kuv. 19Yog tas Kuv siv Npexenpus lub fwjchim ntab puab tawm, leejtwg ho pub fwjchim rua mej cov tuabneeg ntab tau cov dlaab ntawd tawm? Mej cov tuabneeg ntaag lau yog cov kws yuav txavtxim rua mej! 20Tabsis yog Kuv ntab tau dlaab lug ntawm Vaajtswv lub fwjchim, tes qhov ntawd qha tau rua mej paub tas Vaajtswv lub Tebchaws tub lug txug mej lawm.
21“Thaus ib tug txivneej kws muajzug heev, nwg npaaj tej cuabyeej khovkho, hab zuv nwg lub tsev lawm, tes nwg tej khoom yuav nyob ruaj. 22Tabsis thaus muaj ib tug kws tseem muajzug dlua nwg tuaj ntaus nwg hab kovyeej nwg lawm, tes tug ntawd yuav txeeb taagnrho tej cuabyeej kws nwg casab rua, nqaa moog huv tuabsi, hab muab tej kws nwg fuab tau lug coj moog sisfaib.
23“Tug kws tsi tuaj Kuv tog, tes yog nwg tawmtsaam Kuv. Tug kws tsi paab Kuv muab sau lug uake, tes yog nwg ua kuas tawg uasaab uasua. #Malak 9:40
Ntsujplig Phem Rovqaab Lug
(Mathais 12:43-45)
24“Thaus ib tug ntsujplig phem tawm huv ib tug tuabneeg lub cev moog lawm, nwg txawm moog rua tom roob mojsaab qhua hab nrhav chaw su. Yog nwg nrhav tsi tau, nwg yuav has tas, ‘Kuv yuav rovqaab moog rua tom kuv lub qub tse kws kuv tawm tuaj lawm.’ 25Thaus nwg rov lug txug, uacav lub tsev tub cheb dlu lug hab txhua yaam yeej tu tavlog ca lawm. 26Tes nwg txawm moog coj xyaa tug ntsujplig kws tseem phem dlua nwg lug nrug nwg nyob huv lub tsev ntawd. Thaus kawg tug tuabneeg ntawd hajyam txomnyem heev dlua thaus chivthawj.”
Txuj Kev Zoosab Kws Tseeb
27Thaus Yexus tseem taabtom has txug tej ntawd, muaj ib tug quaspuj kws nyob huv cov tuabneeg coob-coob txawm has nrov-nrov tuaj has tas, “Tug quaspuj kws yug Koj hab pub mig rua Koj noj mas ntshe muaj kev zoosab tshaajplawg!”
28Tabsis Yexus teb tas, “Yog, tabsis tseeb tag tes cov kws nov Vaajtswv Txujlug hab ua lawv nraim le txujlug ntawd yog cov kws muaj kev zoosab tshaajplawg!”
Tuabneeg Xaav Pum Txujci Tseemceeb
(Mathais 12:38-42)
29Thaus muaj tuabneeg coob zujzug tuaj sawv puagncig Yexus, Nwg has rua puab tas, “Tam tuabneeg nuav yog ib tam kws phem kawg nkaus le! Puab thov kuas Kuv ua ib yaam txujci tseemceeb, tabsis Kuv yuav tsi ua dlaabtsi rua puab pum le, tsuas tshwj zaaj kws has txug Yaunas nkaus xwb. #Math 16:4; Malak 8:12 30Yaunas ua lub cim rua cov tuabneeg kws nyob huv lub nroog Nineves pum lecaag, Tuabneeg Leejtub yuav ua lub cim rua cov tuabneeg tam nuav ib yaam nkaus le ntawd. #Yauna 3:4
31“Thaus txug Nub Txavtxim, tug puj Vaajntxwv kws kaav tebchaws Senpas yuav sawv lug komtxim rua cov tuabneeg nyob rua tam nuav, ruaqhov nwg taug kev puag tim qaabntuj kawg tuaj noog Vaajntxwv Xalumoos qha txug nwg tej kev txawjntse. Kuv qha rua mej has tas, muaj ib tug nyob ntawm nuav tseem muaj fwjchim luj dlua Xalumoos hab. #1Vaaj 10:1-10; 2Xwm 9:1-12 32Thaus txug Nub Txavtxim, cov tuabneeg kws nyob huv lub nroog Nineves yuav sawv lug komtxim rua mej, ruaqhov thaus puab nov Yaunas qha, puab tub tso puab tej kev txhum tseg lawm. Kuv qha rua mej has tas, muaj ib tug nyob ntawm nuav tseem muaj fwjchim luj dlua Yaunas hab! #Yauna 3:5
Lub Teeb Kws Ci Rua Lub Cev
(Mathais 5:15; 6:22-23)
33“Tsi muaj leejtwg taws teeb es muab coj moog zais lossis muab ib lub phab khwb rua;#11:33: Tej phoo ntawv qub kws xuas teg sau tsi muaj lossis muab ib lub phab khwb rua. tsuas muaj kws yuav muab txawb rua sau lub txee txawb teeb xwb, sub thaus tuabneeg tuaj rua huv tsev, puab txhaj pumkev. #Math 5:15; Malak 4:21; Lukas 8:16 34Koj lub qhovmuag yog lub teeb kws ci rua lub cev pumkev. Thaus koj lub qhovmuag tseem zoo, taagnrho koj lub cev yuav pumkev kaajnrig. Tabsis nub twg koj lub qhovmuag tsi zoo lawm, tes taagnrho koj lub cev yuav tsausntuj nti. 35Ua tuabzoo ceevfaaj, tsi xob ca qhov pumkev kws nyob huv koj tsaus moog. 36Yog koj lub cev yeej kaajnrig, tsi muaj ib qho tsaus le, koj yuav ci moog thoobplawg, ib yaam le thaus tug dluab teeb ci tuaj rua ntawm koj.”
