Mag 8
8
Yisa kaah nan jin bininfob turina man
(Matiu 15:32-39)
1Iyaayoo nmɔn, le kuninfogbaluŋ yaan ti nan lagin tab Yisa ban, baa nan jɔɔ tijiiri, le Yisa yin u bɔɔnɔɔb ki nan bei bi ke, 2“Kunyunyunbaag choom pam bininfob nan bu, iweehn itaa sɔ le bi be n ban, ki mu kaa jɔɔ tijiir ki ji. 3Ni ye n jaa bi ke bi li kun nin nkom ke, bi li fig nsan, bi ni bi bam a tim fɔga.”
4Le u bɔɔnɔɔbin baan u ke, “Ti yin kan tijiir la ban kukunkɔɔg nan yaan wee tin foo bi biɛn naa?” 5Le u baan bi ke, “Ni jɔɔ boroboro kon i ŋaa?” Le bi bei u ke, “I bilile.”
6Iyaayoo le u che kuninfogbaluŋ nmɔn kal tum. Le u ta boroboro kon ilile-n, le ki poor Uwonbɔr le ki war war boroboro ki sei u bɔɔnɔɔbin ke bin ta tol bininfobin na. 7Bi ji nan jɔɔ njanbum wama bi ban; le u ji poor Uwonbɔr i bu, le ki bei u bɔɔnɔɔbin ke bin ta tol ba.
8Le bininfobin nan jin ki gbee. Ni bɔɔn bu, le u bɔɔnɔɔb lagin tijiir tan gurin, le ti ji gbee tikachar tilile. 9Bijab ban nan be niin nan foo turina paama. Le u nin nan jaa bininfobin ke bi li kun na, 10amaa le u ma nin u bɔɔnɔɔb ŋa weem ki kɔɔ kuŋaluŋ ki jon Dalimanuta a tiŋin.
Farasii yaab kaah nan ban Yisa n tun ligaril a toon man
(Matiu 12:38-42; 16:1-4)
11Ni bɔɔn bu le Farasii yaab biba nan dan Yisa ban ki nan baan u, ki mag u ki ke un ŋa ligaril a wan nibau wee bin biɛ ke Uwonbɔr sin nyi u bu. 12Le Yisa nan foor ki jaa u poolin, le ki baan bi, “Ba ŋa wee ni daandaan nan a ninfob ban n tun ligaril a toonl wee ni kan naa? Ibamɔn le n bei ni nan, min kaa yin tun ligaril a toonl ki sei ni daandaan nan a ninfob nan ni.”
13Le u jiɛn bi, le ki jiir kɔɔ kuŋaluŋin, ki lɔŋ limɔgil.
Farasii yaab nin ubɔr Herɔd a wɔɔnim a bɔr
(Matiu 16:5-12)
14Yisa a bɔɔnɔɔb nan tam kaa ŋmag boroboro takpemi, boroboro kon liba kpeŋileŋ le nan be bi ŋaluŋin. 15Le Yisa nan kpaan bi ke, “Ni li nyi man, wee ki li guu ni baa nin Farasii yaab nin ubɔr Herɔd a boroboro a nyɔgim n bu.”
16Le bi nin pag tab ban ke, “Taah kaa ŋmag boroboro n bu le u pag nan.” 17Amaa, le u biɛ baah pag nan, le ki baan bi ke, “Ba ŋa wee ni pag ke naah kaa ŋmag boroboro n naa? Naa le la biɛ nibaa? Ni potiɛl kaa le la ligiraa? 18Ni jɔɔ inunbil, ke ba ŋa wee naa gaa? Ni ji jɔɔ itul, ke ba ŋa wee naa gbiraa? 19Naa tiɛr n-yonn man wee n nan war boroboro kon iŋmu ki tol bininfob turiŋmu n naa? Tikachar ti ŋa wee ni nan lagin tijiir tan nan gurin naa?” Le bi jiin ke, piig nin tilee.
20“Ke n-yonn man wee n nan war boroboro kon ilile-n ki jin bininfob turina-n, tikachar ti ŋaa wee ni nan lagin naa?” Le bi jiin ke tilile.
21Le u nin baan bi, “Ke le naa lee la biɛ nibaa?”
