Chivkeeb 18
18
Anplahas Tus Tub Uas Vajtswv Coglus Tseg
1Tus TSWV los tshwm rau Anplahas pom ntawm cov ntoo xeeb hauv thaj chaw Males. Thaum Anplahas tseem tabtom zaum ntawm nws lub qhovrooj tsevntaub, lub sijhawm ntawd tshavntuj tabtom kub heev, 2nws tsa qhovmuag saib txawm pom peb tug txivneej sawv nresnroos tod. Thaum nws pom dheev lawv, nws txawm ceevnrooj mus cuag lawv thiab txhoscaug ntua nyo ti nkaus av, #Henpl 13:2 3nws hais tias, “Kuv tus tswv, yog nej txaussiab rau kuv, thov nej tsis txhob dhau ntawm nej tus tubtxib no mus. 4Cia kuv mus nqa mentsis dej tuaj rau nej ntxuav kotaw, es thov nej so hauvqab tsob ntoo no kom lossiav. 5Kuv yuav mus nqa mentsis zaub-mov tuaj rau nej noj, kom nej thiaj yuav muajzog taug kev mus ntxiv. Nej twb pomxeeb tuaj txog ntawm kuv tsev no lawm, thov cia kuv tiam nej tso.”
Lawv teb tias, “Ua koj tsaug nawb; ua li koj hais ntawd.”
6Anplahas maj ceevnrooj rov mus rau hauv tsevntaub thiab hais rau Xalas tias, “Tsuag-tsuag, koj ciali mus muab ib hnab hmoov nplej uas zoo tshajplaws los puab ua ncuav thiab muab cub.” 7Ces Anplahas txawm khiav loo mus rau nram cov tsiaj thiab ntes kiag tau ib tug menyuam nyuj tseem mos thiab du-dais, coj los rau ib tug tubtxib, kom nws coj mus npaj tsuag-tsuag kom siav. 8Nws thiaj muab mentsis roj mis nyuj qhuav, mentsis kua mis nyuj, thiab cov nqaij uas hau tau siav lawm, coj mus rau kiag rau ntawm cov txivneej ntawd xubntiag. Nws rau zaub rau mov rau lawv noj hauvqab tsob ntoo ntawd.
9Ces lawv nug nws hais tias, “Xalas uas yog koj tus pojniam nyob qhovtwg?”
Anplahas teb tias, “Nws nyob hauv tsevntaub.”
10Lawv cov ntawd muaj ib tug hais rau Anplahas tias, “Cuaj hlis tomntej no#18:10: Cuaj hlis tomntej no, lossis Lwm xyoo lub caij no. Kuv yuav rovqab tuaj dua, mas Xalas uas yog koj tus pojniam yuav yug tau ib tug metub.”
Xalas sawv ntawm lub qhovrooj tsevntaub sabhauv uas ncaj ntawm Anplahas nrobqaum, mloog lawv sibtham. #Loos 9:9 11Anplahas thiab Xalas twb laus heev lawm, thiab Xalas twb tseg tsis coj khaubncaws lawm. 12Yogli ntawd, Xalas txawm luag twjywm thiab xav tias, “Nimno kuv twb laus dhau qhov uas yuav muaj taus menyuam lawm, kuv tseem yuav muaj tau qhov kev zoosiab no thiab lov? Kuv tus txiv los kuj laus lawm thiab.” #1Pet 3:6
13Ces tus TSWV nug Anplahas hais tias, “Vim licas Xalas thiaj luag thiab hais tias, ‘Kuv twb laus npaum li no lawm, es tseem muaj taus menyuam thiab lov?’ 14Puas muaj ib yam dabtsi uas tus TSWV yuav ua tsis tau? Rawsli Kuv tau hais lawm, cuaj lub hlis tomntej no Kuv yuav rovqab tuaj dua, mas Xalas yeej yuav yug tau ib tug metub xwb.” #Lukas 1:37
15Vim Xalas ntshai, nws thiaj tsis lees tias nws tau luag lawm; nws hais tias, “Kuv tsis tau luag as.”
Tiamsis tus TSWV teb tias, “Koj yeej luag lawm los mas.”
Anplahas Thov Rau Lub Nroog Xaudoos
16Tomqab ntawd lawv peb tug txivneej txawm mus rau ntawm ib qho chaw uas saib pom lub nroog Xaudoos; Anplahas kuj xa lawv sawvkev thiab nrog lawv mus uake. 17Tus TSWV xav tias, “Kuv yuav tsis zais tej uas Kuv tabtom yuav ua ntawd rau Anplahas. 18Nws cajces yuav dhau mus ua ib haivneeg tseemceeb thiab muaj hwjchim heev, thiab Kuv yuav foom koobhmoov los ntawm nws mus rau txhua haivneeg.#18:18: ntawm nws … txhua haivneeg; lossis txhua haivneeg yuav thov Kuv foom koobhmoov rau lawv ib yam li Kuv tau foom rau nws lawm thiab. 19Kuv tau xaiv nws kom nws thiaj yuav xaaj nws tej tub thiab tej cajces kom mloog Kuv lus, kom lawv ua zoo thiab ua ncaj ua ncees. Yog lawv ua li ntawd, Kuv yuav ua txhua yam rau nws rawsli Kuv tau coglus tseg cia lawm.”