Yexus Tshev Cov Falixais Hab Cov Xwbfwb Kws Qha Kevcai
(Mathais 23:1-36; Malakaus 12:38-40)
37Thaus Yexus qha taag, muaj ib tug Falixais tau caw Yexus moog nrug nwg noj mov; Yexus txawm moog huv nwg tsev hab nyob quastsawg ntawm lub rooj mov. 38Thaus tug Falixais pum tas Yexus tsi ntxuav teg uantej noj mov, nwg xaav tsi thoob le. 39Tug Tswv txhaj has rua nwg tas, “Mej cov Falixais yeej ntxuav mej lub khob hab lub phaaj saabnrau xwb, tabsis saabhuv mas mej puvnkaus tej kev uanruj uatsiv hab kev phem. 40Cov nam tuabneeg ruag! Vaajtswv tug kws tsim saabnrau, Nwg tsi yog tug kws tsim saabhuv hab lov? 41Mej cale muab tej kws nyob huv mej tej khob hab tej phaaj pub rua cov tuabneeg pluag, sub txhua yaam txhajle yuav huv lawvle kevcai rua mej.
42“Cov Falixais, mej yuav raug kev puamtsuaj lau! Mej muab ib feem kaum ntawm mej tej txumlom, xwsle pumhum, luamlaws hab txhua yaam txumlom rua Vaajtswv, tabsis mej ho tso txuj kev ncaajnceeg hab txuj kev hlub Vaajtswv tseg. Tej nuav yog tej kws tsimnyog mej yuavtsum tau ua, tabsis ho tsi xob muab lwm nqai tsotseg hab. #Levi 27:30
43“Cov Falixais, mej yuav raug kev puamtsuaj lau! Mej nyam moog nyob tej rooj kws tseemceeb huv tej tsev saablaaj, hab nyam kuas suavdlawg hawm mej tom tej kab. 44Mej yuav raug kev puamtsuaj lau! Mej zoo ib yaam le tej ntxaa kws tsi muaj dlaabtsi cim rua sau, kws tej tuabneeg tub tsuj moog tsuj lug, los puab yeej tsi paub tas yog ntxaa.”
45Muaj ib tug xwbfwb kws qha Kevcai has rua Yexus tas, “Xwbfwb, Koj has le nuav mas yog Koj txobthuam peb xwb!”
46Yexus teb tas, “Cov xwbfwb kws qha Kevcai, mej yuav raug kev puamtsuaj hab! Mej muab tej nraa nyaav kws tsi yoojyim ris rua tuabneeg ris, tabsis mej tub tsi kaam cev ib tug nyuas ntivteg moog paab thaj tej nraa ntawd le. 47Mej yuav raug kev puamtsuaj lau! Mej txhim cov xwbfwb cev Vaajtswv lug tej ntxaa kuas zoonkauj. Puab cov ntawd yog cov kws mej tej yawmkoob muab tua povtseg ntaag. 48Tej kws mej ua ntawd qha tau rua suavdlawg paub tas mej yeej pumzoo txug tej kws mej cov yawmkoob tau ua lug. Mej cov yawmkoob yog cov kws tua cov xwbfwb cev Vaajtswv lug, hab mej yog cov kws txhim puab tej ntxaa. 49Vimle nuav, Vaajtswv tug kws muaj tswvyim txhajle has tas, ‘Kuv yuav khaiv cov xwbfwb cev Vaajtswv lug hab Kuv cov timthawj moog qha puab, puab yuav muab qeeleej tua hab yuav muab qeeleej tsimtxom.’ 50Yogle ntawd, cov tuabneeg tam nuav yuav tau ris lub txim rua cov ntshaav kws cov tuabneeg tam thaus u tua cov xwbfwb cev Vaajtswv lug, txij thaus tsim lub nplajteb lug, 51suav txij le Anpees cov ntshaav lug txug rua Xekhaliyas cov ntshaav, kws raug tua nyob nruabnraab ntawm lub thaaj hab qhov chaw kws Dlawbhuv. Kuv qha rua mej has tas, cov tuabneeg tam nuav yuav tau ris taagnrho cov tuabneeg kws tua cov xwbfwb cev Vaajtswv lug ntawd lub txim! #Chiv 4:8; 2Xwm 24:20-21
52“Cov xwbfwb kws qha Kevcai, mej yuav raug kev puamtsuaj lau! Mej muab tug yumsij kws qheb moog rua txuj kev txawjntse zais ca lawm; txawm yog mej kag los mej tub tsi kaam moog rua huv, mej tseem txwv cov kws xaav moog kuas moog tsi tau rua huv hab!”
53Thaus Yexus tawm huv tug Falixais tsev moog lawm, cov xwbfwb kws qha Kevcai hab cov Falixais txawm pib tawmtsaam Yexus nyaav heev hab nug Yexus ntau yaam, 54seb puab puas yuav lamtxim tau rua tej lug kws Nwg teb.
Pašlaik izvēlēts:
Lukas 11: HNJ2022
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2022 United Bible Societies. All rights reserved.