Yisa kaah nan ligir ujɔɔn a num Befisada man
22Le bi nan foo Befisada, le bininfob biba nan ŋmag ujajɔɔn uba ki dan Yisa ban ki nan balin u ke un ta u nɔɔ ki maa wa. 23Le Yisa nan choo u nɔɔ ki ta u nyan kitiŋ nmɔn a gbaam, le ki sii timɔsann ki ŋa ujajɔɔn nin a numin, le ki ta u nɔɔi ki paan u bu, le ki baan u ke, “A gaa?”
24Le uja-n nan goor ki lig, ki ke “Nn, n kan bininfob, amaa bi nann isiig le ki choon.”
25Le Yisa ji ta u nɔɔi ki paan uja nmɔn a numbili bu, iyaayoo le uja nmɔn ni na lig soon ki miin u numbili n ligira, le u nin ga tiwann yɔɔr biɛn nbamɔm. 26Le Yisa kpaan u ke u ji li nyi un jir kitiŋ nmɔn yaan, le ki che u kun u niin.
Piita kaah nan pag Yisa a bɔr man
(Matiu 16:13-20; Lug 9:18-21)
27Yisa nin u bɔɔnɔɔb nan fɔɔr nin yaan ki jon Sizariya Filipi a tinbumin. Baah nan be nsan bu ki la chaa nan le u baan bi ke, “Ni beim ni, bininfob ke n ye ŋmiɛ?”
28Le bi bei u ke, “Biba ke a ye Jɔnn Wan nan Fu Bininfob Uwonbɔr a Nyunfulin le, le biba mu ke a ye Elaja le, le biba mu ji ke a ye Uwonbɔr a linlemin a ni uba le.”
29Le u baan bi, “Ke nim mu, ni ke n ye ŋmiɛ?” Le Piita bei u ke, “Fin le ye Masiya nmɔn.” 30Le Yisa nan sei bi ikpaan ke bi li nyi bin bei uba tibɔr nmɔn.
Yisa kaah nan pag waah li ji fala ki kpo man
(Matiu 16:21-28; Lug 9:22-27)
31Le Yisa ni nan wɔɔn u bɔɔnɔɔb ke, see Uninfosaal a Big jin fala, le kitiŋ a ninkpeeb, nin kumanug a yudam, nin ban wɔɔnn Uwonbɔr a siimin na li yii u, ki ji ku u, amaa ni ween itaa daal le u li fii nkumin. 32U nan pag ni niɛ nan ki wonn bi biɛn nan a num paam le nbamɔm. Le Piita yin u ki nyan ngbaan, ki tan fuun u bu ki ke u laa ji nyi ki len man ni. 33Le Yisa gbiɛ lig u bɔɔnɔɔbin, ki mu fuun Piita bu ke, “Sintani nan, fɔɔr n ban do. Ŋaa tiɛr Uwonbɔr kaah tiɛr man ni, a tiɛr bininfosaalib kaah tiɛr man le.”
34Le Yisa bei u bɔɔnɔɔb nin bininfob ban biɛn nan nɔɔ win ke, bin fɔɔr ki mal u ni, le ki bei bi ke, “Wan ban un nɔɔ min ke, see ke u yii u ba, wee ki yuur u kum a dapunpunl ki li nɔɔm, 35wan kaa ban un weeh u sayiig n bu ke, u ma na yin lann ki, amaa wan weeh u sayiig min nin tibɔŋann n bu ke, u ma na yin kan limiɛfol nin ibamɔn. 36Ke ni ye uninfo kan dulinya nan a jɔɔm biɛn wee ki sin lann u miɛfol ke, ba a nyɔɔr wee u kan naa? 37Bee uninfo li fir ta baa ki daa limiɛfolaa? 38Wan mu san ifa nin un ta n bɔr nan ki wɔɔn titoonbirdam nin tukangbirdam dulinya nan yaan ke, wee Uninfosaal a Big nan jiirin nin u Baa Uwonbɔr a pɔɔm nin u malakam ke, u mu na li san u ifa nin un ta u ki kpiɛ u ninfobin.
Pašlaik izvēlēts:
Mag 8: KUGL
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Komba New Testament © Bible Society of Ghana, 2014.