20Ces tus TSWV hais rau Anplahas tias, “Muaj suab quaj qw loj heev tawmtsam lub nroog Xaudoos thiab lub nroog Kaumaulas; ob lub nroog ntawd tej kev txhaum loj kawg nkaus li. 21Kuv yuavtsum mus saib seb puas muaj tseeb rawsli tej lus uas Kuv tau hnov ntawd.”
22Ces ob tug txivneej txawm sawvkev mus rau hauv lub nroog Xaudoos lawm, tiamsis tus TSWV tseem nrog Anplahas nyob. 23Anplahas txav mus ze zog rau ntawm tus TSWV thiab nug hais tias, “Koj yuav ua kom cov neeg tsis muaj txim raug kev puastsuaj nrog cov neeg muaj txim huv tibsi thiab lov? 24Yog tias muaj tsibcaug tus neeg zoo nyob hauv lub nroog ntawd, Koj puas yuav ua kom tagnrho lub nroog ntawd puastsuaj mus? Koj txawm yuav tsis tseg lub nroog ntawd kom tsibcaug tus uas zoo ntawd dim li lov? 25Yeej paub meej tias Koj yeej yuav tsis lam muab cov neeg zoo tua nrog cov neeg txhaum ib zaug li. Yog Koj ua li ntawd, cov neeg zoo yuav raug txim nrog cov neeg txhaum uake. Koj yeej yuav tsis ua li ntawd! Tus uas txiavtxim rau tagnrho tej tibneeg ntiajteb yuavtsum txiavtxim ncajncees xwb.”
26Tus TSWV teb tias, “Yog Kuv pom muaj tsibcaug tus neeg uas zoo nyob hauv lub nroog Xaudoos, Kuv yuav tseg tagnrho lub nroog ntawd vim yog tseem muaj lawv.”
27Anplahas rov hais ntxiv tias, “Tus TSWV, thov Koj zamtxim rau kuv lub siab tawv uas pheej nrog Koj haislus. Kuv yog plua luaj plua av xwb, yeej tsis tsimnyog yuav hais ib yam dabtsi li. 28Tiamsis yog tias muaj txog plaubcaug-tsib leeg uas zoo xwb, es muaj tsis txog tsibcaug leej ne, Koj yuav ua kom lub nroog ntawd puastsuaj tag huv tibsi, vim tu tsib nyuag leej ntawd xwb lov?”
Tus TSWV teb tias, “Yog Kuv pom muaj plaubcaug-tsib leeg uas zoo, Kuv yuav tsis ua kom lub nroog ntawd puastsuaj.”
29Anplahas rov hais dua tias, “Yog tias muaj txog plaubcaug leej xwb ne?”
Tus TSWV teb tias, “Yog muaj plaubcaug leej, los Kuv yuav tsis ua kom lub nroog ntawd puastsuaj.”
30Anplahas rov hais dua tias, “Tus TSWV, thov Koj tsis txhob chim, rauqhov kuv xav rov hais dua. Yog tias muaj txog pebcaug leej xwb ne?”
Tus TSWV teb tias, “Yog Kuv pom muaj pebcaug leej, los Kuv yuav tsis ua kom lub nroog ntawd puastsuaj.”
31Anplahas hais tias, “Tus TSWV, thov Koj zamtxim rau kuv lub siab tawv uas pheej nrog Koj haislus. Yog tias Koj nrhiav pom muaj neesnkaum leej xwb ne?”
Tus TSWV teb tias, “Yog Kuv pom muaj neesnkaum leej, los Kuv yuav tsis ua kom lub nroog ntawd puastsuaj.”
32Anplahas hais tias, “Tus TSWV, thov Koj tsis txhob chim lau, kuv thov hais ib zaug ntxiv xwb. Yog tias Koj nrhiav pom muaj kaum leej xwb ne?”
Tus TSWV teb tias, “Yog Kuv pom muaj kaum leej xwb, los Kuv yuav tsis ua kom lub nroog ntawd puastsuaj.” 33Tomqab uas tus TSWV nrog Anplahas tham tag lawm, Nws txawm ncaim mus, thiab Anplahas txawm rovqab mus tsev lawm.
Pašlaik izvēlēts:
Chivkeeb 18: MWW2022
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2022 United Bible Societies. All rights reserved.